Tito 3 - Rapa Nui

He haka tere iŋa tano mo te kiritiano

¹ E Tito, e haka manaꞌu ki te taina: ꞌina ko rehu i a rāua mo haꞌatura ki te nuꞌu pūꞌoko haka tere henua ꞌe ki te nuꞌu ra-rahi, ꞌe mo riro o rāua he nuꞌu ko rito era ꞌā mo aŋa i te meꞌe riva-riva,

² nuꞌu taꞌe vānaŋa ꞌino mo te rua, taꞌe moto, riva, ꞌe ꞌite i te moꞌa i te nuꞌu taꞌatoꞌa.

³ A tātou, ꞌi raꞌe ki te haka moe i te manaꞌu ꞌi ruŋa i a Ietū, i ai takoꞌa rō he taŋata taꞌe haka topa riva-riva i te manaꞌu, haka ꞌāriŋa, oho a te ara taꞌe tano, aŋa i te meꞌe rake-rake pohe e te hakari ꞌe rauhuru haka ꞌou atu meꞌe taꞌe tano reka mai ki a tātou. E noho era ꞌi roto i te mākota, ꞌe ꞌina he haŋa ki te tētahi ꞌe pē ira ꞌana te tētahi ki a tātou.

⁴ ꞌE te ꞌAtua, kope toꞌo i a tātou mai roto i te ūtuꞌa o te hara, i haka takeꞌa rō mai i tōꞌona riva ꞌe i tōꞌona haŋa.

⁵ ꞌE, ka ai atu ꞌina e tahi meꞌe riva-riva o tātou i aŋa, te ꞌAtua, ꞌi tōꞌona haka ꞌaroha, ko haka eꞌa ꞌā i a tātou mai roto i te ūtuꞌa o te hara hai haka maꞌitaki i te tātou māhatu ꞌe hai vaꞌai mai i te ora ꞌe ꞌi te noho iŋa ꞌāpī hai ⌊Vārua Maitai⌋.

⁶ Te ꞌAtua, i vaꞌai mai ai i te Vārua Maitai hai Ietū Kiritō, kope haka eꞌa i a tātou mai roto i te ūtuꞌa o te hara,

⁷ ki aŋi-aŋi riva-riva ai e tātou: pe muꞌa ka oho ena e ravaꞌa rō e tātou i te ora ꞌāpī ꞌina he hopeꞌa raꞌa vaꞌai e te ꞌAtua, pa he hauhaꞌa haka rē e te matuꞌa mo tāꞌana poki. ꞌE e ꞌite nei e tātou i nei meꞌe ꞌo te ai, ꞌi tōꞌona riva rahi, i kī ai e te ꞌAtua: a tātou he nuꞌu tano ki tōꞌona mata.

⁸ He parautiꞌa te ŋā meꞌe kī atu ena e au, ꞌe te meꞌe haŋa, ꞌi te hora nei, he haka aŋi-aŋi riva-riva e koe i nā ŋā meꞌe ki te nuꞌu haka moe i te manaꞌu ꞌi ruŋa i te ꞌAtua, ki ai ai o rāua he nuꞌu aŋa oho i te meꞌe riva-riva. Te hāpī ena he meꞌe tano ꞌe riva-riva mo te taꞌatoꞌa.

⁹ E Tito, ꞌina koe ko haka māuꞌa tuꞌu hora ki te tātake tahaŋa o ruŋa i te hakaara tupuna ꞌe o ruŋa i te ⌊haka tere iŋa era ꞌa Mōtē⌋; ꞌina, paꞌi, e tahi meꞌe riva-riva mo ravaꞌa.

¹⁰ Mo haka topa kē-kē o te kope e tahi i te nuꞌu haka moe i te manaꞌu ꞌi ruŋa i a Ietū, e ture. Ana taꞌe haka roŋo atu, e ture haka ꞌou. ꞌE mo taꞌe haka roŋo mau atu ꞌā, ka haka eꞌa mai roto i te nuꞌu ena.

¹¹ Ko ꞌite ꞌana, paꞌi, koe: te kope pē nā, he kope haka tapa i tōꞌona manaꞌu mai ruŋa i te roŋo parautiꞌa o te ꞌAtua. ꞌE hai noho iŋa hara ōꞌona ka takeꞌa ena pē nei ē: ko hape mau ꞌā a ia.

Te meꞌe hopeꞌa

¹² Ka uŋa atu ena a au i a Ārētema ꞌo i a Tīkiko, e uꞌi te rāveꞌa mo oho atu ōꞌou ki Nīkōpori uꞌi mai i a au; e manaꞌu rō ꞌana, paꞌi, a au mo noho ꞌi ira ꞌi te toŋa.

¹³ E Tito, e hāꞌūꞌū koe ki a ꞌĀporo ꞌe ki a Tena, kope maꞌu ture o te rua ꞌi roto i te hare ture, hai meꞌe mo te rāua ara.

¹⁴ Te nuꞌu o tātou e ꞌite mo aŋa i te meꞌe riva-riva ꞌe mo hāꞌūꞌū i te rua, ki hauhaꞌa ai te rāua noho iŋa ꞌi te ao nei.

He ꞌaroha

¹⁵ Te nuꞌu taꞌatoꞌa o muri i a au ꞌī e ꞌaroha atu ena. E ꞌaroha atu koe ki te tātou repahoa haka moe i te rāua manaꞌu ꞌi ruŋa i a Ietū. ꞌE ka ai ꞌi ruŋa i a kōrua taꞌatoꞌa te riva rahi o te ꞌAtua.