Ruka 13 - Rapa Nui

Te riva o te meꞌe he huri o te manaꞌu ki te ꞌAtua

¹ ꞌI rā ŋā mahana, i oho i ꞌaꞌamu rō e te nuꞌu ki a Ietū: a Pirato i haka tiŋaꞌi i haka mate rō i te tētahi taŋata o Karirea ꞌi te hora e tūtia ꞌana rā nuꞌu i te ꞌanimare ki te ꞌAtua.

² He ꞌui ia e Ietū: «¿Ki te kōrua manaꞌu, te meꞌe topa era ki rā nuꞌu ꞌo te ai ꞌata hau a rāua ꞌi te hara ki te tētahi nuꞌu o Karirea?

³ Taꞌe pē ira. A kōrua mau ena ꞌā, mo taꞌe huri o te manaꞌu ki te ꞌAtua, he mate ꞌe he haꞌataꞌa mau rō ꞌāvai mai muri i a ia.

⁴ »ꞌE te ŋāŋata era e hoꞌe ꞌahuru mā vaꞌu mā-mate era he viri o te hare ruŋa nui ko Tiroē ki ruŋa i a rāua, ki te kōrua manaꞌu, ¿he ai i hau rō atu a rāua ꞌi te hara ki te tētahi atu nuꞌu o Hērutarema?

⁵ Taꞌe pē ira. A kōrua mau ena ꞌā, mo taꞌe huri o te manaꞌu ki te ꞌAtua, he mate ꞌe he haꞌataꞌa mau rō ꞌāvai mai muri i a ia».

He ꞌaꞌamu haꞌaauraꞌa o te tumu pika taꞌe hua

⁶ He ꞌaꞌamu ia e Ietū i te ꞌaꞌamu haꞌaauraꞌa nei: «He taŋata e tahi e ai rō ꞌana e tahi tumu pika ꞌi roto i tōꞌona ꞌāua ꞌoka vino. ꞌI te mahana e tahi he oho he uꞌi koiꞌite ko hua ꞌā, ꞌe ꞌina kai ravaꞌa e tahi pika.

⁷ He kī ki te taŋata hāpaꞌo vino: “¿Ko ꞌite ꞌā koe? Ka toru matahiti o te oho mai ōꞌoku o te uꞌi a ruŋa i te tumu nei hai pika, ꞌe ꞌina e tahi. Ka paꞌo ki raro. He māuꞌa henua te tumu ena, ꞌina he meꞌe hua”.

⁸ »He pāhono e tū taŋata era ꞌāꞌana te hāpaꞌo i rā kona: “Ka haka rē nō koe i te tumu ena e tahi matahiti haka ꞌou. ꞌĪ a au he haka heu ꞌe he huri hai meꞌe mo haka taiko.

⁹ Pē ira pēaha ana hua; ꞌe mo taꞌe hua, ꞌi rā hora ana paꞌo iho”».

He haka ora iŋa o Ietū i te viꞌe māui-ui

¹⁰ ꞌI te ⌊mahana haka ora⌋ e tahi e hāpī ꞌā a Ietū i te nuꞌu ꞌi roto i te ⌊hare pure hūrio⌋.

¹¹ ꞌI ira e tahi viꞌe ka hoꞌe ꞌahuru mā vaꞌu matahiti o tōꞌona māui-ui: o te tātane i haka piko-piko i te tuaꞌivi; ꞌo ira ꞌina he māroa riva-riva.

¹² I takeꞌa era e Ietū he raŋi mo oho ꞌe he kī: «E nua, he ora tuꞌu māui-ui ena».

¹³ He haka eke a Ietū i tōꞌona rima ki ruŋa o rā viꞌe. ꞌI tū hora ꞌā he māroa riva-riva ꞌe he haꞌamata he haꞌahana-hana ki te ꞌAtua.

¹⁴ Te taŋata pūꞌoko haka tere o tū hare pure hūrio era he riri rō atu ꞌai ꞌo te haka ora e Ietū i tū viꞌe era ꞌi te mahana haka ora, ꞌe he kī ki te nuꞌu: «E ono mahana e ai ena mo aŋa. E oho mai kōrua ꞌi rā ŋā mahana mo haka ora atu, taꞌe ꞌō pē nei ē: ꞌi te mahana haka ora».

¹⁵ He pāhono e Ietū: «E te taŋata riva a te haho ē, ¿ꞌina ꞌō kōrua he ve-vete i te ꞌuei ꞌo i te muni ꞌi te mahana haka ora ꞌe he maꞌu he haka unu hai vai?

¹⁶ ꞌE te viꞌe nei, he hakaara o ⌊ꞌAparahama⌋, ko here-here ꞌana hai māui-ui e te tātane ka hoꞌe ꞌahuru mā vaꞌu matahiti, ¿e ko tano hō mo haka ora i a ia ka ai atu he mahana haka ora?».

¹⁷ I kī era e Ietū i tū vānaŋa era, he haꞌamā rō atu ꞌai te nuꞌu riri mōꞌona. ꞌE te nuꞌu haka ꞌou o roto he koa ꞌi te takeꞌa i te meꞌe nui-nui aŋa e Ietū.

He ꞌaꞌamu haꞌaauraꞌa o te karu mostasa

¹⁸ He kī takoꞌa e Ietū: «¿Pa he aha ꞌā te ⌊haka tere iŋa ꞌāpī o te ꞌAtua⌋? ¿Hai aha a au ana haka haꞌaauraꞌa atu?

¹⁹ Hai karu mostasa ꞌiti-ꞌiti: ka ꞌoka era e te taŋata ꞌi ꞌuta, he tupu, he nui-nui, he riro he tumu ꞌe he aŋa e te manu i te rāua hakapupa ꞌi ruŋa».

He ꞌaꞌamu haꞌaauraꞌa o te revaura

²⁰ He kī haka ꞌou e Ietū: «¿Hai aha a au ana haka haꞌaauraꞌa atu i te haka tere iŋa ꞌāpī o te ꞌAtua?

²¹ Hai ꞌapa ꞌiti-ꞌiti revaura hoa e te viꞌe ki roto i te haraoa mata mo haka ahu tahi».

Te ꞌōpani vako-vako

²² ꞌI te ara o Ietū ki Hērutarema, he hāpī te aŋa i te nuꞌu o te kona tuꞌu.

²³ He ꞌui e te kope e tahi: —E Ietū, ¿nuꞌu taꞌe rahi te nuꞌu ka ravaꞌa ena i te ora ꞌāpī ꞌina he hopeꞌa raꞌa vaꞌai e te ꞌAtua? He pāhono e Ietū:

²⁴ «E uꞌi kōrua e uru a roto i te ꞌōpani vako-vako. ꞌĪ a au he kī atu: nuꞌu rahi te nuꞌu haŋa mo uru ki roto i te ao haka tere e te ꞌAtua ꞌe nuꞌu taꞌe rahi ka oꞌo ena.

²⁵ Ki puru te ꞌōpani e te kope era ōꞌona rā kona, ka ohu pūai ena kōrua: “ꞌEi, ka mātaki mai te ꞌōpani”. He pāhono atu e rā kope: “Kai ꞌite a au ko ai kōrua ꞌe o hē kōrua”.

²⁶ He haꞌamata ia he kī e kōrua: “Ananake tātou i kai ai, i unu ai, ꞌe ꞌi te mātou ara koe i hāpī ai”.

²⁷ He pāhono haka ꞌou atu e rā kope: “Kai ꞌite a au ko ai kōrua. ¡Ka mahiti ka oho kōrua mai nei, e te nuꞌu aŋa i te meꞌe taꞌe tano ē!”.

²⁸ »ꞌI rā hora mau ꞌā a kōrua ka taŋi ka ꞌau-ꞌau raꞌa niho ena ꞌi te takeꞌa i a ꞌAparahama, i a Itaꞌata, i a Hākovo ꞌe i te perofeta taꞌatoꞌa ꞌi te ao haka tere e te ꞌAtua, ꞌe ꞌi haho a kōrua.

²⁹ Mai te pāꞌiŋa taꞌatoꞌa, paꞌi, ka oho mai ena te nuꞌu mo noho ꞌe mo kai ꞌi roto i te ao haka tere e te ꞌAtua.

³⁰ Te nuꞌu ko rāua te hopeꞌa ꞌi te hora nei, pe muꞌa ka oho ena ko rāua te raꞌe; ꞌe te nuꞌu ko rāua te raꞌe ꞌi te hora nei, pe muꞌa ka oho ena ko rāua te hopeꞌa».

He taŋi iŋa o Ietū mo Hērutarema

³¹ He tuꞌu ia te tētahi nuꞌu ⌊fariseo⌋ he kī ki a Ietū: —Ka oho koe mai nei. Te ꞌariki era ko ⌊ꞌErore⌋ e haŋa rō ꞌana mo tiŋaꞌi i a koe.

³² He pāhono e Ietū: —Ka oho ka kī ki te haꞌamāꞌore era: “ꞌArīnā ꞌe āpō he haka ora a au i te māui-ui ꞌe he haka eꞌa i te tātane mai roto i te taŋata. ꞌE āpō era ka oti iho tāꞌaku aŋa”.

³³ ꞌĪ a au he kī atu: e ko taꞌe oho a au ꞌarīnā, āpō ꞌe āpō era a te ara ōꞌoku mo oho; te perofeta, paꞌi, e ko tano mo mate mo taꞌe ai ꞌi Hērutarema.

³⁴ »¡E Hērutarema ē, e Hērutarema tiŋaꞌi i te perofeta, ꞌe tamaꞌi hai māꞌea i te nuꞌu uŋa e te ꞌAtua ē! ¡Ka hia rā nei mahana ōꞌoku i haŋa mo haka taka-taka i taꞌa ŋā poki, pa he haka taka-taka iŋa o te ꞌuha i tāꞌana māꞌaŋa ꞌi raro i te karā, ꞌe ꞌina koe he haŋa!

³⁵ Nā e tuꞌu rō te mahana te kōrua hare e ko noho haka ꞌou e te taŋata. ꞌĪ a au he kī atu: e ko takeꞌa haka ꞌou au e kōrua ꞌātā ki te mahana mo kī e kōrua: “¡Ki haꞌahana-hana te taŋata uŋa mai e te ꞌAtua hai ꞌīŋoa ōꞌona!”.