1 Mose 18 - KYERƐW KRONKRON

Isak awo ho Bɔhyɛ

¹ Na AWURADE yii ne ho kyerɛɛ no wɔ Mamre pɔw mu, na ɔte ne ntamadan pon ano awia ketee.

² Na ɔmaa n'ani so hwɛe, na hwɛ, mmarima baasa abegyina ne ntentenso. Na ohuu wɔn no, ofii ne ntamadan pon ano tuu mmirika kohyiaa wɔn, na ɔbɔɔ ne mu ase,

³ kae sɛ: me wura, sɛ manya w'anim anuonyam a, mesrɛ wo, ntwa w'akoa ho nkɔ.

⁴ Ma wɔnkɔsaw nsu kakra bi mmra ɛ, na monhohoro mo anan ase, na monhome dua yi ase.

⁵ Na mekɔ makɔfa abodoo kakra maba, na mode adwudwo mo koma, na ɛno akyi no moakɔ, na enti na mobɛfaa mo akoa nkyɛn yi. Na wose: Yɛ sɛnea woaka yi.

⁶ Na Abraham yɛɛ ntɛm kɔɔ Sara nkyɛn ntamadan mu kae sɛ: Yɛ ntɛm, fa asikresam pa susukora abiɛsa, fɔtɔw to tetare.

⁷ Na Abraham tuu mmirika kɔɔ anantwi mu kɔkyeree nantwi ba a oye, na ne nam bɛyɛ mmerɛw na ɔde maa ne somfo bi, na ɔyɛɛ ntɛm yɛɛ aduan no.

⁸ Na ɔfaa nufusu ani srade ne nufusu ne nantwi ba a osiesiee no no, na ɔde besii wɔn anim; na ɔno de, ogyinaa wɔn anim dua no ase, na wodidii.

⁹ Na wobisaa no sɛ: Wo yere Sara wɔ he? Na ose: Hwɛ, ɔwɔ ntamadan mu.

¹⁰ Na wɔn mu biako kae sɛ: Ampa ara, mɛsan maba wo nkyɛn afedan sesɛɛ, na hwɛ, wo yere Sara anya ɔba. Na Sara tee wɔ ntamadan pon a ɛwɔ n'akyi no ano.

¹¹ Na Abraham ne Sara nyinaa anyin, na wɔadi mfirihyia pii, na nea ɛyɛ mmea no to atwa wɔ Sara ho.

¹² Enti Sara serewee ne mu kae sɛ: Sɛ manya mawie aberewa bɔ na me wura nso abɔ akwakoraa yi, na menya anigye?

¹³ Na AWURADE bisaa Abraham sɛ: Dɛn nti na Sara serewee sɛ: So ampa ne ampa na manyin yi mɛwo ba?

¹⁴ So biribi yɛ AWURADE yɛna? Bere a mahyɛ no, mɛsan maba wo nkyɛn afedan sesɛɛ, na Sara anya ɔba.

¹⁵ Na Sara sanee sɛ: Menserewee ɛ, efisɛ osuro. Na ose: Daabi, na woaserew.

Abraham di ma Sodomfo

¹⁶ Na mmarima no sɔre fii hɔ dan wɔn ani kyerɛɛ Sodom, na Abraham ne wɔn kɔe kogyaa wɔn kwan.

¹⁷ Na AWURADE kae sɛ: So memfa nea merebɛyɛ yi minsie Abraham anaa?

¹⁸ Efisɛ ampa ara, Abraham bɛyɛ ɔman a ɛso na ɛwɔ tumi, na ne mu na wobehyira wiase aman nyinaa.

¹⁹ Na mahu no mayi no sɛ ɔnhyɛ ne mma ne ne fifo a ebedi n'akyi sɛ wonni AWURADE kwan so nyɛ adetrenee, mmu atɛntrenee, na AWURADE ama nea waka Abraham ho no aba no so.

²⁰ Na AWURADE kae sɛ: Sodom ne Gomora nteɛm so, na wɔn nnebɔne yɛ duru dodo nti,

²¹ meresian makɔhwɛ sɛ wɔayɛ sɛnea nteɛm a edu me nkyɛn no te anaa; na sɛ ɛnte saa a, mahu.

²² Na mmarima no dan wɔn ani fii hɔ kɔɔ Sodom, na Abraham de, na ɔda so gyina AWURADE anim ara.

²³ Na Abraham twiw bɛn kae sɛ: So wobɛpra ɔtreneeni ne ɔbɔnefo abom agu anaa?

²⁴ Ebia sesɛɛ atreneefo aduonum wɔ kurow no mu, so wobɛpra wɔn agu, na atreneefo aduonum a ɛwɔ mu no nti woremfa mfiri kurow no anaa?

²⁵ Eyi mpare wo sɛ wubedi saa asɛm yi, sɛ wubekum ɔtreneeni ne ɔbɔnefo afra, na ɔtreneeni ayɛ sɛ ɔbɔnefo; eyi mpare wo. Nea obu asase nyinaa atɛn no remmu atɛntrenee anaa?

²⁶ Na AWURADE kae sɛ Sɛ mihu atreneefo aduonum Sodom kurow mu a, wɔn nti mede mefiri kurow no nyinaa.

²⁷ Na Abraham buae sɛ: Hwɛ, meyɛ mfutuma ne nso de, nanso masi me bo sɛ me ne AWURADE bɛkasa:

²⁸ Se ebia atreneefo aduonum no so tew anum a, so anum no nti wobɛsɛe kurow no nyinaa? Na ose: Sɛ mihu aduanan anum wɔ hɔ a, merensɛe hɔ.

²⁹ Na Abraham toaa so kasa kyerɛɛ AWURADE bio sɛ: Ebia wobehu aduanan wɔ hɔ. Na AWURADE buae se: Aduanan no nti merenyɛ.

³⁰ Ɛnna ɔkae sɛ: Mma AWURADE bo mmfuw, na ma menkasa: Ebia wobehu aduasa wɔ hɔ. Na ose: Sɛ mihu aduasa wɔ hɔ a, merenyɛ.

³¹ Na ɔkae sɛ: Hwɛ, masi me bo sɛ me ne AWURADE bɛkasa. Ebia wobehu aduonu wɔ hɔ. Na ose: Aduonu no nti merensɛe hɔ.

³² Na ɔkae sɛ: Mma Awurade bo mmfuw, na menkasa prɛko pɛ yi: Ebia wobehu edu wɔ hɔ. Na ose: Edu no nti merensɛe hɔ.

³³ Na AWURADE ne Abraham wiee ɔkasa no, ɔkɔe, na Abraham san baa ne fi.