Ruka 23 - Rapa Nui

A Ietū ꞌi muꞌa o Pirato

¹ He eꞌa tahi tū nuꞌu era he maꞌu he oho i a Ietū ki muꞌa o Pirato.

² He kī: —E Pirato, i ravaꞌa ai e mātou i te taŋata nei e haka tumu ꞌana i te ture. E kī ꞌā ꞌina ko ꞌauhau ki te ꞌariki rōmano i te moni kī mo ꞌauhau, ꞌe pē nei takoꞌa i kī ai: ko ia te ⌊Kiritō⌋ ꞌe te ꞌAriki.

³ He ꞌui e Pirato: —¿He ꞌAriki koe o te ⌊hūrio⌋? He pāhono e Ietū: —ꞌĀꞌau i kī.

⁴ He kī ia e Pirato ki tū ŋā ⌊oromatuꞌa ra-rahi⌋ era ꞌe ki te taŋata taꞌatoꞌa ꞌi ira: —Ki tōꞌoku uꞌi, ꞌina e tahi meꞌe rake-rake o te taŋata nei i aŋa ki tano ai mo haka ūtuꞌa.

⁵ He ꞌata kī e tū nuꞌu era: —Hai hāpī ꞌāꞌana e haka tumu ena i te ture ꞌi roto i te taŋata. I haꞌamata ai ꞌi Karirea, ꞌe, hora nei, ꞌī e aŋa ꞌā ꞌi Hūrea.

ꞌI muꞌa i a ⌊ꞌErore⌋ a Ietū

⁶ I ŋaroꞌa era e Pirato i te meꞌe kī e rā nuꞌu, he ꞌui hoki a Ietū o Karirea, kona haka tere e ꞌErore.

⁷ He pāhono e rā nuꞌu: «ꞌĒ-ē, o rā kona». I ŋaroꞌa era e Pirato, he kī mo maꞌu ki a ꞌErore ꞌi te ai ꞌi Hērutarema a ꞌErore ꞌi rā ŋā mahana.

⁸ I takeꞌa era e ꞌErore i a Ietū, he toꞌo rō atu ꞌai te koa ꞌi te meꞌe i rahi rō te mahana i pohe mo māhani ki a Ietū, he rava ŋaroꞌa i te vānaŋa o ruŋa i a ia. Te haŋa o ꞌErore mo takeꞌa i te mana aŋa e Ietū.

⁹ Meꞌe rahi te meꞌe i ꞌui, ꞌe, ꞌina kai pāhono e Ietū.

¹⁰ ꞌI muri i a ꞌErore te oromatuꞌa ra-rahi ꞌe te ⌊maꞌori o te haka tere hūrio⌋ ꞌai e kī era: a Ietū e aŋa rō ꞌana i te meꞌe taꞌe tano.

¹¹ He haꞌamata ia a ꞌErore ananake ko tāꞌana mūtoꞌi he vā-vā ꞌe he haka meꞌe-meꞌe i a Ietū. He haka uru hai kahu hopeꞌa o te tau, ꞌai ka haka hoki haka ꞌou ki a Pirato.

¹² ꞌI rā mahana i riro ai a ꞌErore ararua ko Pirato he repahoa; ꞌi muꞌa ꞌana he moto nō te aŋa o rāua.

Te ūtuꞌa mo Ietū he mate

¹³ He haka taka-taka e Pirato i te oromatuꞌa ra-rahi, i te nuꞌu ra-rahi ꞌe i te taŋata taꞌatoꞌa o ira

¹⁴ he kī: —A kōrua i maꞌu mai i te kope nei koia ko kī mai e haka moto ꞌā i te taŋata. I ꞌui rō e au ꞌi muꞌa i a kōrua ꞌe ꞌina he hape ōꞌona e au i ravaꞌa o te meꞌe taꞌatoꞌa kī mai e kōrua.

¹⁵ Pē ira ꞌā a ꞌErore, ꞌe nā ko haka hoki haka ꞌou mai ꞌā. ꞌĪ a au he kī atu: kai ravaꞌa e au e tahi hape o te taŋata nei ki haka ūtuꞌa ai hai mate.

¹⁶ ꞌĪ he haka tiŋaꞌi hai ꞌuaka, ki oti he haka rē i a ia mo oho. [

¹⁷ ꞌI te ⌊ŋoŋoro he Pakate⌋, e ai rō ꞌā te meꞌe rava aŋa e Pirato, he haka eꞌa e tahi kope puru mo haka koa o te taŋata.]

¹⁸ He ohu ia e te nuꞌu: —¡Ka haka kore te kope ena ꞌe ka haka eꞌa mai a Varavā!

¹⁹ Te taŋata nei i puru ai ꞌo te haka tumu i te ture ki te nuꞌu ra-rahi o te rōmano ꞌe ꞌo te tiŋaꞌi ꞌo te haka mate i te taŋata e tahi.

²⁰ A Pirato, ꞌi te haŋa mo haka eꞌa i a Ietū, he vānaŋa haka ꞌou ki te taŋata.

²¹ ꞌE ꞌina he haka roŋo e te nuꞌu; ꞌai e ꞌata ohu era: —¡Ka veo ꞌi ruŋa i te tātaurō!

²² He toru kī iŋa nei o Pirato ki te nuꞌu: —¿He aha tāꞌana meꞌe taꞌe tano i aŋa? ꞌIna e tahi meꞌe rake-rake e au i takeꞌa mo haka ūtuꞌa i a ia hai mate. ꞌĪ a au he haka tiŋaꞌi. Ki oti he haka rē mo oho.

²³ ꞌE te taŋata, ꞌai e ꞌata ohu era: —¡Ka veo ꞌi ruŋa i te tātaurō! ꞌI te rahi o te ohu-ohu iŋa, he haka roŋo e Pirato.

²⁴ He aŋa ia i tū meꞌe ohu era.

²⁵ He haka eꞌa i a Varavā, taŋata puru era ꞌo te haka tumu i te ture ꞌe ꞌo te tiŋaꞌi ꞌo te haka mate i te taŋata e tahi, ꞌe he vaꞌai i a Ietū ki te vaꞌehau mo aŋa i tū meꞌe ohu era e te taŋata.

He veo iŋa i a Ietū ꞌi ruŋa i te tātaurō

²⁶ I maꞌu i oho era i a Ietū mo tiŋaꞌi ꞌi ruŋa i te tātaurō, ꞌi te ara te taŋata e tahi o te kona ko Tīrene, te ꞌīŋoa ko Tīmona, e vari ꞌana a ira mai ꞌuta. He toꞌo mai e te vaꞌehau i rā taŋata, he haka ꞌamo i te tātaurō ꞌamo e Ietū ꞌe he haka oho ꞌi tuꞌa.

²⁷ Meꞌe rahi te nuꞌu oho ꞌi tuꞌa o Ietū, ꞌe ꞌi roto te ŋā viꞌe e ta-taŋi ꞌā ꞌi te ꞌaroha i a ia.

²⁸ He hārui he uꞌi e Ietū ꞌe he kī: «E te ŋā viꞌe o Hērutarema ē, ꞌina kōrua ko ta-taŋi mōꞌoku. Ka ta-taŋi mo te kōrua ŋā poki ꞌe mo kōrua mau ꞌā.

²⁹ Nā e tuꞌu rō te mahana e kī rō: “¡Ko te koa i te ŋā viꞌe paꞌa, i te ŋā viꞌe kai aꞌu i te poki ꞌe i te ŋā viꞌe kai matuꞌa vahine!”.

³⁰ ꞌI rā ŋā mahana e kī takoꞌa rō e te nuꞌu: “E te maꞌuŋa ē, ka tanu mai koe i a mātou”.

³¹ Mo ai ꞌī e aŋa mai ꞌana i te ŋā meꞌe nei ꞌi ruŋa i a au, he tumu taꞌe paka-paka, ¿he aha rā nei te meꞌe ka aŋa atu ena ki a kōrua ki te tumu paka-paka?».

³² I maꞌu takoꞌa rō e rua kope taparahi-taꞌata mo tiŋaꞌi ꞌi ruŋa i te tātaurō ꞌi muri i a Ietū.

³³ I tuꞌu era ki te kona kī Kona o te Pakahera Taŋata Mate, he veo i a Ietū ꞌi ruŋa i te tātaurō ꞌe i tū ŋā kope era hoko rua ꞌi ruŋa i to rāua, e tahi ꞌi te pāꞌiŋa mataꞌu ꞌe te rua ꞌi te pāꞌiŋa maui. [

³⁴ He kī a Ietū: «E Koro, ka haka rehu koe i te meꞌe aŋa mai e te nuꞌu nei; kai ꞌite e aha ꞌā a rāua».] Te vaꞌehau ia ko no-noho ko pere ꞌā i te kahu o Ietū mo uꞌi ki a ai ki a ai ana topa.

³⁵ ꞌI ira te nuꞌu e uꞌi ꞌana; ꞌe te nuꞌu ra-rahi e haka ka-kata ꞌā: «Ko haka eꞌa ꞌana i te tētahi taŋata mai roto i te rāua ꞌati. Mo ai he ⌊Kiritō⌋ mau ꞌā ꞌe o te ꞌAtua i uŋa mai, ka haka ora i a ia ꞌā ꞌi te hora nei».

³⁶ Te vaꞌehau takoꞌa e haka meꞌe-meꞌe ꞌana ki a Ietū hai vaꞌai hai ꞌava moni taꞌe rahi

³⁷ ꞌe hai kī pē nei ē: «¡Mo ai ōꞌou he ꞌAriki o te hūrio, ka haka ora koe i a koe ꞌā!».

³⁸ ꞌI ruŋa i te pūꞌoko o te tātaurō o Ietū e tau rō ꞌā e tahi miro pararaha e hāꞌaki rō ꞌana: «He ꞌAriki o te hūrio».

³⁹ E tahi o tū ŋā taparahi-taꞌata veo era ꞌi muri i a Ietū pē rā ꞌā e kī era: —Mo ai ōꞌou he Kiritō, ¡ka haka ora koe i a koe ꞌe pē ira ꞌā i a māua!

⁴⁰ He ture e tū rua kope era o muri i a Ietū he kī: —¿ꞌIna ꞌō koe he riꞌa-riꞌa ꞌi te ꞌAtua, ka ai atu ꞌī tāua ko haka ūtuꞌa ꞌā pa he haka ūtuꞌa iŋa ena i a ia?

⁴¹ Te ūtuꞌa nei e tano rō ꞌā mo tāua, he ꞌauhau o te meꞌe taꞌe tano aŋa. ꞌE te taŋata ena ꞌina e tahi ōꞌona hape.

⁴² He kī haka ꞌou e tū kope era: —E Ietū, e manaꞌu koe ki a au ꞌi te hora o tuꞌu haka tere iŋa pa he ꞌariki.

⁴³ He pāhono e Ietū: —ꞌĪ a au he kī atu: ꞌarīnā mau nei ꞌā ꞌi muri i a au koe ꞌi te kona o tōꞌoku Matuꞌa.

He mate iŋa o Ietū

⁴⁴ Mai te hora kai ki te hora toru o te ahi-ahi i pōhāhā tahi ai te henua.

⁴⁵ Kai māꞌeha haka ꞌou te raꞌā, ꞌe te kahu puru i te kona hopeꞌa o te moꞌa o roto i te ⌊Kona Haꞌamuri ꞌAtua⌋ he paihi a vāeŋa.

⁴⁶ ꞌE a Ietū i haka pūai i ohu ai: «¡E Koro ōꞌoku ē, ꞌī a au he vaꞌai atu, ꞌi te hora nei, i tōꞌoku vārua ki tuꞌu rima!». I oti era te kī i te meꞌe nei he mate.

⁴⁷ I takeꞌa era e te kape o te rōmano i rā meꞌe, he haꞌahana-hana ki te ꞌAtua ꞌe he kī: «He aŋi ꞌā tū taŋata nei taŋata hape kore».

⁴⁸ Te nuꞌu taꞌatoꞌa takeꞌa i rā meꞌe he eꞌa he oho mai ira ko ꞌaroha atu ꞌā.

⁴⁹ Te repahoa taꞌatoꞌa o Ietū ꞌe te ŋā viꞌe oho mai Karirea ꞌi muri i a ia mai kōnui ꞌā e noho e uꞌi era.

He haka rē iŋa i te hakari o Ietū

^50-51 E ai rō ꞌana e tahi taŋata riva aŋa i te meꞌe tī-tika te ꞌīŋoa ko ⌊Kōsē⌋ o te kona ko Ārimatea, he kona o Hūrea. A ia o roto o te ⌊nūnaꞌa taŋata i a rāua te kī iŋa hopeꞌa o te haka tere hūrio⌋. A Kōsē e tiaki ꞌā ki te tuꞌu iŋa mai o te haka tere iŋa ꞌāpī o te ꞌAtua, ꞌe ꞌina kai peꞌe ki tū meꞌe aŋa era ki a Ietū e tū nūnaꞌa taŋata era.

⁵² He oho ki a Pirato he ani mo vaꞌai i te hakari o Ietū.

⁵³ I haka topa era mai ruŋa i te tātaurō, he viri hai tāvana rino, ꞌai ka maꞌu ka haka rē ꞌi roto i te kona pa he piha i ka-karo ꞌi roto i te māꞌea mo te pāpaku, kona kai haka rē ꞌā te pāpaku raꞌe.

⁵⁴ Rā mahana he mahana haka riva-riva mo te rua mahana he ⌊mahana haka ora⌋.

⁵⁵ Te ŋā viꞌe tuꞌu ꞌi muri i a Ietū mai Karirea he oho he uꞌi i tū kona era ꞌe pē hē i haka rē ai i te hakari o Ietū.

⁵⁶ I oti era he hoki ki te hare, he aŋa he haka rito i te manoꞌi ꞌe i te meꞌe haka ꞌou mo paru o te hakari o Ietū. ꞌE, ꞌi te ai ko tano ꞌā te mahana haka ora, he haka ora rā ŋā viꞌe, pa he meꞌe kī e te rāua haka tere iŋa.