1 Mose 36 - KYERƐW KRONKRON

Esau asefo

¹ Na eyinom ne Esau a wɔfrɛ no Edom no awo ntoatoaso:

² Esau waree Kanaanfo mmea: Hetini Elon babea Ada ne Hewini Sibeon ba Ana babea Ohlibama,

³ ne Ismael babea Basmat, Nebaiot ne nuabea.

⁴ Na Ada woo Elifas maa Esau, na Basmat woo Reuel.

⁵ Na Oholibama woo Yeus ne Yalam ne Kora. Eyinom ne Esau mma a wɔwoo wɔn maa no wɔ Kanaan asase so.

⁶ Na Esau faa ne yerenom ne ne mmammarima ne ne mmabea ne ne fifo nyinaa ne ne mmoa ne n'anantwi nyinaa ne n'ahonyade a onyae wɔ Kanaan asase so nyinaa, na ofii ne nua Yakob ho kɔɔ asase bi so.

⁷ Efisɛ wɔn ahonyade dɔɔso sen nea wɔde tena faako, na asase a wɔyɛ so ahɔho no, wɔn mmoa dodow nti na wɔnsen so.

⁸ Na Esau a ɔno ara ne Edom no kɔtenaa Seir bepɔw so.

⁹ Na eyinom ne Edomfo agya Esau, a ɔte Seir bepɔw so no awo ntoatoaso:

¹⁰ Esau mmammarima din ni: Esau yere Ada ba Elifas, Esau yere Basmat ba Reuel.

¹¹ Na Elifas mma ne Taman, Omar, Sefo, Gatam ne Kenas.

¹² Na Timna yɛ Esau ba Elifas yefam, no ɔwoo Amalek maa Elifas; eyinom ne Esau yere Ada mma.

¹³ Na eyinom ne Reuel mma: Nahat ne Sera, Sama ne Misa; eyinom ne Esau yere Basmat mma.

¹⁴ Na eyinom ne Esau yere Oholibama, Sibeon ba Ana babea no, mma: ɔwoo Yeus ne Yalam ne Kora maa Esau.

¹⁵ Eyinom ne Esau mma mu atitiriw: Esau abakan Elifas mma: Atitiriw Teman, Omar, Sefo, Kenas,

¹⁶ Kora, Gatam ne Amalek. Eyinom ne Elifas atitiriw wɔ Edom asase so; eyinom ne Ada mma.

¹⁷ Na eyinom ne Esau ba Reuel mma: Atitiriw Nahat, Sera, Sama, ne Misa. Eyinom ne Reuel atitiriw wɔ Edom asase so; eyinom ne Esau yere Basmat mma.

¹⁸ Na eyinom ne Esau yere Oholibama mma: Atitiriw Yeus, Yalam ne Kora. Eyinom ne Esau yere Oholibama, Ana ba, atitiriw no.

¹⁹ Eyinom ne Esau mma, na eyinom ne wɔn atitiriw no; ɔne Edom.

Seir Asefo

²⁰ Eyinom ne Horini Seir mma asase no sofo: Lotan, Sobal, Sibeon, Ana,

²¹ Dison, Eser ne Disan. Eyinom ne Horifo a wɔyɛ Seir mma a wɔte Edom asase so no atitiriw.

²² Na Lotan mma ne Hori ne Heman, na Lotan ne nuabea ne Timna.

²³ Na eyinom ne Sobal mma: Alwan, Manahat, Ebal, Sefo ne Onam.

²⁴ Na eyinom ne Sibeon mma: Aya ne Ana. Oyi ne Ana a na ɔhwɛ n'agya Sibeon mfurum no, a ohuu nsuɔhyew aniwa wɔ sare so no.

²⁵ Na eyinom ne Ana mma: Dison ne Oholibama, Ana babea.

²⁶ Na eyinom ne Dison mma: Hemdan Esban, Itran ne Keran.

²⁷ Eyinom ne Eser mma: Bilhan, Saawan ne Akan.

²⁸ Eyinom ne Disan mma: Us ne Aran.

²⁹ Eyinom ne Horifo atitiriw: Atitiriw Lotan, Sobal, Sibeon, Ana,

³⁰ Dison, Eser, ne Disan. Eyinom ne Horifo atitiriw a wɔyɛɛ wɔn atitiriw wɔ Seir asase so.

Edom Ahene

³¹ Eyinom ne ahene a wodii Edom asase so ansa na obi dii Israel mma so hene.

³² Na Bela, Beor ba, dii Edom hene, na ne kurow din de Dinhaba.

³³ Na Bela wui, na Sera ba Yobab a ofi Bosra bedii n'ade.

³⁴ Na Yobab wui, na Husam a ofi Teman asase so bedii n'ade.

³⁵ Na Husam wui, na Bedad ba Hadad a okum Midian wɔ Moab petee mu no bedii n'ade, na ne kurow din de Awit.

³⁶ Na Hadad wui, na Samla a ofi Masreka bedii n'ade.

³⁷ Na Samla wui, na Saul a ofi Rehobot a ɛda asu no ho no bedii n'ade.

³⁸ Na Saul wui, na Akbor ba Baal-hanan bedii n'ade.

³⁹ Na Akbor ba Baal-hanan wui, na Hadar bedii n'ade. Na ne kurow din de Pau, na ne yere din de Mehetabel, Mesahab babea Matred babea.

⁴⁰ Na eyinom ne Esau atitiriw no din, sɛnea wɔn mmusuakuw, wɔn tenabea ne wɔn din te: Atitiriw Timna, Ahoa, Yetet,

⁴¹ Oholibama, Ela, Pinon,

⁴² Kenas, Teman, Mibsar,

⁴³ Magdiel, ne Iram. Eyinom ne Edom a ɔne Esau, Edomfo agya no atitiriw, sɛnea wɔn tenabea te wɔ asase a wonyae no so.