Rōmano 4 - Rapa Nui

He haꞌaauraꞌa iŋa hai ꞌAparahama

¹ Ka manaꞌu rā kōrua ki a ⌊ꞌAparahama⌋, tupuna o mātou o te ⌊hūrio⌋.

² ꞌĀhani hai meꞌe i aŋa e ꞌAparahama i kī ai e te ꞌAtua a ꞌAparahama he kope tano ki tōꞌona mata, e tano nō ia a ꞌAparahama mo haka paka i a ia, ka ai atu taꞌe ꞌi muꞌa o te ꞌAtua.

³ ꞌE taꞌe, paꞌi, pē ira. E hāꞌaki ena ꞌi ruŋa i te ⌊Pāpaꞌi Moꞌa⌋: «ꞌI te haka moe o ꞌAparahama i te manaꞌu ꞌi ruŋa i te meꞌe kī e te ꞌAtua, i kī ai e te ꞌAtua: a ꞌAparahama he taŋata tano ꞌi muꞌa i a ia».

⁴ Te kope e tahi e aŋa ena, te moni ꞌauhau ki a ia taꞌe he moni vaꞌai tahaŋa nō, he moni ꞌauhau o tāꞌana aŋa.

⁵ ꞌE te meꞌe he tano ki te mata o te ꞌAtua taꞌe pē ira. Te taŋata hara, paꞌi, ⌊haka moe i te manaꞌu⌋ ꞌi ruŋa i te ꞌAtua, hai riva rahi mau nō o te ꞌAtua e kī ena he kope tano ki tōꞌona mata ꞌe taꞌe ꞌō hai meꞌe aŋa e rā kope.

⁶ A ⌊Tāvita⌋ i vānaŋa rō mo te kope kī e te ꞌAtua he taŋata tano ki tōꞌona mata taꞌe ꞌō hai tāꞌana meꞌe i aŋa.

⁷ Pē nei a Tāvita i kī ai: «¡Ko te koa i te nuꞌu haka rehu e te ꞌAtua i te rāua hara ꞌe haka kore i te rāua meꞌe taꞌe tano aŋa!

⁸ ¡Ko te koa i te kope taꞌe tapa haka ꞌou e te ꞌAtua i tōꞌona hara!».

⁹ ¿Mo te nuꞌu hore i te kiri o te kinoŋa nō ꞌō te haꞌamaitai o te ꞌAtua, ꞌo takoꞌa mo te nuꞌu kai hore te kiri o te kinoŋa? I kī rō mātou: a ꞌAparahama i haka moe rō i te manaꞌu ꞌi ruŋa i te ꞌAtua ꞌe ꞌo ira i kī ai e te ꞌAtua he taŋata tano ki tōꞌona mata.

¹⁰ ¿ꞌI ꞌaŋahē i kī ai? ¿Hora era ko hore ꞌana te kiri o te kinoŋa, ꞌo kai hore ꞌā? ꞌI te hora era kai hore ꞌā.

¹¹ Te parautiꞌa, ko kī era ꞌā te ꞌAtua i rā meꞌe i hore iho ai te kiri o te kinoŋa o ꞌAparahama, pa he tāpaꞌo o tū meꞌe kī era e te ꞌAtua o ruŋa i a ia. Pē ira a ꞌAparahama i ai ai he matuꞌa o te nuꞌu taꞌatoꞌa haka moe i te manaꞌu ꞌi ruŋa i te ꞌAtua, nuꞌu e tano takoꞌa rō ꞌā ki te mata o te ꞌAtua, ka ai atu kai hore te kiri o te kinoŋa.

¹² A ꞌAparahama he matuꞌa takoꞌa o te nuꞌu hore o te kiri o te kinoŋa haka moe i te manaꞌu ꞌi ruŋa i te ꞌAtua, te rāua haka moe iŋa i te manaꞌu pa he haka moe iŋa o te manaꞌu o te mātou tupuna ko ꞌAparahama ꞌi te hora kai hore ꞌana te kiri o te kinoŋa.

He hōrea o te ꞌAtua mo te hakaara o ꞌAparahama

¹³ Hora hōrea era e te ꞌAtua ki a ꞌAparahama ꞌe ki tōꞌona hakaara: pe muꞌa ka oho ena mo rāua te ao nei, i hōrea ai taꞌe ꞌo te haꞌatura o ꞌAparahama ki te ⌊haka tere iŋa ꞌa Mōtē⌋, ꞌo te tano ōꞌona ki te mata o te ꞌAtua, he haka moe i tōꞌona manaꞌu ꞌi ruŋa.

¹⁴ ꞌĀhani te ao nei i hōrea ai mo te nuꞌu haꞌatura ki te haka tere iŋa ꞌa Mōtē, ꞌina ia he hauhaꞌa toe o te haka moe i te manaꞌu ꞌi ruŋa i te ꞌAtua, ꞌe o te hōrea o te ꞌAtua.

¹⁵ Te meꞌe ravaꞌa, paꞌi, mai te haka tere iŋa ꞌa Mōtē, he ūtuꞌa ꞌo te ai ꞌina e tahi kope mo ravaꞌa mo haꞌatura tahi i rā haka tere iŋa. ꞌE mo taꞌe ai o te haka tere iŋa mo haꞌatura, ꞌina ia he meꞌe mo kī mai ko hape ꞌā a tātou.

¹⁶ ꞌO ira, te hōrea kī e te ꞌAtua ki a ꞌAparahama mo hauhaꞌa mo oho nō mo tōꞌona hakaara taꞌatoꞌa, e ai he meꞌe vaꞌai nō e te ꞌAtua hai riva rahi ōꞌona, hai haka moe nō i te manaꞌu ꞌi ruŋa i a ia. Te auraꞌa: te hōrea mo te nuꞌu taꞌatoꞌa haka moe i te manaꞌu ꞌi ruŋa i te ꞌAtua, pē ꞌAparahama, ka ai atu e maꞌu rō ꞌā ꞌo ꞌina he maꞌu i te haka tere iŋa ꞌa Mōtē. Pē ira a ꞌAparahama i ai ai he matuꞌa o tātou taꞌatoꞌa.

¹⁷ Pa he meꞌe kī ꞌi ruŋa i te Pāpaꞌi Moꞌa: «Ko haꞌataꞌa ꞌana a au i a koe mo tupuna o te meꞌe rahi nō atu hau o te ao». Te hōrea nei i vaꞌai ai ki a ꞌAparahama ꞌo te haka moe i tōꞌona manaꞌu ꞌi ruŋa i te ꞌAtua, ꞌAtua i a ia te pūai mo haka ora i te taŋata mai te mate ꞌe mo aŋa i te meꞌe kai ai ꞌana.

¹⁸ ꞌI te hora e tuꞌu rō ꞌā pa he meꞌe ena ē: ꞌina he rāveꞌa toe mo topa o tū meꞌe kī era e te ꞌAtua, i ꞌata haka hio-hio i oho nō a ꞌAparahama i tōꞌona manaꞌu ꞌi ruŋa i te ꞌAtua, ꞌe i ꞌata tiaki nō ki te mahana mo haka tano e te ꞌAtua i rā meꞌe hōrea era ki a ia. Pē ira i ai ai «he tupuna o te meꞌe rahi nō atu hau o te ao», pa he meꞌe kī e te ꞌAtua: «Pa he rahi ena ꞌā o te hetuꞌu o te raŋi te rahi o tuꞌu hakaara ka ai ena».

¹⁹ Ka ai atu ko hāhine ꞌā te hoꞌe hānere matahiti o ꞌAparahama ꞌe tāꞌana viꞌe ko ⌊Tara⌋ he paꞌa, kai ꞌaka-ꞌaka te manaꞌu.

²⁰ I haka noho i oho nō i te manaꞌu ꞌi ruŋa i te hōrea o te ꞌAtua. I ꞌata haka pūai nō i te haka moe iŋa i te manaꞌu ꞌi ruŋa i te ꞌAtua ꞌe he haꞌahana-hana,

²¹ ꞌo te ꞌite riva-riva pē nei ē: i te ꞌAtua te pūai mo haka tano i tāꞌana meꞌe hōrea.

²² ꞌO ira te ꞌAtua i kī ai: a ꞌAparahama he taŋata tano ki tōꞌona mata.

²³ Te vānaŋa: «Te taŋata e tano rō ꞌā ki te mata o te ꞌAtua hai haka moe i te manaꞌu ꞌi ruŋa i a ia», i pāpaꞌi ai taꞌe mo ꞌAparahama nō,

²⁴ mo tātou takoꞌa. Te ꞌAtua e kī ena he taŋata tano a tātou ki tōꞌona mata hai haka moe o tātou i te manaꞌu ꞌi ruŋa i a ia, kope haka ora mai mai te mate i a Ietū, Pūꞌoko Haka Tere o tātou,

²⁵ vaꞌai era ki te mate mo te tātou hara, ꞌe haka ora haka ꞌou era mai te mate mo riro o tātou he taŋata tano ki te mata o te ꞌAtua.