Māteo 6 - Rapa Nui

Te hāꞌūꞌū iŋa ki te nuꞌu veve

¹ »Te kōrua meꞌe riva-riva aŋa ꞌina ko aŋa ꞌi muꞌa i te taŋata mo takeꞌa nō e rāua. Mo aŋa pē ira, te Matuꞌa o kōrua o te raŋi e ko vaꞌai atu i te meꞌe mo koa o kōrua.

² »ꞌO ira, hora ena ōꞌou mo hāꞌūꞌū ki te nuꞌu veve, ꞌina ko haka ꞌite ki te tētahi, pa he meꞌe aŋa ꞌi roto i te ⌊hare pure hūrio⌋ ꞌe ꞌi te ara e te nuꞌu riva a te haho nō mo takeꞌa e te nuꞌu mo vānaŋa riva-riva o ruŋa i a rāua. ꞌĪ a au he kī atu: he vānaŋa riva-riva o te nuꞌu te meꞌe mau nō mo haka koa i a rāua.

³ »Hora ena ōꞌou mo hāꞌūꞌū ki te nuꞌu veve, ꞌina ko ꞌaꞌamu e tahi kope, ka ai atu he repahoa haŋa rahi ōꞌou.

⁴ E hāꞌūꞌū ꞌe ꞌina ko haka ꞌite ki te rua. ꞌE tuꞌu Matuꞌa o te raŋi takeꞌa i taꞌa meꞌe aŋa taꞌe ꞌite e te rua, he vaꞌai atu i te meꞌe mo koa ōꞌou.

He hāpī iŋa o Ietū pē hē ana pure

⁵ »Hora era o kōrua mo pure, ꞌina ko ai pa he nuꞌu riva a te haho nō, te meꞌe haŋa o rāua he māroa he pure ꞌi roto i te hare pure hūrio ꞌe ꞌi te pini o te ara mo takeꞌa e te taŋata. ꞌĪ a au he kī atu: he mātaꞌi-taꞌi o te taŋata te meꞌe mau nō mo haka koa i a rāua.

⁶ »Hora ena ōꞌou mo pure, e uru ki roto i tuꞌu piha e puru te ꞌōpani, ꞌai ka pure rō ki tuꞌu Matuꞌa o te raŋi taꞌe e ꞌite e te taŋata. ꞌE tuꞌu Matuꞌa o te raŋi takeꞌa i taꞌa meꞌe aŋa taꞌe ꞌite e te rua, he vaꞌai atu i te meꞌe mo koa ōꞌou.

⁷ »E pure ꞌana kōrua, ꞌina ko haka hoki te vānaŋa ko tū vānaŋa ꞌā ko tū vānaŋa ꞌā, pa he meꞌe aŋa e te nuꞌu taꞌe ꞌite ko ai te ꞌAtua parautiꞌa ꞌi te manaꞌu ana rahi te rāua vānaŋa iŋa, he ŋaroꞌa e te ꞌAtua.

⁸ ꞌIna ko aŋa pē rāua. ꞌI raꞌe ki te kōrua no-noꞌi, paꞌi, ko ꞌite era ꞌā e te kōrua Matuꞌa o te raŋi i te meꞌe riva-riva mo kōrua.

⁹ »Pē nei ana pure: “E te Matuꞌa o mātou o te raŋi ē, te meꞌe haŋa he moꞌa o te taŋata taꞌatoꞌa i tuꞌu ꞌīŋoa,

¹⁰ ꞌe he haka rē atu mo haka tere ōꞌou i a rāua, ki haka tano ai i taꞌa meꞌe haŋa ꞌi te ao nei pa he haka tano iŋa atu o taꞌa meꞌe haŋa ꞌi te raŋi.

¹¹ E vaꞌai mai koe ꞌarīnā to mātou o te kai.

¹² E haka kore koe i te mātou hara, pa he haka rehu iŋa o mātou i te meꞌe ꞌino aŋa mai e te rua.

¹³ ꞌE, ꞌi te hora o te haka ꞌatu mai, ꞌina koe ko haka rē i a mātou mo viri ki roto i te hara; e haka eꞌa koe i a mātou mai roto i te rima o Rukifero”.

¹⁴ »Mo haka rehu o kōrua i te meꞌe ꞌino aŋa atu e te rua, te kōrua Matuꞌa o te raŋi he haka rehu takoꞌa i te kōrua meꞌe taꞌe tano aŋa.

¹⁵ ꞌE mo taꞌe haka rehu o kōrua i te meꞌe taꞌe tano aŋa atu e te rua, e ko haka rehu takoꞌa e te kōrua Matuꞌa i te kōrua hara.

Te tapu iŋa i te kai

¹⁶ »Hora ena o kōrua mo tapu i te kai mo haꞌamuri ki te ꞌAtua, ꞌina ko haka topa te ꞌāriŋa pa he nuꞌu riva a te haho nō haka tuꞌu i te rāua ꞌāriŋa pa he ꞌāriŋa haka ꞌaroha mo ꞌite e te taŋata e tapu ꞌana a rāua i te kai. ꞌĪ a au he kī atu: he ꞌite mau nō era o te nuꞌu te meꞌe o rāua mo ravaꞌa, taꞌe ꞌō he meꞌe vaꞌai e te ꞌAtua mo haka koa.

¹⁷ Hora ena ōꞌou mo tapu, e hopu te ꞌāriŋa e haka riva-riva,

¹⁸ ꞌo ꞌite e te nuꞌu e tapu ꞌana a koe. ꞌE mo tuꞌu Matuꞌa o te raŋi, taꞌe takeꞌa e koe, e ꞌite. A ia, paꞌi, e ꞌite rō ꞌana i te meꞌe taꞌe ꞌite e te rua taŋata, ꞌe māꞌana e vaꞌai atu i te meꞌe mo koa.

He kona tano mo haꞌaputu o te hauhaꞌa

¹⁹ »ꞌIna kōrua ko haꞌaputu i te hauhaꞌa ꞌi te ao nei, he kona e kai rō ꞌana te meꞌe e te manu kai hare, e rake-rake rō ꞌana ꞌi te para, ꞌe e uru rō ꞌana e te toke-toke mo toke.

²⁰ Te tano mau: ꞌi te raŋi a kōrua ana haꞌaputu i te hauhaꞌa, he kona ꞌina e ko kai e te manu kai hare, ꞌina e ko rake-rake ꞌe ꞌina e ko toke.

²¹ ꞌI te kona ꞌi ira, paꞌi, tuꞌu hauhaꞌa, ꞌi ira takoꞌa tuꞌu māhatu.

Te manaꞌu he mōrī o te taŋata

²² »Te mata pa he mōrī haka māꞌeha i te hakari, ꞌe pē ira ꞌā te manaꞌu o te taŋata. Mo riva-riva, he haꞌere a roto i te māꞌeha;

²³ ꞌe mo rake-rake, a roto i te pōhāhā. Mo kī ōꞌou e māꞌeha rō ꞌana tuꞌu manaꞌu, ꞌe te parautiꞌa mau taꞌe pē ira, ¡ko roto i te pōhāhā taparahi-taꞌata koe!

Te ꞌAtua ꞌe he hauhaꞌa

²⁴ »ꞌIna e tahi kope mo ravaꞌa mo tāvini, ꞌi tū hora ꞌā, ki te ŋāŋata hoko rua. Mo aŋa pē ira, ki te kope e tahi ka haŋa era ꞌe ki te rua ꞌina. He haꞌatura ki te taŋata e tahi ꞌe ki te rua ka taꞌe haka au era. Te auraꞌa: e ko tano koe mo aŋa ki te ꞌAtua ꞌe ki te hauhaꞌa ꞌi tū hora ꞌā.

Te ꞌAtua e hāpaꞌo rō ꞌana i tāꞌana ŋā poki

²⁵ »ꞌĪ a au he kī atu: ꞌina kōrua ko manaꞌu rahi ki te meꞌe mo kai ꞌe mo unu mo ora o kōrua, ꞌe ꞌina takoꞌa ko manaꞌu rahi ki te meꞌe mo uru. ¿Ka kī ꞌō e ora ena te taŋata mo kai mau nō, ꞌe te hakari e ai ena mo uru nō i te kahu?

²⁶ »E uꞌi rā te manu: ꞌina he ꞌoka, ꞌina he kato ꞌe ꞌina he hāpaꞌo i te kai ꞌi roto i te hare haꞌaputu kai. Ka ai atu pē ira, te Matuꞌa o kōrua ꞌi te raŋi e hāŋai rō ꞌana i a rāua. ꞌE a kōrua i hau rō atu ꞌi te hauhaꞌa ki te manu.

²⁷ »E manaꞌu takoꞌa: ka rahi atu te hāpaꞌo iŋa o te kope e tahi o kōrua i a ia ꞌā, e ko ravaꞌa mo haka roa ꞌiti i tōꞌona noho iŋa ꞌi te ao nei.

²⁸ »¿He aha ia kōrua e manaꞌu rahi ena ki te kahu? Ka uꞌi rā te tiare ꞌūaꞌa ꞌi ꞌuta: ꞌina he aŋa ꞌe he hiro i te hau.

²⁹ Ka ai atu pē ira, ꞌina kai ai ꞌā e tahi kope i uru i te kahu hopeꞌa o te nehe-nehe pē rā ŋā tiare, korohaŋa te ꞌariki ꞌono era ko ⌊Toromono⌋.

³⁰ »Mo ai pē ira te ꞌAtua e haka nehe-nehe ena i te tiare o ꞌuta, ꞌūaꞌa ꞌi ꞌaŋarīnā ꞌe mae-mae āpō, ¿pē hē ia ana taꞌe haka uru atu i a kōrua hai kahu, e te nuꞌu taꞌe ⌊haka moe i te manaꞌu⌋ ꞌi ruŋa i te ꞌAtua ē?

³¹ »ꞌIna ko manaꞌu pē nei ē: “¿Hai aha a tātou ana kai ꞌe ana unu?” ꞌe “¿Hai aha a tātou ana uru?”.

³² Te ŋā meꞌe nei he meꞌe manaꞌu rahi e te nuꞌu taꞌe ꞌite ko ai te ꞌAtua parautiꞌa. ꞌE, a kōrua e ai rō ꞌana te Matuꞌa ꞌi te raŋi ko ꞌite ꞌana i te meꞌe mo te kōrua ora.

³³ »ꞌO ira, e vaꞌai tahi te kōrua māhatu mo haka tere atu e te ꞌAtua ꞌe mo aŋa o kōrua i te meꞌe tī-tika ki tōꞌona mata ꞌe māꞌana e vaꞌai atu i rā ŋā meꞌe.

³⁴ ꞌIna ko manaꞌu rahi o ruŋa i te meꞌe ka topa ena āpō; āpō ana manaꞌu iho o ruŋa. Taꞌatoꞌa nō mahana e ai rō ꞌana tōꞌona ꞌati.