1 Berɛsosɛm 14 - KYERƐW KRONKRON

Dawid aban, ne yerenom ne ne mma

¹ Na Tiro hene Hiram somaa abɔfo baa Dawid nkyɛn, wɔde nkyeneduru nnua ne abantofo ne nnuapaefo bae sɛ wommesi ɔdan mma no.

² Na Dawid hui sɛ AWURADE asi no Israel so hene, na ne man Israel nti wama n’ahenni so.

³ Na Dawid warewaree yerenom bio Yerusalem, na Dawid wowoo mmammarima ne mmabea bio.

⁴ Na wɔn a wɔwoo wɔn maa no Yerusalem din ni: Samua ne Sobab, Natan ne Solomon,

⁵ ne Yibhar ne Elisua ne Elpelet,

⁶ ne Noga ne Nefeg ne Yafia,

⁷ ne Elisama ne Beeliada ne Elifelet.

Dawid Filistifo so nkonimdi horow

⁸ Na Filistifo tee sɛ wɔasra Dawid de no asi Israel nyinaa so hene no, Filistifo nyinaa foro bae sɛ wɔbɛhwehwɛ Dawid. Na Dawid tee no, ofii adi kohyiaa wɔn.

⁹ Na Filistifo no bae de bɛyeree Refaim bon mu.

¹⁰ Ɛnna Dawid kobisaa Onyankopɔn sɛ: So menkɔ Filistifo no ho na wode wɔn bɛhyɛ me nsa anaa? Na AWURADE ka kyerɛɛ no sɛ: Kɔ, na mede wɔn mɛhyɛ wo nsa.

¹¹ Na wɔforo baa Baal-perasim. Na Dawid kunkum wɔn wɔ hɔ. Na Dawid kae sɛ: Onyankopɔn apae m’atamfo mu me nsam, sɛ nsu mu pae no. Enti wɔfrɛɛ hɔ: Baal-perasim

¹² Na wogyigyaw wɔn anyame wɔ hɔ. Na Dawid kae ma wɔde ogya hyewee.

¹³ Na Filistifo no san foro bae bio de bɛyeree obon no mu.

¹⁴ Na Dawid bisaa Onyankopɔn bio, na Onyankopɔn ka kyerɛɛ no sɛ: Nkɔ nkodi wɔn akyi, dan fi wɔn ho, na fa baka nnua no ntentenso bra wɔn so.

¹⁵ Na sɛ wote ɔnantew nka baka nnua no atifi a, ɛnne fi kɔko, na Onyankopɔn afi redi w’anim akokum Filistifo dɔm no.

¹⁶ Na Dawid yɛe sɛnea Onyankopɔn hyɛɛ no no, na wokunkum Filistifo dɔm no fii Gibeon de kosii Geser.

¹⁷ Na Dawid din hyetaa nsaase no nyinaa so, na AWURADE maa ne ho hu baa amanaman no nyinaa so.