Ruka 20 - Rapa Nui

¿ꞌA ꞌai i vaꞌai ki a Ietū i te parau mo aŋa i te meꞌe aŋa e ia?

¹ E tahi mahana, e haka ꞌite ꞌana a Ietū i te ⌊roŋo riva-riva o te ꞌAtua⌋ ki te taŋata ꞌi te Kona Haꞌamuri ꞌAtua, he tuꞌu te nuꞌu ra-rahi o te ⌊oromatuꞌa⌋, te ⌊maꞌori o te haka tere hūrio⌋ ꞌe te nuꞌu pūꞌoko haka tere hūrio,

² he ꞌui: —¿ꞌA ꞌai i vaꞌai atu i te parau mo aŋa ōꞌou i te ŋā meꞌe ena e koe e aŋa ena?

³ He kī e Ietū: —ꞌĪ a au he ꞌui takoꞌa atu; e pāhono mai.

⁴ ¿ꞌA ꞌai i uŋa mai i a Iovani mo ⌊papatito⌋, o te ꞌAtua, ꞌo o te taŋata?

⁵ He haꞌamata tū nuꞌu era he tātake ki a rāua ꞌā: «Mo kī o tātou: “O te ꞌAtua i uŋa mai”, pē nei ka kī mai era: “¿He aha ia a kōrua i taꞌe haka roŋo ai i tāꞌana vānaŋa?”.

⁶ ꞌE, e ko tano mo kī o tātou: “O te taŋata i uŋa mai”, ꞌo tamaꞌi mai e te nuꞌu hai māꞌea ki te mate. Ki te rāua manaꞌu, paꞌi, a Iovani he perofeta».

⁷ ꞌO ira i pāhono ai ki a Ietū ꞌina a rāua kai ꞌite ꞌa ꞌai a Iovani i uŋa mai mo papatito.

⁸ He kī e Ietū: —ꞌIna takoꞌa ia a au e ko kī atu ꞌa ꞌai i vaꞌai mai i te parau mo aŋa i te meꞌe aŋa e au.

Te nuꞌu hāpaꞌo i te kona ꞌoka vino

⁹ He haꞌamata a Ietū he ꞌaꞌamu ki te taŋata i te ꞌaꞌamu haꞌaauraꞌa nei: «E tahi taŋata he ꞌoka i tōꞌona ꞌāua hai vino. I oti era he haꞌaꞌau ananake ko te nuꞌu ꞌoka kai mo aŋa i rā henua ꞌe mo ꞌauhau ki a ia i te ꞌapa vino tano māꞌana mo te hoa henua. I oti era he eꞌa he oho ki te rua henua.

¹⁰ »I tano era te ꞌāvaꞌe mo kato, he uŋa e tū taŋata era i te tāvini ki rā kona mo kī ki tū nuꞌu ꞌoka kai era mo vaꞌai i te ꞌapa vino haꞌaꞌau era ananake. He toꞌo mai e rā nuꞌu he tiŋaꞌi ka piꞌi-piꞌi rō i rā tāvini, ꞌe ꞌai ka haka hoki ꞌina e tahi meꞌe maꞌu o te rima.

¹¹ »He uŋa e tū taŋata era i te tāvini haka ꞌou e tahi; pē ira takoꞌa ꞌana i meꞌe ai e tū nuꞌu era: he tiŋaꞌi koia ko vā-vā, ꞌe he haka hoki ꞌina e tahi meꞌe maꞌu o te rima.

¹² He uŋa ia i te toru kope, he tiŋaꞌi ꞌe he tute takoꞌa e rā nuꞌu.

¹³ »He kī ia ki a ia ꞌā tū taŋata era ōꞌona rā henua: “¿Hora nei he aha tāꞌaku meꞌe mo aŋa? ꞌĪ a au he uŋa i tāꞌaku poki haŋa rahi nei; pē ira pēaha ana moꞌa”.

¹⁴ »I takeꞌa era e tū nuꞌu hāpaꞌo vino era i rā poki, he kī ki a rāua ꞌana: “Ko te kope era te kope ki a ia ka topa ena te henua nei. Ki toꞌo mai ki tiŋaꞌi ki haka mate mo topa rō mai ꞌai mo tātou”.

¹⁵ »He toꞌo ia e tū nuꞌu era i rā poki mai roto i rā henua, he maꞌu he oho he tiŋaꞌi he haka mate». —Ki te kōrua manaꞌu ia, ¿he aha te meꞌe ka aŋa era ki rā nuꞌu e te taŋata era ōꞌona rā henua?

¹⁶ He oho he tiŋaꞌi i rā nuꞌu he haka mate ꞌe he vaꞌai i rā henua ki te tētahi nuꞌu mo hāpaꞌo. I ŋaroꞌa era e te nuꞌu i rā vānaŋa he kī: —¡Pē hiva ꞌā ana taꞌe topa te meꞌe tuꞌu pē nā!

¹⁷ He rori a Ietū he uꞌi ki tū nuꞌu era he kī: —¿He aha ia te auraꞌa o te vānaŋa nei o ruŋa i te ⌊Pāpaꞌi Moꞌa⌋: “Te māꞌea taꞌe haŋa era e te nuꞌu aŋa hare ko riro ꞌana he māꞌea matuꞌa haka noho hare”?

¹⁸ »Te kope viri a ruŋa i rā māꞌea he ꞌota-ꞌota; ꞌe mo viri o rā māꞌea ki ruŋa, he piꞌi-piꞌi tahi.

¹⁹ Tū ŋā oromatuꞌa ra-rahi era ꞌe te maꞌori o te haka tere hūrio i haŋa rō mo ꞌa-ꞌaru i a Ietū ꞌi rā hora mau ꞌā, he aŋi-aŋi: rā ꞌaꞌamu haꞌaauraꞌa era mo rāua. ꞌE, ꞌi te riꞌa-riꞌa ꞌi te taŋata, i taꞌe ꞌa-ꞌaru ai.

He kimi iŋa i te ꞌōtohe mo ꞌa-ꞌaru i a Ietū

²⁰ He uŋa e tū nuꞌu ra-rahi era o te hūrio i te ŋāŋata, e haka tuꞌu rō ꞌana pa he ŋāŋata riva, haka ꞌui ki a Ietū mo uꞌi i te rāveꞌa mo kī e Ietū i te vānaŋa taꞌe tano mo te rāua haka tere iŋa; pē ira he ravaꞌa e rāua i te ꞌōtohe mo ꞌa-ꞌaru ꞌe mo vaꞌai ki te rima o te suerekao rōmano mo haka ūtuꞌa.

²¹ Pē nei rā nuꞌu i ꞌui ai: —E te Maꞌori, ko ꞌite ꞌana a mātou: taꞌa meꞌe kī ꞌe taꞌa meꞌe hāpī he parautiꞌa. ꞌIna koe he haka tano i te vānaŋa mo haka koa i te taŋata. Te meꞌe hāpī ꞌāꞌau he ara mau ꞌana o te ꞌAtua.

²² Ki tuꞌu manaꞌu, ¿ko tano mau ꞌā a tātou e ꞌauhau nei i te moni kī mo ꞌauhau ki te ꞌariki o te rōmano?

²³ ꞌI te aŋi-aŋi e Ietū i te manaꞌu rake-rake o rā nuꞌu, he kī:

²⁴ —Ka haka takeꞌa mai rā e tahi ⌊renario⌋. I haka takeꞌa era e te nuꞌu he ꞌui: —¿O ꞌai te ꞌāriŋa ꞌe te ꞌīŋoa ena e pāpaꞌi ena o ruŋa? He pāhono e rā nuꞌu: —O te ꞌariki o te rōmano.

²⁵ He kī e Ietū: —Ka vaꞌai ia ki te ꞌariki rōmano te meꞌe o te ꞌariki rōmano, ꞌe ki te ꞌAtua te meꞌe o te ꞌAtua.

²⁶ ꞌIna e tahi meꞌe i ravaꞌa e rā nuꞌu o tū vānaŋa era ꞌa Ietū ꞌi muꞌa o te taŋata mo tano mo ꞌa-ꞌaru i a ia. ꞌI te māere ꞌi tū vānaŋa era, he mo-mou rō ꞌai.

¿E ora haka ꞌou rō te nuꞌu mate?

²⁷ I oho era he haka hāhine ki a Ietū tētahi nuꞌu ⌊saruseo⌋. Ki te rāua kī ꞌina he taŋata he ora haka ꞌou mai te mate. ꞌO ira i kī ai ki a Ietū i te meꞌe nei:

²⁸ —E te Maꞌori, pē nei a ⌊Mōtē⌋ i pāpaꞌi ai: mo mate o te taŋata ⌊hāipo-ipo⌋ e tahi ꞌe ꞌina kai ai te poki ararua ko tāꞌana viꞌe, te taina tane o rā kope e hāipo-ipo ki rā viꞌe mo ai o te poki mo maꞌu i te ꞌīŋoa o rā taina mate era ꞌe mo ai o tōꞌona hakaara.

²⁹ »ꞌI muꞌa ꞌā i ai rō e hitu taina tane. Te kope raꞌe he hāipo-ipo, ꞌe kai ai te poki i mate rō ai.

³⁰ Te rua

³¹ ꞌe te toru he hāipo-ipo ki tū viꞌe ꞌā, pē ira takoꞌa ꞌana tū tētahi taina era. Rā ŋā taina, kai ai hia te poki, i mā-mate rō ai.

³² I oho era he mate takoꞌa tū viꞌe era.

³³ »Iā. ꞌI te hora o te taŋata mo ora mai te mate, ana topa tāꞌue rā meꞌe, o roto o rā ŋā taina, ¿ꞌa ꞌai mau rā viꞌe? A hi-hitu, paꞌi, i hāipo-ipo ai ki tū viꞌe ꞌā.

³⁴ He pāhono e Ietū: —Te taŋata ꞌe te viꞌe ꞌi te ao nei e hāipo-ipo rō ꞌā.

³⁵ ꞌE te nuꞌu tano ki te ꞌAtua mo ora mai te mate ꞌe mo oꞌo ki te ao haka tere e ia e ko hāipo-ipo

³⁶ ꞌi te meꞌe era e ko mate haka ꞌou a rāua pa he merahi, ꞌe he riro rō ꞌai he ŋā poki o te ꞌAtua ꞌo te ai ko haka ora ꞌā mai te mate.

³⁷ ꞌE te ora o te taŋata mai te mate: a Mōtē mau ꞌana i haka ꞌite mai o ruŋa ꞌi te kona pāpaꞌi e ia o te tumu ura ꞌi te ahi. Pē nei, paꞌi, i kī ai e te ꞌAtua ꞌi rā kona ki a Mōtē: «A au he ꞌAtua, kope ki a ia e haꞌamuri ena e te kōrua tupuna ko ⌊ꞌAparahama⌋, ko Itaꞌata, ꞌe ko Hākovo». I kī ai i te vānaŋa nei ko mate era ꞌā rā nuꞌu.

³⁸ ¡Te ꞌAtua, paꞌi, he ꞌAtua o te nuꞌu ora; mōꞌona e ora tahi rō ꞌā!

³⁹ He kī ia e te tētahi maꞌori o te haka tere hūrio: —Ko tano mau ꞌā taꞌa vānaŋa, e te Maꞌori ē.

⁴⁰ ꞌI te huru o te pāhono iŋa o Ietū, ꞌina kai haŋa haka ꞌou rā nuꞌu mo ꞌui e tahi meꞌe.

¿Mai i a ai ka haka ara mai ena te ⌊Kiritō⌋?

⁴¹ He ꞌui e Ietū: —¿He aha kōrua e kī ena: te Kiritō mai i a ⌊Tāvita⌋ ka haka ara mai ena?

⁴² I pāpaꞌi ai e Tāvita ꞌi ruŋa i te puka o te Hīmene: “ꞌA Iehoha te ꞌAtua i kī rō ki tōꞌoku Pūꞌoko Haka Tere: ‘Ka noho koe ꞌi tōꞌoku pāꞌiŋa mataꞌu,

⁴³ ꞌātā ka haka rē rō e au i te nuꞌu taꞌe haŋa atu ki a koe ꞌi raro o tuꞌu vaꞌe’”.

⁴⁴ »Hai kī o Tāvita i te vānaŋa era mo te Kiritō, e ꞌite nei e tātou: te Kiritō taꞌe nō he hakaara o Tāvita.

Te huru o te maꞌori o te haka tere hūrio

⁴⁵ E noho e haka roŋo tahi ꞌā te taŋata, he kī e Ietū ki tāꞌana nuꞌu hāpī:

⁴⁶ «E uꞌi kōrua ꞌo riro pa he maꞌori o te haka tere hūrio, nuꞌu haŋa mo hāꞌere e uru rō ꞌā i te kahu ro-roa mo haka tuꞌu pa he nuꞌu hōnui ꞌe mo ꞌaroha e te taŋata ꞌi te ara pa he ꞌariki. He uꞌi nō te aŋa mo noho e rāua i te pepe o te nuꞌu hōnui o roto i te ⌊hare pure hūrio⌋ ꞌe o te kona ŋoŋoro.

⁴⁷ He hiko nō te aŋa i te hare o te ŋā viꞌe hove mo rāua, ꞌe mo naꞌa i rā meꞌe taꞌe tano aŋa era e rāua, he haka roa-roa te pure iŋa ꞌi muꞌa o te taŋata mo haka tuꞌu i a rāua pa he nuꞌu riva. ꞌĪ a au he kī atu: ꞌata paŋahaꞌa te ūtuꞌa ka topa ena ki rā ŋā nuꞌu».