Ruka 17 - Rapa Nui

E uꞌi kōrua ꞌo hara

¹ He kī e Ietū ki tāꞌana nuꞌu hāpī: «ꞌI te ao nei e ko taꞌe ai te meꞌe mo uŋa i te taŋata a roto i te hara; ꞌe, ¡ko te ꞌaroha ꞌi te kope haka hara i te rua!

² Te ūtuꞌa o te ꞌAtua mo te taŋata haka hara i te kope taꞌe pūai rahi o te haka moe iŋa i tōꞌona manaꞌu ꞌi ruŋa i a au he ūtuꞌa ꞌata taparahi-taꞌata ki te ūtuꞌa he here hai māꞌea paŋahaꞌa ki te ŋao ꞌai ka hoa ki roto i te vaikava.

³ ¡ꞌO ira, e uꞌi kōrua! »Mo hara o tuꞌu taina, e ture; ꞌe mo haka roŋo atu ꞌe mo haka tapa mai roto, e haka rehu tōꞌona hara.

⁴ Ka ai atu ꞌi te mahana mau nō e tahi e hitu hara iŋa atu ōꞌona, ꞌe e hitu kī iŋa atu e ko aŋa haka ꞌou e ia, e haka rehu tahi koe».

Te pūai o te meꞌe he ⌊haka moe i te manaꞌu⌋ ꞌi ruŋa i te ꞌAtua

⁵ He ani ia e te ⌊ꞌāpōtoro⌋ ki a Ietū mo haka pūai i te rāua haka moe iŋa i te manaꞌu ꞌi ruŋa i te ꞌAtua.

⁶ He pāhono e Ietū: «ꞌĀhani te kōrua haka moe iŋa o te manaꞌu ꞌi ruŋa i te ꞌAtua korohaŋa pa he ꞌiti-ꞌiti ena ꞌā o te karu mostasa, e tano nō kōrua mo kī ki te tumu nei: “Ka oꞌi tuꞌu aka, ꞌai ka oho ka ꞌoka rō ꞌi roto i te vaikava”, ꞌe he haꞌatura atu.

He tāvini iŋa ki te ꞌAtua

⁷ »Mo ai e tahi o roto o kōrua e ai rō ꞌana tōꞌona tāvini e hoki mai ꞌā mai ꞌuta mai te ꞌārote iŋa ꞌo mai te hāpaꞌo iŋa i te māmoe, ¿e kī mau rō ki rā tāvini: “Ka uru mai ka noho, ki ao atu tāꞌau o te kai”?

⁸ E ko kī pē ira. Pē nei ka kī era: “Ka uru ka tunu mai tāꞌaku o te kai. E kai ꞌana a au, e tiaki ꞌiti-ꞌiti mai koiꞌite e ai nō ꞌā tāꞌaku meꞌe haŋa. Ki oti koe ana kai”.

⁹ ꞌE rā taŋata ꞌina he māuru-uru ki te tāvini; he aŋa mau ꞌā, paꞌi, o te tāvini.

¹⁰ »Pē ira takoꞌa ꞌā mo kōrua. Ka oti ena te aŋa taꞌatoꞌa kī atu e te ꞌAtua mo aŋa, e manaꞌu kōrua: “A mātou he tāvini. Te meꞌe mau nō o mātou i aŋa he haꞌatura ꞌe he aŋa i te meꞌe kī mai e ia; ꞌo te aha nō ana māuru-uru mai”».

He ŋāŋata e hoꞌe ꞌahuru māui-ui ꞌi te rēpera

¹¹ ꞌI te ara oho o Ietū ki Hērutarema i vari ai a te tītaꞌa henua vahi i Karirea mai ⌊Tāmāria⌋.

¹² I tuꞌu era ki te kona e tahi, he haka hāhine e hoꞌe ꞌahuru taŋata māui-ui ꞌi te rēpera, ꞌe mai kōnui

¹³ i ohu ai: —¡E Ietū, e te Maꞌori ē, ka haka ꞌaroha koe i a mātou!

¹⁴ I takeꞌa era e Ietū, he kī: —Ka oho ka haka takeꞌa i a kōrua ki te ⌊oromatuꞌa⌋. E oho nō ꞌā tū nuꞌu rēpera era he ora rō ꞌai te rāua māui-ui.

¹⁵ E tahi o rā nuꞌu, i takeꞌa era ko ora ꞌā a ia, he hoki he oho koia ko te haꞌahana-hana i te ꞌAtua hai reꞌo pūai.

¹⁶ He tū-turi ꞌi muꞌa o Ietū, he noi ꞌātā ka puā rō te tira ki ruŋa i te ꞌōꞌone mo māuru-uru. Rā taŋata o Tāmāria.

¹⁷ He kī e Ietū: «E hoꞌe ꞌahuru kope i haka ora e au. ¿Hē ia te tētahi nuꞌu era?

¹⁸ O rā ŋā nuꞌu, ¿he taŋata kē nō nei i hoki mai haꞌamuri ki te ꞌAtua?».

¹⁹ He kī ia e Ietū ki tū taŋata era: «Ka eꞌa koe ki ruŋa ka oho. ꞌI te haka moe ōꞌou i te manaꞌu ꞌi ruŋa i te ꞌAtua i ora ena tuꞌu māui-ui».

¿A hē ka haꞌamata te ⌊haka tere iŋa ꞌāpī o te ꞌAtua⌋?

²⁰ He ꞌui e te nuꞌu ⌊fariseo⌋ ki a Ietū: —¿A hē ka haꞌamata te haka tere iŋa ꞌāpī o te ꞌAtua vānaŋa mai e koe? He pāhono e Ietū: —Te tuꞌu iŋa mai o te haka tere iŋa ꞌāpī o te ꞌAtua taꞌe he meꞌe mo takeꞌa e te mata.

²¹ E ko kī atu pē nei ē: “ꞌĪ aꞌa” ꞌo “ꞌAi rā”; te haka tere iŋa ꞌāpī o te ꞌAtua nā ko ai era ꞌā ꞌi roto i te māhatu o te taŋata.

²² He kī ki tāꞌana nuꞌu hāpī: «Nā e tuꞌu rō te mahana e topa rō te ꞌati taparahi-taꞌata, ꞌe a kōrua e pohe rō mo noho ꞌi muri i te ⌊Poki o te taŋata⌋ ka ai atu mo te mahana nō e tahi. ꞌE, ꞌi rā hora, e ko tano vave kōrua mo noho ꞌi muri i a ia.

²³ Tētahi e kī rō pē nei ē: “ꞌĪ te Poki o te taŋata ꞌī aꞌa ꞌo ꞌai rā”. E uꞌi kōrua ꞌo haka roŋo rō.

²⁴ Pa he māꞌeha iŋa o te ꞌuira e takeꞌa ena e te taŋata ꞌi te kona taꞌatoꞌa, pē ira ka takeꞌa ena e te nuꞌu te hoki iŋa mai o te Poki o te taŋata.

²⁵ Ka ai atu pē ira, ꞌi raꞌe te Poki o te taŋata ka ꞌamo ena i te ꞌati ꞌe i te mamae ꞌi roto i tōꞌona māhatu, he taꞌe haŋa e te nuꞌu o te hora nei.

²⁶ »ꞌE te noho iŋa o te taŋata ꞌi te ŋā mahana era ko hāhine ꞌā mo hoki mai o te Poki o te taŋata, pa he noho iŋa ꞌā o te nuꞌu ꞌi te hora o Nōē.

²⁷ E kai nō ꞌana, e unu nō ꞌā ꞌe e ⌊hāipo-ipo⌋ nō ꞌana te taŋata i tano rō ai te hora o Nōē mo uru ki roto i te pahī, ꞌe he haꞌamata he hoa te ꞌua ꞌe he mā-mate tahi rō ꞌai.

²⁸ »Pē ira takoꞌa ꞌā te noho iŋa o te nuꞌu ꞌi te hora o ⌊Rota⌋: e kai ꞌā, e unu ꞌā, e hoꞌo ꞌā, e hoꞌo mai ꞌā, e ꞌoka ꞌā i te kai ꞌe e aŋa ꞌana i te hare.

²⁹ ꞌE, i eꞌa era a Rota mai ⌊Tōroma⌋, he hoa mai mai te raŋi te ahi ꞌe te azufre, ꞌe he mā-mate tahi rō ꞌai te nuꞌu o ira.

³⁰ »Pē ira takoꞌa ꞌā ꞌi te mahana ka tuꞌu haka ꞌou mai ena te Poki o te taŋata.

³¹ ꞌI rā mahana te kope ꞌi haho o te hare, e uꞌi ꞌo hoki ki roto ki te meꞌe toꞌo mai; ꞌe te kope aŋa ꞌi ꞌuta, e uꞌi ꞌo hoki ki tōꞌona hare.

³² E manaꞌu ki te meꞌe topa ki te viꞌe ꞌa Rota, hora uꞌi era a tuꞌa.

³³ »ꞌĪ a au he kī atu: te kope hārui i a au ꞌe i tāꞌaku hāpī hai tuaꞌivi mo hāpaꞌo i a ia ꞌo mate ꞌe mo aŋa i tāꞌana meꞌe nō era i haŋa, e ko ai i a ia te ora ꞌāpī ꞌina he hopeꞌa raꞌa vaꞌai e te ꞌAtua. ꞌE, te kope haka rē i tāꞌana meꞌe haŋa mo haꞌatura mai ki a au, he ravaꞌa e ia rā ora.

³⁴ »ꞌĪ a au he kī haka ꞌou atu: ꞌi rā pō, o te kope e rua ꞌi ruŋa i tū roꞌi ꞌā, e tahi ka toꞌo ena, e tahi ka haka rē ena.

³⁵ ꞌE o te viꞌe e rua e oro ꞌana i te tariko mo te haraoa mata, e tahi ka toꞌo ena, e tahi ka haka rē ena. [

³⁶ ꞌE o te taŋata e rua aŋa ꞌi ꞌuta, e tahi ka toꞌo ena, e tahi ka haka rē ena.]»

³⁷ He ꞌui ia ki a Ietū: —¿ꞌI hē te meꞌe ena ka topa ena? He pāhono e Ietū: —E ꞌite nei e tātou i te kona ai o te meꞌe mate hai taka-taka ꞌi rā kona o te manu kai i te meꞌe mate. Pē ira ka ꞌite takoꞌa ena ko hāhine ꞌā te hoki iŋa mai o te Poki o te taŋata hai topa iŋa o te ŋā meꞌe taꞌatoꞌa nei.