1 Samuel 15 - KYERƐW KRONKRON

Saul asoɔden

¹ Na Samuel ka kyerɛɛ Saul sɛ: Me na AWURADE somaa me sɛ memmɛsra wo ngo minsi wo ne man so hene; na afei tie AWURADE nsɛm:

² Sɛɛ na asafo AWURADE se: Mahu nea Amalek yɛɛ Israel, sɛnea wofi Misraim reba no wobetwaree wɔn ɔkwan mu.

³ Na afei kɔ na kokum Amalek, na monsɛe nea wɔwɔ nyinaa pasaa, na nkyɛe wɔn so, na kum mmarima ne mmea, mmofra ne nkokoaa, anantwi ne nguan, yoma ne mfurum.

⁴ Ɛnna Saul maa ɔman no tee, na ɔkan wɔn wɔ Telaim, mmarima a wɔnam anammɔn mu ɔpehanu ne Yuda mmarima ɔpedu.

⁵ Na Saul duu Amalek kurokɛse no so, na ɔde atɛwfo sisii obon no mu.

⁶ Na Saul ka kyerɛɛ Kenifo no sɛ: Monkɔ, mumfi Amalek mu nsian nkɔ, na mampra wo mamfra wɔn; na wo de, woyɛɛ Israelfo nyinaa adɔe bere a wofi Misraim reba no. Ɛnna Kenifo fii Amalek mu kɔe.

⁷ Na Saul kunkum Amalek fii Hawila de kosii baabi a w’ani kyerɛ Sur a ɛda Misraim apuei fam no.

⁸ Na ɔkyeree Amalek hene Agag animono, na ɔman no nyinaa de, ɔde nkrante sɛee wɔn pasaa.

⁹ Na Saul ne dɔm no kyɛe Agag ne nguan ne anantwi a woye ne wɔn a wɔadodɔ srade ne nguammuruwa ne nea eye no nyinaa so, na wɔampɛ sɛ wɔsɛe wɔn; na ade biara a wommu na enye mma hwee no de, wɔsɛee no pasaa.

¹⁰ Ɛnna AWURADE asɛm baa Samuel nkyɛn sɛ:

¹¹ Manu me ho sɛ misii Saul hene, efisɛ wasan afi m’akyi, na wamma me nsɛm annyina. Na ɛyɛɛ Samuel awerɛhow, na osu frɛɛ AWURADE anadwo no nyinaa.

¹² Na Samuel tuaa ahema sɛ okohyia Saul anɔpa; na wɔka kyerɛɛ Samuel sɛ: Saul aba Karmel, na hwɛ, wasi ne nkaedum, na wadan ne ho atwam asian rekɔ Gilgal.

¹³ Na Samuel duu Saul nkyɛn no, Saul ka kyerɛɛ no sɛ: AWURADE nhyira nka wo. Mama AWURADE asɛm no atim.

¹⁴ Na Samuel kae sɛ: Na ɛdɛn ne nguan su a egu m’asom yi ne anantwi su a mete yi?

¹⁵ Na Saul se: Amalekfo mu na wɔde fi bae, efisɛ ɔman no kyɛe nguan ne anantwi a eye no so, sɛ wɔde rebɛbɔ afɔre ama AWURADE wo Nyankopɔn, na nkae no de, yɛasɛe wɔn pasaa.

¹⁶ Ɛnna Samuel ka kyerɛɛ Saul sɛ: Gyae, ma menka nea AWURADE ka kyerɛɛ me anadwo yi menkyerɛ wo. Na ɔka kyerɛɛ no sɛ: Kasa ɛ!

¹⁷ Na Samuel kae sɛ: Ɛwom sɛ woyɛ wo ara w’ani so ketewa de, nanso wone Israel mmusuakuw ti, AWURADE sraa wo sɛ di Israel so hene;

¹⁸ na AWURADE somaa wo akwankɔ bi sɛ: Kɔ na kɔsɛe Amalekfo nnebɔneyɛfo no pasaa, na wo ne wɔn nko nkosi sɛ wobɛhyew wɔn.

¹⁹ Ɛdɛn nti na woantie AWURADE, na woatow ahyɛ asade so, na woayɛ nea ɛyɛ AWURADE ani so bɔne yi?

²⁰ Ɛnna Saul ka kyerɛɛ Samuel sɛ: Sɛ matie AWURADE, na makɔ ɔkwan a AWURADE somaa me no, na mede Amalek hene Agag maba, na masɛe Amalek pasaa!

²¹ Na ɔman no faa asade no mu nguan ne anantwi, ahyirade no mu adikanne, sɛ wɔde rebɛbɔ AWURADE wo Nyankopɔn afɔre Gilgal.

²² Na Samuel kae sɛ: So AWURADE pɛ ɔhyew afɔre ne okum afɔre sɛ otie a wotie AWURADE anaa? Hwɛ, osetie ye sen afɔre, na asoyɛ kyɛn adwennini srade.

²³ Na atuatew te sɛ woakɔ abisa, na asoɔden te sɛ amumɔyɛ ne ahonisom! Esiane sɛ woapo AWURADE asɛm nti, ɔno nso apa wo afi ahenni no so.

²⁴ Ɛnna Saul ka kyerɛɛ Samuel sɛ: Mayɛ bɔne sɛ mafom AWURADE anom asɛm ne wo nsɛm so, sɛ misuroo ɔman no na mitiee wɔn.

²⁵ Na afei fa me bɔne firi me, na wo ne me nsan na menkɔsɔre AWURADE.

²⁶ Na Samuel ka kyerɛɛ Saul sɛ: Me ne wo rensan nkɔ, efisɛ woapa AWURADE asɛm, na AWURADE nso apa wo sɛ nni Israel so hene.

²⁷ Na Samuel dan ne ho rekɔ no, Saul soo ne batakari ano, na esuanee.

²⁸ Na Samuel ka kyerɛɛ no sɛ: Osuan na AWURADE asuan Israel ahenni afi wo nsam nnɛ, na ɔde ama wo yɔnko a oye sen wo.

²⁹ Nso Israel Tumfo no renni atoro na ɔrennu ne ho, efisɛ ɔnyɛ onipa na wanu ne ho.

³⁰ Ɛnna ose: Mayɛ bɔne de, nanso afei di me ni me man mpanyin ne Israel anim: Wo ne me nsan nkɔ, na menkɔsɔre AWURADE wo Nyankopɔn.

³¹ Ɛnna Samuel san kodii Saul akyi; na Saul kɔsɔree AWURADE.

³² Na Samuel se: Momfa Amalek hene Agag mmrɛ me ha. Na Agag baa ne nkyɛn anigye so. Na Agag se: Ampa, owuyaw atwam kɔ.

³³ Na Samuel se: Sɛ wo nkrante maa mmea dii mmasigyaw no, saa ara nso na wo na bedi basigyaw mmea mu. Na Samuel twitwaa Agag AWURADE anim wɔ Gilgal.

³⁴ Ɛnna Samuel siim kɔɔ Rama. Na Saul nso foro kɔɔ ne fi Gibea-saul.

³⁵ Na Samuel ammɛhwɛ Saul bio kosii ne wuda, na Samuel gyam Saul; na AWURADE nuu ne ho sɛ ɔde Saul dii Israel so hene.