Ruka 2 - Rapa Nui

He poreko iŋa o Ietū

¹ ꞌI rā noho iŋa, he kī e Akutino, ꞌariki o te rōmano, mo haka pāpaꞌi i te nuꞌu o te henua taꞌatoꞌa ko ia te ꞌariki mo ꞌite e hia taŋata.

² Te pāpaꞌi raꞌe nei i aŋa ai ꞌi te hora era ko Kīrino te suerekao o Tīria.

³ Te taŋata taꞌatoꞌa ana haka pāpaꞌi ꞌi te kāiŋa o te rāua hakaara.

⁴ He eꞌa ia a ⌊Kōsē⌋ mai Nātāreta, he kona o Karirea, he oho ki Vērene ꞌi Hūrea, he kona poreko o tōꞌona hakaara ko ⌊Tāvita⌋,

⁵ mo haka pāpaꞌi i a rāua ko ⌊Māria⌋, viꞌe ꞌāꞌana, e hānautama rō ꞌā.

⁶ E noho nō ꞌana ꞌi Vērene he tano te mahana o tū poki era mo poreko.

⁷ He poreko poki tane, poki ꞌatariki ꞌa Māria. He haꞌī hai kahu ꞌe he haka moe ꞌi roto i te meꞌe hāŋai puaꞌa. A rāua, paꞌi, ꞌi te kona hāpaꞌo puaꞌa, ꞌi te meꞌe ko ꞌī tahi ꞌā te hare e te taŋata.

He nuꞌu hāpaꞌo māmoe o ꞌuta

⁸ ꞌI te kona e tahi o ꞌuta hāhine ki Vērene e noho rō ꞌā te nuꞌu e hāpaꞌo ꞌana i te rāua māmoe ꞌi te pō.

⁹ ꞌĪ ka uꞌi atu ena ko te merahi e tahi, ꞌe te mana o te ꞌAtua ko ꞌana-ꞌana ꞌā e haka vari era i a rāua. He mate rō atu ꞌai ananake ꞌi te riꞌa-riꞌa.

¹⁰ He kī e te merahi: «ꞌIna kōrua ko riꞌa-riꞌa. E maꞌu mai ꞌana a au i te parau ꞌāpī riva-riva mo kōrua, he meꞌe hopeꞌa o te nui-nui mo koa o te taŋata taꞌatoꞌa.

¹¹ ꞌI ꞌaŋarīnā, ꞌi te kona poreko o Tāvita ko Vērene, i poreko ai te ⌊Kiritō⌋, he Pūꞌoko Haka Tere o tātou; māꞌana e haka eꞌa i te taŋata mai roto i te ūtuꞌa o te hara ꞌe e vaꞌai i te ora ꞌāpī ꞌina he hopeꞌa raꞌa o te ꞌAtua.

¹² Mo aŋi-aŋi e kōrua ko ai, he poki e tahi e haꞌī rō ꞌana hai kahu ꞌe e haka moe rō ꞌā ꞌi roto i te meꞌe hāŋai puaꞌa».

¹³ ꞌI tū hora ꞌā he takeꞌa e rā nuꞌu meꞌe rahi atu merahi ꞌi muri i tū merahi era e haꞌahana-hana tahi ꞌā ki te ꞌAtua pē nei ē:

¹⁴ «¡Ko te nui-nui ꞌe ko te pūai i a koe, e te ꞌAtua ē! ¡Ka ai te haumārū ꞌi roto i te taŋata taꞌatoꞌa o te ao ꞌi ruŋa i a rāua te koa o te ꞌAtua!».

¹⁵ I hoki era te merahi ki te raŋi, he kī tū nuꞌu hāpaꞌo māmoe era: «Matu ki oho tātou ki Vērene ki uꞌi i te meꞌe haka ꞌite mai ena e te ꞌAtua».

¹⁶ He oho ananake, i keꞌo-keꞌo te vaꞌe, ki rā kona. He takeꞌa i a Māria, i a Kōsē, ꞌe i te poki e moe rō ꞌā ꞌi roto i te meꞌe hāŋai puaꞌa.

¹⁷ I takeꞌa era he haka ꞌite i tū meꞌe kī era e te merahi o ruŋa i rā poki.

¹⁸ Te nuꞌu ŋaroꞌa i rā meꞌe ꞌaꞌamu e tū nuꞌu hāpaꞌo māmoe era he māere tahi.

¹⁹ ꞌE, a Māria e maꞌu tahi rō ꞌana i rā ŋā meꞌe ꞌi roto i a ia, ꞌe e manaꞌu rahi rō ꞌana o ruŋa.

²⁰ He hoki he oho tū nuꞌu hāpaꞌo māmoe era koia ko haꞌahana-hana i te ꞌAtua o ruŋa i te meꞌe ŋaroꞌa ꞌe takeꞌa e rāua; ko tano tahi ꞌana, paꞌi, pa he meꞌe kī era e te merahi.

He maꞌu iŋa i a Ietū ki te Kona Haꞌamuri ꞌAtua

²¹ ꞌI te vaꞌu mahana o te poreko o tū poki era, he maꞌu he haka tāpaꞌo i te tāpaꞌo iŋa ⌊hūrio⌋, he hore i te kiri o te kinoŋa, ꞌe he nape i te ꞌīŋoa o te poki ko Ietū, he ꞌīŋoa kī e te merahi ki a Māria mo nape ꞌi te hora era kai tupu ꞌā te poki.

²² I tuꞌu era te mahana mo haka tano i te meꞌe kī ꞌi ruŋa i te ⌊haka tere iŋa ꞌa Mōtē⌋ o ruŋa i te ⌊haka maꞌitaki⌋ iŋa o te viꞌe poreko poki, he eꞌa a Kōsē ararua ko Māria he maꞌu i tū poki era ki Hērutarema ki muꞌa o te ꞌAtua.

²³ I aŋa ai pē ira ꞌo te ai e hāꞌaki rō ꞌana ꞌi ruŋa i te ⌊haka tere iŋa o te ꞌAtua haka pāpaꞌi ki a Mōtē⌋ pē nei ē: «Taꞌatoꞌa poki ꞌatariki tane e haꞌataꞌa mo te ꞌAtua».

²⁴ ꞌO ira a rāua i oho ai mo vaꞌai i te tūtia kī e te ꞌAtua: e rua manu pa he pāroma ꞌo e rua pāroma taŋa.

²⁵ ꞌI rā noho iŋa e ai rō ꞌana e tahi taŋata noho ꞌi Hērutarema te ꞌīŋoa ko Timione, taŋata tano ki te mata o te ꞌAtua, haꞌamuri ꞌe moꞌa ki a ia; he tiaki nō te aŋa ki te mahana mo haka koa e te ꞌAtua i te itaraera hai uŋa i te Kiritō. ꞌI ruŋa i a Timione te ⌊Vārua Maitai⌋ ꞌe

²⁶ ko haka ꞌite era ꞌā ki a ia ꞌina e ko mate ꞌātā ki te takeꞌa iŋa i te Kiritō kī e te ꞌAtua e uŋa rō mai e ia.

²⁷ He haka oho ia e te Vārua Maitai ki te Kona Haꞌamuri ꞌAtua, ꞌe ꞌī tū nuꞌu matuꞌa era o Ietū ko maꞌu takoꞌa ꞌana i te poki ki ira mo haka tano ki te haka tere iŋa ꞌa Mōtē.

²⁸ I takeꞌa era e Timione, he hapai i tū poki era he haꞌahana-hana ki te ꞌAtua pē nei ē:

²⁹ «Te meꞌe hōrea mai era e koe, e te ꞌAtua ē, ko tano tahi ꞌā. Hora nei ko tano ꞌā tuꞌu tāvini nei mo mate.

³⁰ Ko takeꞌa ꞌana, paꞌi, e au te kope i a ia te mātou ora

³¹ uŋa mai e koe mo takeꞌa e te hau taꞌatoꞌa,

³² he mōrī haka māꞌeha i te taŋata o te ao ꞌe hai ia ka nui-nui ena te itaraera».

³³ Tū nuꞌu matuꞌa era o Ietū he māere ꞌi te vānaŋa kī e Timione.

³⁴ He haꞌamaitai ia e Timione i a rāua ꞌe ꞌai ka kī ki a Māria: «Hai poki nei meꞌe rahi nō atu nuꞌu o Itaraera ka haka ūtuꞌa ena ꞌe meꞌe rahi nō atu nuꞌu ka ravaꞌa ena i te ora ꞌāpī ꞌina he hopeꞌa raꞌa. Mo rā meꞌe i haꞌataꞌa rō ai e te ꞌAtua i te poki nei. E riro rō a ia pa he tāpaꞌo haka takeꞌa i te meꞌe haŋa o te ꞌAtua, ꞌe meꞌe rahi nuꞌu ka taꞌe haŋa ena ki a ia.

³⁵ Pē ira ka takeꞌa ena i te huru mau o te manaꞌu o te taŋata. ꞌE te meꞌe taꞌatoꞌa nei, e Māria ē, ka ai ena mōꞌou pa he mamae ena ꞌā o te hoe ꞌo-ꞌoka i tuꞌu māhatu».

³⁶ ꞌI te ⌊Kona Haꞌamuri ꞌAtua⌋ takoꞌa te viꞌe perofeta te ꞌīŋoa ko ꞌAna, he poki ꞌa Penuera o te nūnaꞌa hakaara o ꞌĀtere. A ia ko rūꞌau atu ꞌā. E ꞌāpī nō ꞌana i ⌊hāipo-ipo⌋ ai, ꞌe e hitu nō matahiti i noho ai ararua ko tāꞌana kenu.

³⁷ ꞌE, ki rā hora, ka vaꞌu ꞌahuru mā maha matahiti o tōꞌona hove. Te aŋa mau nō ꞌāꞌana, ka pō ka ꞌōtea, he noho ꞌi te Kona Haꞌamuri ꞌAtua, he pure ꞌe he tapu i te kai.

³⁸ He tuꞌu rā viꞌe ꞌi rā hora mau ꞌā ki te kona ꞌi ira a kuā Māria. He haꞌamata ia he māuru-uru ki te ꞌAtua ꞌe he vānaŋa o ruŋa i rā poki ki te nuꞌu taꞌatoꞌa o ira e ŋatu rō ꞌā te haŋu ki te eꞌa iŋa o Hērutarema mai roto i te meꞌe taꞌe tano.

He hoki iŋa ki Nātāreta

³⁹ I oti era te aŋa i te meꞌe taꞌatoꞌa hāꞌaki o ruŋa i te haka tere iŋa ꞌa Mōtē, he hoki a kuā Kōsē ki Karirea ki te kona noho o rāua ko Nātāreta.

⁴⁰ He nui-nui he oho ia a Ietū koia ko pūai ꞌe ko mārama-rama, ꞌe ꞌi ruŋa i a ia te riva rahi ꞌe te haŋa o te ꞌAtua.

ꞌI te Kona Haꞌamuri ꞌAtua a Ietū

^41-42 Paurō te matahiti e oho era a Kōsē ararua ko Māria ki Hērutarema ki te ⌊ŋoŋoro o te Pakate⌋, pa he meꞌe rava aŋa e te hūrio ꞌi rā ŋoŋoro. I tano era te hoꞌe ꞌahuru mā piti matahiti o Ietū, he maꞌu takoꞌa e kuā Kōsē ꞌi muri i a rāua.

⁴³ I oti era te ŋoŋoro, he hoki he oho a kuā Kōsē ki te rāua hare. Mā te taꞌe ꞌite, a Ietū ko noho ꞌā ꞌi Hērutarema;

⁴⁴ e manaꞌu era ꞌai e oho era ꞌi muri i te tētahi nuꞌu. ꞌI te ahi-ahi o te mahana raꞌe o te rāua oho, he kimi a roto i te nuꞌu huaꞌai ꞌe a muri i te nuꞌu māhani.

⁴⁵ ꞌE ꞌina kai takeꞌa i a Ietū. ꞌO ira i hoki i kimi ai a Hērutarema.

⁴⁶ ꞌI te toru mahana i takeꞌa iho ai ꞌi te Kona Haꞌamuri ꞌAtua e noho rō ꞌana ꞌi muri i te nuꞌu ⌊maꞌori o te haka tere hūrio⌋ e haka roŋo ꞌana koia ko ꞌui.

⁴⁷ He māere tahi te nuꞌu ŋaroꞌa ꞌi te mārama-rama ꞌe ꞌi te huru o tāꞌana vānaŋa e pāhono era.

⁴⁸ I takeꞌa era e tōꞌona nuꞌu matuꞌa, he māere ꞌe he kī e te matuꞌa vahine: —E haŋu, ¿he aha koe i aŋa mai ai i te meꞌe pē nā? Ko poto ꞌā te māua haŋu ꞌi te kimi iŋa atu i a koe.

⁴⁹ He kī e Ietū: —¿He aha rā kōrua i kimi mai ai? ¿Kai ꞌite ꞌana ꞌō kōrua: māꞌaku e aŋa i te aŋa o tōꞌoku Matuꞌa?

⁵⁰ Kai aŋi-aŋi e tū ŋā matuꞌa era i te haꞌaauraꞌa o rā vānaŋa.

⁵¹ He hoki ia a Ietū ki Nātāreta ꞌi muri i tōꞌona matuꞌa ꞌe he haꞌatura ki te rāua meꞌe kī. Te ŋā meꞌe taꞌatoꞌa nei e maꞌu tahi rō ꞌā e tōꞌona matuꞌa vahine ꞌi roto i a ia.

⁵² He nui-nui he oho a Ietū koia ko pūai ko oho te mārama-rama. E haŋa rahi rō ꞌā e te ꞌAtua ꞌe e te taŋata taꞌatoꞌa.