1 Samuel 30 - KYERƐW KRONKRON

Dawid tɔ Amalekfo so were

¹ Na Dawid ne ne mmarima no duu Siklag da a ɛto so abiɛsa no, na Amalekfo abetua atifi fam ne Siklag, na wɔabɔ Siklag, na wɔde gya ahyew.

² Na wɔafa mmea a wɔwɔ mu no nnommum, fi mmofra so kosi mpanyin so, wɔankum obiara, na wɔsoaa wɔn sii kwan so kɔe.

³ Na Dawid ne ne mmarima no duu kurow no mu no, na hwɛ, wɔde gya ahyew, na wɔn yerenom ne wɔn mmammarima ne wɔn mmabea no, wɔafa wɔn nnommum kɔ.

⁴ Ɛnna Dawid ne dɔm a wɔka ne ho no momaa wɔn nne so sui ara kosii sɛ wonnya ahoɔden nsu bio.

⁵ Na Dawid yerenom baanu no, Yesreelni Ahinoam ne Karmelni Abigail, Nabal yere no, nso, wɔafa wɔn nnommum bi.

⁶ Na Dawid ho kyeree no papaapa, efisɛ ɛdɔm no kae sɛ wobesiw no abo, na dɔm no nyinaa kra botowee, wɔn mmammarima ne wɔn mmabea nti; nanso Dawid hyɛɛ ne ho den AWURADE ne Nyankopɔn mu.

⁷ Na Dawid ka kyerɛɛ ɔsɔfo Ahimelek ba Abiatar sɛ: Fa asɔfotade no brɛ me. Na Abiatar de asɔfotade no brɛɛ Dawid.

⁸ Na Dawid bisaa AWURADE sɛ: Mintiw dɔm yi anaa? So mɛto wɔn? Na ɔka kyerɛɛ no sɛ: Tiw wɔn, na wobɛto wɔn, na ogye nso wubegye.

⁹ Ɛnna Dawid siim kɔe, ɔno ne mmarima ahansia a wɔka ne ho no. Na woduu Besor subon ho no, wɔn a wɔkaa akyiri no soo hɔ.

¹⁰ Na Dawid ne mmarima ahanan tiw wɔn, na ahanu a wɔabrɛ a wɔantumi antwa Besor subon no soo hɔ.

¹¹ Na wohuu Misraimni bi wuram hɔ, na wɔde no brɛɛ Dawid; na wɔmaa no abodoo dii, na wɔmaa no nsu nomee,

¹² na wɔmaa no borɔdɔma tɔw sin ne bobe aba atɔw abien; na odii no, n’ani so baee no, efisɛ nnansa, awia ne anadwo, na onnidii na ɔnnomee.

¹³ Na Dawid ka kyerɛɛ no sɛ: Hena ba ne wo, na ɛhe na wufi? Na ose: Meyɛ Misraimni ba, Amalekni bi akoa, na me wura gyaw me, efisɛ ɔyare bɔɔ me nnɛ nnansa.

¹⁴ Yekotuaa Keretifo nifa ne nea ɛyɛ Yuda dea no ne Kaleb nifa, na yɛde gya hyew Siklag.

¹⁵ Na Dawid ka kyerɛɛ no sɛ: So wode me besian akɔ dɔm no nkyɛn? Na ose: Ka me Onyankopɔn sɛ worenkum me, nso woremfa me nhyɛ me wura nsa, na mede wo mesian makɔ dɔm no nkyɛn.

¹⁶ Na ɔde no sian kɔe; na hwɛ, asade bebree a wɔakɔfa Filistifo asase so ne Yuda asase so no nti, wɔboaboa fam hɔ nyinaa redidi na wɔrenom na wɔresaw.

¹⁷ Na Dawid kunkum wɔn fi ahemadakye kosii da a edi so no anwummere; na wɔn mu biara amfi mu gye mmerante ahanan a wɔtenatenaa yoma so guanee.

¹⁸ Na Dawid gyee nea Amalekfo fae no nyinaa; ne yerenom baanu no nso, Dawid gyee wɔn;

¹⁹ na anka wɔn biribiara, ketewa oo, kɛse oo, mmammarima oo, mmabea oo, asade a wɔbɛfae no mu biara oo, Dawid de ne nyinaa san bae.

²⁰ Na Dawid faa nguan ne anantwi no nyinaa, na wɔde mmoa no dii n’anim bae, na wɔkae sɛ: Eyi de, Dawid asade ni.

²¹ Na Dawid duu mmarima ahanu a wɔabrɛ a wɔantumi anni Dawid akyi a wogyaw wɔn tenaa Besor subon ho no nkyɛn. Na wofii adi behyiaa Dawid ne dɔm a wɔne no nam no, na Dawid bɛn dɔm no kyiaa wɔn.

²² Ɛnna mmarima a wɔne Dawid kɔe no mu nnipa bɔne ne ahuhufo bi buae sɛ: Sɛ wɔne yɛn ankɔ nti, wɔremma wɔn asade a yɛakogye no bi, gye wɔn yerenom ne wɔn mma na wɔmfa wɔn nkɔ.

²³ Na Dawid kae sɛ: Anuanom, monnyɛ sa, nea AWURADE de ama yɛn, na wahwɛ yɛn so, na ɔde dɔm a wɔbaa yɛn so no ahyɛ yɛn nsa.

²⁴ Na hena na obetie mo, asɛm yi mu? Na sɛnea ɔkɔ akono kyɛfa te no, saa ara na nea ɔtena nneɛma ho no nso kyɛfa te: Wɔnkyɛ mu pɛ.

²⁵ Na efi da no ara de rekɔ no, ɔde too hɔ yɛɛ ahyɛde ne atemmude maa Israel de besi nnɛ.

²⁶ Na Dawid duu Siklag no, ɔsomae ma wɔde asade no bi kɔmaa Yuda mpanyin a wɔyɛ ne nnamfo kae sɛ: Hwɛ, AWURADE atamfo asade mu akyɛde a wɔde rebrɛ mo ni.

²⁷ Ɔde kɔmaa wɔn a wɔwɔ Betel ne wɔn a wɔwɔ Ramot a ɛwɔ nifa ne wɔn a wɔwɔ Yatir,

²⁸ ne wɔn a wɔwɔ Aroer ne wɔn a wɔwɔ Sifmot ne wɔn a wɔwɔ Estemoa,

²⁹ ne wɔn a wɔwɔ Rakal ne wɔn a wɔwɔ Yerahmeelifo nkurow mu, ne wɔn a wɔwɔ Kenifo nkurow mu,

³⁰ ne wɔn a wɔwɔ Horma ne wɔn a wɔwɔ Borasan ne wɔn a wɔwɔ Atak,

³¹ ne wɔn a wɔwɔ Hebron, ne mmeaemmeae a Dawid ne ne nnipa akyinkyin nyinaa.