Māteo 12 - Rapa Nui

He mo-more iŋa i te tariko ꞌi te ⌊mahana haka ora⌋

¹ ꞌI te mahana haka ora e tahi, e oho nō ꞌā a kuā Ietū a te kona ꞌoka kai, he maruaki tāꞌana nuꞌu hāpī ꞌe he haꞌamata he more-more i te tariko he kai.

² He takeꞌa e te nuꞌu ⌊fariseo⌋ ꞌe he kī ki a Ietū: —Ka uꞌi taꞌa nuꞌu hāpī; e aŋa ꞌana i te meꞌe taꞌe haꞌatiꞌa mo aŋa ꞌi te mahana haka ora.

³ He pāhono e Ietū: —¿Kai taiꞌo ꞌana ꞌō kōrua i te meꞌe aŋa e ⌊Tāvita⌋ ꞌi te hora maruaki ōꞌona ananake ko te nuꞌu oho ꞌi muri i a ia?

⁴ I uru nō ki roto i te Kona Haꞌamuri ꞌAtua, he kai i te haraoa e tapu rō ꞌā, he haraoa taꞌe haꞌatiꞌa mo kai e rāua, mo te ⌊oromatuꞌa⌋ mau nō.

⁵ ꞌE ¿taꞌe ꞌō ko taiꞌo ꞌana a kōrua ꞌi ruŋa i te ⌊haka tere iŋa ꞌa Mōtē⌋: ꞌina te oromatuꞌa he haka ora mai te rāua aŋa o roto i te ⌊Kona Haꞌamuri ꞌAtua⌋ ꞌi te mahana haka ora ꞌe, ka ai atu pē ira, ꞌina he hara?

⁶ ꞌĪ a au he kī atu: ꞌi nei te meꞌe ꞌata hau rō atu ꞌi te hauhaꞌa ki te Kona Haꞌamuri ꞌAtua.

⁷ A kōrua kai aŋi-aŋi ꞌā i te haꞌaauraꞌa o te vānaŋa nei o te ꞌAtua: «Tāꞌaku meꞌe haŋa taꞌe he tūtia o kōrua, he ai o kōrua nuꞌu māhatu ꞌaroha». ꞌĀhani i aŋi-aŋi e kōrua, e ko kī e hape rō ꞌā te nuꞌu ꞌina kai aŋa hia i te meꞌe taꞌe tano.

⁸ ꞌĪ a au he kī atu: i a au i te ⌊Poki o te taŋata⌋ te parau o te mahana haka ora mo kī i te meꞌe haꞌatiꞌa ꞌe i te meꞌe taꞌe haꞌatiꞌa mo aŋa.

He haka ora iŋa o Ietū i te taŋata rima rehe-rehe

⁹ He oho a Ietū mai rā kona ꞌoka tariko era ꞌe he uru ki roto i te hare pure o ira.

¹⁰ ꞌI roto e tahi taŋata rima rehe-rehe. ꞌI roto takoꞌa te nuꞌu e uꞌi ꞌā i te ꞌōtohe mo tuhi i te hape o Ietū, he ꞌui: —E Ietū, ¿e haꞌatiꞌa rō ꞌana mo haka ora i te taŋata māui-ui ꞌi te mahana haka ora?

¹¹ He pāhono e Ietū: —¿Ko ai o kōrua, mo viri o tāꞌana māmoe ki roto i te pū ꞌi te mahana haka ora, e ko oho e ko toꞌo?

¹² ꞌE te taŋata ꞌata hauhaꞌa rō atu ki te māmoe. ꞌO ira ꞌi te mahana haka ora e haꞌatiꞌa rō ꞌā mo aŋa i te meꞌe riva-riva.

¹³ He kī ia ki tū taŋata rima rehe-rehe era: «Ka haka toro mai tuꞌu rima». He haka toro i tū rima era ōꞌona ꞌe he ora rō ꞌai pa he rua rima.

¹⁴ I eꞌa era tū nuꞌu fariseo era, he haꞌamata he uꞌi i te rāveꞌa mo tiŋaꞌi mo haka mate i a Ietū.

He haka tano iŋa i te meꞌe kī e te perofeta

¹⁵ I ꞌite era a Ietū, he eꞌa he oho mai tū kona era, ꞌe meꞌe rahi nuꞌu i oho ꞌi muri. He haka ora i te nuꞌu taꞌatoꞌa māui-ui,

¹⁶ ꞌe he kī mo taꞌe vānaŋa o ruŋa i a ia ꞌi te kona taŋata.

¹⁷ Pē nei i tano ai te meꞌe haka ꞌite e te perofeta era ko ꞌItaia ꞌi te hora kī pē nei ē:

¹⁸ «ꞌĪ tōꞌoku tāvini haꞌataꞌa e au, kope haŋa rahi ꞌāꞌaku, ꞌi ruŋa i a ia tōꞌoku koa. Ki a ia ka vaꞌai nei e au i tōꞌoku Vārua, ꞌe he haka ꞌite e ia ki te taŋata o te ao pē hē a rāua ana tano ki tōꞌoku mata.

¹⁹ E ko tātake a ia ꞌe e ko ohu-ohu; e ko ŋaroꞌa e te nuꞌu i tōꞌona pōŋeha iŋa ꞌi te ara.

²⁰ E ko riri ki te nuꞌu taꞌe haka moe rahi i te manaꞌu ꞌi ruŋa i a ia, ꞌe e ko riri ki te nuꞌu ꞌaka-ꞌaka o te manaꞌu. E aŋa e oho nō ꞌātā ka haka tano tahi rō i te meꞌe haŋa ꞌāꞌaku.

²¹ ꞌE te nuꞌu o te henua taꞌatoꞌa he ŋatu te haŋu ꞌi ruŋa i a ia».

Te mana o Ietū e kī era o ⌊Veresepupa⌋

²² He maꞌu ia ki a Ietū i te taŋata ko keva ꞌā te mata ꞌe ꞌina he vānaŋa ꞌi te oꞌo e te tātane, ꞌe he haka ora e Ietū.

²³ Te nuꞌu taꞌatoꞌa he māere he ꞌui ki a rāua ꞌā: «¿Ko te Hakaara era hō rā o Tāvita?».

²⁴ I ŋaroꞌa era e te fariseo, he kī: «ꞌA Veresepupa, pūꞌoko o te tātane, i vaꞌai ki a ia i te mana mo haka eꞌa mai roto i te taŋata i te tātane».

²⁵ ꞌI te ꞌite o Ietū i te meꞌe manaꞌu e te fariseo, he kī: «Te henua tamaꞌi ki a rāua ꞌā e tōtōā ꞌana i a rāua ꞌā; te nuꞌu o te kona nūnaꞌa hare ꞌe te huaꞌai moto ki a rāua ꞌā e ko roa he haꞌataꞌa.

²⁶ Pē ira takoꞌa, mo haka eꞌa e Rukifero i a ia mau ꞌana, e haꞌataꞌa ꞌana i a ia ꞌā, ꞌe te pūai o tōꞌona haka tere iŋa he ŋaro.

²⁷ A kōrua e kī ena e haka eꞌa nei a au i te tātane hai pūai o Veresepupa; ꞌe mo aŋa ia ōꞌoku pē ira, ¿ꞌa ꞌai te vaꞌai i te pūai ki te nuꞌu hāpī o kōrua mo haka eꞌa i te tātane mai roto i te taŋata? E takeꞌa ena te hape o te kōrua manaꞌu hai meꞌe aŋa e te kōrua nuꞌu hāpī.

²⁸ ꞌE mo haka eꞌa ōꞌoku i te tātane mai roto i te taŋata hai pūai o te ⌊Vārua Maitai⌋, ko tuꞌu mai ꞌana ia te ⌊haka tere iŋa ꞌāpī o te ꞌAtua⌋ ki a kōrua.

²⁹ »¿Pē hē te kope e tahi ana uru ana toꞌo i te meꞌe o roto i te hare o te ꞌaito, mo taꞌe here-here ꞌi raꞌe i rā ꞌaito? Pē ira mau nō, paꞌi, ana ravaꞌa i te meꞌe o roto i rā hare.

³⁰ »Te kope taꞌe peꞌe mai ꞌina he haŋa mai; ꞌe te kope taꞌe hāꞌūꞌū mai mo haka taka-taka i te taŋata mo te ꞌAtua e haka mira-mira ꞌā i tāꞌaku aŋa.

³¹ »ꞌO ira, ꞌī a au he kī atu: te ꞌAtua e haka kore nō i te hara taꞌatoꞌa ꞌe i te meꞌe taꞌe tano kī e te taŋata. ꞌE te hara mau nō mo taꞌe haka kore e ia: he kī i te vānaŋa taꞌe tano mo te Vārua Maitai.

³² Te ꞌAtua, paꞌi, e haka kore nō ꞌātā i te hara o te taŋata kī i te vānaŋa taꞌe tano mo te Poki o te taŋata; ꞌe, te kope kī i te vānaŋa taꞌe tano mo te Vārua Maitai, e ko haka kore e te ꞌAtua i tōꞌona hara ꞌi te ao nei ꞌe ꞌi te ao ka tuꞌu mai ena.

Te tumu e aŋi-aŋi ena hai hua iŋa ōꞌona

³³ »Mo riva-riva o te tumu, he hua te meꞌe riva-riva; ꞌe mo rake-rake, meꞌe rake-rake. Te huru o te tumu e aŋi-aŋi ena hai huru o tāꞌana meꞌe hua.

³⁴ ¡E te huaꞌai o te kōreha veneno ē! ¿Pē hē kōrua, te nuꞌu aŋa i te meꞌe taꞌe tano, ana kī i te meꞌe riva-riva? Hai meꞌe rahi o roto i te māhatu, te haha e vānaŋa ena.

³⁵ Te taŋata riva he meꞌe riva-riva te meꞌe kī, he manaꞌu riva-riva tōꞌona; ꞌe te taŋata aŋa i te meꞌe taꞌe tano he meꞌe taꞌe tano te meꞌe kī, he manaꞌu rake-rake tōꞌona.

³⁶ ꞌĪ a au he kī atu: ꞌi te mahana o te ture hopeꞌa, e tahi e tahi ka kī ena ki te ꞌAtua i te tumu o tāꞌana vānaŋa taꞌe tano kī.

³⁷ Hai taꞌa vānaŋa mau ꞌā ka ture atu ena pē nei ē: ko hape ꞌana koe ꞌo ꞌina koe kai hape».

He ani iŋa ki a Ietū mo haka takeꞌa i te mana

³⁸ Tētahi o te nuꞌu fariseo ꞌe o te nuꞌu ⌊maꞌori o te haka tere hūrio⌋ he kī ki a Ietū: —E te Maꞌori, e haŋa rō ꞌana a mātou mo takeꞌa i te aŋa iŋa ōꞌou i te mana.

³⁹ He kī a Ietū: —A kōrua, te nuꞌu manaꞌu taꞌe tano haka tapa mai te ara parautiꞌa o te ꞌAtua e haŋa ꞌā mo aŋa ōꞌoku i te mana; ꞌe te meꞌe mau nō mo takeꞌa e kōrua he tāpaꞌo tuꞌu pa he meꞌe topa ki te perofeta era ko ⌊Hōnā⌋.

⁴⁰ Pa he noho iŋa e toru mahana o Hōnā ꞌi roto i te ika nui-nui, pē ira takoꞌa te Poki o te taŋata ka noho ena e toru mahana ꞌi te kona muraki i a ia.

⁴¹ ꞌI te mahana o te ture hopeꞌa, hora ture i te nuꞌu taꞌatoꞌa, he eꞌa te nuꞌu o Nīnive, ꞌe hai rāua ka takeꞌa ena te hape o te nuꞌu o te hora nei. Te nuꞌu o ira, paꞌi, i ŋaroꞌa era i te vānaŋa ꞌa Hōnā, he haka moe tahi i te manaꞌu ꞌi ruŋa i te ꞌAtua. ꞌE ꞌi te kona nei te kope ꞌata hau ki a Hōnā.

⁴² »Pē ira takoꞌa te ꞌariki vahine o Tāvā ka eꞌa ena ꞌi te mahana o te haka ūtuꞌa ꞌe hai ia ka takeꞌa ena te hape o kōrua; i oho nō mai, paꞌi, mai te henua hopeꞌa o te roa mo haka roŋo i te vānaŋa mārama-rama o te ꞌariki era ko ⌊Toromono⌋. ꞌE ꞌi te kona nei te kope ꞌata hau ki a Toromono.

Te hoki iŋa o te tātane ki roto i te taŋata

⁴³ »Te tātane e haka eꞌa ena mai roto i te taŋata he oho he kimi a te kona ꞌone taꞌe noho taŋata hai kona mo haka ora; ꞌe mo taꞌe ravaꞌa,

⁴⁴ he manaꞌu: “ꞌĪ a au he hoki ki te hare mai ira a au i haka eꞌa mai ai”. »Ka hoki era he takeꞌa i rā taŋata pa he hare ꞌina he nuꞌu noho o ira ko purumu ko haka riva-riva ꞌana.

⁴⁵ He oho rā tātane he tari ki ira e hitu tātane ꞌata hau ꞌi te taparahi-taꞌata ki a ia, he uru he noho tahi ꞌi roto i tū taŋata era, ꞌe he ꞌata ꞌati rā taŋata ki te hora raꞌe era. Pē ira ka topa takoꞌa ena ki te nuꞌu o te hora nei, he nuꞌu aŋa i te meꞌe taꞌe tano.

He matuꞌa vahine ꞌe he taina o Ietū

⁴⁶ E vānaŋa nō ꞌā a Ietū ki te nuꞌu, he tuꞌu tōꞌona matuꞌa vahine ꞌe te ŋā taina ōꞌona, e haŋa ꞌā mo vānaŋa ki a ia. ꞌE, ꞌi te noho ꞌi haho o te hare,

⁴⁷ he oho e te kope e tahi he kī ki a Ietū: —ꞌAi haho tuꞌu matuꞌa vahine ananake ko tuꞌu ŋā poki taina e haŋa ꞌā mo vānaŋa atu ki a koe.

⁴⁸ He kī e Ietū: —¿Ko ꞌite ꞌana a kōrua ko ai te nuꞌu he matuꞌa vahine ꞌe he taina takoꞌa ōꞌoku?

⁴⁹ He tuhi ia hai rima ki tāꞌana nuꞌu hāpī ꞌe he kī: —Ko rāua takoꞌa tōꞌoku matuꞌa vahine ꞌe tōꞌoku taina.

⁵⁰ Te nuꞌu aŋa, paꞌi, i te meꞌe haŋa o tōꞌoku Matuꞌa o te raŋi he huaꞌai takoꞌa ōꞌoku.