1 Mose 43 - KYERƐW KRONKRON

Wɔne Benyamin kɔ Misraim

¹ Na ɔkɔm no mu yɛɛ den wɔ asase no so.

² Na wowiee aduan a wɔde fi Misraim bae no di no, wɔn agya ka kyerɛɛ wɔn sɛ: Monsan nkɔtɔ aduan kakra mmrɛ yɛn.

³ Na Yuda ka kyerɛɛ no sɛ, ɔbarima no hyɛɛ yɛn ketee sɛ: Sɛ mo nua no nka mo ho a, munnsi m'anim ha.

⁴ Na sɛ worema yɛn nua ne yɛn akɔ a, ɛnne yebesian akɔtɔ aduan abrɛ wo.

⁵ Na sɛ woremma ɔnkɔ a, ɛnne yɛrensian nkɔ hɔ, efisɛ ɔbarima no ka kyerɛɛ yɛn sɛ: Sɛ mo nua no nka mo ho a, munnsi m'anim ha.

⁶ Na Israel se: Ɛdɛn nti na moyɛɛ me bɔne sɛɛ, sɛ moka kyerɛɛ ɔbarima no sɛ mowɔ onua bi?

⁷ Na wose: Obisa na ɔbarima no bisaa yɛn, yɛn ne yɛn abusua ho asɛm sɛ: Mo agya da so te ase anaa? Mowɔ onua bi anaa? Nea obisaa yɛn yi ara na yebuae. So yenim sɛ ɔbɛka akyerɛ yɛn sɛ: Momfa mo nua no mmra anaa?

⁸ Na Yuda ka kyerɛɛ n'agya Israel sɛ: Ma abofra no ne me nkɔ, na yensim nkɔ, na yɛne wo ne yɛn mma atena ase, na yɛanwu.

⁹ Midi ne ho agyinam; me nsam na hwehwɛ no. Sɛ mamfa no mammrɛ wo, mammegyina w'anim a, ɛnne mayɛ wo bɔne daa nyinaa.

¹⁰ Sɛ yɛantwentwɛn yɛn nan ase a, anka sesɛɛ yɛakɔ aba mprenu.

¹¹ Na wɔn agya Israel ka kyerɛɛ wɔn sɛ: Sɛ ɛte saa a, ɛnne monyɛ eyi: Momfa asase yi so nnepa ngu mo ade mu, na momfa ayɛyɛde nkɔma ɔbarima no: akyenkyennuru kakra ne ɛwo kakra, ohuam ne kurobow, nkate ne ɔsonkoran aba.

¹² Na momfa dwetɛ foforo nkura, ne dwetɛ a wɔdan maa mo wɔ mo kotoku ano no, munkura nsan nkɔ; ebia ɛyɛ anifaso.

¹³ Na momfa mo nua no, na munsim nsan nkɔ ɔbarima no nkyɛn.

¹⁴ Na Onyankopɔn Tweaduampɔn mma ɔbarima no nhu mo mmɔbɔ, na onnyaa mo nua no ne Benyamin mma mo. Na me de, me mma fi me nsa a, na wɔafi me nsa!

¹⁵ Na mmarima no faa ayɛyɛde no, na wɔfaa dwetɛ mmɔho kurae ne Benyamin, na wɔsɔre sian kɔɔ Misraim kogyinaa Yosef anim.

¹⁶ Na Yosef huu Benyamin sɛ ɔka wɔn ho no, ɔka kyerɛɛ ne fie panyin sɛ: Fa nnipa yi kɔ fie, na kum mmoa siesie nnuan, na nnipa yi ne me rebedidi awia yi.

¹⁷ Na ɔbarima no yɛe sɛnea Yosef kae no, na ɔbarima no de nnipa no kɔɔ Yosef fi.

¹⁸ Na nnipa no suroe sɛ wɔde wɔn akɔ Yosef fi, na wose: Dwetɛ a ɛsan kekaa yɛn kotoku mu kan no nti na wɔde yɛn aba ha yi, na wabɛtoa yɛn atow ahyɛ yɛn so afa yɛn ne yɛn mfurum ayɛ nkoa.

¹⁹ Na wotwiw bɛn Yosef fie panyin no ne no kasae wɔ ofi no pon ano

²⁰ sɛ Owura, yɛpa wo kyɛw, yesian baa ha kan bɛtɔɔ aduan.

²¹ Na yekoduu asoɛe na yɛsansan yɛn nkotoku ano no, na hwɛ, yɛn nyinaa dwetɛ hyehyɛ yɛn nkotoku mu, yɛn dwetɛ sɛnea wɔkarii no pɛ, na yekurae de asan aba.

²² Yekura dwetɛ foforo aba de rebɛtɔ aduan. Yennim onii ko a ɔde yɛn dwetɛ no hyehyɛɛ yɛn nkotoku no mu.

²³ Na ose: Asomdwoe nka mo, munnsuro. Mo Nyankopɔn ne mo agya Nyankopɔn ama mo, mo nkotoku mu ademmude, mo dwetɛ no kaa me nsa. Na oyii Simeon brɛɛ wɔn.

²⁴ Na ɔbarima no de nnipa no hyɛn Yosef fi, na ɔmaa wɔn nsu hohoroo wɔn anan ho, na ɔmaa wɔn mfurum aduan.

²⁵ Na wosiesiee ayɛyɛde no twɛn ɔba a Yosef bɛba owigyinae no, efisɛ na wɔate sɛ wɔrebedidi hɔ.

²⁶ Na Yosef baa fie no, wɔde ayɛyɛde a wokurae no kɔɔ ɔdan mu kɔmaa no, na wɔkotow fam wɔ n'anim.

²⁷ Na obisaa wɔn sɛ, wɔn ho ye anaa; na ose: Mo agya akwakoraa a mokaa ne ho asɛm no ho ye anaa? Ɔda so te ase anaa?

²⁸ Na wose: W'akoa, yɛn agya no ho ye, na ɔda so te ase. Na wɔbobɔɔ wɔn mu ase kotow no.

²⁹ Na ɔmaa n'ani so huu ne nua Benyamin, ne na ba no, ɔkae sɛ: Mo nua kumaa a mokaa me ne ho asɛm no ni anaa? Na ose: Onyankopɔn nnom wo, me ba.

³⁰ Na Yosef yɛɛ no hare so, efisɛ ne yam hyehye no ma ne nua no, na ɔhwehwɛ baabi akosu, na ɔhyɛn ne pia mu kosui wɔ hɔ.

³¹ Na ɔhohoroo n'anim, na ofii adi, na ɔhyɛɛ ne ho so kae sɛ: Momfa aduan mmesisi hɔ.

³² Na wɔde ne de sii fa, na wɔde wɔn de sisii fa, na wɔde Misraimfo a wɔne wɔn didi no de sisii fa, efisɛ Misraimfo ne Hebrifo ntumi nnidi, na Misraimfo kyi.

³³ Na wɔbɛtenatenaa n'anim, ɔpanyin sɛnea ne panyin te, ne akumaa sɛnea n'akumaa te, na ɛyɛɛ nnipa no nyinaa nwonwa.

³⁴ Na wogyigyee aduan no fii n'anim brɛɛ wɔn, na Benyamin de boroo wɔn nyinaa de so mpɛn anum. Na wɔnonnomee, na wɔne no ani gyei.