Māteo 13 - Rapa Nui

He ꞌaꞌamu haꞌaauraꞌa o te taŋata ꞌoka kai e tahi

¹ ꞌI rā mahana mau ꞌā, he eꞌa a Ietū mai te hare noho o rāua he oho he noho ꞌi te taha-taha o te vai.

² ꞌI te rahi o te taŋata e taka-taka era, he eke a Ietū he noho ꞌi ruŋa i te vaka, ꞌai ka hāpī i te nuꞌu o ꞌuta.

³ Meꞌe rahi te meꞌe e hāpī era e Ietū hai ꞌaꞌamu haꞌaauraꞌa, ꞌe he kī: «He taŋata e tahi e ꞌoka ꞌā i tāꞌana kai.

⁴ I pī i oho era i te karu, he vī-viri te tētahi a te ara; he tuꞌu e te manu he kai.

⁵ »Tētahi karu i marere a te kona papa ꞌōꞌone taꞌe rahi ꞌe kai roa i tupu ai.

⁶ ꞌI te taꞌe hio-hio o te aka ꞌe ꞌi te pūai o te raꞌā, he paka-paka.

⁷ »I ai rō te karu i marere a te kona mauku pū-pū. ꞌI te taiko o rā ŋā mauku, he ꞌapi i te karu tupu he vavau ꞌe ꞌina kai hua.

⁸ »I ai takoꞌa rō te karu i marere a te kona ꞌōꞌone riva-riva. I tupu era he taiko. Mai rā ŋā karu i hua ꞌe i puŋa ai e hoꞌe hānere, e ono ꞌahuru ꞌe e toru ꞌahuru karu mai te karu nō e tahi.

⁹ »Te nuꞌu haŋa mo aŋi-aŋi ka haka topa te manaꞌu».

He aha a Ietū e hāpī era hai ꞌaꞌamu haꞌaauraꞌa

¹⁰ He haka hāhine ia ki a Ietū te nuꞌu hāpī ꞌāꞌana ꞌe he ꞌui he aha e vānaŋa era ki te nuꞌu hai ꞌaꞌamu haꞌaauraꞌa.

¹¹ He pāhono e Ietū: «Ki a kōrua te ꞌAtua e haka ꞌite atu ena i te meꞌe taꞌe ꞌite e te taŋata o ruŋa o te haka tere iŋa ꞌāpī ꞌāꞌana, ꞌe ki a rāua ꞌina he haka ꞌite.

¹² Te kope aŋi-aŋi ꞌe toꞌo mōꞌona i te parautiꞌa o te ꞌAtua he haka ꞌata aŋi-aŋi. ꞌE te kope ꞌina he toꞌo i rā meꞌe mōꞌona, ꞌātā ki te meꞌe ꞌiti-ꞌiti ꞌite e ia o ruŋa i te ꞌAtua ka toꞌo ena.

¹³ ꞌO ira a au e vānaŋa nei ki te nuꞌu hai ꞌaꞌamu haꞌaauraꞌa; e uꞌi rō ꞌā a rāua ꞌe ꞌina he takeꞌa; e haka roŋo rō ꞌana ꞌe ꞌina he aŋi-aŋi.

¹⁴ ꞌI ruŋa i a rāua he tano te meꞌe kī e te perofeta era ko ꞌItaia: “Ka rahi atu te haka roŋo, e ko aŋi-aŋi, ka rahi atu te uꞌi iŋa, e ko takeꞌa.

¹⁵ Te manaꞌu, paꞌi, o te nuꞌu nei ko mira-mira ꞌā, ko puru ꞌana te tariŋa, ꞌe ko puru ꞌā te mata, ꞌo ŋaroꞌa ꞌe ꞌo takeꞌa, ꞌo aŋi-aŋi, ꞌo huri te manaꞌu ki ruŋa i a au, ꞌo haka kore e au i te rāua hara”.

¹⁶ »ꞌE, ko te koa i a kōrua ꞌo te ai te kōrua mata e takeꞌa rō ꞌā, ꞌe te kōrua tariŋa e ŋaroꞌa rō ꞌā.

¹⁷ ꞌĪ a au he kī atu: meꞌe rahi perofeta ꞌe meꞌe rahi taŋata tano ki te mata o te ꞌAtua i haŋa rō mo takeꞌa i te meꞌe takeꞌa e kōrua, ꞌe ꞌina kai takeꞌa, ꞌe i haŋa rō mo ŋaroꞌa i te meꞌe ŋaroꞌa e kōrua, ꞌe ꞌina e rāua kai ŋaroꞌa.

He haka ꞌite iŋa o Ietū i te haꞌaauraꞌa o rā ꞌaꞌamu

¹⁸ »Ka haka roŋo mai. Te auraꞌa o tū ꞌaꞌamu era o te taŋata ꞌoka kai ko te meꞌe nei:

¹⁹ E ai rō ꞌā te nuꞌu pa he kona ara era ꞌā a ira i vī-viri ai te karu: e haka roŋo ena i te roŋo o ruŋa i te ⌊haka tere iŋa ꞌāpī o te ꞌAtua⌋ ꞌina he aŋi-aŋi; he tuꞌu ia e Rukifero he toꞌo i rā roŋo ꞌo tupu ꞌi roto i te rāua māhatu.

²⁰ »E ai takoꞌa rō ꞌā te nuꞌu pa he kona papa ꞌōꞌone taꞌe rahi vī-viri era o te karu: e haka roŋo ena i te roŋo o te ꞌAtua he toꞌo mo rāua hai koa.

²¹ Te meꞌe ꞌino nō, he haka moe i te rāua manaꞌu ꞌi ruŋa i rā roŋo mo te hora nō e tahi; ka riri era te nuꞌu mo rāua o ruŋa o te vānaŋa o te ꞌAtua ꞌo ka topa rō era te ꞌati ꞌi te hora haka ꞌatu i a rāua, he rehu rā roŋo, pa he taꞌe hio-hio iŋa o te aka ꞌi te kona ꞌōꞌone taꞌe rahi.

²² »Te kona mauku pū-pū vī-viri era o te karu he nuꞌu haka roŋo i te roŋo o te ꞌAtua, ꞌe, ꞌi te pūai o te haŋa ki te meꞌe o te ao nei ꞌe ki te ꞌono he mira-mira te manaꞌu. Taꞌatoꞌa meꞌe nei he haka vavau i te vānaŋa o te ꞌAtua ꞌe ꞌina e ko haka rē mo hua ꞌi roto i a rāua.

²³ »ꞌE te kona ꞌōꞌone riva-riva vī-viri era o te karu he nuꞌu haka roŋo ꞌe aŋi-aŋi i te roŋo o te ꞌAtua. Mai i a rāua he hua meꞌe rahi nō atu meꞌe haŋa e te ꞌAtua, pa he ŋā karu ena ꞌā mai ruŋa i hua ai e hoꞌe hānere, e ono ꞌahuru ꞌe e toru ꞌahuru karu».

He ꞌaꞌamu haꞌaauraꞌa o te mauku rake-rake

²⁴ He ꞌaꞌamu takoꞌa e Ietū i te ꞌaꞌamu haꞌaauraꞌa nei: «Te meꞌe topa ꞌi te haka tere iŋa ꞌāpī o te ꞌAtua e tuꞌu rō ꞌā pa he meꞌe topa ki te taŋata pī i te karu tariko ꞌi roto i tōꞌona henua.

²⁵ E haꞌuru nō ꞌā rā taŋata ꞌe te nuꞌu taꞌatoꞌa o tōꞌona hare, he tuꞌu e tahi kope taꞌe haŋa ki rā taŋata, he pī takoꞌa ꞌi rā kona hai mauku rake-rake ꞌe he eꞌa he oho.

²⁶ »I nui-nui era te tariko he hua ꞌe he tupu takoꞌa tū mauku rake-rake era.

²⁷ He oho ia he kī e te nuꞌu aŋa ki tū taŋata era ōꞌona te henua: “Ē, karu tariko taꞌa karu ꞌoka era, ¿pē hē ia i tupu mai ai te mauku rake-rake?”.

²⁸ »He pāhono e rā taŋata: “O te kope taꞌe haŋa mai ki a au i aŋa i te meꞌe era”. »He ꞌui e tū nuꞌu aŋa era: “¿E haŋa rō koe mo oꞌi-oꞌi o mātou i te ŋā mauku era?”.

²⁹ »He kī e rā taŋata: “ꞌIna, ꞌo oꞌi-oꞌi rō kōrua i te tariko hora ena o kōrua ka oꞌi ena i te mauku.

³⁰ Ka haka rē nō pē nā. Ki tuꞌu te ꞌāvaꞌe mo hore i te tariko, he uŋa a au, ꞌi raꞌe, i te nuꞌu he haka here-here hai ruru i rā mauku mo tutu. Ki oti he hāpaꞌo i te tariko ꞌi roto i te hare haꞌaputu tariko”».

He haꞌaauraꞌa iŋa hai karu mostasa

³¹ He ꞌaꞌamu takoꞌa e Ietū i te ꞌaꞌamu haꞌaauraꞌa nei: «Te haka tere iŋa ꞌāpī o te ꞌAtua pa he karu mostasa ꞌoka e te taŋata e tahi ꞌi ꞌuta.

³² Te karu nei karu hopeꞌa o te ꞌiti-ꞌiti; ꞌe, ka tupu ka nui-nui ka oho era, he ꞌata nui-nui ki te tētahi meꞌe o roto i te haꞌaꞌapu, ꞌātā he tuꞌu pa he tumu ꞌe, ꞌi te nui-nui, he aŋa te manu i te rāua hakapupa ꞌi ruŋa i te maŋa».

He ꞌaꞌamu haꞌaauraꞌa o te revaura

³³ He ꞌaꞌamu takoꞌa i te ꞌaꞌamu haꞌaauraꞌa nei: «Te haka tere iŋa ꞌāpī o te ꞌAtua pa he ꞌapa ꞌiti-ꞌiti revaura hoa e te viꞌe ki roto i te haraoa mata mo haka ahu tahi».

He haka tano iŋa o te ⌊Pāpaꞌi Moꞌa⌋

³⁴ E vānaŋa era a Ietū ki te rahi raꞌa o te nuꞌu o ruŋa i te meꞌe taꞌatoꞌa nei o te haka tere iŋa ꞌāpī o te ꞌAtua hai ꞌaꞌamu haꞌaauraꞌa, ꞌe mo taꞌe ai hai ꞌaꞌamu haꞌaauraꞌa, ꞌina he vānaŋa o ruŋa.

³⁵ Pē ira i tano ai te meꞌe kī e te perofeta pē nei ē: «Hai ꞌaꞌamu haꞌaauraꞌa a au ka vānaŋa nei; e kī rō a au i te meꞌe ꞌina kai ꞌite e te taŋata mai te hora aŋa era ꞌā e te ꞌAtua i te ao».

He haꞌaauraꞌa o tū ꞌaꞌamu era o te mauku rake-rake

³⁶ He haka marere ia e Ietū i te taŋata ꞌe he oho he uru ki roto i te hare. He haka hāhine tāꞌana nuꞌu hāpī ꞌe he ani mo haka aŋi-aŋi i tū ꞌaꞌamu haꞌaauraꞌa era o te mauku rake-rake.

³⁷ He pāhono e Ietū: «Te kope ꞌoka era i te karu riva-riva he ⌊Poki o te taŋata⌋,

³⁸ ꞌe te henua ko te ao nei. Te karu riva-riva era he nuꞌu o roto i te haka tere iŋa ꞌāpī o te ꞌAtua, ꞌe te mauku rake-rake he nuꞌu haka tere e Rukifero.

³⁹ ꞌE tū kope taꞌe haŋa era ki te taŋata era ōꞌona te henua, pī era i te mauku rake-rake ko Rukifero. Te hora era o te hore he paꞌo o te ao, ꞌe te nuꞌu aŋa he merahi.

⁴⁰ »Pa he mauku rake-rake hoa mo tutu ꞌi roto i te ahi, pē ira takoꞌa ka topa ena ꞌi te paꞌo iŋa o te ao.

⁴¹ He uŋa e te Poki o te taŋata i tāꞌana merahi mo toꞌo mai roto o te haka tere iŋa ꞌāpī o te ꞌAtua i te nuꞌu haka hara i te rua ꞌe i te nuꞌu aŋa i te meꞌe taꞌe tano.

⁴² He toꞌo he hoa ki roto i te rona e hū rō ꞌā, he kona ꞌi ira te ta-taŋi ꞌe te ꞌau-ꞌau raꞌa niho.

⁴³ ꞌE te nuꞌu tano ki te mata o te ꞌAtua he ꞌuira pa he raꞌā ꞌi te ao haka tere e te rāua Matuꞌa o te raŋi. »Te nuꞌu haŋa mo aŋi-aŋi ka haka topa te manaꞌu.

He ꞌaꞌamu haꞌaauraꞌa o te hauhaꞌa e naꞌa rō ꞌā

⁴⁴ »Te haka tere iŋa ꞌāpī o te ꞌAtua pa he hauhaꞌa o roto i te henua e tahi. He tuꞌu e tahi kope he ravaꞌa, ꞌe he naꞌa haka ꞌou ꞌi rā kona mau ꞌā. Ko koa atu ꞌana, he oho he hoꞌo i tōꞌona meꞌe taꞌatoꞌa ki te nuꞌu, ꞌe he hoꞌo i rā henua mōꞌona.

He ꞌaꞌamu haꞌaauraꞌa o te poe hopeꞌa o te hauhaꞌa

⁴⁵ »Te haka tere iŋa ꞌāpī o te ꞌAtua pa he taŋata hoꞌo taoꞌa kimi i te poe riva-riva ꞌe nehe-nehe.

⁴⁶ I ravaꞌa era i te poe hopeꞌa o te hauhaꞌa, he oho he hoꞌo tahi i tāꞌana meꞌe, ꞌe he hoꞌo i rā poe mōꞌona.

He ꞌaꞌamu haꞌaauraꞌa o te kūpeŋa

⁴⁷ »Te haka tere iŋa ꞌāpī o te ꞌAtua pa he kūpeŋa hoa ki roto i te vaikava ꞌe toꞌo meꞌe rahi nō atu huru o te ika.

⁴⁸ Ki ꞌī te kūpeŋa, he haro ki ꞌuta, he noho he vae i te ika riva-riva he hāpaꞌo ꞌi roto i te kānato ꞌe he hoa i te ika taꞌe au mo kai.

⁴⁹ ꞌI te paꞌo iŋa o te ao, pē ira ka ai ena: he eꞌa te merahi he haꞌataꞌa i te taŋata aŋa i te meꞌe taꞌe tano mai roto i te nuꞌu aŋa i te meꞌe tano,

⁵⁰ ꞌe he hoa i rā nuꞌu aŋa era i te meꞌe taꞌe tano ki roto i te rona e hū rō ꞌā, he kona ꞌi ira te taŋi ꞌe te ꞌau-ꞌau raꞌa niho».

Te meꞌe ꞌāpī ꞌe te meꞌe rūꞌau

⁵¹ He ꞌui e Ietū: —¿Ko aŋi-aŋi tahi ꞌana e kōrua i te meꞌe nei? —ꞌĒ-ē —i pāhono ai.

⁵² He kī ia e Ietū: —Te ⌊maꞌori o te haka tere hūrio⌋ ꞌite ꞌe aŋi-aŋi takoꞌa o ruŋa i te haka tere iŋa ꞌāpī o te ꞌAtua e tano rō ꞌā mo hāpī o ruŋa i te meꞌe ꞌāpī ꞌe o ruŋa i te meꞌe tuai, pa he hoa hare ꞌite mo toꞌo mai roto i tāꞌana meꞌe rahi hāpaꞌo i te meꞌe ꞌāpī ꞌe i te meꞌe rūꞌau.

ꞌI Nātāreta a Ietū

⁵³ I oti era te ꞌaꞌamu e Ietū i tū ꞌaꞌamu haꞌaauraꞌa era, he eꞌa he oho mai ira ki tōꞌona kāiŋa ko Nātāreta.

⁵⁴ I tuꞌu era ki ira, he haꞌamata he hāpī ꞌi roto i te ⌊hare pure hūrio⌋. Te taŋata, ko māere atu ꞌā, e kī era: «¿ꞌI hē te kope era i ꞌite ai i te meꞌe taꞌatoꞌa era? ¿Pē hē e ravaꞌa ena mo aŋa i te mana?

⁵⁵ ¿Taꞌe ꞌō a ia ko te poki era o te tāmuta, ꞌe ko ⌊Māria⌋ tōꞌona matuꞌa vahine? ¿Taꞌe ꞌō he taina o ⌊Tanatiako⌋, o ⌊Kōsē⌋, o Tīmona ꞌe o Hura?

⁵⁶ ꞌE ¿taꞌe ꞌō tōꞌona ŋā taina vahine ena e noho rō ꞌana ꞌi roto i a tātou? ¿O hē tōꞌona mārama-rama ꞌe tōꞌona pūai?».

⁵⁷ ꞌE ꞌina he nuꞌu o tōꞌona kāiŋa i ⌊haka moe i te manaꞌu⌋ ꞌi ruŋa i a ia. He kī e Ietū: «ꞌIna e tahi perofeta moꞌa e tōꞌona huaꞌai ꞌe e te nuꞌu o tōꞌona kāiŋa. O te nuꞌu o te tētahi atu kona te moꞌa i a ia».

⁵⁸ ꞌE ꞌina kai rahi te mana i aŋa e Ietū ꞌi ira he taꞌe haka moe o te manaꞌu o te nuꞌu o ira ꞌi ruŋa i a ia.