1 Ahene 19 - KYERƐW KRONKRON

Elia wɔ Sinai bepɔw so

¹ Na Ahab bɛkaa nea Elia yɛe no nyinaa kyerɛɛ ne yere Yesebel, ne sɛnea ɔde nkrante akunkum Baal adiyifo no nyinaa.

² Na Yesebel somaa ɔbɔfo kɔɔ Elia nkyɛn sɛ: Sɛɛ na anyame nyɛ me, na sɛɛ nso na wɔmfa nka ho, sɛ ɔkyena sesɛɛ na mama wo kra ayɛ sɛ wɔn mu biako de.

³ Na ohuu saa no, ne nkwa nti ɔsɔre kɔe na okoduu Beer-seba a ɛyɛ Yuda de no, na ogyaw n’abofra no wɔ hɔ.

⁴ Na ɔno de, ɔnantew sare so da koro kwan na ɔkɔtenaa sisia bi ase, na ɔsrɛe sɛ ne kra nwu. Na ɔkae sɛ: Ɛdɔɔso, afei, AWURADE, fa me kra, na minnye mensen m’agyanom.

⁵ Na ɔde ne ho too hɔ dae, sisia bi ase. Na hwɛ, ɔbɔfo bi bɛkaa no, na ɔka kyerɛɛ no sɛ: Sɔre didi!

⁶ Na ɔhwɛe, na hwɛ, ɔfam a wɔato no nnyansramma so ne nsu kuruwa si n’atifi; na odidii na ɔnomee, na ɔtɔɔ hɔ dae.

⁷ Na AWURADE bɔfo san bɛkaa no ne mprenu so sɛ: Sɔre didi, na ɔkwan no ware papa ma wo.

⁸ Na ɔsɔre didii na ɔnomee, na ɔde aduan no mu ahoɔden nantewee adaduanan, awia ne anadwo, koduu Onyankopɔn bepɔw Horeb ho.

Onyankopɔn yi ne ho adi Horeb

⁹ Na oduu ɔbodan no ho hɔ, na ɔsoɛɛ. Na hwɛ, AWURADE asɛm baa ne nkyɛn na ɔka kyerɛɛ no sɛ: Elia, dɛn na wowɔ yɛ wɔ ha?

¹⁰ Na ose: Ninkunu na matwe mama AWURADE, asafo Nyankopɔn, sɛ Israelfo agyaw w’apam: W’afɔremuka no, wɔadwiridwiriw, na w’adiyifo nso, wɔde nkrante akunkum wɔn; na me nko na maka, na wɔrehwehwɛ me akum me.

¹¹ Na ɔkae sɛ: Fi adi kogyina bepɔw no so AWURADE anim. Na hwɛ, AWURADE twaam, na mframa kɛse a ɛyɛ den paepaee mmepɔw na ebubuu abotan dii AWURADE anim; na ɛnyɛ mframa no mu na AWURADE wɔ; na mframa no akyi no asasewosow; na ɛnyɛ asasewosow no mu na AWURADE wɔ;

¹² na asasewosow no akyi no ogya; na ɛnyɛ ogya no mu na AWURADE wɔ; na ogya no akyi no na mframa a ɛbɔ brɛoo bi nne di.

¹³ Na Elia tee no, ɔde ne nguguso kataa n’ani, na ofi kogyinaa ɔbodan no ano. Na hwɛ, ɛnne bi baa ne nkyɛn sɛ: Elia, dɛn na wowɔ yɛ wɔ ha?

¹⁴ Na ose: Ninkunu na matwe mama AWURADE, asafo Nyankopɔn, sɛ Israelfo agyaw w’apam: W’afɔremuka no, wɔadwiridwiriw, na w’adiyifo nso, wɔde nkrante akunkum wɔn; na me nko na maka, na wɔrehwehwɛ me akum me.

¹⁵ Na AWURADE ka kyerɛɛ no sɛ: Kɔ, san si wo kwan so kɔ Damasko sare so; na sɛ wudu a, sra Hasael ngo si no Siria so hene;

¹⁶ na Nimsi ba Yehu nso, sra no si Israel so hene; na Safat ba Elisa a ofi Abel-mehola no de, sra no si w’ananmu diyifo.

¹⁷ Na nea obefi Hasael nkrante ano no, Yehu bekum no, na nea obefi Yehu nkrante ano no, Elisa bekum no.

¹⁸ Nanso megyaw Israel mu nnipa mpemnsɔn, nkotodwe a ennya nkotow Baal nyinaa ne ano a ennya mfew n’ano nyinaa.

Elisa frɛ

¹⁹ Ɛnna ofii hɔ kɔe. Na okohuu Safat ba Elisa sɛ ɔrefɛtɛw; anantwi mpamho dumien na edi n’anim, na ɔno ne nea ɛto so dumien na ɛrefuntum; na Elia sen baa ne nkyɛn, na ɔtow ne nguguso guu no so.

²⁰ Na ogyaw anantwi no, na otuu mmirika dii Elia akyi kae sɛ: Ma menkɔkra m’agya ne me na, na mimmedi w’akyi! Na ɔka kyerɛɛ no sɛ: San kɔ bio, na dɛn na mayɛ wo yi?

²¹ Na ɔsan fii n’akyi kɔfaa anantwi mpamho no kunkum wɔn, na ɔde anantwi no adwumayɛ nnua no noaa nam no, na ɔde maa nkurɔfo no, na wodii; na ɔsɔre dii Elia akyi, na ɔsom no.