1 Mose 11 - KYERƐW KRONKRON

Babel Abantenten

¹ Na asase nyinaa sofo yɛ anokoro kasa ɔkasa koro.

² Na ɛbae sɛ wotuu kwan faa apuei no, wohuu asasetaw bi wɔ Sinear asase so, na wɔtenaa hɔ.

³ Na wosisee wɔn ho wɔn ho sɛ: Wiɛ, momma yɛnyɛ ntayaa, na yɛnto! Na ntayaa no yɛɛ wɔn abo, na ama yɛɛ wɔn dɔte.

⁴ Ɛnna wɔkae sɛ: Wiɛ, momma yɛnkyekye kurow, na yɛnto abantenten a n'atifi bedu soro, na yɛmfa nnye din, na yɛanhwete asase nyinaa ani.

⁵ Na AWURADE sane bɛhwɛɛ kurow ne abantenten a nnipa mma reto no.

⁶ Na AWURADE kae sɛ: Hwɛ, wɔyɛ ɔman biako, na wɔn nyinaa kasa ɔkasa koro na nea wɔafi ase reyɛ ni; na afei, biribiara rentumi nsiw wɔn nea wosusuw sɛ wɔbɛyɛ no biara ho kwan.

⁷ Wiɛ, momma yensian nkɔ hɔ na yɛnkɔyɛ wɔn kasa basabasa, na wɔn mu biara ante ne yɔnko kasa bio.

⁸ Na efi hɔnom na AWURADE bɔɔ wɔn hwetee asase nyinaa ani, na wogyaee kurow no kyekye.

⁹ Enti na wɔfrɛ hɔ Babel ase ne: Basabasa, efisɛ ɛhɔ na AWURADE yɛɛ asase nyinaa kasa basabasa, na efi hɔ na AWURADE bɔɔ wɔn hwetee asase nyinaa ani.

Sem awo ntoatoaso

¹⁰ Eyinom ne Sem awo ntoatoaso: Sem dii mfirihyia ɔha na ɔwoo Arfaksad, nsuyiri no akyi mfe abien.

¹¹ Na Sem woo Arfaksad no akyi no, odii mfe ahannum, na ɔwoo mmammarima ne mmabea.

¹² Na Arfaksad dii mfirihyia aduasa anum na ɔwoo Sela.

¹³ Na Arfaksad woo Sela no akyi no, odii mfe ahanan ne abiɛsa, na ɔwoo mmammarima ne mmabea.

¹⁴ Na Sela dii mfirihyia aduasa na ɔwoo Eber.

¹⁵ Na Sela woo Eber no akyi no, odii mfe ahanan ne abiɛsa, na ɔwoo mmammarima ne mmabea.

¹⁶ Na Eber dii mfirihyia aduasa anan na ɔwoo Peleg.

¹⁷ Na Eber woo Peleg no akyi no, odii mfe ahanan aduasa, na ɔwoo mmammarima ne mmabea.

¹⁸ Na Peleg dii mfirihyia aduasa na ɔwoo Reu.

¹⁹ Na Peleg woo Reu no akyi no, odii mfe ahanu ne akron, na ɔwoo mmammarima ne mmabea.

²⁰ Na Reu dii mfirihyia aduasa abien na ɔwoo Serug.

²¹ Na Reu woo Serug no akyi no, odii mfe ahanu ne asɔn, na ɔwoo mmammarima ne mmabea.

²² Na Serug dii mfirihyia aduasa na ɔwoo Nahor.

²³ Na Serug woo Nahor no akyi no, odii mfe ahanu, na ɔwoo mmammarima ne mmabea.

²⁴ Na Nahor dii mfirihyia aduonu akron na ɔwoo Tera.

²⁵ Na Nahor woo Tera no akyi no, odii mfe ɔha ne dunkron, na ɔwoo mmammarima ne mmabea.

²⁶ Na Tera dii mfirihyia aduɔsɔn, na ɔwoo Abram, Nahor ne Haran.

Abram agya Tera awo ntoatoaso

²⁷ Na eyinom ne Tera awo ntoatoaso: Tera woo Abram ne Nahor ne Haran, na Haran woo Lot.

²⁸ Na Haran wui n'agya Tera anim, asase a wɔwoo no wɔ so no so, ɛne Ur a ɛwɔ Kaldea.

²⁹ Na Abram ne Nahor waree yerenom, Abram yere din de Sarai, na Nahor yere din de Milka a ɔyɛ Haran babea. Na Haran yɛ Milka ne Iska agya.

³⁰ Na Sarai yɛ obonin, onni ba.

³¹ Na Tera faa ne ba Abram ne ne nena Lot, Haran ba ne n'ase Sarai, ne ba Abram yere, na ɔne wɔn fii Ur a ɛwɔ Kaldea sɛ wɔrekɔ Kanaan asase so. Na woduu Haran no, wɔtenaa hɔ.

³² Na Tera nna si mfe ahanu ne anum, na Tera wui wɔ Haran.