Rōmano 16 - Rapa Nui

He ꞌaroha

¹ Nā he oho atu te viꞌe e tahi te ꞌīŋoa ko Peve, he viꞌe hāꞌūꞌū i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o te kona era ko Tenekerea.

² Ki tuꞌu atu, e uꞌi kōrua e haka naho-naho i a ia ꞌo te ai takoꞌa ōꞌona ꞌa Ietū, he meꞌe mau ꞌā, paꞌi, mo aŋa e tātou e te taina haka moe i te manaꞌu ꞌi ruŋa i a Ietū. ꞌE mo hape o te meꞌe, e hāꞌūꞌū kōrua. I rahi rō, paꞌi, te nuꞌu i hāꞌūꞌū e ia, ꞌātā i hāꞌūꞌū takoꞌa rō mai i a au.

³ E ꞌaroha atu kōrua ki a Pirika ꞌe ki a ꞌĀkira; a rāua he hokorua ōꞌoku ꞌi te aŋa vaꞌai mai e Ietū Kiritō.

⁴ Te nuꞌu ena i vaꞌai rō i a rāua ki roto i te ꞌati mo ora ōꞌoku. E māuru-uru rō ꞌā a au i a rāua, ꞌe pē ira takoꞌa te nūnaꞌa taina taꞌatoꞌa taꞌe he hūrio haka moe i te manaꞌu ꞌi ruŋa i a Ietū.

⁵ E ꞌaroha takoꞌa ki te nūnaꞌa taŋata haka moe i te manaꞌu ꞌi ruŋa i a Ietū taka-taka ꞌi te hare o Pirika ararua ko ꞌĀkira. E ꞌaroha atu kōrua ki tōꞌoku repahoa ko ꞌEpeneto, he kope raꞌe i haka moe i tōꞌona manaꞌu ꞌi ruŋa i te ⌊Kiritō⌋ o ꞌĀtia taꞌatoꞌa.

⁶ E ꞌaroha atu ki a ⌊Māria⌋, vaꞌai i a ia ki te aŋa mo hāꞌūꞌū atu ki a kōrua.

⁷ E ꞌaroha ki a Anatoroniko ꞌe ki a Hūnia, he ⌊hūrio⌋ takoꞌa pē au ꞌā, ꞌe he hokorua era ōꞌoku ꞌi roto i te hare maꞌuꞌaurī. He ⌊ꞌāpōtoro⌋ moꞌa rahi a rāua, ꞌe ꞌi raꞌe ki a au i haka moe ai i te rāua manaꞌu ꞌi ruŋa i a Ietū.

⁸ E ꞌaroha ki a Amapiriato, he repahoa ōꞌoku ꞌi te haka moe iŋa i te manaꞌu ꞌi ruŋa i a Ietū.

⁹ E ꞌaroha ki a ꞌUrupano, he hokorua aŋa o tātou ki te Kiritō, ꞌe ki tōꞌoku repahoa haŋa rahi ko ꞌĒtaki.

¹⁰ E ꞌaroha ki a Āpere, he kope ko haka takeꞌa mai ꞌana i te pūai o tōꞌona haka moe iŋa i te manaꞌu ꞌi ruŋa i a Ietū, ꞌe, takoꞌa, ki te huaꞌai o Aritovuro.

¹¹ E ꞌaroha ki a Erotione, hūrio takoꞌa pē au, ꞌe ki te nuꞌu o te huaꞌai o Naratito haka moe i te manaꞌu ꞌi ruŋa i a Ietū.

¹² E ꞌaroha ki a Tiripena ꞌe ki a Tiripota, he ŋā viꞌe aŋa i te aŋa o te tātou Pūꞌoko Haka Tere ko Ietū Kiritō, ꞌe pē ira takoꞌa ꞌana ki a Peretire, taina haŋa rahi o tātou, vaꞌai i a ia ki te aŋa mā Ietū.

¹³ E ꞌaroha atu ki a Rufo, kope haka kē ꞌi tōꞌona aŋa iŋa ki a Ietū, ꞌe pē ira takoꞌa ꞌana ki tōꞌona matuꞌa vahine. A ia pa he matuꞌa takoꞌa ōꞌoku.

¹⁴ E ꞌaroha atu ki a Atinikirito, ki a Perekono, ki a ꞌĒreme, ki a Patarova, ki a ꞌĒrema, ꞌe ki te taina taꞌatoꞌa o muri i a rāua.

¹⁵ E ꞌaroha takoꞌa kōrua ki a Firoroko, ki a Hūrita, ki a Nēreo ꞌe ki tōꞌona taina vahine, ki a ꞌŌrimpa ꞌe ki te taina taꞌatoꞌa haka moe i te manaꞌu ꞌi ruŋa i a Ietū o muri i a rāua.

¹⁶ E ꞌaroha ꞌi roto i a kōrua ꞌā hai haŋa. Te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū o te kona tuꞌu ōꞌoku i ꞌaroha rō mai mo kōrua.

¹⁷ E te taina, e uꞌi e haka tapa mai muri i te nuꞌu haka huri i te manaꞌu hai hāpī taꞌe parautiꞌa, ꞌo taꞌe ai e tahi mau nō kōrua manaꞌu o ruŋa i te hāpī parautiꞌa haka ꞌite atu era, ꞌo haka tapa kōrua mai te ara parautiꞌa o te ꞌAtua.

¹⁸ A rāua, paꞌi, taꞌe he tāvini o te tātou Pūꞌoko Haka Tere he Kiritō; he tāvini o te meꞌe pohe ꞌe haŋa nō o rāua. Hai vānaŋa koroꞌiti ꞌe reka e reo-reo ena ki te nuꞌu māhatu rehe-rehe taꞌe manaꞌu e aŋa rō ꞌō e te rua i te meꞌe taꞌe tano ki a rāua.

¹⁹ Ko ꞌite ꞌana te taina taꞌatoꞌa e haꞌatura rō ꞌana a kōrua ki te ꞌAtua, ꞌe e koa rō ꞌana a au ꞌo te ai o kōrua pē ira. Te meꞌe nō, e haka tere kōrua i a kōrua ꞌā hai manaꞌu ꞌAtua, ki aŋa ki oho nō ai kōrua i te meꞌe riva-riva, taꞌe i te meꞌe taꞌe tano.

²⁰ Pē ira e ko roa he toꞌo mai e te ꞌAtua, vaꞌai i te haumārū, he haka hēpiꞌi i a Rukifero ꞌi raro i te kōrua vaꞌe. Ka ai ꞌi ruŋa i a kōrua te riva rahi o Ietū, he Pūꞌoko Haka Tere o tātou.

²¹ ꞌĪ e ꞌaroha atu ena a Timoteo, hokorua aŋa ōꞌoku, pē ira takoꞌa ꞌana tōꞌoku hau a Rūtio, a Hātō, ꞌe a Tōtipataro.

²² He ꞌaroha takoꞌa atu ki a kōrua hai ꞌīŋoa o te tātou Pūꞌoko Haka Tere te kope pāpaꞌi i te parau nei ꞌāꞌaku ko Teretio.

²³ ꞌE ꞌī a Kāio e ꞌaroha atu ena mo kōrua. E noho nei a au ꞌi tōꞌona hare, he kona haka rē e ia mo taka-taka o te nūnaꞌa taŋata haka moe i te manaꞌu ꞌi ruŋa i a Ietū. ꞌE ꞌī e ꞌaroha takoꞌa atu ena a Erato, he kope hāpaꞌo moni o te kona nei, ꞌe te tātou taina ko Kuarato. [

²⁴ Ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō. ⌊ꞌĀmene⌋.]

He ani iŋa mo haꞌahana-hana ki te ꞌAtua

²⁵ Ki haꞌahana-hana tahi tātou ki te ꞌAtua. I a ia te pūai mo haka hio-hio i te kōrua manaꞌu ꞌi ruŋa i a ia hai roŋo haka ꞌite e au o ruŋa i a Ietū Kiritō, he parautiꞌa taꞌe haka ꞌite ꞌi muꞌa ꞌā o ruŋa i te meꞌe manaꞌu e ia mo aŋa

²⁶ ꞌe, hora nei, ko haka ꞌite ꞌana ꞌi ruŋa i te meꞌe pāpaꞌi e te perofeta. Nei parautiꞌa ko haka ꞌite ꞌana ki te taŋata o te henua taꞌatoꞌa mo haka moe o rāua i te manaꞌu ꞌi ruŋa i a Ietū ꞌe mo haꞌatura ki a ia. O te ꞌAtua, ꞌina ōꞌona haꞌamata ꞌe ꞌina ōꞌona hopeꞌa, i kī mo aŋa pē ira.

²⁷ ¡ꞌĀtā ki te hopeꞌa raꞌa ki haꞌahana-hana tahi tātou hai Ietū Kiritō ki te ꞌAtua, ko ia mau nō te ꞌAtua, ꞌe i a ia mau nō te mārama-rama parautiꞌa! ꞌĀmene.