1 Ahene 21 - KYERƐW KRONKRON

Nabot bobeturo

¹ Na nsɛm yi akyi no, na Yesreelni Nabot wɔ bobeturo bi Yesreel a ɛwɔ Samaria hene Ahab ahemfi ho.

² Na Ahab ka kyerɛɛ Nabot sɛ: Fa wo bobeturo no ma me, na memfa menyɛ fan turo, efisɛ ɛbɛn me fi ho, na mɛma wo bobeturo a eye sen no mahyɛ ananmu, anaasɛ wopɛ a, mɛma wo ɛso sika.

³ Na Nabot ka kyerɛɛ Ahab sɛ: AWURADE mma eyi mpare me, sɛ mede m’agyanom awunnyade mɛma wo.

⁴ Ɛnna Ahab kɔɔ ne fi, a na wakum n’anim na odi yaw, Yesreelni Nabot asɛm a ɔka kyerɛɛ no no nti, sɛ osee no sɛ: Meremfa m’agyanom awunnyade memma wo. Na ɔdaa ne mpa so dan n’ani, na wannidi.

⁵ Na ne yere Yesebel baa ne nkyɛn bɛka kyerɛɛ no sɛ: Ɛdɛn na wo honhom abotow sɛɛ na wunnidi yi?

⁶ Na ɔka kyerɛɛ no sɛ: Efisɛ me ne Yesreelni Nabot kasae, na misee no sɛ: Fa wo bobeturo no ma me gye sika, anaasɛ nso sɛ wopɛ a, mɛma wo bobeturo mahyɛ ananmu. Na ose: Meremfa me bobeturo no memma wo.

⁷ Ɛnna ne yere Yesebel ka kyerɛɛ no sɛ: Ɛnyɛ wo na wudi Israel so hene? Sɔre didi, na ma wo bo ntɔ wo yam na mede Yesreelni Nabot bobeturo no mɛma wo.

⁸ Ɛnna ɔde Ahab din kyerɛkyerɛw nhoma, na ɔde ne nsɔanode sosɔɔ ano, na ɔsomasomae ma wɔde nhoma no kɔmaa mpanyimfo ne adehye a wɔwɔ ne kurom a wɔne Nabot te no.

⁹ Na ɔkyerɛw nhoma no mu sɛ: Mompae mma wonni mmuada, na momfa Nabot ntena nkurɔfo no ti.

¹⁰ Na momfa mmarima baanu a wɔyɛ mmahuhufo nnyina n’anim, na wonni no adanse sɛ: Woadome Onyankopɔn ne ɔhene! Na momfa no mfi nkosiw no abo mma onwu.

¹¹ Ɛnna ne kurow no mufo, mpanyimfo ne adehye a wɔte ne kurom no yɛe sɛnea Yesebel kraa wɔn no, sɛnea ɔkyerɛw nhoma a wɔde kɔmaa wɔn no mu no:

¹² Ɔpaee sɛ wonni mmuada, na wɔde Nabot tenaa nkurɔfo no ti.

¹³ Na mmarima mmahuhufo baanu bae bɛtenaa n’anim, na mmarima ahuhufo no dii Nabot adanse ɔman no anim sɛ: Nabot adome Onyankopɔn ne ɔhene. Na woyii no fii kurow no akyi kosiw no abo ma owui.

¹⁴ Ɛnna wɔsoma kɔɔ Yesebel nkyɛn sɛ: Wɔasiw Nabot abo, na wawu.

¹⁵ Na Yesebel tee sɛ wɔasiw Nabot abo na wawu no, Ɔka kyerɛɛ Ahab sɛ: Sɔre kɔfa Yesreelni Nabot bobeturo a ɔmpɛ sɛ ɔde ma wo gye sika no di so, efisɛ Nabot nte ase bio, na wawu.

¹⁶ Na Ahab tee sɛ Nabot awu no, Ahab sɔree sɛ ɔresian akɔ Yesreelni Nabot bobeturo no mu akɔfa adi so.

Elia hyɛ asotwe ho nkɔm

¹⁷ Ɛnna AWURADE asɛm baa Tisbini Elia nkyɛn sɛ:

¹⁸ Sɔre sian kohyia Israel hene Ahab a ɔwɔ Samaria no. Hwɛ, ɔwɔ Nabot bobeturo a wasian akɔ hɔ sɛ ɔrekɔfa adi so no mu;

¹⁹ na ka kyerɛ no sɛ: Sɛ AWURADE se ni: Woadi awu, na woafa obi ade adi so? Na ka kyerɛ no sɛ: Sɛ AWURADE se ni: Faako a akraman taforoo Nabot mogya no, ɛhɔ na akraman bɛtaforo wo nso wo mogya.

²⁰ Na Ahab ka kyerɛɛ Elia sɛ: So woahu me, me tamfo? Na ose: Mahu wo, efisɛ woatɔn wo ho ayɛ nea ɛyɛ AWURADE ani so bɔne.

²¹ Mɛpra wo akɔ, na matwa Ahab babarima biara afi Israel mu, akoa anaa ɔdehye.

²² Na mɛyɛ wo fi sɛ Nebat ba Yeroboam fi ne Ahigya ba Baasa fi, ohuru a woahuru me bo na woama Israel ayɛ bɔne ntia.

²³ Na Yesebel nso, AWURADE kaa ne ho asɛm sɛ: Akraman bedi Yesebel nam, Yesreelni fasu ho.

²⁴ Ahabni a obewu kurow mu no, akraman na ebedi ne nam, na nea obewu wuram no, wim nnomaa na ebedi ne nam.

²⁵ Ampa, obiara nni hɔ a ɔte sɛ Ahab a ɔtɔn ne ho sɛ ɔbɛyɛ AWURADE ani so bɔne, efisɛ ne yere Yesebel hyɛɛ no.

²⁶ Na ɔyɛɛ akyide sɛ, efisɛ odii ahoni huhuw no akyi, sɛnea Amorifo a AWURADE tuu wɔn Israelfo anim yɛe no ara.

²⁷ Na Ahab tee nsɛm yi no, osunsuanee ne ntade mu, na ɔde atweaatam guu ne ho so, na odii abuada, na ɔdaa atweaatam no mu, na ɔnam siamoo.

²⁸ Na AWURADE asɛm baa Tisbini Elia nkyɛn sɛ: So woahu sɛ Ahab abrɛ ne ho ase m’anim?

²⁹ Esiane sɛ wabrɛ ne ho ase m’anim nti, meremfa bɔne no memma ne bere so. Ne ba bere so na mede bɔne no mɛba ne fi so.