Ruka 4 - Rapa Nui

He haka ꞌatu iŋa o Rukifero i a Ietū mo hara

¹ He eꞌa ia a Ietū mai te kona rio era ko Horotana, ko ꞌī ꞌā e te pūai o te ⌊Vārua Maitai⌋, ꞌe he oho ki te kona ꞌone taꞌe noho taŋata, i haka oho e te Vārua Maitai.

² E maha ꞌahuru mahana i noho ai ꞌi ira ꞌe he haka ꞌatu e Rukifero. ꞌIna e tahi meꞌe i kai a Ietū ꞌi rā ŋā mahana ꞌe i oho era he maruaki.

³ He kī e Rukifero: —Ē, a koe he Poki o te ꞌAtua, ¿he aha rā koe e taꞌe haka riro ena i te ŋā māꞌea nei he haraoa?

⁴ He pāhono e Ietū: —Ē, pē nei e kī ena ꞌi ruŋa i te ⌊Pāpaꞌi Moꞌa⌋: «Taꞌe hai haraoa nō te taŋata e ora ena».

⁵ He maꞌu ia e Rukifero ki ruŋa i te maꞌuŋa ruŋa nui, he haka takeꞌa hai minuti i te henua taꞌatoꞌa o te ao,

⁶ ꞌe he kī: —Te henua taꞌatoꞌa ena ōꞌoku, ꞌe i a au te parau mo vaꞌai ki te kope ꞌāꞌaku i haŋa. Hora nei he vaꞌai tahi atu e au koia ko tōꞌona hauhaꞌa

⁷ mo tū-turi ꞌe mo haꞌamuri mai ōꞌou ki a au.

⁸ He pāhono e Ietū: —Pē nei takoꞌa e kī ena ꞌi ruŋa i te Pāpaꞌi Moꞌa: «E haꞌamuri koe ki a Iehoha ki tuꞌu ꞌAtua ꞌe ki a ia mau nō koe ana tāvini».

⁹ I oti era he maꞌu e Rukifero i a Ietū ki Hērutarema ki ruŋa i te kona hopeꞌa o te ruŋa nui o te ⌊Kona Haꞌamuri ꞌAtua⌋ ꞌe he kī: —He Poki koe o te ꞌAtua. Ka rere mai ruŋa nei ki raro.

¹⁰ Nā, paꞌi, e hāꞌaki rō ꞌā ꞌi ruŋa i te Pāpaꞌi Moꞌa: “E uŋa rō atu te ꞌAtua i tāꞌana merahi mo hāpaꞌo i a koe.

¹¹ Hai rima o rāua ka maꞌu ena i a koe a ruŋa ꞌo hetu ki te māꞌea”.

¹² He pāhono e Ietū: —E hāꞌaki takoꞌa rō ꞌana ꞌi ruŋa: «ꞌIna koe ko haka ꞌatu i tuꞌu ꞌAtua, ꞌina ko aŋa e tahi meꞌe maꞌa-maꞌa hai manaꞌu pē nei ē: e haka eꞌa rō koe e te ꞌAtua mai rā meꞌe».

¹³ I uꞌi era e Rukifero ꞌina he rāveꞌa toe mo haka ꞌatu i a Ietū, he eꞌa he oho mai muri ꞌātā ki te mahana mo hoki.

He hoki iŋa o Ietū ki Karirea

¹⁴ He hoki ia a Ietū ki Karirea ko ꞌī ꞌā e te pūai o te Vārua Maitai. ꞌI ira ꞌe ꞌi te kona taꞌatoꞌa hāhine e vānaŋa rō ꞌā te nuꞌu o ruŋa i a Ietū.

¹⁵ E hāpī era ꞌi te ⌊hare pure hūrio⌋ o te kona taꞌatoꞌa tuꞌu. Te nuꞌu taꞌatoꞌa o rā ŋā kona e haꞌahana-hana rō ꞌā i a ia.

ꞌI Nātāreta a Ietū

¹⁶ He oho ia a Ietū ki Nātāreta ki te kona ꞌi ira i nui-nui ai. I tano era te ⌊mahana haka ora⌋, he oho ki te hare pure hūrio, pa he meꞌe rava aŋa e ia ꞌi te mahana haka ora, ꞌe he māroa mo taiꞌo i te Pāpaꞌi Moꞌa.

¹⁷ He puka o te perofeta era ko ꞌItaia te meꞌe i vaꞌai. He mātaki ꞌi te kona e hāꞌaki rō ꞌā pē nei ē:

¹⁸ «ꞌI ruŋa i a au te Vārua o te ꞌAtua, ꞌo te ai ko haꞌataꞌa ꞌana i a au mo maꞌu i te roŋo riva-riva ꞌāꞌana ki te nuꞌu veve. Ko uŋa mai ꞌā mo haka ꞌite ki te nuꞌu puru e ai rō ꞌā te rāveꞌa mo eꞌa o rāua mai roto i te ꞌati. Ko uŋa takoꞌa mai ꞌana i a au mo haka māꞌeha i te mata o te nuꞌu matapō, mo haka eꞌa i te nuꞌu mai te rima o te nuꞌu tōtōā i a rāua,

¹⁹ ꞌe mo haka ꞌite pē nei ē: ko tano ꞌā te hora mo haꞌamaitai e te ꞌAtua i te taŋata».

²⁰ He puru a Ietū i tū puka era, he vaꞌai ki te taŋata hāꞌūꞌū ꞌi te aŋa o roto i te hare pure ꞌe he noho. Te nuꞌu taꞌatoꞌa o ira ko te uꞌi iŋa ꞌana a ruŋa.

²¹ He haꞌamata ia a Ietū he vānaŋa: «ꞌI ꞌaŋarīnā te meꞌe taiꞌo atu ena e au o ruŋa i te Pāpaꞌi Moꞌa i tano ai».

²² Te nuꞌu taꞌatoꞌa o ira e koa rō ꞌā e vānaŋa era o ruŋa i a Ietū ꞌe ko māere tahi ꞌana ꞌi te meꞌe nehe-nehe kī e ia. He ꞌui ki a rāua ꞌā: —¿Pē hē ia te meꞌe nei? Ko tū poki era ꞌa ⌊Kōsē⌋, paꞌi, te kope nei.

²³ He kī haka ꞌou e Ietū: —Ko ꞌite ꞌana a au e kī rō mai kōrua i te vānaŋa nei: «E te taote, ka haka ora koe i a koe ꞌā». E takoꞌa: «Te meꞌe aŋa e koe ꞌi Kaperenāū ka aŋa takoꞌa ꞌi nei ꞌi tuꞌu kāiŋa».

²⁴ Ko te vānaŋa iŋa ꞌana ia a Ietū: —ꞌĪ a au he kī atu: te taŋata ꞌina he haŋa ki te perofeta o te rāua kāiŋa mau ꞌā.

²⁵ Te parautiꞌa, ꞌi tū matahiti era e toru ꞌe te ꞌafa taꞌe hoa era o te ꞌua, rahi era o te maruaki ꞌi ruŋa i te henua, ŋā mahana era ko ⌊ꞌĒria⌋ te perofeta, i ai rō ꞌi Itaraera meꞌe rahi ŋā viꞌe hove.

²⁶ ꞌE ꞌina he ꞌAtua kai uŋa i a ꞌĒria mo hāꞌūꞌū ki rā ŋā viꞌe; i haka oho ai ki te viꞌe hove taꞌe he hūrio o te kona era ko Tarapeta, he kona hāhine ki Tīrone.

²⁷ »I ai takoꞌa rō meꞌe rahi nuꞌu rēpera o Itaraera ꞌi te ŋā mahana era ko Eriteo te perofeta, ꞌe ꞌina e tahi o rā nuꞌu i haka ora; he taŋata mau nō e tahi taꞌe he hūrio te ꞌīŋoa ko Nāmana o te kona era ko Tīria te meꞌe i haka ora.

²⁸ I ŋaroꞌa era e te nuꞌu taꞌatoꞌa o roto i te hare pure hūrio i te vānaŋa ꞌa Ietū, he riri tahi rō ꞌai.

²⁹ He moko he ꞌa-ꞌaru i a Ietū he maꞌu he iri ki te kona hopeꞌa o te ruŋa nui o Nātāreta mo ava ki raro.

³⁰ He huri ia a Ietū, he hoki a vāeŋa o rā ŋā nuꞌu ꞌe he eꞌa he oho rō ꞌai.

He taŋata e tahi ko oꞌo ꞌana e te tātane

³¹ He eꞌa a Ietū he oho ki Kaperenāū, he kona haka ꞌou o Karirea, ꞌe ꞌi te mahana haka ora e hāpī era ꞌi roto i te hare pure hūrio.

³² He māere te nuꞌu ꞌi te huru o tōꞌona hāpī iŋa; e vānaŋa era pa he taŋata i a ia te parau o te meꞌe taꞌatoꞌa.

³³ ꞌI roto i rā hare pure e tahi taŋata ko oꞌo ꞌā e te tātane, he ohu pūai:

³⁴ —¿He aha taꞌa meꞌe haŋa i a mātou, e Ietū o Nātāreta ē? ¿E oho mai ꞌana koe mo haka kore i a mātou? Ko ꞌite ꞌana a au ko ai koe: he kope moꞌa uŋa mai e te ꞌAtua.

³⁵ He ture ia e Ietū ki tū tātane era: —¡Ka mou ꞌe ka eꞌa koe mai roto i te taŋata ena! He haka ꞌamo e tū tātane era i rā kope ki raro e uꞌi nō atu ꞌana te nuꞌu taꞌatoꞌa o tū kona era. He eꞌa rā tātane mai roto ꞌe ꞌina e tahi meꞌe ꞌino i aŋa.

³⁶ He riꞌa-riꞌa tahi tū nuꞌu era koia ko kī ki a rāua ꞌā: «¿Ko ŋaroꞌa ꞌā e kōrua te vānaŋa o te kope era? I kī era ki te tātane ka eꞌa, he eꞌa rō ꞌai».

³⁷ ꞌE he ꞌata rahi rō ꞌai te vānaŋa o ruŋa i a Ietū ꞌi te kona taꞌatoꞌa hāhine ki ira.

He haka ora iŋa o Ietū i te huŋavai o Tīmona

³⁸ He eꞌa a Ietū mai tū hare pure era, he oho ki te hare o Tīmona. Te māmā huŋavai o Tīmona e māui-ui rō ꞌā, ko hū ꞌā te hakari ꞌi te māui-ui. He ani e te nuꞌu ki a Ietū mo haka ora.

³⁹ He noi a Ietū a ruŋa i rā viꞌe, he kī ki te māui-ui mo kore, ꞌe he kore rō ꞌai. ꞌI tū hora ꞌā he eꞌa rā viꞌe ki ruŋa he haꞌamata he vaꞌai hai kai mo rāua.

He haka ora iŋa o Ietū meꞌe rahi nuꞌu

⁴⁰ I ŋaro era te raꞌā o rā mahana haka ora era, he eꞌa te taŋata taꞌatoꞌa ai o te rāua nuꞌu māui-ui he maꞌu ki a Ietū. ꞌE, ka ai atu huru kē huru kē te rāua māui-ui, he haka puā e Ietū hai rima ꞌe he ora rō ꞌai.

⁴¹ I rahi rō te nuꞌu o rā nuꞌu māui-ui era mai roto takoꞌa i eꞌa ai te tātane koia ko ohu: —¡He Poki koe o te ꞌAtua! He ture e Ietū ki rā ŋā tātane ꞌe, ꞌi te ꞌite o rāua a ia he ⌊Kiritō⌋, ꞌina he haka rē e Ietū mo vānaŋa.

He haka ꞌite iŋa o Ietū i te roŋo o te ꞌAtua

⁴² I ꞌōtea era he eꞌa a Ietū he oho mai tū kona era ki te kona ꞌina he taŋata. He kimi he oho e te nuꞌu ka ravaꞌa rō. Te haŋa mo taꞌe oho o Ietū mai muri i a rāua.

⁴³ He kī e Ietū: «Te aŋa ꞌāꞌaku he haka ꞌite takoꞌa ki te taŋata o te tētahi kona i te roŋo riva-riva o ruŋa i te ⌊haka tere iŋa ꞌāpī o te ꞌAtua⌋; ki ira a au i uŋa mai ai».

⁴⁴ Pē ira a Ietū e haka ꞌite e oho era i te ⌊roŋo riva-riva o te ꞌAtua⌋ ꞌi te hare pure hūrio taꞌatoꞌa o tōꞌona henua.