1 Ahene 22 - KYERƐW KRONKRON

Ahab ne Yehosafat ko tia Siriafo

¹ Na wɔtenaa hɔ mfirihyia abiɛsa a ɔko bi nni Siria ne Israel ntam.

² Na afe a ɛto so abiɛsa mu no, Yuda hene Yehosafat sian baa Israel hene nkyɛn.

³ Na Israel hene ka kyerɛɛ ne nkoa sɛ: So munnim sɛ Ramot-gilead wɔ yɛn, na yɛn de, yɛte hɔ komm na yennye mfi Siria hene nsam?

⁴ Na ɔka kyerɛɛ Yehosafat sɛ: Wo ne me bɛkɔ Ramot-gilead sa anaa? Na Yehosafat ka kyerɛɛ Israel hene no sɛ: Mete sɛ wo, me man te sɛ wo man, m’apɔnkɔ te sɛ w’apɔnkɔ.

⁵ Yehosafat ka kyerɛɛ Israel hene sɛ: Bisa AWURADE asɛm nnɛ ɛ!

⁶ Ɛnna Israel hene boaboaa adiyifo no ano, ɛbɛyɛ mmarima ahannan, na ɔka kyerɛɛ wɔn sɛ: Menkɔ Ramot-gilead menkɔko anaasɛ minnyae? Na wose: Foro kɔ, na AWURADE de bɛhyɛ ɔhene nsa.

⁷ Ɛnna Yehosafat kae sɛ: So AWURADE diyifo bi nni ha bio a yebebisa no hɔ ade?

⁸ Na Israel hene ka kyerɛɛ Yehosafat sɛ: Ɔbarima biako bi da so wɔ hɔ a anka yebetumi abisa AWURADE afi ne nkyɛn, nanso metan no, efisɛ ɔnhyɛ me ho nkɔm pa, sɛ bɔne nko, ɛyɛ Imla ba Mikaia. Na Yehosafat se: Mma ɔhene nnka sa.

⁹ Ɛnna Israel hene frɛɛ ogyaaseni bi, na ɔkae sɛ: Ma Imla ba Mikaia nnu ha ntɛm!

¹⁰ Na Israel hene ne Yuda hene Yehosafat tete wɔn nhengua so hyehyɛ wɔn ntade, Samaria pon ano mprae so, na adiyifo no nyinaa hyehyɛɛ nkɔm wɔn anim.

¹¹ Na Kenaana ba Sedekia ayɛ dade mmɛn, na ɔkae sɛ: Sɛ AWURADE se ni: Eyinom na wode besum Siriafo de akosi sɛ wobewie wɔn sɛe.

¹² Na adiyifo no nyinaa hyehyɛɛ nkɔm saa sɛ: Kɔ Ramot-gilead na kodi siade, na AWURADE de ahyɛ ɔhene nsa.

¹³ Na ɔbɔfo a ɔkɔfrɛɛ Mikaia no ka kyerɛɛ no sɛ: Hwɛ, adiyifo no nyinaa de nokoro ka asɛmpa kyerɛ ɔhene, ma wo nsɛm nyɛ sɛ wɔn mu biako de, na ka nea eye!

¹⁴ Na Mikaia kae sɛ: Sɛ AWURADE te ase yi, nea AWURADE bɛka akyerɛ me no, ɛno na mɛka.

Mikaia hyɛ nkogu ho nkɔm

¹⁵ Ɛnna ɔbaa ɔhene nkyɛn. Na ɔhene no ka kyerɛɛ no sɛ: Mikaia, so yɛnkɔ Ramot-gilead nkɔko anaasɛ yennyae? Na obuaa no sɛ: Kɔ na kodi nim, na AWURADE de ahyɛ ɔhene nsa.

¹⁶ Na ɔhene no ka kyerɛɛ no sɛ: Mpɛn ahe ara na menka wo ntam sɛ, nka me asɛm bi sɛ nokware nko AWURADE din mu?

¹⁷ Na ose: Mahu Israel nyinaa sɛ wɔapete mmepɔw so sɛ nguan a wonni hwɛfo, na AWURADE se: Eyinom nni wura, ma wɔnsan nkokɔ wɔn afi asomdwoe mu.

¹⁸ Na Israel hene ka kyerɛɛ Yehosafat sɛ: So manka mankyerɛ wo sɛ ɔrenhyɛ me ho nkɔm pa bi, na mmom bɔne?

¹⁹ Ɛnna ɔkae sɛ: Enti tie AWURADE asɛm: Mahu AWURADE sɛ ɔte n’agua so, na ɔsoro asafo nyinaa gyinagyina ne ho, ne nifa ne ne benkum.

²⁰ Na AWURADE kae sɛ: Hena na ɔbɛdaadaa Ahab na waforo akɔtɔ Ramot-gilead? Na oyi kaa sɛɛ, na oyi kaa sɛɛ.

²¹ Na honhom bi fi begyinaa AWURADE anim kae sɛ: Me na mɛdaadaa no.

²² Na AWURADE ka kyerɛɛ no sɛ: Wode dɛn? Na ose: Mefi makɔyɛ atoro honhom n’adiyifo nyinaa anom. Na ɔkae sɛ: Wobɛdaadaa no na wubetumi nso; fi kɔ na kɔyɛ saa.

²³ Na afei, hwɛ, AWURADE de atoro honhom ahyɛ w’adiyifo yi nyinaa anom, na AWURADE akasa wo ho bɔne.

²⁴ Ɛnna Kenaana ba Sedekia twiw bɛnee bɛbɔɔ Mikaia sotɔre kae sɛ: Ɛhe na AWURADE honhom nam fii me nkyɛn kɔka kyerɛɛ wo yi?

²⁵ Na Mikaia se: Hwɛ, da a wubefi pia mu akɔ pia mu akohintaw no na wubehu.

²⁶ Ɛnna Israel hene kae sɛ: Kyere Mikaia fa no kɔ kurow no so hwɛfo Amon ne ɔhene ba Yoas nkyɛn,

²⁷ na kɔka sɛ: Sɛ ɔhene se ni: Momfa oyi nto nneduadan mu, na momma no ahohia aduan nni ne ahohia nsu nnom nkosi sɛ mɛba no dwoodwoo.

²⁸ Na Mikaia kae sɛ: Sɛ wosan ba dwoodwoo a, ɛnne ɛnyɛ AWURADE na ɔnam me so kasae. Na ose: Mo aman nyinaa, muntie!

Ahab wu

²⁹ Na Israel hene ne Yuda hene Yehosafat foro kɔɔ Ramot-gilead.

³⁰ Na Israel hene ka kyerɛɛ Yehosafat sɛ: Mɛsakra me ho na makɔ dɔm no mu, na wo de, hyɛ wo ntade. Na Israel hene no sakraa ne ho, na ɔkɔɔ dɔm no mu.

³¹ Nso na Siria hene no ahyɛ ne nteaseɛnam a ɔwɔ no so asafohene aduasa abien no sɛ: Mo ne akumaa anaa ɔkɛse nnko, gye Israel hene no nko.

³² Na nteaseɛnam so asafohene no huu Yehosafat no, wɔkae sɛ: Ampa, Israel hene no ni! Na wɔmanee ne no kɔkoe; na Yehosafat teɛɛm.

³³ Na nteaseɛnam so asafohene no hui sɛ ɛnyɛ Israel hene ne no no, wɔsan fii n’akyi.

³⁴ Na ɔbarima bi twee ne ta mu anibiannaso so, na ɔde saa Israel hene no mmɔtoam ne nkatabo no ntam. Na ɔka kyerɛɛ ne teaseɛnamkafo no sɛ: Dan wo nsa fa me fi dɔm yi mu, na mapira.

³⁵ Na ɔko no mu yɛɛ den da no. Na wokura ɔhene no mu ma ogyina teaseɛnam no mu Siriafo no anim ara, na owui anwummere; na apirakuru no mu mogya sen guu teaseɛnam no mu.

³⁶ Na wɔpae faa nsra no mu owiatɔ bere sɛ: Nnipa nyinaa nkokɔ wɔn kurom ne wɔn asase so.

³⁷ Na ɔhene no wui, na wɔde no baa Samaria; na wosiee ɔhene no Samaria.

³⁸ Na wɔkɔhohoroo teaseɛnam no mu Samaria ɔtare mu, na akraman bɛtaforoo ne mogya, na mmea nguaman nso guaree hɔ, sɛnea AWURADE aka no.

³⁹ Na Ahab ho nsɛm nkae ne nea ɔyɛe nyinaa ne asonse dan a osii, ne nkurow a ɔkyekyee nyinaa, so wɔankyerɛw Israel ahene beresosɛm nhoma no mu?

⁴⁰ Na Ahab wui, na ne ba Ahasia bedii n’ade.

Yehosafat di Yuda so hene

⁴¹ Na Israel hene Ahab afe a ɛto so anan so na Asa ba Yehosafat bedii Yuda so hene.

⁴² Yehosafat bedii hene no, na wadi mfirihyia aduasa anum, na odii hene mfirihyia aduonu anum Yerusalem. Na ne na din de Asuba, Silhi ba.

⁴³ Na ɔfaa n’agya Asa kwan nyinaa so, wamman amfi ho, na ɔyɛɛ nea ɛteɛ AWURADE ani so; gye sorɔnsorɔmmea no na wɔanyi: Ɔman no kɔɔ so bɔɔ afɔre na wɔhyew aduhuam sorɔnsorɔmmea hɔ.

⁴⁴ Na asomdwoe daa Yehosafat ne Israel hene ntam.

⁴⁵ Na Yehosafat ho nsɛm nkae ne ne mmaninne a ɔyɛe ne sɛnea odii ako no, so wɔankyerɛw Yuda ahene beresosɛm nhoma no mu?

⁴⁶ Na mmarima nguaman nkae a wogyaw wɔn n’agya Asa bere so no, oguu wɔn ase fii asase no so.

⁴⁷ Na ɔhene bi nni Edom; na n’abediakyiri na ɔhwɛ akyi sɛ hene.

⁴⁸ Yehosafat yɛɛ Tarsis ahyɛn sɛ ɛnkɔ Ofir nkɔpɛ sika kɔkɔɔ; nanso ankɔ, efisɛ ahyɛn no bobɔe Esion-geber.

⁴⁹ Ɛno mu na Ahab ba Ahasia ka kyerɛɛ Yehosafat sɛ: Ma me nkoa ne wo nkoa nkɔ ahyɛn no mu. Na Yehosafat ampene.

⁵⁰ Na Yehosafat wui, na wosiee no kaa n’agyanom ho, n’agya Dawid kurow mu; na ne ba Yehoram bedii n’ade.

Ahasia di Israel so hene

⁵¹ Ahab ba Ahasia bedii Israel so hene Samaria, Yuda hene Yehosafat afe a ɛto so dunsɔn so, na odii Israel so mfe abien.

⁵² Na ɔyɛɛ nea ɛyɛ AWURADE ani so bɔne, na ɔfaa n’agya kwan so ne ne na kwan so ne Nebat ba Yeroboam a ɔmaa Israel yɛɛ bɔne no kwan so;

⁵³ na ɔsom Baal na ɔsɔree no, na ohuruu AWURADE, Israel Nyankopɔn, bo sɛnea n’agya yɛe no ara.