1 Mose 17 - KYERƐW KRONKRON

Apam no ho nsenkyerɛnne

¹ Na Abram dii mfirihyia aduakron akron no, AWURADE yii ne ho adi kyerɛɛ no sɛ: Mene Nyankopɔn, Tweaduampɔn, nantew m'anim, na yɛ pɛ.

² Na mɛma m'apam ada me ne wo ntam, na mama woadɔ kɛse ara.

³ Na Abram daa hɔ de n'anim butuw fam; na Onyankopɔn ne no kasae sɛ

⁴ Me de, hwɛ, m'apam da hɔ ma wo, na mɛyɛ wo aman pii agya.

⁵ Na wɔremfrɛ wo din Abram, a ase ne: Agya a wɔama no so bio, na mmom wɔbɛfrɛ wo Abraham ase ne: Nnipakuw agya, efisɛ mayɛ wo aman pii agya.

⁶ Na mɛma woadɔ pii pa, na mɛyɛ wo aman, na ahene afi wo mu.

⁷ Na mɛma me ne wo ne w'asefo a ebedi w'akyi no apam agyina wɔ wɔn awo ntoatoaso mu, na ayɛ daa apam, na mayɛ wo ne w'asefo a ebedi w'akyi no Nyankopɔn.

⁸ Na mede asase a woyɛ so hɔho yi, Kanaan asase nyinaa, mɛma wo ne w'asefo a ebedi w'akyi, sɛ daa awunnyade, na mayɛ wɔn Nyankopɔn.

⁹ Na Onyankopɔn ka kyerɛɛ Abram sɛ: Wo de, di m'apam so, wo ne w'asefo a ebedi w'akyi awo ntoatoaso mu.

¹⁰ Eyi ne me ne w'asefo a ebedi w'akyi no ntam apam a munni so: Wontwitwa mo mu mmarima nyinaa twetia.

¹¹ Na muntwa mo ho twetia, na ayɛ me ne mo ntam apam no ho sɛnkyerɛnne.

¹² Na ɔbabarima biara a wadi nna awotwe no, muntwa no twetia mo awo ntoatoaso mu, nea wɔawo no ofie ne nea wɔde sika tɔɔ no wɔ ɔhɔho biara a ɔnyɛ w'aseni nkyɛn.

¹³ Otwa na twa nea wɔawo no wɔ wo fi ne nea wɔde wo sika tɔɔ no twetia, na m'apam atena mo honam mu sɛ daa apam.

¹⁴ Na ɔbarima momonoto biara a wontwaa no twetia no, saa onipa no wobetwa no afi ne man mu, wato m'apam.

¹⁵ Na Onyankopɔn ka kyerɛɛ Abraham sɛ: Wo yere Sarai de, mfrɛ no Sarai bio, na mmom Sara, ase ne: Ɔhene babea.

¹⁶ Na mehyira no, na mama wo ne mu ba nso. Yiw, mehyira no, na ɔbɛyɛ ɔmankɛse. Aman ahemfo befi ne mu.

¹⁷ Na Abraham de n'anim butuw fam serewee, na ɔkae ne komam sɛ: So wɔbɛwo ɔba ama nea wadi mfirihyia ɔha, na Sara a wadi mfe aduakron no bɛwo anaa?

¹⁸ Na Abraham ka kyerɛɛ Onyankopɔn sɛ: O, enne anka ma Ismael nya w'anim adom ɛ!

¹⁹ Na Onyankopɔn kae sɛ: Ampa ne ampa, wo yere Sara bɛwo ba ama wo, na woato ne din Isak ase ne: Ɔserew. Na mɛma me ne no apam agyina ayɛ daa apam ama n'asefo a ebedi n'akyi no.

²⁰ Na Ismael ho de, matie wo. Hwɛ, mehyira no, na mama wawo, na wadɔɔso pii pa ara. Atitiriw dumien na ɔbɛwo, na mayɛ no ɔman kɛse.

²¹ Na m'apam de, me ne Isak a Sara bɛwo no ama wo afedan sesɛɛ no na ɛbɛpam ama agyina.

²² Na ɔne no wiee kasa no, Onyankopɔn fii Abraham nkyɛn kɔɔ ɔsoro.

²³ Na Abraham faa ne ba Ismael ne wɔn a wɔawo wɔn wɔ ne fi nyinaa ne wɔn a wɔde ne sika tɔɔ wɔn nyinaa, Abraham fifo mu mmarima nyinaa, na otwaa wɔn twetia da no ara, sɛnea Onyankopɔn ka kyerɛɛ no no.

²⁴ Na Abraham adi mfirihyia aduakron akron na wotwaa no twetia,

²⁵ na ne ba Ismael adi mfe dumiɛnsa na wotwaa no twetia.

²⁶ Da no ara na wotwitwaa Abraham ne ne ba Ismael twetia.

²⁷ Na ne fifo nyinaa, wɔn a wɔwoo wɔn wɔ ne fi ne wɔn a wɔde sika totɔɔ wɔn wɔ ahɔho nkyɛn, wotwitwaa wɔn twetia kaa ne ho.