1 Mose 20 - KYERƐW KRONKRON

Abraham ne Abimelek

¹ Na Abraham tutu fii hɔ kɔɔ nɛgeb, na ɔkɔtenaa Kades ne Sur ntam, na ɔkɔyɛɛ ɔhɔho wɔ Gerar.

² Na Abraham kae ne yere Sara ho sɛ ɔyɛ me nuabea. Na Gerar hene Abimelek soma ma wɔbɛfaa Sara.

³ Na Onyankopɔn baa Abimelek nkyɛn anadwo dae mu, na ɔka kyerɛɛ no sɛ: Hwɛ, ɔbea a woakɔfa no no nti woawu awie, efisɛ ɔyɛ ɔbarima bi yere.

⁴ Nso Abimelek nnya mfaa ne ho nkaa no ɛ. Na ɔkae sɛ: AWURADE, so wubekum ɔman trenee nso?

⁵ So ɛnyɛ ɔno na ɔka kyerɛɛ me sɛ: Me nua ne no? Na ɔbea no nso kae sɛ: Me nua ne no. Me komam fann ne me tirim fitaa na mede meyɛɛ eyi.

⁶ Na Onyankopɔn ka kyerɛɛ no ɔdae mu sɛ: Me nso minim sɛ, wo komam fann na wode yɛɛ eyi, na me nso misoo wo mu, na woanyɛ me bɔne, ɛno nti na mamma woamfa wo ho anka no.

⁷ Na afei dan ɔbarima no yere kɔma no, efisɛ ɔyɛ odiyifo, na wapa kyɛw ama wo, na woanya nkwa; na sɛ woannan no ankɔma no a, ɛnne, hu sɛ owu na wubewu, wo ne nea wowɔ nyinaa.

⁸ Na Abimelek sɔree anɔpatutu frɛɛ ne nkoa nyinaa, na ɔkaa nsɛm yi nyinaa kyerɛɛ wɔn, na nnipa no suroe pii.

⁹ Na Abimelek frɛɛ Abraham ka kyerɛɛ no sɛ: Dɛn na woayɛ yɛn yi, na bɔne bɛn na mayɛ wo, na wode bɔne kɛse yi aba me ne m'ahenni so? Ade a wɔnyɛ na woayɛ me yi.

¹⁰ Na Abimelek ka kyerɛɛ Abraham sɛ: Dɛn na wuhui na wudii saa asɛm yi?

¹¹ Na Abraham kae sɛ: Efisɛ misusuwii sɛ, ampa Onyankopɔn ho suro nni ha yi, na me yere nti wobekum me.

¹² Nanso ɛwom ampa sɛ ɔyɛ me nua; m'agya ba ne no, na ɛnyɛ me na ba a; na wayɛ me yere.

¹³ Na Onyankopɔn ma mifii m'agya fi mibekyinii no, misee no sɛ: W'adɔe a wobɛyɛ me ne sɛ, baabiara a yebedu no, ka me ho sɛ ɔyɛ me nua.

¹⁴ Ɛnna Abimelek faa nguan ne anantwi, ne nkoa ne mfenaa de maa Abraham, na ɔdan ne yere Sara maa no.

¹⁵ Na Abimelek kae sɛ: Hwɛ, m'asase na ɛda w'anim yi, baabiara a eye wɔ w'ani so no, tena.

¹⁶ Na Sara de, ɔka kyerɛɛ no sɛ: Hwɛ, mama wo nua nnwetɛbona apem, hwɛ, ɛno na wɔn a wɔka wo ho nyinaa de behu wo tirim, na wo ho afi nnipa nyinaa anim.

¹⁷ Na Abraham bɔɔ Onyankopɔn mpae, na Onyankopɔn saa Abimelek ne ne yere ne ne mfenaa yare ma wɔwowoe.

¹⁸ Esiane Abraham yere Sara ho asɛm no nti, na AWURADE ato Abimelek fifo mmea nyinaa yafunu mu.