Māteo 18 - Rapa Nui

¿Ko ai te kope ꞌata hōnui mo te ꞌAtua?

¹ ꞌI rā mahana mau ꞌā, he haka hāhine tāꞌana nuꞌu hāpī ꞌe he ꞌui ki a Ietū: —¿Ko ai te kope ꞌata hōnui ꞌi roto i te ⌊haka tere iŋa ꞌāpī o te ꞌAtua⌋?

² He raŋi e Ietū ki te poki e tahi, he haka māroa ꞌi vāeŋa o rāua

³ ꞌe he kī: —ꞌĪ a au he kī atu: mo taꞌe huri o te kōrua manaꞌu pa he ŋā poki, e ko oꞌo kōrua ki roto i te haka tere iŋa ꞌāpī o te ꞌAtua.

⁴ Te kope hopeꞌa o te hōnui o roto i te haka tere iŋa ꞌāpī o te ꞌAtua he kope manaꞌu i hau rō atu te rua ki a ia, ꞌe tōꞌona manaꞌu pa he ŋā poki.

⁵ ꞌE te kope toꞌo ꞌe hāpaꞌo hai ꞌīŋoa ōꞌoku i te rua, ka ai atu i te poki e tahi pa he poki nei, e toꞌo ꞌana i a au.

E uꞌi kōrua ꞌo hara

⁶ »Te ūtuꞌa o te ꞌAtua mo te taŋata haka hara i te kope taꞌe pūai rahi o te haka moe iŋa i tōꞌona manaꞌu ꞌi ruŋa i a au he ūtuꞌa ꞌata taparahi-taꞌata ki te ūtuꞌa he here hai māꞌea paŋahaꞌa ki te ŋao ꞌai ka hoa ki raro i te parera o te vaikava.

⁷ »He ꞌati e tahi mo te nuꞌu o te ao te ai meꞌe rahi nō atu meꞌe uŋa i te taŋata ki roto i te hara. Rā ŋā meꞌe ꞌina e ko taꞌe ai. Ka ai atu pē ira, ¡ko te ꞌaroha ꞌi te kope haka hara i te rua!

⁸ »ꞌO ira, mo haka hara atu i a koe e tuꞌu rima e tuꞌu vaꞌe, ka hore, ꞌai ka hoa rō a kōnui era. E hau rō atu ꞌi te tano mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua e tahi mau nō rima ꞌo e tahi mau nō vaꞌe, ki te ai ararua uꞌu rima ꞌe ararua uꞌu vaꞌe ꞌe he hoa i a koe ki roto i te ahi ꞌina he mate ki te hora hopeꞌa.

⁹ ꞌE mo haka hara atu i a koe e tuꞌu mata, ka ka-karo ꞌe ꞌai ka hoa rō a kōnui era. E hau rō atu ꞌi te tano mo ravaꞌa i te ora ꞌāpī ꞌina he hopeꞌa raꞌa e tahi nō uꞌu mata, ki te ai ararua mata ꞌe he hoa i a koe ki roto i te pōꞌauahi.

He ꞌaꞌamu haꞌaauraꞌa o te māmoe ŋaro

¹⁰ »ꞌIna kōrua ko taꞌe haka au i te nuꞌu taꞌe pūai rahi o te haka moe iŋa i te manaꞌu ꞌi ruŋa i a au. ꞌĪ a au he kī atu: te merahi hāpaꞌo i te nuꞌu era ꞌai te raŋi ꞌi muꞌa o tōꞌoku Matuꞌa. [

¹¹ Te ⌊Poki o te taŋata⌋, paꞌi, i oho mai ai mo haka eꞌa mai roto i te ūtuꞌa o te hara i te taŋata oho a te ara taꞌe tano ꞌe mo vaꞌai ki a rāua i te ora ꞌāpī ꞌina he hopeꞌa raꞌa.]

¹² »Mo ai e tahi taŋata e ai rō ꞌana e hoꞌe hānere māmoe ꞌe he ŋaro e tahi, ¿e ko haka rē hō ꞌi ruŋa i te maꞌuŋa ꞌā i te māmoe era e iva ꞌahuru mā iva mo oho mo kimi i rā māmoe ŋaro era?

¹³ ꞌE mo ravaꞌa, ꞌata hau rō atu te koa ki rā māmoe ki te ŋā māmoe taꞌe ŋaro era e iva ꞌahuru mā iva.

¹⁴ Pē ira takoꞌa ꞌā, te Matuꞌa o kōrua o te raŋi e ko haŋa mo ŋaro ꞌo mo ꞌati e tahi o te nuꞌu nei, nuꞌu taꞌe pūai rahi o te haka moe iŋa i te manaꞌu ꞌi ruŋa i a au.

Pē hē ana haka kore i te riri mo te taina

¹⁵ »Mo aŋa atu o tuꞌu taina e tahi meꞌe taꞌe tano ki a koe, ka vānaŋa kōrua hoko rua nō ꞌe ꞌai ka haka aŋi-aŋi rō i tōꞌona hape. Mo haka roŋo atu, ko ravaꞌa haka ꞌou ꞌana e koe i tuꞌu taina.

¹⁶ ꞌE mo taꞌe haka roŋo atu, ka maꞌu e tahi ꞌo e rua taŋata ꞌi muri i a koe mo mataꞌite, mo haka tano ki te haka tere iŋa o te ꞌAtua pāpaꞌi e ⌊Mōtē⌋ pē nei ē: hai vānaŋa o te mataꞌite e rua ꞌo e toru he tī-tika te ture taꞌatoꞌa.

¹⁷ ꞌE mo taꞌe haka roŋo ki rā ŋā mataꞌite, ka kī ki te nūnaꞌa taŋata taꞌatoꞌa o rā kona ⌊haka moe i te manaꞌu⌋ ꞌi ruŋa i te ꞌAtua. ꞌE mo taꞌe haka roŋo ki rā nuꞌu, ka haꞌariro pa he taŋata kai ꞌite ko ai te ꞌAtua parautiꞌa ꞌo pa he ⌊nuꞌu haka ꞌauhau i te taŋata hai moni mo te rōmano⌋.

¹⁸ »ꞌĪ a au he kī atu: te meꞌe mo taꞌe haꞌatiꞌa e kōrua ꞌi te ao nei, ko taꞌe haꞌatiꞌa takoꞌa ꞌā ꞌi ruŋa i te raŋi, ꞌe te meꞌe mo haꞌatiꞌa e kōrua ꞌi te ao nei, ko haꞌatiꞌa takoꞌa ꞌā ꞌi te raŋi.

¹⁹ »He kī atu a au: mo haꞌaꞌau ꞌi te ao nei hoko rua o kōrua mo no-noꞌi e tahi meꞌe hai pure, he vaꞌai atu e tōꞌoku Matuꞌa o te raŋi.

²⁰ Mo taka-taka e rua ꞌo e toru taŋata hai ꞌīŋoa ōꞌoku, ꞌi vāeŋa o rāua a au.

²¹ He oho ia e Pētero he ꞌui ki a Ietū: —¿E hia hape o tōꞌoku taina mo haka rehu e au ana aŋa ana oho nō mai i te meꞌe taꞌe tano? ¿E hitu?

²² He pāhono e Ietū: —ꞌIna a au e ko kī atu e hitu; tāꞌaku kī: taꞌatoꞌa nō hape mo aŋa atu.

He kope taꞌe haka rehu i te hape o te rua

²³ »Te haka tere iŋa ꞌāpī o te ꞌAtua pa he haka tere iŋa o te ꞌariki e tahi haŋa mo ꞌauhau e tāꞌana nuꞌu aŋa i te tārahu mōꞌona.

²⁴ »I haꞌamata era mo haka ꞌauhau i rā nuꞌu, he maꞌu he haka māroa ꞌi muꞌa i a ia i te kope e tahi rahi riꞌa-riꞌa te tārahu mōꞌona.

²⁵ ꞌI te taꞌe ai o te moni o rā kope mo ꞌauhau, he kī e te ꞌariki mo hoꞌo pa he ꞌekaravo koia ko tāꞌana viꞌe, ko tāꞌana ŋā poki, ꞌe he meꞌe taꞌatoꞌa ꞌāꞌana; pē ira ana ꞌauhau i tōꞌona tārahu.

²⁶ »He tū-turi rā kope he ani ki te ꞌariki: “Ka haꞌaoromaꞌi mai koe; e ꞌauhau tahi rō atu e au”.

²⁷ »He haka ꞌaroha te ꞌariki, he haka rehu i rā tārahu ꞌe he haka rē mo oho.

²⁸ »I eꞌa i oho era rā kope he piri te hokorua e tahi e ai rō ꞌā te tārahu ꞌiti-ꞌiti o rā hokorua mōꞌona. He ꞌa-ꞌaru he ŋatu i te ŋao ꞌai ka kī e rā kope: “¡Ka ꞌauhau mai tuꞌu tārahu!”.

²⁹ »He tū-turi rā hokorua he ani: “Ka haꞌaoromaꞌi mai koe; e ꞌauhau tahi rō atu e au”.

³⁰ »ꞌIna rā kope kai haŋa. He toꞌo mai he haka puru ꞌātā ka ꞌauhau tahi rō i rā tārahu.

³¹ »Te tētahi atu nuꞌu aŋa mo te ꞌariki he ŋaroꞌa i te māui-ui ki roto i te māhatu ꞌi tū meꞌe topa era ki rā hokorua, ꞌe he oho he ꞌaꞌamu tahi ki te ꞌariki.

³² »He uŋa ia e te ꞌariki mo oho o tū kope era ki a ia ꞌe he ture: “¡E te taparahi-taꞌata ē! Ko haka rehu tahi ꞌana a au i tuꞌu tārahu, he ani mai ōꞌou.

³³ ꞌE i ani atu era tuꞌu hokorua, kai haka ꞌaroha a koe i a ia, pa he haka ꞌaroha iŋa atu era ōꞌoku i a koe”.

³⁴ »ꞌE, ꞌi te riri o te ꞌariki, he kī mo haka ūtuꞌa ꞌātā ka ꞌauhau tahi rō i tū tārahu era ōꞌona.

³⁵ He kī haka ꞌou e Ietū: «Pē ira takoꞌa tōꞌoku Matuꞌa o te raŋi ka aŋa atu ena mo taꞌe haka rehu o kōrua hai māhatu i te meꞌe taꞌe tano aŋa atu e te kōrua taina».