Māteo 15 - Rapa Nui

He meꞌe haka taꞌe tano i te taŋata ki te ꞌAtua

¹ E tahi mahana tētahi nuꞌu ⌊fariseo⌋ ꞌe tētahi ⌊maꞌori o te haka tere hūrio⌋ tuꞌu mai Hērutarema he haka hāhine ki a Ietū he ꞌui:

² —¿He aha taꞌa nuꞌu hāpī e taꞌe aŋa ena i te meꞌe kī e te tātou tupuna mo aŋa? ¿He aha e kai ena kai ⌊haka maꞌitaki⌋ hia i te rima hai hopu haŋa māhani aŋa e tātou e te ⌊hūrio⌋?

³ He ꞌui e Ietū: —ꞌE a kōrua, ¿he aha e haka rehu ena i te roŋo o te ꞌAtua mo maꞌu i te haka tere iŋa o te taŋata?

⁴ Te kī o te ꞌAtua: “E moꞌa koe i tuꞌu matuꞌa tane ꞌe i tuꞌu matuꞌa vahine” ꞌe, “Te kope kī i te vānaŋa taꞌe tano mo tōꞌona matuꞌa te ūtuꞌa he mate”.

⁵ »Ka ai atu pē ira, e kī rō ꞌana e kōrua e tano nō te kope e tahi mo kī ki tōꞌona matuꞌa: “Te meꞌe ai ꞌāꞌaku mo hāꞌūꞌū atu ko haꞌataꞌa ꞌā e au mo te ꞌAtua”.

⁶ Pē ira te kope aŋa i rā meꞌe ka taꞌe moꞌa ena i tōꞌona matuꞌa hai taꞌe hāꞌūꞌū ki a rāua. Hai kī iŋa era e taꞌe haka hauhaꞌa ena e kōrua i te roŋo o te ꞌAtua mo maꞌu i te kōrua haka tere iŋa.

⁷ »¡E te nuꞌu riva a te haho ē! He parautiꞌa mau ꞌana ꞌō te meꞌe kī o ruŋa i a kōrua e te perofeta era ko ꞌItaia hora kī pē nei ē:

⁸ “Te nuꞌu nei hai ŋutu mau nō e haꞌamuri mai nei, ꞌe te rāua māhatu ꞌi te kona kē nō atu.

⁹ ꞌE te rāua haꞌamuri iŋa mai ꞌina e tahi hauhaꞌa; e hāpī rō ꞌana, paꞌi, i te meꞌe taŋata pa he roŋo ꞌāꞌaku”.

¹⁰ He raŋi e Ietū ki te nuꞌu mo haka hāhine ꞌe he kī: —Ka haka roŋo tahi mai kōrua ꞌe e aŋi-aŋi tāꞌaku vānaŋa ka kī atu ena:

¹¹ Taꞌe hai meꞌe oꞌo a roto i te haha e haka taꞌe tano ena i te taŋata ki te mata o te ꞌAtua, hai meꞌe kī eꞌa mai roto i te haha.

¹² He haka hāhine ia ki a Ietū tāꞌana nuꞌu hāpī he ꞌui: —¿Ko ꞌite ꞌana rō koe: te fariseo ko taꞌe au ꞌā mo taꞌa vānaŋa ena?

¹³ He kī e Ietū: —Te tumu taꞌe ꞌoka e tōꞌoku Matuꞌa mai tōꞌona aka ka oꞌi era.

¹⁴ Ka haka rē nō. A rāua he matapō e uŋa ꞌā i te tētahi matapō. ꞌE te taŋata matapō e tahi mo uŋa i te rua matapō, ararua ka vī-viri era ki roto i te pū.

¹⁵ He kī ia e Pētero ki a Ietū: —Ka haꞌaauraꞌa mai taꞌa meꞌe kī era.

¹⁶ He pāhono e Ietū: —¿ꞌĀtā ki a kōrua kai aŋi-aŋi ꞌā?

¹⁷ ¿Kai ꞌite ꞌā e kōrua: te meꞌe oꞌo a roto i te haha he turu ki roto i te kōpū ꞌe he eꞌa mai roto i te hakari?

¹⁸ Te meꞌe haka taꞌe tano i te taŋata ki te mata o te ꞌAtua he meꞌe kī eꞌa mai te haha, he meꞌe mai roto i te taŋata e eꞌa ena.

¹⁹ Mai roto i te māhatu o te taŋata, paꞌi, e eꞌa ena te manaꞌu rake-rake, te tiŋaꞌi te haka mate i te taŋata, te taiꞌata, te piri tane taꞌatoꞌa taꞌe haꞌatiꞌa e te ꞌAtua, te toke, te reo-reo, ꞌe te vā-vā.

²⁰ He meꞌe taꞌatoꞌa nei te meꞌe haka taꞌe tano i te taŋata ki te mata o te ꞌAtua, taꞌe ꞌō he kai ꞌina kai haka maꞌitaki hia i te rima hai hopu haŋa māhani aŋa e tātou e te hūrio.

He viꞌe taꞌe hūrio e tahi

²¹ He eꞌa ia a Ietū mai ira he oho ki te kona hāhine ki Tiro ꞌe ki Tīrone.

²² E tahi viꞌe tōꞌona noho iŋa e hāhine rō ꞌā ki rā ŋā kona, viꞌe o te kona kī ꞌi muꞌa ꞌā ko ⌊Kanaꞌana⌋, he haka hāhine a muri koia ko ohu: —¡E Ietū, e te Hakaara o ⌊Tāvita⌋ ē, ka haka ꞌaroha koe i a au! ¡Ko oꞌo ꞌana tāꞌaku poki vahine e te tātane he haka māui-ui nō te aŋa i a ia!

²³ ꞌIna kai pāhono e Ietū. He haka hāhine ia tāꞌana nuꞌu hāpī ꞌe he ani: —Ka hāꞌūꞌū te viꞌe era ki hoki ai ki tōꞌona hare ꞌo ohu ꞌo oho nō mai ꞌi tuꞌa o tātou.

²⁴ He kī e Ietū: —I uŋa mai ai i a au e te ꞌAtua ki te itaraera mau nō. A rāua pa he māmoe ꞌā ko ŋaro ꞌana.

²⁵ Ka ai atu pē ira, i oho nō rā viꞌe he tū-turi ꞌi muꞌa i a Ietū ꞌe he kī: —¡Ka hāꞌūꞌū mai koe!

²⁶ He pāhono e Ietū: —Meꞌe taꞌe tano mo hiko i te haraoa mai te ŋā poki mo vaꞌai ki te paiheŋa.

²⁷ He kī e tū viꞌe era: —He aŋi ꞌā tāꞌau, e Ietū ē. Ka ai atu pē ira, te paiheŋa e kai takoꞌa rō ꞌā i te pārehe-rehe haraoa vī-viri mai ruŋa i te ꞌamuramaꞌa o te kope ꞌāꞌana rā ŋā paiheŋa.

²⁸ He kī ia e Ietū: —¡Ko te pūai i tuꞌu haka moe iŋa i te manaꞌu ꞌi ruŋa i a au! Ka ai pa he meꞌe haŋa ena e koe. ꞌE ꞌi rā hora mau ꞌā he ora tū poki era.

He haka ora iŋa o Ietū meꞌe rahi nuꞌu māui-ui

²⁹ He eꞌa he oho a Ietū mai tū kona era, he tuꞌu ki te taha-taha o te vai o Karirea ꞌe he eke ki ruŋa i te reva-reva e tahi he noho.

³⁰ Meꞌe rahi te nuꞌu i taka-taka ꞌi rā kona. E maꞌu rō ꞌana i te nuꞌu vaꞌe koke, i te matapō, i te nuꞌu rima rehe-rehe, i te nuꞌu taꞌe vānaŋa, ꞌe meꞌe rahi haka ꞌou atu nuꞌu māui-ui he haka topa a te vaꞌe o Ietū, ꞌe he haka ora e ia.

³¹ He māere te taŋata ꞌi te takeꞌa i te nuꞌu taꞌe vānaŋa ko vānaŋa ꞌā, i te nuꞌu rima rehe-rehe ko ora ꞌana, i te nuꞌu vaꞌe koke ko haꞌere ꞌā ꞌe i te nuꞌu matapō ko takeꞌa ꞌana. ꞌE he haꞌamata rō ꞌai he haꞌahana-hana ki te ꞌAtua o te itaraera.

He hāŋai iŋa haka ꞌou o Ietū i te nuꞌu rahi

³² He raŋi e Ietū ki tāꞌana nuꞌu hāpī ꞌe he kī: —Ko haka ꞌaroha ꞌana a au i te nuꞌu nei. Ka toru mahana o rāua ꞌi muri i a tātou ꞌe ꞌina he meꞌe toe o rāua mo kai. Kai haŋa a au mo haka oho ki te rāua hare kai kai hia ꞌo re-rehu rō ꞌi te ara.

³³ He kī e tū nuꞌu hāpī era ꞌāꞌana: —¿Pē hē ia a tātou ana ravaꞌa i te kai mo te rahi nei ꞌi te kona tuꞌu pē nei ꞌina he noho e te taŋata?

³⁴ He ꞌui e Ietū: —¿E hia haraoa o kōrua? —E hitu, ꞌe he ꞌapa ika riki-riki —i pāhono ai e tū nuꞌu era.

³⁵ He uŋa ia e Ietū mo haka no-noho i te taŋata.

³⁶ He toꞌo i tū ŋā haraoa era e hitu ꞌe i tū ŋā ika era, he māuru-uru ki te ꞌAtua, he more-more he vaꞌai ki tāꞌana nuꞌu hāpī, ꞌe o rāua i tuhaꞌa ki te taŋata.

³⁷ Taꞌatoꞌa i kai ai ki te mākona, ꞌe i haꞌaꞌī rō ki te ꞌī e hitu kānato o te kai i topa.

³⁸ Te rahi i kai ai, mo tataku i te ŋāŋata nō, e maha taꞌutini. ꞌIna kai tataku i te ŋā viꞌe ꞌe i te ŋā poki.

³⁹ I oti era he haka oho e Ietū i te nuꞌu ki te rāua hare, he eke ki ruŋa i te vaka ꞌe he oho ki te kona ko Makarana.