Māteo 14 - Rapa Nui

He aha i tiŋaꞌi ai i a Iovani Papatito

¹ ꞌI rā noho iŋa, a ⌊ꞌErore⌋, ꞌariki haka tere o Karirea, he ŋaroꞌa i te vānaŋa o ruŋa i a Ietū,

² ꞌe he kī ki te nuꞌu aŋa ki a ia: «Te kope era ko Iovani Papatito ko ora haka ꞌou mai ꞌana. ꞌO ira e pūai era mo aŋa i te mana».

³ I kī ai pē ira e ꞌErore ꞌo te ai ꞌāꞌana i uŋa i haka puru i a Iovani hai ꞌEroria, viꞌe ⌊hāipo-ipo⌋ o tōꞌona taina ko Fīripo

⁴ ꞌo te rava ture e Iovani pē nei ē: «Ko hape ꞌā a koe i toꞌo ai i a ꞌEroria mo viꞌe ꞌāꞌau».

⁵ A ꞌErore e haŋa rō ꞌā mo tiŋaꞌi i a Iovani. Te meꞌe nō, e riꞌa-riꞌa rō ꞌā ꞌi te nuꞌu; taꞌatoꞌa nō, paꞌi, e manaꞌu era a Iovani he perofeta.

⁶ ꞌI te ŋoŋoro o te mahana poreko o ꞌErore, he eꞌa te poki vahine ꞌa ꞌEroria he ꞌori ki te nuꞌu taꞌatoꞌa o rā ŋoŋoro. ꞌI te nehe-nehe o te ꞌori o rā uka he koa a ꞌErore.

⁷ He hōrea he vaꞌai e ia i te meꞌe nō era mo no-noꞌi.

⁸ ꞌI te hatu e tōꞌona matuꞌa vahine, he kī ki a ꞌErore: «Ka vaꞌai mai ꞌi ruŋa i te mareti te pūꞌoko o Iovani Papatito».

⁹ He māui-ui te māhatu, he haka kiva-kiva a ꞌErore; ꞌe, ꞌi te ai ko hōrea ꞌana ꞌi muꞌa o te nuꞌu oho ki rā ŋoŋoro, he uŋa ki te vaꞌehau mo vaꞌai.

¹⁰ He kī mo oho ki roto i te hare maꞌuꞌaurī ꞌe mo paꞌo i te pūꞌoko o Iovani.

¹¹ I oti era he maꞌu i rā pūꞌoko ꞌi ruŋa i te mareti he vaꞌai ki rā uka, ꞌe o rā uka i vaꞌai ki tōꞌona matuꞌa vahine.

¹² He tuꞌu ia te nuꞌu hāpī ꞌa Iovani, he toꞌo i te hakari ꞌe he maꞌu he tanu. I oti era he oho he haka ꞌite ki a Ietū.

He hāŋai iŋa o Ietū i te nuꞌu rahi

¹³ I ꞌite era e Ietū o ruŋa i rā ꞌati, he eꞌa he oho a ruŋa i te vaka ki te kona ꞌina he taŋata. I ꞌite nō e te nuꞌu, ꞌe he eꞌa mai te rāua kona taꞌatoꞌa noho he oho a ruŋa i te henua ki te kona ꞌi ira a Ietū.

¹⁴ I topa era a Ietū mai ruŋa i te vaka, he takeꞌa i te rahi o te nuꞌu; he haka ꞌaroha i a rāua ꞌe he haka ora i te nuꞌu māui-ui maꞌu ki a ia.

¹⁵ I haꞌamata era mo pō, he haka hāhine tāꞌana nuꞌu hāpī he kī: —E Ietū, ko ahi-ahi ꞌana, ꞌe kona nei, kona taꞌe noho taŋata. Ka uꞌi te nuꞌu ena ka haka oho ki te kona mo hoꞌo i te rāua meꞌe mo kai.

¹⁶ He pāhono e Ietū: —ꞌIna ko haka oho; ka vaꞌai e kōrua hai meꞌe mo kai.

¹⁷ He kī e rā nuꞌu: —Te meꞌe ai nō o mātou he haraoa e rima ꞌe he ika e rua.

¹⁸ He kī e Ietū: —Ka maꞌu mai.

¹⁹ He kī takoꞌa ki te taŋata taꞌatoꞌa mo no-noho ꞌi ruŋa i te mauku. I oti era he toꞌo i tū haraoa era e rima ꞌe i tū ika era e rua, he uꞌi a te raŋi, he māuru-uru ki te ꞌAtua. He more-more ia i tū ŋā meꞌe era, he vaꞌai ki te nuꞌu hāpī ꞌāꞌana, ꞌe he tuhaꞌa e rāua ki te taŋata.

²⁰ Taꞌatoꞌa nō taŋata i kai ai ꞌātā ka mākona rō ꞌe i haꞌaꞌī rō ki te ꞌī e hoꞌe ꞌahuru mā piti kānato o te kai topa.

²¹ Te nuꞌu i kai, mo tataku i te ŋāŋata nō, e pae taꞌutini ꞌe ꞌina kai tataku te ŋā viꞌe ꞌe te ŋā poki.

He haꞌere iŋa o Ietū ꞌi ruŋa i te vai

²² I oti era te meꞌe nei, he kī e Ietū ki tāꞌana nuꞌu hāpī mo eke ki ruŋa i te vaka mo oho ꞌi raꞌe ki a ia ki te rua pāꞌiŋa o te vai; ko ia mo noho mo haka oho i te taŋata.

²³ I haka oho tahi era a Ietū i te taŋata, he eke ki ruŋa i te maꞌuŋa he pure. Hoko tahi nō ꞌi rā kona i pō ai,

²⁴ ꞌe te vaka ꞌi ruŋa tāꞌana nuꞌu hāpī ko ꞌava-ꞌava ꞌā e oho era mai te henua. ꞌI te ai o te tokerau ꞌi muꞌa o rāua, he tiŋaꞌi tū vaka era e te pari.

²⁵ ꞌI te popohaŋa he haꞌere he oho a Ietū a ruŋa i te vai ki te kona era ꞌi ira te nuꞌu hāpī era ꞌāꞌana.

²⁶ I takeꞌa era e rā nuꞌu i te meꞌe e haꞌere ꞌā a ruŋa i te vai, he mataku ꞌe he kī: —¡He vārua!

²⁷ He meꞌe e Ietū: —¡Kiahio kōrua! ¡Ko au nei! ¡ꞌIna ko mataku!

²⁸ He pāhono e Pētero: —E Ietū, hoki ko koe mau ꞌana, ka kī mai mo oho atu ōꞌoku ki muri i a koe a ruŋa i te vai.

²⁹ —Ka oho mai —i kī ai e Ietū. He topa a Pētero mai ruŋa i te vaka, he haꞌamata he haꞌere a ruŋa i te vai pe te kona era ꞌi ira a Ietū.

³⁰ ꞌI te ŋaroꞌa i te pūai o te tokerau, he riꞌa-riꞌa. ꞌE i haꞌamata i emu i oho era, he ohu: —¡Ka hāꞌūꞌū mai koe, e Ietū ē!

³¹ ꞌI tū hora ꞌā he ꞌa-ꞌaru e Ietū a te rima he kī: —¿Pē nā te haka moe iŋa ōꞌou i te manaꞌu ꞌi ruŋa i a au? ¿He aha rā koe i ꞌaka-ꞌaka ai?

³² I eke era ararua ki ruŋa i te vaka, he haumārū rō ꞌai te tokerau.

³³ Te nuꞌu o ruŋa i te vaka he haꞌamuri ki a Ietū he kī: —¡He parautiꞌa mau ꞌana he Poki koe o te ꞌAtua!

He nuꞌu māui-ui o Henetareta

³⁴ He vari ia ananake a ruŋa i te vaka ki te rua pāꞌiŋa ꞌe he tuꞌu ki te kona e tahi te ꞌīŋoa ko Henetareta.

³⁵ He aŋi-aŋi e te nuꞌu i a Ietū, ꞌe kai roa i tuꞌu ai te parau ꞌāpī ki te kona taꞌatoꞌa o ira. He maꞌu i te rāua nuꞌu māui-ui ki a Ietū,

³⁶ ꞌe he ani mo haka rē i a rāua mo haka puā korohaŋa ki te titi o tōꞌona kahu; ꞌe taꞌatoꞌa nuꞌu haka puā, he ora te māui-ui.