1 Samuel 11 - KYERƐW KRONKRON

Saul di Amonfo so nkunim

¹ Na Amonni Nahas foro ba bɛbɔɔ Yabes-gilead so nsra. Na Yabes mmarima nyinaa ka kyerɛɛ Nahas sɛ: Wo ne yɛn mpam na yɛnsom wo.

² Na Amonni Nahas no ka kyerɛɛ wɔn sɛ: Ansa na me ne mo bɛpam no, gye sɛ mitutu mo aniwa nifa nyinaa na mede mayɛ ahohora mato Israel nyinaa so.

³ Na Yabes mpanyin no ka kyerɛɛ no sɛ: Ma yɛn nnanson, na yɛnsomasoma abɔfo nkɔ Israel ahye nyinaa so, na sɛ obi nni hɔ a obegye yɛn a, yɛafi adi aba wo nkyɛn.

⁴ Ɛnna abɔfo no baa Gibea faako a Saul fi bɛkaa asɛm no ɔman no asom; na ɔman no nyinaa momaa wɔn nne so susui.

⁵ Na hwɛ, Saul di anantwi akyi fi afuw mu reba; na Saul kae sɛ: Dɛn na ɛyɛ ɔman yi na wɔresu yi? Na wɔkaa Yabesfo nsɛm no kyerɛɛ no.

⁶ Na Saul tee nsɛm yi no, AWURADE honhom sii no so, na ne bo fuwii kɛse.

⁷ Na ɔfaa anantwi mpamho twitwaa no asinasin de hyehyɛɛ abɔfo no nsam soma ma wɔkɔɔ Israel asase nyinaa so kɔkae sɛ: Obiara a wamfi adi ammedi Saul ne Samuel akyi no, sɛ wɔbɛyɛ n’anantwi ni. Ɛnna AWURADE ho hu tɔɔ ɔman no so, na wofi bae sɛ onipa biako.

⁸ Na ɔkan wɔn Besek, na Israelfo no ano si ɔpehasa, na Yuda mmarima si ɔpeduasa.

⁹ Na wɔka kyerɛɛ abɔfo a wɔbae no sɛ: Sɛ monkɔka nkyerɛ Yabes-gileadfo no ni: Ɔkyena a owia mu reyɛ den no, mubenya ogye. Na abɔfo no ba bɛka kyerɛɛ Yabesfo no, wɔn ani gyei.

¹⁰ Na Yabesfo no kae sɛ: Ɔkyena yebefi adi aba mo nkyɛn, na moayɛ yɛn sɛ eye mo ani so nyinaa.

¹¹ Na ade kyee no, Saul buu ɔman no mu asafokuw abiɛsa na wɔkɔɔ nsra no mu anɔpa dasu mu, na wokunkum Amonfo koduu awia ketee; na wɔn a ɛkae no bɔ petee a anka wɔn mu baanu po wɔ faako.

¹² Ɛnna ɔman no ka kyerɛɛ Samuel sɛ: Hena na ɔkae sɛ: Saul na ɔrebedi yɛn so hene yi, no? Fa nnipa no bra ma yenkum wɔn.

¹³ Na Saul kae sɛ: Wonnkum obiara nnɛ da yi, efisɛ ɛnnɛ AWURADE ayɛ nkwagyede Israel mu.

¹⁴ Na Samuel ka kyerɛɛ ɔman no sɛ: Mommra mma yɛnkɔ Gilgal, na yɛnkɔyɛ ahenni no foforo wɔ hɔ.

¹⁵ Na ɔman no nyinaa kɔɔ Gilgal, na wokosii Saul hene AWURADE anim wɔ Gilgal; na wɔbobɔɔ asomdwoe afɔre AWURADE anim wɔ hɔ. Na Saul ne Israel mmarima nyinaa ani gyee.