Māteo 3 - Rapa Nui

He haka riva-riva iŋa o te ara mo te ⌊Kiritō⌋

¹ ꞌI te mahana e tahi ia he tuꞌu a Iovani Papatito ki te kona ꞌone taꞌe noho taŋata o Hūrea.

² ꞌI roto i tāꞌana tātara e kī era: «¡Ka ⌊huri te kōrua manaꞌu⌋ ki te ꞌAtua; te haka tere iŋa ꞌāpī ōꞌona ko hāhine mai ꞌā!».

³ Te perofeta era ko ꞌItaia i vānaŋa rō o ruŋa i a Iovani ꞌi te hora kī pē nei ē: «E tahi reꞌo e ohu ꞌana ꞌi te kona ꞌone taꞌe noho taŋata: “Ka haka riva-riva te ara mo te Kiritō; ka mātaki e tahi ara tī-tika”».

⁴ Te kahu uru o Iovani hai huru-huru kameio i aŋa ai, ꞌe hai pena kiri e here era; e kai era hai meꞌe tuꞌu pa he pereteꞌi ꞌe hai meri ravaꞌa o ruŋa o te maꞌuŋa.

⁵ Meꞌe rahi te nuꞌu o Hērutarema, o te kona taꞌatoꞌa o Hūrea ꞌe o te pāꞌiŋa ararua o te rio ko Horotana i eꞌa i oho ai mo haka roŋo.

⁶ He pinitinia i te rāua hara ꞌe he ⌊papatito⌋ e Iovani ꞌi roto i te rio era ko Horotana.

⁷ I takeꞌa era e Iovani meꞌe rahi te ⌊fariseo⌋ ꞌe te ⌊saruseo⌋ i tuꞌu mo papatito, he kī: «¡E te huaꞌai o te kōreha veneno ē! ¿ꞌA ꞌai i kī atu he eꞌa kōrua mai roto i te ūtuꞌa nui-nui ena ko hāhine mai ꞌā?

⁸ Ka haka tī-tika te kōrua noho iŋa ki takeꞌa ai he parautiꞌa mau ꞌā ko huri ꞌana te kōrua manaꞌu ki te ꞌAtua.

⁹ ꞌE ꞌina ko teꞌo-teꞌo ko kī ki a kōrua ꞌā: “A mātou, hoꞌi, he hakaara o ⌊ꞌAparahama⌋; ꞌo ira e tano rō ꞌā ki te mata o te ꞌAtua”. ꞌĪ a au he kī atu: e tano nō te ꞌAtua mo haka riro i te ŋā māꞌea nei he hakaara o ꞌAparahama.

¹⁰ Te ꞌōhio nā ko rito era ꞌā mo paꞌo i te tumu mai tōꞌona aka. Te tumu taꞌatoꞌa taꞌe hua o te meꞌe riva-riva he paꞌo ꞌe he hoa ki roto i te ahi.

¹¹ »Te parautiꞌa, e papatito atu ena a au hai vai mo takeꞌa e te nuꞌu ko huri ꞌana te kōrua manaꞌu ki te ꞌAtua. ꞌE nā he oho mai te kope māꞌana e papatito atu hai ⌊Vārua Maitai⌋ ꞌe hai ahi. A ia ꞌata hau rō atu ꞌi te pūai ki a au; a au mau nei e ko tano mo maꞌu i tōꞌona kirivaꞌe.

¹² Te kope nei e tuꞌu rō pa he kope maꞌu i te ope mo haka maꞌitaki i te tariko ꞌe mo haꞌataꞌa i te kave-kave paka-paka. He tariko te meꞌe ka hāpaꞌo era ꞌi roto i te hare haꞌaputu tariko, ꞌe he kave-kave ka tutu era ꞌi roto i te ahi ꞌina he mate».

He papatito iŋa i a Ietū

¹³ He oho a Ietū mai Karirea ki te rio era ko Horotana, he kona ꞌi ira a Iovani, mo haka papatito i a ia.

¹⁴ A Iovani kai haŋa ꞌi raꞌe mo papatito i a Ietū ꞌe he kī: —¿Taꞌe ꞌō ko au te meꞌe mo papatito mai e koe? ꞌE, ka ai atu pē ira, ¿e oho mai ꞌā koe mo papatito atu e au?

¹⁵ He pāhono e Ietū: —Mo te hora nei ka haka rē pē nā ꞌā, mo haka tano tahi i te meꞌe haŋa o te ꞌAtua. He papatito ia e Iovani.

¹⁶ I oti era he eꞌa a Ietū mai roto i te vai. ꞌĪ ka uꞌi atu ena ka ha-hata te raŋi. He takeꞌa te turu iŋa o te Vārua Maitai o te ꞌAtua ki ruŋa i a ia pa he pāroma.

¹⁷ He ŋaroꞌa i te reꞌo ka kī mai te raŋi: «He Poki nā ꞌāꞌaku, Poki haŋa rahi; ꞌi ruŋa i a ia tōꞌoku koa».