1 Samuel 19 - KYERƐW KRONKRON

Saul taa Dawid

¹ Na Saul ka kyerɛɛ ne ba Yonatan ne ne nkoa nyinaa sɛ wonkum Dawid. Nanso Saul ba Yonatan pɛ Dawid asɛm sɛ.

² Na Yonatan kɔka kyerɛɛ Dawid sɛ: M’agya Saul hwehwɛ wo akum wo, na afei, kora wo ho so anɔpa, na tena kokoa bi mu hintaw;

³ na me de, mefi adi makogyina m’agya nkyɛn wuram baabi a wowɔ no, na me ne m’agya aka wo ho asɛm, na mete biribi a, maka makyerɛ wo.

⁴ Na Yonatan kaa Dawid ho asɛmpa kyerɛɛ n’agya Saul, na ɔka kyerɛɛ no sɛ: Mma ɔhene nnyɛ n’akoa Dawid ho bɔne; na ɔnyɛɛ wo bɔne bi ɛ, na ne nneyɛe nso ayɛ wo yiye pii.

⁵ Na ɔde ne kra too ne nsam kokum Filistini no, na AWURADE dii nkonim kɛse maa Israel nyinaa. Wuhui na w’ani gyei; na ɛdɛn nti na worebɛyɛ mogya a edi bem ho bɔne na woakum Dawid kwa?

⁶ Na Saul tiee Yonatan, na Saul kaa ntam sɛ: Sɛ AWURADE te ase yi, wɔrenkum no da!

⁷ Na Yonatan frɛɛ Dawid; na Yonatan kaa nsɛm no nyinaa kyerɛɛ no. Ɛnna Yonatan de Dawid baa Saul nkyɛn, na ɔbɛtenaa n’anim sɛ kan no.

⁸ Na ɔko baa bio, na Dawid fii adi ne Filistifo kɔkoe, na okum wɔn kunkɛse, na woguan fii n’anim.

⁹ Na AWURADE honhommɔne no baa Saul so; na ɔte ne fi, kura peaw, na Dawid de ne nsa rebɔ sanku.

¹⁰ Na Saul hwehwɛɛ sɛ ɔde peaw no bɔ Dawid fam ɔfasu no ho, nanso ɔtwee ne ho fii Saul anim, na ɔtow peaw no wɔɔ ɔfasu no mu; na Dawid guanee, na ofii mu anadwo no.

¹¹ Ɛnna Saul somaa abɔfo kɔɔ Dawid fi sɛ wɔnkɔwɛn no na wonkum no anɔpa. Na Dawid yere Mikal ka kyerɛɛ no sɛ: Sɛ woannye wo kra anadwo yi a, ɔkyena wobekum wo.

¹² Na Mikal de Dawid faa mfɛnsere mu sii fam, na ɔkɔe, na oguan fii mu.

¹³ Na Mikal faa ohoni de too mpa no so, na ɔde abirekyi nwi sumii too atifi, na ɔde ntama kataa so.

¹⁴ Na Saul somaa abɔfo sɛ wɔnkɔfa Dawid no, ɔkae sɛ: Ɔyare.

¹⁵ Ɛnna Saul somaa abɔfo no sɛ wɔnkɔhwɛ Dawid, na ose: Momfa no mfi mpa no so mmrɛ me, na minkum no.

¹⁶ Na abɔfo no duu hɔ no, na hwɛ, ohoni na ɛda mpa no so, na abirekyi nwi sumii da atifi.

¹⁷ Na Saul ka kyerɛɛ Mikal sɛ: Ɛdɛn nti na woadaadaa me sɛɛ, na woagya me tamfo kwan na wafi mu afi yi? Na Mikal ka kyerɛɛ Saul sɛ: Ɔno na ɔka kyerɛɛ me sɛ: Ma menkɔ! Ɛdɛn nti na minkum wo!

¹⁸ Na Dawid guan fii mu, na ɔkɔɔ Samuel nkyɛn Rama kɔkaa nea Saul ayɛ no nyinaa kyerɛɛ no. Na ɔne Samuel kɔe kɔtenaa Naiot.

¹⁹ Na wɔka kyerɛɛ Saul sɛ: Hwɛ, Dawid wɔ Naiot wɔ Rama.

²⁰ Na Saul somaa abɔfo sɛ wɔnkɔfa Dawid; na wohuu adiyifo no sɛ wɔrehyɛ nkɔm na Samuel gyina hɔ rehwɛ wɔn so no, Onyankopɔn honhom baa Saul abɔfo no so, na wɔn nso hyehyɛɛ nkɔm.

²¹ Na wɔbɛka kyerɛɛ Saul no, ɔsomaa abɔfo foforo; na wɔn nso hyehyɛɛ nkɔm saa ara. Na Saul somaa abɔfo bio, ne mprɛnsa so, na wɔn nso hyehyɛɛ nkɔm.

²² Ɛnna ɔno ara kɔɔ Rama, na oduu abura kɛse a ɛwɔ Seku no ho no, obisae sɛ: Ɛhe na Samuel ne Dawid wɔ? Na wose: Hwɛ, wɔwɔ Naiot wɔ Rama.

²³ Na ɔkɔɔ Naiot wɔ Rama hɔ; na Onyankopɔn honhom baa ɔno nso so, na ɔrekɔ no, ɔhyɛɛ nkɔm ara kɔ kosii sɛ oduu Naiot wɔ Rama.

²⁴ Na ɔno nso worɔw ne ntade, na ɔno nso hyɛɛ nkɔm Samuel anim, na ɔde adagyaw daa hɔ da mu no nyinaa ne anadwo mu no nyinaa. Enti na wɔka sɛ: So Saul nso fra adiyifo no mu anaa?