1 Berɛsosɛm 26 - KYERƐW KRONKRON

Aponanohwɛfo

¹ Aponanohwɛfo no mu nkyekyem ni: Korafo no mu: Kore ba Meselemia, ofi Asaf mma mu.

² Na Meselemia wɔ mma: Sakaria ne abakan, Yediael tia abien, Sebadia to so abiɛsa, Yarniel to so anan,

³ Elam to so anum, Yohanan to so asia, Eliehoenai to so asɔn.

⁴ Na Obed-edom wɔ mma: Semaia ne abakan, Yosabad tia abien, Yoah to so abiɛsa, Sakar to so anan, Netanel to so anum.

⁵ Amiel to so asia, Isakar to so asɔn, Peuletai to so awotwe, efisɛ Onyankopɔn hyiraa no.

⁶ Na ne ba Semaia nso, wɔwoo mma maa no, na wodii wɔn agya fi so efisɛ, wɔyɛ mmarima a wotumi.

⁷ Semaia mma ne: Otni ne Refael ne Obed, Elsabad a ne nuanom Elihu ne Semakia yɛ nnipa a wotumi.

⁸ Eyinom nyinaa fi Obed-edom mma mu, wɔne wɔn mma ne wɔn nuanom, mmarima a wotumi a wɔwɔ ɔsom mu ahoɔden, wosi aduosia abien a wɔyɛ Obed-edom de.

⁹ Na Meselemia wɔ mma ne nuanom, nnipa a wotumi dunwɔtwe.

¹⁰ Na Hosa a ofi Merari mma mu no wɔ mma: Simir na odi ti, ɔnyɛ abakan de, nanso n’agya na ɔde no sii ti.

¹¹ Hilkia tia abien, Tebalia to so abiɛsa, Sakaria to so anan; Hosa mma ne ne nuanom nyinaa si dummiɛnsa.

¹² Eyinom ne aponanohwɛfo no nkyekyem, sɛ wɔn atitiriw te; wɔwɔ ɔwɛn adwuma sɛ wɔn nuanom no, na wɔsom AWURADE fi.

¹³ Na wɔbɔɔ ɔpon biara so ntonto, akumaa ne ɔkɛse nyinaa, sɛ wɔn mpanyimfi te.

¹⁴ Na apuei ntonto no fi maa Selemia. Na ne ba Sakaria a ɔyɛ nimdeɛ mu fotufo no nso, wɔbɔɔ ntonto maa no, na ne ntonto no fii benkum fam.

¹⁵ Obed-edom de wɔ nifa fam, na ne mma de ne anoboa dan no.

¹⁶ Supim ne Hosa de wɔ atɔe fam, Saleket pon ho, aforoe tempɔn no so, ɔwɛn wɔ ɔwɛn ntentenso.

¹⁷ Lewifo baasia wɔ apuei, baanan wɔ benkum fam da koro, baanan wɔ nifa fam da koro, na anoboa dan no ho de, baanu baanu.

¹⁸ Parbar de wɔ atɔe fam: Nnipa baanan wɔ ɔtempɔn no ano, na baanu wɔ Parbar ho.

¹⁹ Eyinom ne aponanohwɛfo nkyekyem no, Korafo mma ne Merari mma no mu.

Sannaafo no

²⁰ Na Ahia a ɔyɛ Lewifo no mu bi di Onyankopɔn fi akorade ne akronkronne akorade no so:

²¹ Ladan mma, Gersonni no mma a wɔyɛ Ladan de no, Gersonni Ladan agyanom atitiriw: Yehieli.

²² Yehieli mma, Setam ne ne nua Yoel, dii AWURADE fi akorade no so.

²³ Amramfo, Yisharfo, Hebronfo, Usielfo no mu

²⁴ na Mose ba Gersom ba Sebuel di akorade no so bapɔmma.

²⁵ Na ne nuanom nso: Eliesa de: Ne ba Rehabia, ne ba Yesaia, ne ba Yoram, ne ba Sikri, ne ba Selomit.

²⁶ Ɔno Selomit ne ne nuanom di akronkronne a ɔhene Dawid ne agyanom atitiriw, mpem ne ɔha ha so asafohene ne dɔm asafohene no yɛɛ no kronkron no akorade nyinaa so,

²⁷ akodi mu asade no bi na wɔde mae sɛ wɔmfa nsiesie AWURADE fi no.

²⁸ Na nneɛma a ɔdehufo Samuel ne Kis ba Saul ne Ner ba Abner ne Seruia ba Yoab de mae no nyinaa nso, ɛhyɛ Selomit ne ne nuanom nsa.

Atemmufo no

²⁹ Yisharfo mu na woyii Kenania ne ne mma sɛ wonni Israel so, anihumafo adwuma mu: Wɔyɛ mpanyimfo ne atemmufo.

³⁰ Hebronfo mu nso, Hasabia ne ne nuanom, nnipa a wotumi apem ahanson na ɛhwɛɛ Israel so, Yordan atɔe fam, AWURADE adwuma ne ɔhene som nyinaa fam.

³¹ Hebronfo no mu nso, Yeria na odi ti sɛ Hebronfo no awo ntoatoaso ne mpanyimfi te. Dawid ahenni afe a ɛto so aduanan mu na wɔhwehwɛɛ wɔn mu, na wohuu wɔn mu mmarima a wotumi wɔ Yaser-gilead.

³² Na ɔne ne nuanom, nnipa a wotumi na wɔyɛ mpanyimfi atitiriw mpennu ahanson, na ɔhene Dawid de wɔn sisii Rubenfo ne Gadfo ne Manase abusuakuw fa no so, Onyankopɔn ne ɔhene nsɛm nyinaa fam.