1 Berɛsosɛm 16 - KYERƐW KRONKRON

Dawid aseda ne ayeyi dwom

¹ Na wɔde Onyankopɔn adaka no baa mu de besii ntamadan a Dawid asi ama no no mu, na wɔbobɔɔ ɔhyew afɔre ne asomdwoe afɔre, Onyankopɔn anim.

² Na Dawid wiee ɔhyew afɔre ne asomdwoe afɔre no bɔ no, ɔde AWURADE din hyiraa ɔman no.

³ Na ɔkyekyɛɛ Israelfo nyinaa, mmarima ne mmea, obiara abodoo sebɔw ne nankum ne bobe aba tetare.

⁴ Na ɔyeyɛɛ Lewifo no mu bi asomfo, AWURADE adaka no anim, sɛ wɔnkamfo AWURADE Israel Nyankopɔn nna no ase nyi no ayɛ.

⁵ Asaf na odi ti, na Sakaria di hɔ, Yeiel ne Semiramot ne Yehiel ne Matitia ne Eliab ne Benaia ne Obed-edom ne Yeiel, wokurakura mmɛnta asanku ne nsankuten, na Asaf de, ɔbɔ nnawuru a egyigye.

⁶ Na Benaia ne Yahasiel, asɔfo no hyɛn ntorobɛnto daa di Onyankopɔn apam adaka no anim.

⁷ Da no ara na Dawid ma wɔfaa Asaf ne ne nuanom so daa AWURADE ase kan.

⁸ O Monna AWURADE ase, mommɔ ne din, momma wonhu ne nneyɛe aman mu.

⁹ Monto no dwom, monto no ayeyi dwom, monka n’anwonwade nyinaa.

¹⁰ Momfa ne din kronkron nhyehye mo ho, wɔn a wɔhwehwɛ AWURADE koma ntɔ wɔn yam.

¹¹ Mompɛ AWURADE ne ne tumi akyi kwan, monhwehwɛ n’anim daa yi.

¹² Monkae n’anwonwade a wayɛ, n’ahodwiriwde ne n’anom atemmusɛm,

¹³ mo, n’akoa Israel asefo, Yakob a ɔfaa no no mma.

¹⁴ Ɔno ne AWURADE yɛn Nyankopɔn, n’atemmude wɔ asase nyinaa so.

¹⁵ Monkae n’apam no nkosi daa, asɛm a ɔhyɛɛ awo ntoatoaso apem no,

¹⁶ sɛ ɔne Abraham pamee no, ne ne ntam a ɔkaa Isak no.

¹⁷ Na ɔde sii hɔ maa Yakob sɛ ahyɛde, ne Israel sɛ daa apam

¹⁸ kae sɛ: Wo na mede Kanaan asase mɛma wo, sɛ mo agyapade a wɔakyɛ no susuhama so.

¹⁹ Bere a mo ano nnɔɔso, na moyɛ nnipa kakraa bi ne ahɔho wɔ mu,

²⁰ na wɔnenam fi ɔman mu kɔ ɔman mu, wofi ahenni bi mu kɔ ɔman foforo bi mu,

²¹ wamma obi anhom wɔn so, na wɔn nti ɔkaa ahene anim:

²² Monnka me nnipa a wɔasra wɔn no, na monnyɛ m’adiyifo bɔne bi.

²³ Monto AWURADE dwom, asase nyinaa, mompae ne nkwagye mfi da nkɔ da mu.

²⁴ Monka n’anuonyam wiase aman mu, ne n’anwonwade aman nyinaa mu.

²⁵ Na AWURADE yɛ ɔkɛse na ɔsɛ ayeyi sɛ, na ne ho yɛ hu anyame nyinaa so.

²⁶ Na amanaman anyame nyinaa yɛ abosonhuhuw, na AWURADE de, ɔno na ɔyɛɛ ɔsoro.

²⁷ Nidi ne anuonyam wɔ n’anim, tumi ne anika wɔ ne tenabea.

²⁸ Aman mmusuakuw, momma AWURADE, momma AWURADE anuonyam ne tumi.

²⁹ Momfa AWURADE din anuonyam no mma no, monsoa ayɛyɛde mmra n’anim. Monsɔre AWURADE ahokeka kronkron mu.

³⁰ Asase nyinaa, mo ho mpopo n’anim. Nso wiase tim hɔ, ɛrenhim.

³¹ Wɔmma ɔsoro ani nnye, na asase ho nsan no; wɔnka amanaman mu sɛ: AWURADE adi hene.

³² Ɛpo ne ne mayɛ bɛworo. Mfuwa ne nea ɛwɔ mu nyinaa bedi ahurusi.

³³ Ɛno na kwae mu nnua bɛto ahosan dwom, AWURADE anim, na ɔreba abebu asase atɛn.

³⁴ Monna AWURADE ase, na oye, na n’adɔe wɔ hɔ daa.

³⁵ Na monka sɛ: Gye yɛn nkwa, yɛn nkwagye Nyankopɔn, na boaboa yɛn ano, na yi yɛn fi amanaman mu, na yɛnna wo din kronkron no ase, na yɛmfa w’ayeyi nhyehye yɛn ho.

³⁶ Nhyira ne AWURADE, Israel Nyankopɔn, fi daa kosi daa. Na ɔman no nyinaa kae sɛ Amen, yii AWURADE ayɛ.

Ɔsom no ho nhyehyɛe

³⁷ Ɛnna ogyaw Asaf ne ne nuanom hɔ AWURADE apam adaka no anim, sɛ wɔnsom adaka no anim daa sɛnea ehia da biara;

³⁸ na Obed-edom ne wɔn nuanom si aduosia awotwe, na Yedutun ba Obed-edom ne Hosa yɛɛ aponanohwɛfo.

³⁹ Na ogyaw ɔsɔfo Sadok ne ne nuanom hɔ AWURADE anim sorɔnsorɔmmea a ɛwɔ Gibea no,

⁴⁰ sɛ wɔmmɔ ɔhyew afɔre, ɔhyew afɔremuka no so mma AWURADE daa yi anɔpa ne anwummere nyɛ sɛ wɔakyerɛw AWURADE mmara a ɔhyɛɛ Israel no mu nyinaa.

⁴¹ Na Heman ne Yedutun ka wɔn ho, ne wɔn a wɔpaw wɔn a wɔbobɔɔ wɔn din no nkae, sɛ wɔnna AWURADE ase, sɛ n’adɔe wɔ hɔ daa;

⁴² na Heman ne Yedutun ka wɔn ho kura ntorobɛnto ne nsammɔ nnawuru a wɔma egyigye, ne nneɛma a wɔde to Onyankopɔn dwom. Na Yedutun mma de, wɔwɔ ɔpon ano.

⁴³ Ɛnna ɔman no nyinaa siim kokɔɔ wɔn afi, na Dawid nso san kɔe kohyiraa ne fi.