Māteo 9 - Rapa Nui

He haka ora iŋa o Ietū i te taŋata hakari taꞌe makenu

¹ I oti era rā meꞌe, he eke a Ietū ki ruŋa i te vaka he oho ki te rua pāꞌiŋa o te vai ꞌe he tuꞌu ki te kona noho ōꞌona.

² ꞌI ira te nuꞌu i maꞌu ai ki a ia i te taŋata hakari taꞌe makenu e moe rō ꞌana ꞌi ruŋa i te raŋo. I takeꞌa era i te rahi o te haka moe iŋa o te manaꞌu o rā nuꞌu ꞌi ruŋa i a ia mo ora o rā māui-ui, he kī e Ietū ki tū taŋata hakari taꞌe makenu era: «¡Kiahio koe, e haŋu ē! Ko haka kore ꞌā e au i tuꞌu hara».

³ Tētahi ⌊maꞌori o te haka tere hūrio⌋ he manaꞌu: «Te meꞌe kī era e te kope era vānaŋa taꞌe tano mo te ꞌAtua».

⁴ ꞌI te ꞌite o Ietū i te manaꞌu o rā nuꞌu, he ꞌui: «¿He aha kōrua e manaꞌu rake-rake ena?

⁵ Ki a kōrua, ¿ꞌata aŋarahi mo haka kore i te hara ki te haka ora i te māui-ui? ¿Taꞌe ꞌō hai parau nō o te ꞌAtua te ŋā meꞌe nei e aŋa ena?

⁶ ꞌE ꞌī he haka takeꞌa atu pē nei ē: i a au i te ⌊Poki o te taŋata⌋ te parau mo haka kore i te hara ꞌi te ao nei». He kī ia ki tū taŋata hakari taꞌe makenu era: «Ka eꞌa koe ki ruŋa, ka toꞌo tuꞌu raŋo, ka eꞌa ka oho ki tuꞌu hare».

⁷ He eꞌa ki ruŋa tū taŋata hakari taꞌe makenu era ꞌe he oho ki tōꞌona hare.

⁸ I takeꞌa era e te nuꞌu i tū meꞌe era, he riꞌa-riꞌa ꞌe he haꞌahana-hana ki te ꞌAtua ꞌo te vaꞌai i te pūai pē ira ki te taŋata.

He toꞌo iŋa o Ietū i a Māteo mo taŋata hāpī ꞌāꞌana

⁹ He oho ia a Ietū mai tū kona era, he takeꞌa i te taŋata e tahi te ꞌīŋoa ko Māteo e noho rō ꞌana ꞌi tōꞌona kona aŋa. A ia he kope haka ꞌauhau i te taŋata hai moni mo te rōmano. He kī: «Ka oho mai koe mo taŋata hāpī ꞌāꞌaku». He eꞌa a Māteo he oho ꞌi muri.

¹⁰ Ko hora atu ꞌā e kai ꞌana a kuā Ietū ꞌi te hare o Māteo. Meꞌe rahi te ⌊nuꞌu haka ꞌauhau i te taŋata hai moni mo te rōmano⌋ ꞌe te tētahi haka ꞌou atu nuꞌu hara i tuꞌu i kai ananake ko kuā Ietū.

¹¹ I takeꞌa era i rā meꞌe e te ⌊fariseo⌋, he ꞌui ki te nuꞌu hāpī ꞌa Ietū: —¿He aha te kōrua maꞌori e kai ena ananake ko te nuꞌu haka ꞌauhau i te taŋata hai moni mo te rōmano ꞌe ananake ko te tētahi haka ꞌou atu nuꞌu hara?

¹² I ŋaroꞌa era e Ietū i rā vānaŋa, he kī: —Taꞌe mo te nuꞌu taꞌe māui-ui te taote, mo te nuꞌu māui-ui.

¹³ Ka haka topa te haꞌaauraꞌa o te vānaŋa nei: «Tāꞌaku meꞌe haŋa taꞌe he tūtia mai o kōrua, he ai o kōrua he nuꞌu māhatu ꞌaroha». Taꞌe, paꞌi, ki te nuꞌu taꞌe hara a au i oho mai ai, ki te nuꞌu hara.

He tapu iŋa o te kai

¹⁴ Te nuꞌu hāpī ꞌa Iovani Papatito he haka hāhine ki a Ietū ꞌe he ꞌui: —A mātou ꞌe te fariseo e tapu rahi rō ꞌā i te kai. ¿He aha taꞌa nuꞌu hāpī e taꞌe tapu ena?

¹⁵ He pāhono e Ietū: —¿E taꞌe koa ꞌe e taꞌe kai mau rō te nuꞌu ꞌi te ŋoŋoro hāipo-ipo ꞌi te hora ꞌi muri i a rāua te kope ōꞌona te hāipo-ipo? Nā, paꞌi, e tano rō te hora he toꞌo i rā kope mai muri i a rāua; ꞌi rā hora ka tapu iho era.

¹⁶ »ꞌIna e tahi kope hono i te kahu rūꞌau hai parehe tapa kahu ꞌāpī; te hono ꞌāpī he hiki ꞌe he paihi tū kahu rūꞌau era ꞌe he ꞌata nui-nui rō atu ꞌai te more.

¹⁷ »ꞌE ꞌina takoꞌa he haꞌaꞌī i te vino ꞌāpī ki roto i te ipu i aŋa hai kiri ko rūꞌau ꞌā. Mo aŋa pē ira he paihi rā ipu, he māuꞌa te ꞌava ꞌe pē ira takoꞌa ꞌā te ipu. ꞌO ira, e haꞌaꞌī te ꞌava ꞌāpī ki roto i te ipu kiri ꞌāpī ꞌo māuꞌa rā ŋā meꞌe.

He poki ꞌa Hairo ꞌe he viꞌe māui-ui

¹⁸ E vānaŋa nō ꞌana a Ietū ki te nuꞌu, he tuꞌu e tahi taŋata hōnui o te ⌊hūrio⌋, he tū-turi ꞌi muꞌa ꞌe he kī: «Mate iho nō tāꞌaku poki vahine; mo oho mai ōꞌou mo haka puā i tuꞌu rima ki a ia, he ora haka ꞌou».

¹⁹ He eꞌa a Ietū he oho ꞌi muri i tū taŋata era ananake ko tāꞌana nuꞌu hāpī.

²⁰ E tahi ia viꞌe, ka hoꞌe ꞌahuru mā piti matahiti ꞌina he noho haka ꞌou tōꞌona māui-ui vahine, he haka hāhine a tuꞌa i a Ietū he haka puā ki te titi o te kahu

²¹ hai manaꞌu: mo haka puā nō ōꞌona ki te kahu o Ietū, he ora a ia.

²² He hārui he uꞌi a Ietū a tuꞌa, he takeꞌa i rā viꞌe ꞌe he kī: «Kiahio koe, e vovo ē. He haka moe ōꞌou i tuꞌu manaꞌu ꞌi ruŋa i a au i ora ena tuꞌu māui-ui». ꞌE mai rā hora he ora rō ꞌai rā viꞌe.

²³ I tuꞌu era a Ietū ki te hare o tū taŋata hōnui era, he takeꞌa i te nuꞌu haka taŋi puhi e puhi ꞌā i te hīmene pāpaku, ꞌe i te tētahi nuꞌu e ki-kiu e taŋi ꞌā.

²⁴ He kī: «Ka eꞌa kōrua ka oho mai nei. ꞌIna he poki kai mate, e haꞌuru ꞌā». He ka-kata te taŋata

²⁵ ꞌe i haka eꞌa nō e Ietū. He uru ki roto i te piha ꞌi ira rā poki, he ꞌa-ꞌaru a te rima ꞌe he eꞌa rō ꞌai rā poki ki ruŋa.

²⁶ ꞌI te taꞌatoꞌa nō kona o ira i ꞌite ai o ruŋa i tū parau ꞌāpī era.

He ŋāŋata matapō e rua

²⁷ I eꞌa era a Ietū mai tū hare era, ꞌi tuꞌa i oho ai e rua matapō koia ko ohu: —¡E Ietū, e te Hakaara o ⌊Tāvita⌋ ē, ka haka ꞌaroha koe i a māua!

²⁸ I tuꞌu era a Ietū ki te hare ki ira e oho era, he uru ki roto. He haka hāhine tū ŋāŋata era ꞌe he ꞌui e Ietū: —Ki te kōrua manaꞌu, ¿i a au te parau mo aŋa i te meꞌe ena? —ꞌĒ-ē, e Ietū ē —i pāhono ai.

²⁹ He haka puā ia a Ietū i tōꞌona rima ki te mata ꞌe he kī: —Ka ai pa he meꞌe haka moe ena e kōrua i te manaꞌu ꞌi ruŋa i a au.

³⁰ He ora rō ꞌai te mata o tū ŋāŋata era. ꞌE he kī e Ietū: —E uꞌi ꞌo ꞌite e te nuꞌu.

³¹ ꞌE, ka ai atu pē ira, te meꞌe raꞌe i aŋa i eꞌa ai mai rā kona, he ꞌaꞌamu a te kona taꞌatoꞌa i tū meꞌe aŋa era e Ietū.

He taŋata taꞌe vānaŋa e tahi

³² Ka eꞌa ka oho tū ŋāŋata era, ka tuꞌu tētahi nuꞌu e maꞌu rō ꞌā ki a Ietū i te taŋata ko oꞌo ꞌana e te tātane ꞌe ꞌina he vānaŋa haka ꞌou.

³³ I haka eꞌa era e Ietū i rā tātane, he haꞌamata he vānaŋa rā taŋata. Te nuꞌu ko māere atu ꞌā e kī era: «¡ꞌIna kai takeꞌa ꞌā ki te hora hopeꞌa i te meꞌe tuꞌu pē nei ꞌi Itaraera!».

³⁴ ꞌE he kī e te fariseo: «O te pūꞌoko haka tere mau ꞌā o te tātane i vaꞌai ki a ia i te mana mo haka eꞌa i te tātane».

Te toꞌo iŋa i te taŋata mo te ꞌAtua pa he kato iŋa o te kai

³⁵ A te kona taꞌatoꞌa e hāpī e oho era e Ietū ꞌi roto i te ⌊hare pure hūrio⌋, e haka ꞌite ꞌā o ruŋa i te roŋo riva-riva o te ⌊haka tere iŋa ꞌāpī o te ꞌAtua⌋ ꞌe e haka ora ꞌā meꞌe rahi nō atu huru o te māui-ui.

³⁶ I uꞌi era e Ietū i te taŋata, he haka ꞌaroha; e tuꞌu rō ꞌana pa he māmoe ꞌina he taŋata mo hāpaꞌo i a rāua, ko rohi-rohi ꞌana ꞌe ꞌina he haŋu toe.

³⁷ He kī ia ki tāꞌana nuꞌu hāpī: «Te parautiꞌa, nuꞌu rahi te nuꞌu mo toꞌo mo roto i te haka tere iŋa ꞌāpī o te ꞌAtua, pa he kato iŋa o te kai, ꞌe nuꞌu taꞌe rahi te nuꞌu o rāua te kato.

³⁸ ꞌO ira, ka ani ki te kope ꞌāꞌana te kai, he ꞌAtua, mo ꞌata uŋa hai nuꞌu mo kato».