Māteo 28 - Rapa Nui

He haka ꞌite i te ora iŋa o Ietū mai te mate

¹ I oti era tū ⌊mahana haka ora⌋ era, ꞌe i haꞌamata era te mahana raꞌe o te tāpati, he mahana tāpati, he oho a Māria Matarena ararua ko te rua Māria uꞌi i tū kona haka rē era i te hakari o Ietū.

² ꞌI rā hora he mākenu-kenu pūai te henua. He merahi e tahi o te ꞌAtua tū meꞌe era ko topa ꞌana mai te raŋi. He haka hāhine ki te kona haka rē i te hakari o Ietū, he kume i te māꞌea puru, ꞌe he eke he noho ꞌi ruŋa.

³ Rā merahi meꞌe pura atu pa he ꞌuira, te kahu meꞌe rito-rito atu.

⁴ I takeꞌa era e te vaꞌehau, he rurū rō atu ꞌai ꞌi te riꞌa-riꞌa ꞌe he re-rehu.

⁵ He kī ia e te merahi ki tū ŋā viꞌe era: «ꞌIna kōrua ko riꞌa-riꞌa. Ko ꞌite ꞌana a au e kimi ꞌana kōrua i a Ietū veo era ꞌi ruŋa i te tātaurō.

⁶ ꞌIna a ia o nei, ko ora ꞌana mai te mate pa he meꞌe kī era e ia. Ka oho mai rā ka uꞌi.

⁷ Ka hōrou kōrua, ka oho ka kī ki te nuꞌu hāpī ꞌāꞌana: “Ko ora haka ꞌou ꞌana a Ietū, ꞌe ꞌai he oho ki Karirea; ꞌi ira ka piri ena ananake”. He meꞌe nei tāꞌaku meꞌe mo kī atu».

He haka takeꞌa iŋa o Ietū i a ia

⁸ He oho tū ŋā viꞌe era mai rā kona e horo-horou rō ꞌā koia ko riꞌa-riꞌa ꞌe ko koa haka ꞌite i tū parau ꞌāpī era ki te nuꞌu hāpī ꞌa Ietū.

⁹ E oho nō ꞌā ararua i māroa rō ai a Ietū ꞌi muꞌa ꞌe he ꞌaroha. He haka hāhine tū ŋā viꞌe era, he haꞌamuri ꞌe he haꞌi a te vaꞌe.

¹⁰ He kī e Ietū: «ꞌIna kōrua ko riꞌa-riꞌa. Ka oho ka kī ki tōꞌoku ŋā taina era: “Ka oho ki Karirea; ꞌi ira a mātou ana piri”».

He ꞌauhau iŋa i te vaꞌehau ꞌo kī i te parautiꞌa

¹¹ E oho nō ꞌana tū ŋā viꞌe era, tētahi o te vaꞌehau ꞌauario i te kona haka rē i te hakari o Ietū he oho ki Hērutarema he ꞌaꞌamu ki te nuꞌu ⌊oromatuꞌa ra-rahi⌋ i te meꞌe taꞌatoꞌa i topa.

¹² He oho ia tū ŋā oromatuꞌa era he vānaŋa ki te nuꞌu pūꞌoko haka tere hūrio mo haꞌaꞌau he aha te rāua meꞌe mo aŋa. I oti era he ꞌauhau ki rā ŋā vaꞌehau hai moni riꞌa-riꞌa

¹³ ꞌe he hatu: «E ꞌaꞌamu: e hāꞌuru nō ꞌana a kōrua i tuꞌu atu ai te nuꞌu hāpī ꞌa Ietū, he mātaki i te kona haka rē pāpaku, he toke i te hakari.

¹⁴ ꞌE mo ŋaroꞌa tāꞌue e te suerekao o ruŋa i te ꞌaꞌamu nei, mo mātou e vānaŋa ki a ia ꞌo ꞌati kōrua».

¹⁵ He toꞌo ia tū ŋā vaꞌehau era i te moni, ꞌe he eꞌa he oho he aŋa pē rā meꞌe kī era e rā nuꞌu. ꞌE pē ira e ꞌaꞌamu ena e te ⌊hūrio⌋ ꞌātā ki ꞌaŋarīnā.

He meꞌe mo aŋa e te nuꞌu hāpī ꞌa Ietū

¹⁶ Te hoꞌe ꞌahuru mā hoꞌe nuꞌu hāpī ꞌa Ietū he eꞌa he oho ki Karirea, ki ruŋa o te maꞌuŋa kī e ia.

¹⁷ I takeꞌa era i a Ietū he haꞌamuri, ka ai atu tētahi o rāua e ꞌaka-ꞌaka rō ꞌā te manaꞌu.

¹⁸ He haka hāhine a Ietū ki muri i rā nuꞌu ꞌe he kī: «Ko vaꞌai tahi mai ꞌana te ꞌAtua i te parau mo haka tere i te meꞌe o te raŋi ꞌe o te ao nei.

¹⁹ Ka oho kōrua ka haka ꞌite ki te nuꞌu o te kona taꞌatoꞌa o ruŋa i a au, ki riro ai a rāua he nuꞌu hāpī ꞌāꞌaku, ꞌe ꞌai ka ⌊papatito⌋ rō hai ꞌīŋoa o te Matuꞌa, o te Poki ꞌe o te ⌊Vārua Maitai⌋.

²⁰ E hāpī mo haꞌatura i te meꞌe taꞌatoꞌa hāpī atu e au ki a kōrua. ꞌE ꞌina ko rehu: ꞌi muri i a kōrua a au paurō te mahana ꞌātā ki te hopeꞌa iŋa o te ao».