1 Berɛsosɛm 17 - KYERƐW KRONKRON

Dawid pɛ sɛ osi asɔrefi

¹ Na Dawid te ne fi no, ɔka kyerɛɛ odiyifo Natan sɛ: Hwɛ, me de, mete nkyeneduru dan mu, na AWURADE apam adaka no wɔ ntama ase.

² Na Natan ka kyerɛɛ Dawid sɛ: Ade biara a ɛwɔ wo koma mu no yɛ, na Onyankopɔn di w’akyi.

³ Na anadwo no ara, Onyankopɔn asɛm baa Natan nkyɛn sɛ:

⁴ Kɔ na kɔka kyerɛ m’akoa Dawid sɛ: Sɛ AWURADE se ni: Ɛnyɛ wo na wubesi ɔdan ama me na matena mu.

⁵ Na mentenaa ɔdan mu pɛn fi da a mikoyii Israel mebae no de abedu nnɛ da yi, na mmom mifi ntamadan mu mekɔ ntamadan mu, na mifi tenabea mekɔ tenabea.

⁶ Baabiara a me ne Israel nyinaa nennamee no, so maka makyerɛ Israel akannifo no a mehyɛɛ wɔn sɛ wɔnyɛn me man no mu bi sɛ: Ɛdɛn nti na munsi nkyeneduru dan mma me?

⁷ Na afei, ka kyerɛ m’akoa Dawid sɛ: Sɛɛ na asafo AWURADE se: Me de, mefaa wo mifii nguan adidibea nguan no akyi, sɛ bɛyɛ me man Israel so panyin,

⁸ na madi w’akyi baabiara a wokɔe, na matwitwa w’atamfo nyinaa afi w’anim, na mayɛ wo din sɛ asase so nnipa akɛse din.

⁹ Na mesiesie baabi mama me man Israel, na madua wɔn na wɔatena wɔn afa, na wɔanhaw wɔn bio, na amumɔyɛ mma ankɔ so ansɛe wɔn sɛ kan no,

¹⁰ ne nna a mehyɛɛ akannifo no sɛ wonni me man Israel so no; na mɛbrɛ w’atamfo nyinaa ase. Na meka mekyerɛ wo sɛ AWURADE besi ofi ama wo.

Onyankopɔn bɔhyɛ kɛse no

¹¹ Na sɛ wo nna wie du na wokɔ w’agyanom nkyɛn asaman a, mɛma w’aseni so wɔ w’akyi a obefi wo mma mu, na mama n’ahenni atim.

¹² Ɔno na obesi ɔdan ama me, na mɛma n’agua atim akosi daa.

¹³ Me de, mɛyɛ no agya, na ɔno nso ayɛ me ɔba. Na m’adɔe nso merenyi mimfi ne ho, sɛnea miyii nea odi w’anim no ho no.

¹⁴ Na mede no mesi me fi ne m’ahenni mu akosi daa, na n’ahengua betim hɔ akosi daa.

Dawid aseda ne adesrɛ mpaebɔ

¹⁵ Sɛ nsɛm yi nyinaa ne anisoadehu yi nyinaa te no, saa ara na Natan kasa kyerɛɛ Dawid.

¹⁶ Ɛnna ɔhene Dawid ba bɛtenaa AWURADE anim sɛ: Hena ne me, AWURADE Nyankopɔn, na hena ne me fi, na wode me abedu sesɛɛ yi?

¹⁷ Nanso eyi yɛ w’ani so ketewa, Onyankopɔn, na woaka daakye a ɛwɔ akyirikyiri ho asɛm, w’akoa fi ho, na woabu me sɛ onipa a ɔwɔ dibea a ɛkɔ soro, AWURADE Nyankopɔn.

¹⁸ Dɛn na Dawid nka nkyerɛ wo bio, sɛ woahyɛ w’akoa anuonyam? Na wo na wunim w’akoa.

¹⁹ AWURADE, w’akoa nti, ne sɛ ɛwɔ wo koma mu no, na woadi saa asɛnkɛse yi nyinaa, sɛ worema wɔahu asɛnkɛse no nyinaa.

²⁰ AWURADE, obiara nni hɔ a ɔte sɛ wo, na Onyankopɔn biara nni w’akyi sɛnea yɛde yɛn aso ate no nyinaa.

²¹ Na hena na ɔte sɛ wo man Israel, asase so man biako a Onyankopɔn akogye wɔn afa ayɛ ɔman, na wode ade akɛse ne ade a ɛyɛ hu agye din, na woatutu amanaman, wo man a wugyee wɔn Misraim no anim no?

²² Na wode wo man Israel ayɛ wo man afa de rekosi daa, na wo, AWURADE, woayɛ wɔn Onyankopɔn.

²³ Na afei, AWURADE, asɛm a wokae w’akoa ho ne ne fi ho no, ma entim nkosi daa, na yɛ sɛnea woaka no;

²⁴ na entim, na wo din no nso kɛse nkosi daa, na wɔnka sɛ: Asafo AWURADE, Israel Nyankopɔn, ne Nyankopɔn ma Israel. Na ma w’akoa Dawid fi nsi w’anim pintinn.

²⁵ Na wo, me Nyankopɔn, woayi w’akoa asitiw sɛ wubesi ofi ama no, enti na w’akoa nso ahu sɛnea ɔbɔ mpae w’anim yi.

²⁶ Na afei, AWURADE, wo ara ne Nyankopɔn, na woaka w’akoa ho asɛmpa yi,

²⁷ na afei ma ɛnyɛ wo fɛ sɛ wubehyira w’akoa fi, na ensi w’anim daa; na nea wo, AWURADE, wuhyira no no na wɔahyira no.