1 Berɛsosɛm 27 - KYERƐW KRONKRON

Asafohene dumien no

¹ Na Israelfo a wɔabu wɔn ano mpanyimfi atitiriw, ne mpem ne ɔha ha so asafohene, ne wɔn ahwɛfo a wɔsom ɔhene, nkyekyem horow no ho nsɛm nyinaa mu, wɔn a wɔba ne wɔn a wofi adi daa ɔsram, afe mu asram nyinaa a nkyekyem biara yɛ nnipa peduonu anan ni:

² Ɔsram a edi kan mu nkyekyem a edi kan no so na Yasobeam, Sabdiel ba, di, na ne nkyekyem no mu nnipa si ɔpeduonu anan.

³ Ofi Peres mma mu na odi dɔm asafohene nyinaa ti, ɔsram a edi kan no mu.

⁴ Na ɔsram a ɛto so abien no nkyekyem so na Ahohini Dodai di, na ne nkyekyem so bapɔmma ne Miklot, na ne nkyekyem no mu nnipa si ɔpeduonu anan.

⁵ Ɔsram a ɛto so abiɛsa no mu dɔm so safohene a ɔto so abiɛsa ne ɔsɔfo Yehoiada ba Benaia, odi ti, na ne nkyekyem no mu nnipa si ɔpeduonu anan.

⁶ Ɔno Benaia ne aduasa no mu dɔmmarima a odi aduasa no so, na ne ba Amisabad fra ne nkyekyem mu.

⁷ Nea ɔto so anan ɔsram a ɛto so anan mu ne Yoab ne nua Asahel, na ne ba Sebadia wɔ n’akyi, na ne nkyekyem no mu nnipa si ɔpeduonu anan.

⁸ Nea ɔto so anum ɔsram a ɛto so anum mu ne ɔsafohene Yisrahini Samhut, na ne nkyekyem mu nnipa si ɔpeduonu anan.

⁹ Nea ɔto so asia ɔsram a ɛto so asia mu ne Tekoani Ikes ba Ira, na ne nkyekyem mu nnipa si ɔpeduonu anan.

¹⁰ Nea ɔto so ason ɔsram a ɛto ason mu ne Pelonni Heles a ofi Efraim mma mu, na ne nkyekyem mu nnipa si ɔpeduonu anan.

¹¹ Nea ɔto so awotwe ɔsram a ɛto so awotwe mu ne Husani Sibekai a ofi Serahfo mu, na ne nkyekyem mu nnipa si ɔpeduonu anan.

¹² Nea ɔto so akron ɔsram a ɛto so akron mu ne Anatotni Abieser a ofi Benyaminfo mu, na ne nkyekyem mu nnipa si ɔpeduonu anan.

¹³ Nea ɔto so du ɔsram a ɛto so du mu ne Netofani Maharai a ofi Serahfo mu, na ne nkyekyem mu nnipa si ɔpeduonu anan.

¹⁴ Nea ɔto so dubiako ɔsram a ɛto so dubiako mu ne Piratonni Benaia a ofi Efraim mma mu, na ne nkyekyem mu nnipa si ɔpeduonu anan.

¹⁵ Nea ɔto so dumien ɔsram a ɛto so dumien mu ne Netofani Heldai a ɔyɛ Otniel aseni, na ne nkyekyem mu nnipa si ɔpeduonu anan.

Mmapɔmma no

¹⁶ Na wɔn a wodi Israel mmusuakuw no so ni: Rubenfo bapɔmma ne Sikri ba Eliesa. Simeonfo mu: Maaka ba Sefatia;

¹⁷ Lewifo mu: Kemuel ba Hasabia; Aaronfo mu: Sadok;

¹⁸ Yuda mu: Elihu a ofi Dawid nuanom mu; Isakar mu: Mikael ba Omri;

¹⁹ Sebulon mu: Obadia ba Yismaia; Naftali mu: Asriel ba Yerimot;

²⁰ Efraim mma mu: Asasia ba Hosea; Manase abusuakuw fa mu: Pedaia ba Yoel;

²¹ Manase abusuakuw fa a ɛwɔ Gilead no mu: Sakaria ba Ido; Benyamin mu: Abner ba Yaasiel;

²² Dan mu: Yeroham ba Asarel. Eyinom ne Israel mmusuakuw so asafohene.

²³ Na Dawid ammu wɔn a wɔadi mfirihyia aduonu ne wɔn a wonnii no ano, efisɛ AWURADE aka sɛ ɔbɛma Israel adɔɔso sɛ ɔsoro nsoromma.

²⁴ Seruia ba Yoab fii ase kanee, na wanwie; na eyi nti abufuw baa Israel so, na dodow no, wɔankyerɛw ɔhene Dawid beresosɛm nhoma no mu.

Dawid nhenkwaa ne ne mpanyin

²⁵ Na ɔhene akorade no so na Adiel ba Asmawet di, na akorade a ɛwɔ asase no so nkurow ne nkurowa ne abantenten mu no so na Usia ba Yonatan di.

²⁶ Na wɔn a wɔyɛ mfuw mu adwuma dɔw asase no so na Kelub ba Esri di.

²⁷ Na bobe nturo so na Ramatni Simei di, na bobe nturo no mu akorasa no so na Sifimni Sabdi di.

²⁸ Na ngo nnua ne ankye a ɛwɔ tataw so no so na Gederni Baal-hanan di. Na ngo akorae no so na Yoas di.

²⁹ Na anantwi a wɔyɛn wɔn Saron no so na Saronni Sitrai di, na abon no mu anantwi so na Adlai ba Safat di.

³⁰ Na yoma so na Ismaelni Obil di, na mfurum so na Meronotni Yehedia di.

³¹ Na nguan so na Hagarni Yasis di. Eyinom nyinaa yɛ ɔhene Dawid nneɛma so ahwɛfo.

³² Na Dawid wɔfa Yonatan ne ɔfotufo, ɔyɛ ɔbarima nhumufo, na ɔyɛ ɔkyerɛwfo nso. Ɔno ne Hakmoni ba Yehiel na wɔtetew ahene mma no.

³³ Na Ahitofel ne ɔhene fotufo, na Arkini Husai ne ɔhene adamfo.

³⁴ Na Ahitofel akyi na Benaia ba Yehoiada ne Abiatar di. Na ɔhene no sahene ne Yoab.