1 Mose 40 - KYERƐW KRONKRON

Nneduafo baanu no adaeso

¹ Na nsɛm yi akyi no, Misraim hene nsahyɛfo ne n'abodootofo fom wɔn wura, Misraim hene no.

² Na Farao bo fuw n'asomfo baanu no, nsahyɛfo so panyin ne abodootofo so panyin no.

³ Na ɔde wɔn koguu afiase wɔ ankɔbeafo so panyin no fi, faako a Yosef da hɔ.

⁴ Na ankɔbeafo so panyin no maa Yosef hwɛɛ wɔn so som wɔn; na wɔkyɛɛ afiase hɔ kakra.

⁵ Na Misraim hene nsahyɛfo ne n'abodootofo a wogu afiase hɔ no baanu nyinaa sosoo adae anadwo koro, ɛsono oyi ne ne dae asekyerɛ, na ɛsono oyi nso de.

⁶ Na Yosef kɔɔ wɔn nkyɛn anɔpa kɔhwɛɛ wɔn, na hwɛ, wɔayeyɛ bosobosoo.

⁷ Na obisaa Farao asomfo a wɔne no gu afiase wɔ ne wura fi no sɛ, ɛdɛn nti na nnɛ mo anim ayɛ siamosiamoo sɛɛ?

⁸ Na wɔka kyerɛɛ no sɛ: Yɛasoso adae, nso obiara nni hɔ a ɔbɛkyerɛ yɛn ase. Na Yosef ka kyerɛɛ wɔn sɛ: So nkyerɛase no mfi Nyankopɔn hɔ anaa? Monka nkyerɛ me ɛ!

⁹ Ɛnna nsahyɛfo so panyin no kaa ne dae kyerɛɛ Yosef sɛ: Me dae mu no, na hwɛ, obobe bi si m'anim,

¹⁰ na obobe no abɔ nkorabata abiɛsa, na ayɛ sɛ ɛrefefɛw, na anyin agu nhwiren, na abɔ akasiaw ayɛ aba a abere.

¹¹ Na Farao kuruwa kura me na metetew bobe aba no mikyi miguu Farao kuruwa no mu, na mede kuruwa no mehyɛɛ Farao nsa.

¹² Na Yosef ka kyerɛɛ no sɛ: Ne nkyerɛase ni: Nkorabata abiɛsa no yɛ nnansa;

¹³ na aka nnansa na Farao ayi wo de wo asan akodi wo dibea bio, na wode Farao kuruwa ahyɛ ne nsa sɛ kan a woyɛ ne nsahyɛfo no.

¹⁴ Nanso sɛ ɛyɛ a, kae me, na sɛ esi wo yiye a, yɛ me adɔe, na bɔ me din kyerɛ Farao, na beyi me ɔdan yi mu,

¹⁵ efisɛ owia na wowiaa me Hebrifo asase so, na ɛha nso menyɛɛ hwee a anka ɛsɛ sɛ wɔde me bɛto amoa yi mu.

¹⁶ Na abodootofo so panyin no hui sɛ nkyerɛase no ye no, ɔka kyerɛɛ Yosef sɛ: Me nso, me dae mu no, na hwɛ, aboodoo nkyerɛnkyɛ abiɛsa a esisi so wɔ m'atifi.

¹⁷ Na kyerɛnkyɛ a edi soro no mu, na Farao anom atoduan nyinaa bi wɔ; na nnomaa redi wɔ kyerɛnkyɛ no mu wɔ m'atifi.

¹⁸ Na Yosef buae sɛ: Ne nkyerɛase ni: Nkyerɛnkyɛ abiɛsa no yɛ nnansa;

¹⁹ na aka nnansa na Farao ayi wo afi ha, na wasɛn wo dua ho ma nnomaa adi wo nam afi wo ho.

²⁰ Na da a ɛto so abiɛsa a ɛyɛ Farao awoda no, ɔtow ne nkoa nyinaa pon, na oyii nsahyɛfo so panyin ne abodootofo so panyin no de wɔn baa ne nkoa anim;

²¹ na ɔsan de nsahyɛfo so panyin no sii ne nsahyɛ so bio a ɔde kuruwa hyɛ Farao nsa.

²² Na abodootofo so panyin no de, ɔsɛn no, sɛnea Yosef kyerɛɛ wɔn ase no.

²³ Nanso nsahyɛfo so panyin no ankae Yosef, na ne werɛ fii no.