1 Korintofo 16 - KYERƐW KRONKRON

Tow a woyi kɔma Yerusalem asafo no mu ahiafo

¹ Na ɛfa tow a wɔde kɔma ahotefo no ho de, sɛnea mehyehyɛe Galatia asafo mu no, mo nso monyɛ saa ara.

² Daa nnawɔtwe mu da a edi kan no, mo mu biara mfa nea ebesi no yiye ama wanya no nsie, na mamma ansa na wɔayi tow no.

³ Na menya meba a, mɛma wɔn a mode nhoma bɛkyerɛ sɛ wɔsɛ no, de mo ayɛyɛde no akɔ Yerusalem.

⁴ Na sɛ ɛsɛ sɛ me nso mekɔ bi a, wɔne me akɔ.

Paulo akwantu nhyehyɛe

⁵ Na metwa mu Makedonia a, mɛba mo nkyɛn; efisɛ Makedonia na merekɔfa.

⁶ Na ebia mɛtena mo nkyɛn, anaasɛ medi awɔw bere nso mo nkyɛn, na baabiara a mɛkɔ no, moagya me kwan.

⁷ Na mempɛ sɛ meretwam nko ara na mehu mo, na m’ani da so sɛ Awurade ma ho kwan a, medi mo nkyɛn nna kakra.

⁸ Na mɛtena Efeso akosi Pentekoste;

⁹ efisɛ wɔabue ɔpon kɛse a emu adwumayɛ bɛsow aba ama me, na wɔn a wɔasɔre atia dɔɔso.

Timoteo

¹⁰ Na sɛ Timoteo ba a, monhwɛ na wamfa ehu ne mo antena; na ɔyɛ Awurade adwuma no bi sɛ me nso.

¹¹ Ɛno nti obiara mmmu no animtiaa, na munnya no kwan asomdwoe mu, na ɔmmra me nkyɛn; na meretwɛn no ne anuanom no.

¹² Na onua Apolo de, matu no fo pii sɛ ɔne anuanom no mmra mo nkyɛn; nso ɔmpɛ koraa sɛ ɔba mprempren, na mmom onya ho adagyew a, ɔbɛba.

¹³ Monwɛn, munnyina gyidi mu, monyɛ mmarima, momma mo ho nyɛ den.

¹⁴ Monyɛ mo ade nyinaa ɔdɔ mu.

¹⁵ Na mitu mo fo, anuanom, munim Stefana fifo sɛ wɔne Akaia aba a edi kan, na wɔde wɔn ho ama ahotefo som no,

¹⁶ sɛ mo nso mommrɛ mo ho ase mma wɔn a wɔte saa ne obiara a ɔyɛ adwuma no bi na ɔbrɛ mu no.

¹⁷ Na m’ani gye Stefana ne Fortunato ne Akaiko ba no ho, efisɛ munni me nkyɛn yi, wɔn na wɔabesi ananmu;

¹⁸ na wɔama me honhom ne mo de ahome. Enti monhwɛ wɔn a wɔte saa no yiye!

¹⁹ Asafo a ɛwowɔ Asia no kyiakyia mo. Akwila ne Priska ne asafo a ɛwɔ wɔn fi no kyia mo papaapa, Awurade mu.

²⁰ Anuanom nyinaa kyia mo. Momfa mfewano kronkron nkyiakyia mo ho.

²¹ Me Paulo me nsam nkyia ni.

²² Sɛ obi mpɛ Awurade Yesu Kristo asɛm a, onnue! Maranata: (Yɛn Awurade, bra!)

²³ Awurade Yesu adom ne mo ntena!

²⁴ Me dɔ nka mo nyinaa, Kristo Yesu mu. Amen.