Rōmano 11 - Rapa Nui

Te ꞌAtua kai hārui i te itaraera hai tuaꞌivi

¹ He ꞌui haka ꞌou nei: ¿Ko hārui ꞌana hō te ꞌAtua i te itaraera hai tuaꞌivi? ꞌIna. A au mau nei ꞌā, paꞌi, he itaraera, he hakaara o ⌊ꞌAparahama⌋ o te mata o ⌊Mēhāmina⌋.

² Te parautiꞌa, ꞌina te ꞌAtua kai hārui tahi i te itaraera, he nuꞌu haꞌataꞌa e ia māꞌana mai muꞌa ꞌā, hai tuaꞌivi. Ka haka topa rā te kōrua manaꞌu ki te meꞌe ena e hāꞌaki ena ꞌi ruŋa i te ⌊Pāpaꞌi Moꞌa⌋ o ruŋa i te perofeta era ko ꞌĒria. ꞌI tōꞌona hora pure ki te ꞌAtua i horo ai i tāꞌana ture mo tōꞌona taŋata he itaraera pē nei ē:

³ «E te ꞌAtua, ko tiŋaꞌi ko haka kore tahi ꞌana e rāua i taꞌu perofeta, ꞌe ko haka mārere-rere tahi ꞌana i tuꞌu fata. Ko au mau nō taꞌu taŋata toe, ꞌe ꞌī e haŋa takoꞌa rō ꞌana rāua mo tiŋaꞌi i a au».

⁴ ꞌE pē nei te ꞌAtua i pāhono ai: «Ko te ai iŋa ꞌana e hitu taꞌutini taŋata haka ꞌou haꞌataꞌa e au māꞌaku, ŋāŋata taꞌe haꞌamuri ki te meꞌe kī e te nuꞌu he ꞌatua o rāua ko Vāara».

⁵ Pē ira takoꞌa ꞌana ꞌi te hora nei, e te taina ē, e toe nō ꞌā te itaraera haꞌataꞌa e te ꞌAtua māꞌana hai riva rahi ōꞌona.

⁶ ꞌE, i ai ena hai riva rahi o te ꞌAtua i haꞌataꞌa ai i te itaraera māꞌana, taꞌe ia hai meꞌe i aŋa e rāua. ꞌĀhani, paꞌi, hai meꞌe i aŋa e rāua, taꞌe ia he meꞌe ꞌo te riva rahi o te ꞌAtua.

⁷ ¿He aha ia te auraꞌa o te meꞌe taꞌatoꞌa nei? Te auraꞌa: te rahi raꞌa o te itaraera ꞌina kai ravaꞌa i te rāua meꞌe kimi: he tano o rāua ki te mata o te ꞌAtua. O te nuꞌu itaraera haꞌataꞌa e te ꞌAtua māꞌana i ravaꞌa. ꞌE tū rahi raꞌa era o te itaraera ko haka hio-hio ꞌā e te ꞌAtua i te rāua manaꞌu.

⁸ Pa he meꞌe kī ꞌi ruŋa i te Pāpaꞌi Moꞌa: «Te ꞌAtua i haka hio-hio rō i te rāua manaꞌu; i vaꞌai rō i te mata taꞌe takeꞌa, ꞌe i te tariŋa taꞌe ŋaroꞌa, ꞌe pē nei mau ꞌā a rāua ꞌātā ki ꞌaŋarīnā».

⁹ I pāpaꞌi takoꞌa rō e te ꞌariki era ko ⌊Tāvita⌋ pē nei ē: «Ka riro te rāua ŋoŋoro he meꞌe mo ꞌa-ꞌaru mo puru i a rāua, pa he kūpeŋa ika, ki ravaꞌa ai mo haka ūtuꞌa hai ūtuꞌa tano mo rāua.

¹⁰ Ka pōhāhā ka oho nō te rāua manaꞌu, ꞌo aŋi-aŋi i te parautiꞌa, ꞌe ka piko-piko ka oho nō te rāua tuaꞌivi ꞌi te paŋahaꞌa o te ꞌati ꞌamo e rāua».

He ravaꞌa iŋa e te nuꞌu taꞌe hūrio i te ora ꞌāpī

¹¹ Tāꞌaku ꞌui ia: i hara era te ⌊hūrio⌋ ꞌi te taꞌe ⌊haka moe i te manaꞌu⌋ ꞌi ruŋa i a Ietū, ¿he kore rō ꞌāvai te rāveꞌa mo tano o rāua ki te mata o te ꞌAtua? Taꞌe pē ira. ꞌI te taꞌe haꞌatura o te hūrio i ravaꞌa ai e te nuꞌu taꞌe he hūrio mo eꞌa mai te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. Te meꞌe nei i aŋa ai e te ꞌAtua ki mākota ai ꞌe ki haŋa ai te hūrio mo ravaꞌa takoꞌa e rāua i te ora ꞌāpī ꞌina he hopeꞌa raꞌa.

¹² I ai ena hai hara o te hūrio i haꞌamaitai ai e te ꞌAtua i te nuꞌu o te ao taꞌe he hūrio, ¡ka manaꞌu atu rā kōrua pē hē ka ai ena ꞌi te mahana haka moe i te manaꞌu ꞌi ruŋa i a Ietū te taꞌatoꞌa nuꞌu hūrio haꞌataꞌa e te ꞌAtua māꞌana!

¹³ E ai rō ꞌana tāꞌaku meꞌe mo kī atu ki a kōrua ki te nuꞌu taꞌe he hūrio: te ꞌAtua ko haꞌataꞌa ꞌā i a au pa he ⌊ꞌāpōtoro⌋ mo haka ꞌite atu ki a kōrua i tāꞌana vānaŋa. ꞌO ira a au e aŋa riva-riva nei i te aŋa nui-nui nei,

¹⁴ he haŋa ōꞌoku mo haka mākota i tōꞌoku taŋata koiꞌite pē ira tētahi o rāua ana haka moe i te manaꞌu ꞌi ruŋa i a Ietū mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

¹⁵ Mo ai ia hai hārui o te ꞌAtua i te nuꞌu hūrio hai tuaꞌivi e ai ena te rāveꞌa mo haka riva-riva i te taŋata taꞌatoꞌa ki a ia, ¡ka manaꞌu atu kōrua pē hē ka ai ena ꞌi te hora haka tano e te ꞌAtua i a rāua ki tōꞌona mata! ¡Ka ai ena pa he nuꞌu mate ko ora haka ꞌou ꞌā mai te mate!

¹⁶ Mo ai e haꞌataꞌa rō ꞌana mo te ꞌAtua te haraoa raꞌe tunu mai ruŋa i te haraoa ko ŋatu ꞌā, pē ira takoꞌa ꞌā ia te haraoa taꞌatoꞌa ŋatu era. ꞌE mo ai o te aka o te tumu e haꞌataꞌa rō ꞌana mo te ꞌAtua, pē ira takoꞌa ꞌana ia te maŋa taꞌatoꞌa o rā tumu.

¹⁷ Te hūrio pa he tumu ꞌōrivo mai ruŋa i paꞌo ai i te tētahi maŋa, ꞌe a rā ŋā kona paꞌo mau era ꞌā i haka puā haka ꞌou ai hai maŋa ꞌōrivo o ꞌuta taꞌe hāpaꞌo e te taŋata, te auraꞌa, ko kōrua he nuꞌu taꞌe hūrio. Pē ira e ora ena ꞌi te hora nei hai tāpau ꞌe hai aka o rā tumu.

¹⁸ Ka ai atu pē ira, ꞌina ko manaꞌu i hau rō atu koe ki te maŋa mau era o rā tumu. E haka topa te manaꞌu: taꞌe mai i a koe mai te maŋa te aka e ora ena; a koe e ora ena hai aka o rā tumu.

¹⁹ E kī rō pēaha e tahi o kōrua: ꞌEi, i paꞌo rō i te tētahi maŋa mo haka puā i a au ki ruŋa.

²⁰ He aŋi ꞌā. I paꞌo ai i a rāua he taꞌe haka moe i te manaꞌu ꞌi ruŋa i a Ietū, ꞌe a koe e raꞌu ena ꞌi ruŋa ꞌo te haka moe nō i tuꞌu manaꞌu ꞌi ruŋa i a ia. ꞌO ira, ꞌina ko kī i hau rō atu koe ki a rāua; te meꞌe nō, e riꞌa-riꞌa koe.

²¹ Mo ai ꞌina kai haka rehu e te ꞌAtua i te hara o te maŋa mau o rā tumu, e ko haka rehu takoꞌa e ia i tuꞌu hara.

²² Te ꞌAtua e haka takeꞌa rō ꞌana i tōꞌona riva ꞌe i tōꞌona riri. Ki te nuꞌu hūrio hārui i a ia hai tuaꞌivi i haka takeꞌa ai i tōꞌona riri, ꞌe ki a kōrua ki te nuꞌu taꞌe he hūrio i haka takeꞌa ai i tōꞌona riva. Te meꞌe nō, e uꞌi e noho kōrua ꞌi roto i tōꞌona riva rahi, ꞌo paꞌo takoꞌa rō i a kōrua mai ruŋa i rā tumu.

²³ Mo haka moe o te hūrio i te manaꞌu ꞌi ruŋa i a Ietū, he haka tupu haka ꞌou e te ꞌAtua ꞌi ruŋa i rā tumu; i a ia, paꞌi, te parau mo haka tupu haka ꞌou.

²⁴ Pē nei te auraꞌa: mo ai ko toꞌo ꞌana e te ꞌAtua i a koe, he maŋa o te tumu o ꞌuta mo haka tupu ꞌi ruŋa i te tumu ꞌōrivo riva-riva, ¿pē hē ia ana taꞌe haka tupu haka ꞌou e ia, ꞌi ruŋa i rā tumu, i te hūrio, he maŋa parautiꞌa mau o rā tumu?

He eꞌa iŋa o te hūrio mai te ūtuꞌa o te hara

²⁵ E te taina ē, e haŋa rō ꞌana a au mo haka ꞌite atu i te meꞌe ꞌina kai ꞌite ꞌana e te taŋata o ruŋa i te hūrio, ꞌo manaꞌu rō kōrua i hau rō atu ꞌō kōrua ki a rāua. Tētahi o rāua ko hārui ꞌana hai tuaꞌivi i te ꞌAtua, ꞌe pē rā mau ꞌā ka oho ena ꞌātā ka haka moe tahi rō te manaꞌu ꞌi ruŋa i a Ietū te nuꞌu taꞌe he hūrio haꞌataꞌa e te ꞌAtua māꞌana.

²⁶ Ki topa te meꞌe nei, ka eꞌa iho ena te hūrio taꞌatoꞌa mai roto i te ūtuꞌa o te hara ꞌe ka ravaꞌa ena i te ora ꞌāpī ꞌina he hopeꞌa raꞌa vaꞌai e te ꞌAtua. E kī rō ꞌana, paꞌi, ꞌi ruŋa i te Pāpaꞌi Moꞌa pē nei ē: «Te kope toꞌo i te taŋata mai roto i te ꞌati ka oho mai ena mai te kona era ko ⌊Tione⌋ mo haꞌataꞌa i te itaraera mai roto i te meꞌe taꞌe tano.

²⁷ Pē ira ka haka tano ena te hōrea kī e au mo rāua: he haka kore e au i te rāua hara».

²⁸ ꞌI te taꞌe haŋa o te hūrio ki te ⌊roŋo riva-riva o te ꞌAtua⌋ ꞌe ꞌi te taꞌe haka moe i te manaꞌu ꞌi ruŋa i a Ietū, i hārui ai e te ꞌAtua hai tuaꞌivi. ꞌE rā meꞌe mo te kōrua riva-riva, mo haka ꞌite atu i tāꞌana roŋo ki a kōrua ki te nuꞌu taꞌe he hūrio. Ka ai atu pē ira, ko te haŋa iŋa ꞌana te ꞌAtua ki a rāua; i haꞌataꞌa rō, paꞌi, e ia i te rāua tupuna, ꞌi muꞌa ꞌana, mo taŋata ꞌāꞌana.

²⁹ Te ꞌAtua ꞌina he hiko i tāꞌana meꞌe vaꞌai, ꞌe ꞌina he haka rehu i te nuꞌu haꞌataꞌa e ia māꞌana.

³⁰ ꞌI muꞌa ꞌā, ꞌina a kōrua he haꞌatura ki te ꞌAtua, ꞌe, hora nei ꞌi ruŋa i a kōrua te riva rahi ōꞌona, he taꞌe haꞌatura o te hūrio ki a ia.

³¹ Te taꞌe haꞌatura o te hūrio he meꞌe e tahi o te ꞌAtua mo haka ꞌaroha i a kōrua, ꞌe mo haka ꞌaroha takoꞌa i a rāua.

³² Te ꞌAtua ia ꞌi te haŋa mo haka takeꞌa i tōꞌona haka ꞌaroha ꞌe i tōꞌona riva rahi ꞌi ruŋa i te taŋata taꞌatoꞌa, ko haka ꞌite mai ꞌana pē nei ē: ka hūrio ꞌe ka taꞌe hūrio, taꞌatoꞌa he nuꞌu taꞌe haꞌatura ki a ia.

³³ ¿Ko ai te kope mo ravaꞌa mo hāito i te rahi o te riva o te ꞌAtua, i tōꞌona mārama-rama ꞌe i tāꞌana meꞌe ꞌite? ꞌE ¿ko ai takoꞌa te kope mo ravaꞌa mo aŋi-aŋi i tōꞌona manaꞌu, ꞌe mo haꞌaauraꞌa i tāꞌana meꞌe aŋa?

³⁴ Pa he meꞌe kī ꞌi ruŋa i te Pāpaꞌi Moꞌa: «¿Ko ai te meꞌe mo ꞌite i te manaꞌu o te ꞌAtua? ¿Ko ai te kope mo kī he aha tāꞌana meꞌe mo aŋa?

³⁵ ¿Ko ai te kope i vaꞌai i tāꞌana meꞌe mo haka hoki iŋa e ia?».

³⁶ Taꞌatoꞌa meꞌe o te ꞌAtua i aŋa, ꞌe hai ia e ai e oho nō ena; i aŋa ai mo haꞌahana-hana ki a ia. ¡Ki haꞌahana-hana tahi ia tātou ki te ꞌAtua ꞌātā ki te hopeꞌa raꞌa! ⌊ꞌĀmene⌋.