Tanatiako 3 - Rapa Nui

Te ꞌarero

¹ E te taina, taꞌe taꞌatoꞌa o kōrua mo maꞌori hāpī. E ꞌite rō ꞌā, paꞌi, kōrua: ꞌata hau te paŋahaꞌa o te ture o te ꞌAtua mo mātou mo te nuꞌu haka ꞌite i tāꞌana vānaŋa ki te tētahi nuꞌu.

² A tātou, te taŋata taꞌatoꞌa e hape rahi rō ꞌā. ꞌE mo ai tāꞌue o te kope taꞌe hape ꞌi tāꞌana meꞌe kī, he taŋata ꞌina e tahi hape ia ꞌi muꞌa o te ꞌAtua ꞌe he taŋata ꞌite mo haka noho i a ia ꞌo hara.

³ E manaꞌu rā kōrua ki te tāvaha: ka ai atu he meꞌe ꞌiti-ꞌiti e tahi, e ravaꞌa nō e tātou mo haka oho i te nui-nui ena o te hoi a te kona o tātou i haŋa.

⁴ Pē ira takoꞌa ꞌā te pahī: ka ai atu he pahī hopeꞌa o te nui-nui ꞌe te tokerau haka makenu i a ia he tokerau hopeꞌa o te pūai, hai huira ꞌiti-ꞌiti e tahi e haka oho ena e te kope haka tere a te kona ꞌāꞌana i haŋa.

⁵ Pē ira te ꞌarero; he meꞌe ꞌiti-ꞌiti e tahi o te hakari, ꞌe, ka ai atu pē ira, e ravaꞌa nō mo aŋa i te meꞌe hopeꞌa o te nui-nui. Te kona rahi o te tumu e vera tahi nō ꞌi te ahi hopeꞌa o te ꞌiti-ꞌiti.

⁶ ꞌE te ꞌarero pa he ahi ꞌā. He kona o te tātou hakari mai ira e poreko ena te meꞌe rake-rake haka ꞌōꞌone tahi i a tātou hai hara. Te ꞌarero e ura ena hai ahi mau era ꞌā o te pōꞌauahi koia ko te tutu ko te oho i te tātou noho iŋa ꞌi te ao nei.

⁷ Taꞌatoꞌa huru o te manu e haka māŋaro nō e te taŋata, ka ai he manu vaꞌe e hā, he manu rere, he kōreha, ꞌe he manu o roto i te vaikava; ꞌe ko māŋaro ꞌana ꞌi te taŋata.

⁸ ꞌE te ꞌarero, kai ravaꞌa ꞌā e te taŋata mo haka māŋaro ꞌo te ai he meꞌe hopeꞌa o te rake-rake taꞌe ravaꞌa mo haka noho, ꞌātā e tuꞌu rō ꞌana pa he meꞌe ꞌī e te veneno.

⁹ Hai ꞌarero a tātou e haꞌahana-hana ena i te ꞌAtua Matuꞌa ꞌe e tohu ena i te taŋata, ka ai atu i aŋa ai e te ꞌAtua hai huru ōꞌona.

¹⁰ Mai roto i tū haha ꞌana e eꞌa ena te vānaŋa mo haꞌahana-hana i te ꞌAtua ꞌe pē ira ꞌā te vānaŋa taꞌe tano mo te rua taŋata. Te meꞌe nei ꞌina ko ai pē ira, e te taina ē.

¹¹ ꞌIna, paꞌi, he tehe mai tū kona ꞌā te vai māŋaro ꞌe te vai maŋeo.

¹² ꞌIna takoꞌa he hua mai ruŋa i te tumu pika te aceituna ꞌe mai ruŋa i te tumu vino te pika. Pē ira ꞌana, e te taina ē, ꞌina he eꞌa te vai maŋeo mai te kona eꞌa o te vai māŋaro.

Te huru tano ki te mata o te ꞌAtua

¹³ Mo ai ꞌi roto o kōrua te kope manaꞌu ko ꞌite ꞌā he aha te meꞌe tī-tika mo aŋa ꞌi te hora taꞌatoꞌa, e haka takeꞌa hai meꞌe riva-riva aŋa ꞌe hai taꞌe manaꞌu e hau rō atu a ia ki te rua, he huru o te nuꞌu haka tere i a rāua hai manaꞌu o te ꞌAtua.

¹⁴ ꞌE mo ai e nou-nou rō ꞌana ki te meꞌe o te rua ꞌe e haŋa rō ꞌana mo ai ko ia mau nō te raꞌe ꞌi te meꞌe taꞌatoꞌa, ꞌina ko kī pē nei ē: e ꞌite rō ꞌana ꞌō mo aŋa i te meꞌe tī-tika ꞌi te hora taꞌatoꞌa. He reo-reo. E hape ꞌā ki te parautiꞌa.

¹⁵ Taꞌe o te ꞌAtua te huru ena; he meꞌe o te ao nei, o te taŋata ꞌe o Rukifero.

¹⁶ Te kona ai o te nou-nou, ꞌe o te haŋa mo raꞌe ꞌi te meꞌe taꞌatoꞌa, ꞌi ira e ai ena te mira-mira ꞌe rauhuru atu meꞌe taꞌe tano.

¹⁷ ꞌE te nuꞌu mai te ꞌAtua te rāua ꞌite, te meꞌe raꞌe he noho iŋa taꞌe hara, ꞌe te rāua huru: haumārū, riva ꞌe ꞌite i te moꞌa. A rāua takoꞌa nuꞌu māhatu ꞌaroha, uꞌi i te taꞌatoꞌa pē tū huru tahi ꞌā, kī i te parautiꞌa, ꞌe aŋa i te meꞌe riva-riva.

¹⁸ Te nuꞌu aŋa mo ai o te haumārū ꞌi ruŋa i te henua te meꞌe ꞌoka he haumārū. ꞌE ꞌi te hora hopeꞌa te meꞌe ravaꞌa he meꞌe tano ki te mata o te ꞌAtua.