1 Mose 33 - KYERƐW KRONKRON

Yakob ne Esau nkabom

¹ Na Yakob maa n'ani so hui, na hwɛ, Esau reba, na mmarima ahanan ka ne ho. Na ɔkyɛɛ ne mma mu maa Lea ne Rahel ne mmaawa baanu no.

² Na ɔde mmaawa no ne wɔn mma dii anim, na Lea ne ne mma dii hɔ, na Rahel ne Yosef dii akyiri.

³ Na ɔno ankasa de, ɔsen dii wɔn anim, na ɔbɔɔ ne mu ase kɔɔ fam mpɛn ason de kosii sɛ oduu ne nua no nkyɛn.

⁴ Na Esau tuu mmirika behyiaa no yɛɛ no atuu, na ɔde ne ti too ne kɔn ho, na ofew n'ano, na wosui.

⁵ Na ɔmaa n'ani so huu mmea no ne wɔn mma no, ɔkae sɛ: Henanom ne eyinom a wɔka wo ho yi? Na ose: ɛyɛ mma a Onyankopɔn de adom w'akoa.

⁶ Na mmaawa no twiw bɛnee, wɔn ne wɔn mma, na wɔbobɔɔ wɔn mu ase.

⁷ Na Lea nso ne ne mma twiw bɛnee bobɔɔ wɔn mu ase, na akyiri no Yosef ne Rahel twiw bɛnee bobɔɔ wɔn mu ase.

⁸ Na ɔkae sɛ: Na ɛdɔm a mihyiaa wɔn yi ase ne dɛn? Na ose: Sɛ ɛbɛyɛ na menya me wura anim dom.

⁹ Na Esau kae sɛ: Nea mewɔ dɔɔso, me nua, ma wo de ntena hɔ mma wo.

¹⁰ Na Yakob kaa se: Dabida, mesrɛ wo, sɛ manya w'anim dom a, gye m'ayɛyɛde a ɛwɔ me nsam yi, na w'anim a mahu yi te sɛ obi hu Nyankopɔn anim, efisɛ w'ani asɔ me.

¹¹ Mesrɛ wo, gye nhyira a wɔde abrɛ wo yi, efisɛ Onyankopɔn adom me, na mewɔ ade nyinaa. Na ɔhyɛɛ no, na ogyei.

¹² Na ɔkae sɛ: Ma yensim nkɔ, na minni w'anim.

¹³ Na ɔka kyerɛɛ no sɛ: Me wura nim sɛ mma a wɔyɛ mmerɛw ne nguan ne anantwi a wɔma nufu ka me ho, na sɛ wopia wɔn dodo da koro a, nguankuw no nyinaa bewuwu.

¹⁴ Enti ma me wura ntwam nni n'akoa kan, na me de, mɛnantew brɛoo, sɛnea mmoa a wodi m'anim ne mma no betumi, de akosi sɛ medu me wura nkyɛn wɔ Seir.

¹⁵ Na Esau kae sɛ: Ma minnyaw wo nnipa a wɔka me ho yi bi. Na ose: Na wɔnyɛ dɛn? Ma minnya me wura anim dom.

¹⁶ Ɛnna Esau san da no ara sii kwan so kɔɔ Seir.

¹⁷ Na Yakob siim kɔɔ Sukot, na osii dan wɔ hɔ, na ɔbobɔɔ asese maa ne mmoa; enti wɔfrɛ hɔ Sukot, ase ne: Asese.

¹⁸ Na Yakob fii Mesopotamia no, ɔnam beduu Sekem kurow a ɛwɔ Kanaan asase so no mu dwoodwoo, na osisii ne ntamadan wɔ kurow no anim.

¹⁹ Na ɔtɔɔ asase a osii ne ntamadan wɔ so no wɔ Sekem n'agya Hamor mma nkyɛn, nnwetɛbona ɔha.

²⁰ Na osii afɔremuka wɔ hɔ, na ɔtoo no: El-Elohe-Israel, ase ne: Onyankopɔn, Israel Nyankopɔn.