Tanatiako 1 - Rapa Nui

He ꞌaroha

¹ A au, a ⌊Tanatiako⌋, tāvini o te ꞌAtua ꞌe o te Pūꞌoko Haka Tere ko Ietū Kiritō, he ꞌaroha atu ki a kōrua ki te taina ⌊haka moe i te manaꞌu⌋ ꞌi ruŋa i a Ietū o te hoꞌe ꞌahuru mā piti mata o te itaraera noho ꞌi te henua taꞌatoꞌa.

E haꞌaoromaꞌi i te ꞌati hai pūai

² E te taina, ka topa atu ena rauhuru ꞌati, e koa kōrua.

³ Ko ꞌite ꞌana, paꞌi, kōrua: ꞌi te hora haꞌatiꞌa e te ꞌAtua mo topa atu o te ꞌati, e haka ꞌatu ꞌana i te kōrua haka moe iŋa i te manaꞌu ꞌi ruŋa i a ia. ꞌE mo hio-hio mo oho nō o te kōrua manaꞌu ꞌi rā hora, he ꞌite kōrua mo haꞌaoromaꞌi i te ꞌati hai pūai.

⁴ E haꞌaoromaꞌi e oho kōrua hai pūai ꞌi te ꞌati, ki ai ai kōrua he nuꞌu haka moe parautiꞌa i te manaꞌu ꞌi ruŋa i te ꞌAtua ꞌe nuꞌu aŋa i te meꞌe tī-tika ki tōꞌona mata ki te roa ꞌina e tahi hape mo tuhi iŋa atu.

⁵ ꞌE mo ai ꞌi roto i a kōrua te kope kai ꞌite pē hē ana haka tere i a ia hai manaꞌu o te ꞌAtua ꞌi te hora o te ꞌati, e no-noꞌi ki te ꞌAtua, ꞌe māꞌana e haka ꞌite. Te ꞌAtua ki te taꞌatoꞌa nō kope no-noꞌi e hāꞌūꞌū ena ꞌina he hāito ꞌe ꞌina he haka ꞌati.

⁶ ꞌE ana no-noꞌi, e haka moe te manaꞌu ꞌi ruŋa i a ia ꞌe ꞌina ko ꞌaka-ꞌaka. Te kope ꞌaka-ꞌaka o te manaꞌu pa he vave ꞌā ꞌi te hora haka makenu e te tokerau ki te pāꞌiŋa ki te pāꞌiŋa.

⁷ Te taŋata tuꞌu pē ira ꞌina ko manaꞌu he ravaꞌa e ia te meꞌe mai te ꞌAtua

⁸ ꞌi te meꞌe era ꞌi ꞌaŋarīnā ꞌi ruŋa i te ꞌAtua tōꞌona manaꞌu, ꞌe āpō ꞌi ruŋa i te meꞌe o te ao nei. ꞌIna he haka tano i te manaꞌu ki te meꞌe e tahi, ꞌe te taŋata nei mo te meꞌe taꞌatoꞌa pē ira.

⁹ Te taina veve haka moe i te manaꞌu ꞌi ruŋa i a Ietū e koa ꞌo te ai i a ia te hauhaꞌa parautiꞌa o te ꞌAtua.

¹⁰ ꞌE te taina ꞌono e koa ꞌo te aŋi-aŋi he nuꞌu hara a rāua ꞌe ꞌo te haka moe i te manaꞌu ꞌi ruŋa i a Ietū, taꞌe ꞌi ruŋa i te rāua hauhaꞌa. Te taŋata ꞌono, paꞌi, pa he tiare mauku ꞌā, e ko roa he ŋaro.

¹¹ Hora ena o te raꞌā e ꞌata pūai ena he paka-paka te mauku, he vī-viri tōꞌona tiare, he kore te nehe-nehe. Pē ira takoꞌa ꞌā te taŋata ꞌono ka ŋaro ena. ꞌI te mahana e tahi, e riva-riva nō ꞌā; ꞌe ꞌi te rua mahana, ko mate ko oti ꞌā.

¹² Ko te koa i te taŋata haꞌaoromaꞌi hai pūai i te ꞌati taꞌatoꞌa topa ꞌi ruŋa i a ia. ꞌI te haka moe nō i te manaꞌu ꞌi ruŋa i a Ietū ꞌi roto i te ꞌati, he tano rā taŋata ki te mata o te ꞌAtua, ꞌe he vaꞌai ki a ia i te ora ꞌāpī ꞌina he hopeꞌa raꞌa, he hei kī e te ꞌAtua mo vaꞌai ki te nuꞌu haŋa ki a ia.

¹³ Mo ŋaroꞌa e te kope e tahi i te meꞌe e kī ꞌana ꞌi roto i a ia mo aŋa i te meꞌe taꞌe tano, ꞌina ko manaꞌu o te ꞌAtua i kī. Te ꞌAtua, paꞌi, ꞌina he ŋaroꞌa ꞌi roto i a ia i te meꞌe era ꞌe, takoꞌa, ꞌina he haka ꞌatu i te taŋata mo aŋa i te meꞌe taꞌe tano.

¹⁴ Te meꞌe haka ꞌatu i te taŋata mo hara he manaꞌu taꞌe tano o rāua. O rā manaꞌu mau ꞌā te haka pohe te oho mo aŋa i te meꞌe taꞌe tano.

¹⁵ Mai roto i te manaꞌu taꞌe tano e poreko ena te hara, ꞌe te meꞌe hopeꞌa mo poreko mai roto i te hara he mate.

¹⁶ E te mau taina haŋa rahi ōꞌoku ē, e ꞌite kōrua pē nei ē:

¹⁷ taꞌatoꞌa meꞌe riva-riva ai o tātou mai te ꞌAtua e ai mai ena. ꞌĀꞌana, paꞌi, i aŋa i te meꞌe taꞌatoꞌa māꞌeha o te raŋi. Te ŋā meꞌe nei e huri rō ꞌana ꞌi tōꞌona hora: e pōꞌuri rō ꞌā ꞌe e māꞌeha rō ꞌana. ꞌE te huru o te ꞌAtua ꞌina he huri.

¹⁸ Te ꞌAtua, ꞌi te ai ko haŋa ꞌā, i vaꞌai rō mai i te ora ꞌāpī ꞌina he hopeꞌa raꞌa hai haka moe i te manaꞌu ꞌi ruŋa i tāꞌana roŋo o ruŋa i te parautiꞌa, ki ai ai a tātou he raꞌe o roto i tāꞌana meꞌe aŋa taꞌatoꞌa.

Te meꞌe haŋa he haka roŋo ꞌe he haꞌatura

¹⁹ E te taina haŋa rahi ē, e uꞌi ꞌo rehu: a kōrua taꞌatoꞌa e ꞌite mo haka roŋo i te vānaŋa. ꞌE, ana vānaŋa, ꞌi raꞌe ana manaꞌu riva-riva te kōrua meꞌe mo kī, ꞌe ꞌina ko riri tahaŋa.

²⁰ Te taŋata riri, paꞌi, e ko tano mo aŋa i te meꞌe tī-tika ki te mata o te ꞌAtua.

²¹ ꞌO ira, ka haka rē te kōrua hara hano-hano ꞌe te meꞌe rake-rake taꞌatoꞌa rava aŋa e kōrua. Te roŋo parautiꞌa haka ꞌite atu e toꞌo mo kōrua. E ai rō ꞌana, paꞌi, te pūai o rā roŋo mo haka eꞌa i a kōrua mai roto i te ūtuꞌa o te hara ꞌe mo vaꞌai atu i te ora ꞌāpī ꞌina he hopeꞌa raꞌa.

²² ꞌE taꞌe nō e haka roŋo i rā roŋo; e aŋa takoꞌa i te meꞌe era e kī atu era. Mo taꞌe aŋa pē ira, e reo-reo ꞌana kōrua ki a kōrua ꞌā.

²³ Te kope haka roŋo nō i rā roŋo ꞌe ꞌina he aŋa i tāꞌana meꞌe kī, pa he taŋata uꞌi a roto i te hiꞌo:

²⁴ he takeꞌa i a ia, ꞌe i taha era, he rehu rō ꞌai pē hē tōꞌona huru.

²⁵ ꞌE te kope taꞌe rehu te meꞌe ŋaroꞌa, hāpī mo ꞌata ꞌite ōꞌona o ruŋa i te haka tere iŋa hopeꞌa o te tī-tika haka eꞌa i te taŋata mai roto i te hara, haka tano tahi i te meꞌe aŋa ki te meꞌe kī e rā roŋo, he haꞌamaitai e te ꞌAtua ꞌi tāꞌana meꞌe taꞌatoꞌa aŋa.

²⁶ Te taŋata kī he taŋata pure ꞌAtua a ia ꞌe ꞌina he haka rehe i tōꞌona ꞌarero, e reo-reo ꞌana ki a ia ꞌā, ꞌe te meꞌe aŋa ꞌāꞌana mo te ꞌAtua ꞌina e tahi hauhaꞌa.

²⁷ Te haꞌamuri iŋa parautiꞌa ꞌe tano ki te mata o te ꞌAtua Matuꞌa ko te meꞌe ena: he hāꞌūꞌū ki te ŋā poki matuꞌa kore ꞌe ki te ŋā viꞌe hove ai o te rāua ꞌati, ꞌe, takoꞌa, he taꞌe hara hai meꞌe o te ao nei.