Māteo 4 - Rapa Nui

He haka ꞌatu iŋa o Rukifero i a Ietū mo hara

¹ He maꞌu ia e te ⌊Vārua Maitai⌋ i a Ietū ki te kona ꞌone taꞌe noho taŋata mo haka ꞌatu e Rukifero koiꞌite e aŋa rō e tahi meꞌe taꞌe haŋa e te ꞌAtua.

² ꞌI ira i noho ai e maha ꞌahuru mahana ꞌina he kai. I oho era he ŋaroꞌa te maruaki.

³ He haka hāhine ia a Rukifero he kī: —Ē, a koe he Poki o te ꞌAtua, ¿he aha rā koe e taꞌe haka riro ena i te ŋā māꞌea nei he haraoa?

⁴ He pāhono e Ietū: —ꞌIna. Pē nei, paꞌi, e kī ena ꞌi ruŋa i te ⌊Pāpaꞌi Moꞌa⌋: «Taꞌe hai haraoa nō te taŋata e ora ena. Hai haka roŋo takoꞌa ki te vānaŋa taꞌatoꞌa o te ꞌAtua».

⁵ He maꞌu ia e Rukifero i a Ietū ki Hērutarema, ki ruŋa i te kona hopeꞌa o te ruŋa nui o te Kona Haꞌamuri ꞌAtua

⁶ ꞌe he kī: —He Poki koe o te ꞌAtua. Ka rere mai ruŋa nei ki raro. Nā, paꞌi, e hāꞌaki rō ꞌana ꞌi ruŋa i te Pāpaꞌi Moꞌa: «E uŋa rō atu te ꞌAtua i tāꞌana merahi mo hāpaꞌo i a koe. Hai rima o rāua ka maꞌu ena i a koe a ruŋa ꞌo hetu ki te māꞌea».

⁷ He pāhono e Ietū: —E hāꞌaki takoꞌa rō ꞌana ꞌi ruŋa: «ꞌIna koe ko haka ꞌatu i tuꞌu ꞌAtua, ꞌina ko aŋa e tahi meꞌe maꞌa-maꞌa hai manaꞌu pē nei ē: e haka eꞌa rō koe e te ꞌAtua mai rā meꞌe».

⁸ ꞌI te hora hopeꞌa he maꞌu e Rukifero ki ruŋa i te maꞌuŋa hopeꞌa o te ruŋa nui. He haka takeꞌa i te henua taꞌatoꞌa o te ao ꞌe i te rāua hauhaꞌa

⁹ he kī: —He vaꞌai tahi atu a au i te meꞌe taꞌatoꞌa era mo tū-turi ꞌe mo haꞌamuri mai ōꞌou ki a au.

¹⁰ He pāhono e Ietū: —¡Ka mahiti koe ka oho, e Rukifero ē! Ko pāpaꞌi era ꞌana ꞌi ruŋa i te Pāpaꞌi Moꞌa: «E haꞌamuri koe ki a Iehoha ki tuꞌu ꞌAtua ꞌe ki a ia mau nō koe ana tāvini».

¹¹ He haka tapa ia a Rukifero mai muri, ꞌe he oho e te merahi he hāpaꞌo i a Ietū.

He haꞌamata iŋa o Ietū i tāꞌana aŋa ꞌi Karirea

¹² I ŋaroꞌa era e Ietū ko puru ꞌā a ⌊Iovani⌋ ꞌi roto i te hare maꞌuꞌaurī, he eꞌa he oho ki Karirea.

¹³ ꞌIna kai noho ꞌi Nātāreta; ꞌi Kaperenāū i noho ai, ꞌi te taha-taha o te vai, ꞌi te kona o te hakaara o Tāvūrone ꞌe o Nefetārī.

¹⁴ Te meꞌe nei i topa ai tano ki te meꞌe pāpaꞌi e te perofeta era ko ꞌItaia pē nei ē:

¹⁵ «ꞌI te henua o Tāvūrone ꞌe o Nefetārī, ꞌi te taha-taha o te vaikava, ꞌi te rua pāꞌiŋa o te rio era ko Horotana, ꞌi Karirea, kona noho o te nuꞌu taꞌe he ⌊hūrio⌋,

¹⁶ te taŋata noho ꞌi roto i te pōhāhā o te hara ko takeꞌa ꞌana i te mōrī nui-nui. Ko haka māꞌeha ꞌana i te nuꞌu noho ꞌi roto i te pōhāhā o te mate, he taꞌe ꞌite ko ai te ꞌAtua».

¹⁷ Mai rā hora he haꞌamata a Ietū he tātara: «Ka huri te kōrua manaꞌu ki te ꞌAtua; ko hāhine mai ꞌana te haka tere iŋa ꞌāpī ōꞌona».

He toꞌo iŋa o Ietū i te ŋāŋata hī ika hoko hā

¹⁸ E haꞌere e oho nō ꞌā a Ietū a te taha-taha o te vai era o Karirea, he takeꞌa e rua taina: e tahi ko Tīmona, kī takoꞌa ko Pētero, ꞌe te rua ko Antarea, he nuꞌu hī ika e hoa ꞌana i te rāua kūpeŋa.

¹⁹ He kī e Ietū: «Ka oho mai kōrua ꞌi muri i a au. He haka riro a au i a kōrua he nuꞌu hī taŋata mo te ꞌAtua».

²⁰ ꞌI tū hora ꞌana he haka rē i te rāua kūpeŋa he eꞌa he oho ꞌi muri i a Ietū.

²¹ Pe muꞌa ꞌiti he takeꞌa e Ietū i te taina haka ꞌou hoko rua: ko ⌊Tanatiako⌋ ꞌe ko Iovani, he ŋā poki ꞌa Tevereo, e haka riva-riva ꞌana i te rāua kūpeŋa ananake ko te rāua matuꞌa tane ꞌi ruŋa i te vaka. He kī e Ietū mo oho takoꞌa ꞌi muri i a ia.

²² ꞌI tū hora ꞌā he to-topa tū ŋā taina era mai ruŋa i te vaka, he haka rē i te rāua matuꞌa tane ꞌe he eꞌa he oho rō ꞌai ꞌi muri.

He haka ora iŋa o Ietū meꞌe rahi nuꞌu māui-ui

²³ A te kona taꞌatoꞌa o Karirea e haꞌere e oho era a Ietū, e hāpī ꞌana ꞌi roto i te ⌊hare pure hūrio⌋ taꞌatoꞌa o rā ŋā kona. E haka ꞌite ꞌana i te parau ꞌāpī riva-riva o te ⌊haka tere iŋa ꞌāpī o te ꞌAtua⌋ ꞌe e haka ora ꞌā i te māui-ui taꞌatoꞌa.

²⁴ ꞌI te kona taꞌatoꞌa o Tīria e ꞌaꞌamu era o ruŋa i te meꞌe aŋa e Ietū. He maꞌu ia e te taŋata o ira i te nuꞌu huru kē huru kē te rāua māui-ui, te nuꞌu oꞌo e te tātane, te nuꞌu māui-ui kiki-kiki, te nuꞌu taꞌe makenu o te hakari, ꞌe he haka ora tahi e Ietū.

²⁵ Meꞌe rahi nō atu nuꞌu o Karirea, o Rēkāpori, o Hērutarema, o Hūrea ꞌe o te pāꞌiŋa eꞌa o te raꞌā o te rio ko Horotana i oho ꞌi muri i a Ietū.