Rōmano 5 - Rapa Nui

Pē hē a tātou ana ꞌite: te ꞌAtua e haŋa rō mai ꞌana

¹ ꞌI te ai o tātou ꞌi te hora nei he taŋata tano ki te mata o te ꞌAtua ꞌo te ⌊haka moe i te manaꞌu⌋ ꞌi ruŋa i a Ietū, e riva-riva nei a tātou ko te ꞌAtua hai meꞌe aŋa era e te tātou Pūꞌoko Haka Tere ko Ietū Kiritō.

² ꞌE, takoꞌa, hai haka moe i te manaꞌu ꞌi ruŋa i a Ietū e ꞌite nei a tātou o ruŋa i te riva rahi o te ꞌAtua, ꞌe e noho nei ꞌi roto. E koa rahi nei a tātou ꞌo te ai, pe muꞌa ka oho ena, i a tātou te huru riva o te ꞌAtua, he roa haŋa ꞌāꞌana mo tātou.

³ ꞌE taꞌe nō ꞌo ira a tātou e koa nei, ꞌo te ꞌamo takoꞌa i te ꞌati; ꞌi te ꞌamo iŋa, paꞌi, i te ꞌati e ꞌite nei a tātou i te haꞌaoromaꞌi hai pūai.

⁴ ꞌI te ꞌite o tātou ꞌi te haꞌaoromaꞌi hai pūai, e koa ena te ꞌAtua. ꞌE hai koa o te ꞌAtua mo tātou, e ꞌata pūai ena te tātou manaꞌu ꞌi ruŋa i a ia.

⁵ ꞌE, ꞌi te ꞌata pūai o te tātou manaꞌu ꞌi ruŋa i te ꞌAtua, e ꞌite nei e tātou e ko taꞌe aŋa e ia i tāꞌana meꞌe kī. Ko haka takeꞌa mai ꞌana, paꞌi, i te rahi o tōꞌona haŋa hai vaꞌai mai i te ⌊Vārua Maitai⌋ mo ŋaroꞌa e tātou i rā haŋa ꞌi roto i te māhatu.

⁶ Hora era ꞌina he rāveꞌa toe o tātou o te taŋata mo eꞌa mai roto i te hara, i mate ai te ⌊Kiritō⌋ mo tātou, hora kī mau era ꞌā mo mate.

⁷ ꞌI roto i te taŋata, taꞌe paurō te mahana e takeꞌa ena i te kope haŋa mo vaꞌai i a ia ki te mate mo te taŋata aŋa i te meꞌe tī-tika. Ka ai atu pē ira, e ai rō pēaha te kope haŋa mo vaꞌai i a ia ki te mate mo te taŋata riva ꞌe māhatu ꞌaroha hāꞌūꞌū ki a ia.

⁸ Oho iŋa kē ia to te ꞌAtua; hora era ꞌi roto i te hara ꞌana a tātou, i uŋa nō mai i te Kiritō mo mate mo ꞌauhau o te tātou hara. Pē ira i haka takeꞌa mai ai ki a tātou i tōꞌona haŋa.

⁹ Mo ai hai Ietū Kiritō ꞌe hai haka moe o tātou i te manaꞌu ꞌi ruŋa i te meꞌe aŋa era e ia mo tātou ꞌi ruŋa i te tātaurō i kī ai e te ꞌAtua e tano rō ꞌana a tātou ki tōꞌona mata, e ꞌite riva-riva nei: hai ia ka eꞌa ena tātou mai roto i te ūtuꞌa o te hara ꞌi te hora o te haka ūtuꞌa.

¹⁰ ꞌE, i ai era ko haka riva-riva ꞌā e te ꞌAtua i a tātou ki a ia hai mate o tāꞌana Poki ꞌi te hora e ꞌenemī rō ꞌā a tātou mōꞌona, hora nei ia, he hora e riva-riva rō ꞌana a tātou ko te ꞌAtua, e ꞌite nei a tātou e ko taꞌe haka eꞌa e te ꞌAtua i a tātou mai roto i te ūtuꞌa o te hara ꞌi te ai e ora rō ꞌana tāꞌana Poki.

¹¹ ꞌE, takoꞌa, e koa nei a tātou ꞌo te ai ꞌi te hora nei ꞌi roto i te haumārū e noho nei ananake ko te ꞌAtua hai meꞌe aŋa era e te tātou Pūꞌoko Haka Tere ko Ietū Kiritō.

Ko ꞌĀtamu ꞌe ko Ietū Kiritō

¹² Hai ⌊ꞌĀtamu⌋, taŋata mau nō e tahi, i ai ai te hara ꞌi te ao, ꞌe hai hara i ai ai te mate. Pē ira te mate i ai ai mo te taꞌatoꞌa ꞌi te ai ko hara tahi ꞌana te taŋata.

¹³ Ko ai era ꞌana te hara ꞌi te hora ꞌina kai ai ꞌā e tahi haka tere iŋa mo haꞌatura. Te meꞌe nō, ꞌina he tapa atu i te hara mo taꞌe ai o te haka tere iŋa kī i te hape ꞌe i te taꞌe hape o te taŋata.

¹⁴ Mai te hora o ꞌĀtamu ki te hora o ⌊Mōtē⌋, te meꞌe mo te nuꞌu hara he mate, ka ai atu te rāua hara taꞌe he taꞌe haꞌatura ki te meꞌe kī e te ꞌAtua mo aŋa, pa he hara o ꞌĀtamu, kope pa he kope era mo oho mai ko Ietū Kiritō.

¹⁵ Te hara o ꞌĀtamu ꞌe te meꞌe vaꞌai mai e te ꞌAtua meꞌe kē meꞌe kē. Hai hara, paꞌi, o te kope mau nō e tahi i mate ai te taŋata. ꞌE te meꞌe vaꞌai mai e te ꞌAtua hai riva rahi o te taŋata mau nō e tahi ko Ietū Kiritō, he meꞌe hopeꞌa o te nui-nui mo te riva-riva o te taŋata taꞌatoꞌa.

¹⁶ Te hara o ꞌĀtamu meꞌe kē, ꞌe te meꞌe vaꞌai mai e te ꞌAtua meꞌe kē. Te meꞌe i ravaꞌa mai te hara o ꞌĀtamu he kī iŋa o te ꞌAtua pē nei ē: «ko hape ꞌā te taŋata», ꞌe te meꞌe i ravaꞌa mai te meꞌe vaꞌai e te ꞌAtua, he rāveꞌa mo kī e ia: «ꞌina he hape», ka ai atu e rahi rō ꞌā te hara.

¹⁷ Hai hara o te kope mau nō e tahi e mate ena te taŋata taꞌatoꞌa, ꞌe hai meꞌe aŋa e te taŋata mau nō e tahi ko Ietū Kiritō, e ai ena te meꞌe nui-nui. Hai ia, paꞌi, e ai ena, i te nuꞌu taꞌatoꞌa tano ki te mata o te ꞌAtua, te ora ꞌāpī ꞌina he hopeꞌa raꞌa hai riva rahi ōꞌona taꞌe e ꞌauhau, ꞌe a rāua ka haka tere ena ꞌi muri i a Ietū.

¹⁸ Hai meꞌe taꞌe tano aŋa e ꞌĀtamu i ai ai te ūtuꞌa ꞌi ruŋa i te taŋata taꞌatoꞌa, ꞌe hai meꞌe riva-riva aŋa e Ietū Kiritō i ai ai te rāveꞌa mo te taŋata taꞌatoꞌa mo kī e te ꞌAtua: «ꞌina rāua hape», ki ravaꞌa ai i te ora ꞌāpī ꞌina he hopeꞌa raꞌa.

¹⁹ ꞌO te taꞌe haꞌatura o te taŋata mau nō e tahi i hara tahi ai te taŋata, ꞌe ꞌo te haꞌatura o te taŋata mau nō e tahi meꞌe rahi nō atu taŋata ka ai ena he nuꞌu e tano rō ꞌana ki te mata o te ꞌAtua.

²⁰ Te ꞌAtua i vaꞌai ai i te ⌊haka tere iŋa ꞌa Mōtē⌋ mo aŋi-aŋi e te taŋata he aŋi mau ꞌana e rahi rō ꞌana te rāua hara. ꞌE, ka ai atu e rahi rō ꞌā te hara, te ꞌAtua i haka ꞌite rō mai: ꞌata hau rō atu ki te hara tōꞌona riva rahi.

²¹ Te meꞌe ravaꞌa e te taŋata mai te hara he mate, he haꞌataꞌa mau rō ꞌāvai mai te ꞌAtua. ꞌE te meꞌe ravaꞌa mai te riva rahi o te ꞌAtua he tano ki tōꞌona mata ꞌe he ora ꞌāpī ꞌina he hopeꞌa raꞌa hai meꞌe aŋa era ꞌi ruŋa i te tātaurō e te tātou Pūꞌoko Haka Tere ko Ietū Kiritō.