Marko 8 - Rapa Nui

He hāŋai iŋa haka ꞌou o Ietū i te nuꞌu rahi

¹ ꞌI te mahana e tahi ko taka-taka haka ꞌou ꞌā te taŋata ꞌi muri i a Ietū, ꞌe ꞌina he meꞌe toe o rāua mo kai. He raŋi e Ietū ki tāꞌana nuꞌu hāpī mo haka hāhine ꞌe he kī:

² —Ko haka ꞌaroha ꞌana a au ꞌi te nuꞌu nei; ka toru mahana o rāua ꞌi muri i a tātou ꞌe ꞌina he meꞌe toe o rāua mo kai.

³ Mo haka hoki ōꞌoku i te nuꞌu nei ki te rāua hare ꞌina kai hāŋai hia, he re-rehu ꞌi te ara; e ai rō ꞌana, paꞌi, te nuꞌu mai te kona roa-roa i oho mai ai.

⁴ He pāhono e tāꞌana nuꞌu hāpī: —¿Mai hē ia a tātou ana toꞌo mai i te kai mo hāŋai i a rāua ꞌi te kona tuꞌu pē nei, kona taꞌe noho taŋata?

⁵ He ꞌui e Ietū: —¿E hia haraoa o kōrua? —E hitu —i pāhono ai.

⁶ He hārui e Ietū, he kī ki te nuꞌu taꞌatoꞌa o ira mo no-noho ki raro. He toꞌo i rā ŋā haraoa, he māuru-uru ki te ꞌAtua, ꞌe he more-more he vaꞌai ki tāꞌana nuꞌu hāpī mo tuhaꞌa ki te taŋata, ꞌe pē ira i aŋa ai.

⁷ E ai takoꞌa rō ꞌā i rā nuꞌu hāpī era ꞌāꞌana te ꞌapa ika riki-riki. He māuru-uru takoꞌa a Ietū i rā ŋā ika ki te ꞌAtua, ꞌe he vaꞌai ki rā nuꞌu mo tuhaꞌa.

⁸ Taꞌatoꞌa i kai ai ki te mākona, ꞌe ꞌātā i haꞌaꞌī rō e hitu kānato o te kai i topa.

⁹ Te rahi i kai ai pa he meꞌe ena ē: e maha taꞌutini. I oti era he haka hoki i rā nuꞌu ki te rāua hare.

¹⁰ He eke ia a Ietū ki ruŋa i te vaka ananake ko tāꞌana nuꞌu hāpī, he oho ki te kona ko Raramanuta.

He kī iŋa o te ⌊fariseo⌋ mo aŋa o Ietū i te mana

¹¹ He tuꞌu ia te nuꞌu fariseo ki te kona ꞌi ira a kuā Ietū he haꞌamata he haka tātake ki a ia. ꞌI te haŋa mo ravaꞌa i te reo-reo o Ietū pē nei ē: o te ꞌAtua a ia i uŋa mai, he kī mo aŋa e tahi mana.

¹² ꞌI te taꞌe au o tū vānaŋa era ki a Ietū he puhi te haŋu ꞌe he kī: «¿Ki roa toe nō hē a kōrua e haŋa ena mo aŋa ōꞌoku i te mana? ꞌĪ a au he kī atu: ꞌina e tahi mana mo aŋa atu e au».

¹³ He haka rē ia e Ietū i tū nuꞌu era, he hoki ki ruŋa i te vaka ꞌe he oho ki te rua pāꞌiŋa.

Te revaura o te fariseo

¹⁴ Te nuꞌu hāpī ꞌa Ietū ko rehu ꞌana mo maꞌu hai meꞌe mo kai; te meꞌe mau nō o ruŋa i te vaka he haraoa e tahi.

¹⁵ He kī e Ietū ki tāꞌana nuꞌu hāpī: —E uꞌi e hāpaꞌo kōrua e te revaura o te fariseo ꞌe e te revaura ꞌa ⌊ꞌErore⌋.

¹⁶ He kī ia rā nuꞌu ki a rāua ꞌā: «Te vānaŋa ena e kī mai ena he ꞌite: e tahi nō haraoa maꞌu o tātou».

¹⁷ ꞌI te ꞌite o Ietū o ruŋa i te meꞌe o rā nuꞌu e vānaŋa era, he kī: —¿He aha kōrua e vānaŋa ena o ruŋa i te haraoa? ¿Kai aŋi-aŋi ꞌana ꞌō e kōrua? ¿Ka kī ꞌō e puru rō ꞌā te kōrua māhatu?

¹⁸ ¿Te kōrua mata ꞌina he takeꞌa, ꞌe te kōrua tariŋa ꞌina he ŋaroꞌa? ¿ꞌIna ꞌō kōrua he manaꞌu ki te meꞌe aŋa era e au?

¹⁹ I tuhaꞌa era i te haraoa e rima ki te taŋata e pae taꞌutini, ¿e hia kānato i ꞌī e te pārehe-rehe topa? He pāhono e rā nuꞌu: —E hoꞌe ꞌahuru mā piti.

²⁰ —ꞌE te haraoa e hitu tuhaꞌa era e au ki te taŋata e maha taꞌutini, ¿e hia kānato i ꞌī e te kai topa? He pāhono: —E hitu.

²¹ He kī e Ietū: —ꞌE, ¿kai aŋi-aŋi ꞌā e kōrua?

He haka ora iŋa o Ietū i te taŋata matapō

²² He tuꞌu ia a kuā Ietū ki Vetetaira. ꞌI ira i maꞌu ai e te nuꞌu i te taŋata matapō ki a Ietū, he ani mo haka puā hai rima mo ora o tōꞌona mata.

²³ He ꞌa-ꞌaru e Ietū i tū taŋata era a te rima he hāꞌere he oho ararua ki haho o Vetetaira. He haka rari i te mata hai ꞌā-ꞌanu ꞌe he haka puā hai rima. I oti era he ꞌui e Ietū: —¿E takeꞌa rō ꞌā koe i te meꞌe?

²⁴ He uꞌi tū matapō era ꞌe he kī: —ꞌĪ e takeꞌa mai nei i te taŋata. E tuꞌu rō ꞌana pa he tumu e hāꞌere ꞌā.

²⁵ He haka puā haka ꞌou e Ietū i tōꞌona rima ki te mata. He uꞌi haka ꞌou tū taŋata era ana takeꞌa riva-riva e ia ꞌe he aŋi-aŋi ko ora ꞌā tōꞌona mata. Ko takeꞌa riva-riva ꞌā i te meꞌe taꞌatoꞌa.

²⁶ I oti era he haka oho e Ietū ki tōꞌona hare ꞌe he kī: —Ka hoki ena koe, ꞌina ko hipa ki Vetetaira.

He kī iŋa e Pētero a Ietū he ⌊Kiritō⌋

²⁷ He oho ia a Ietū ananake ko tāꞌana nuꞌu hāpī ki te ŋā kona era o Tētārea o Fīripo. ꞌI te ara he ꞌui e Ietū ki rā nuꞌu: —¿Ko ai a au e kī ena e te nuꞌu?

²⁸ He pāhono: —E ai rō ꞌā te nuꞌu kī ko Iovani Papatito a koe. E ai takoꞌa rō ꞌā te nuꞌu kī ko te perofeta era ko ꞌĒria. ꞌE e ai rō ꞌā te nuꞌu kī he perofeta e tahi o roto o te ŋā perofeta era o muꞌa ꞌā.

²⁹ He ꞌui haka ꞌou e Ietū ki tū nuꞌu era: —ꞌE ki te kōrua kī, ¿ko ai a au? He pāhono e Pētero: —A koe he Kiritō.

³⁰ ꞌE he kī e Ietū ki tāꞌana nuꞌu hāpī mo taꞌe haka ꞌite ki te taŋata.

He haka ꞌite iŋa o Ietū i tōꞌona mate

³¹ He haꞌamata he haka ꞌite e Ietū ki tū nuꞌu hāpī era ꞌāꞌana: te ⌊Poki o te taŋata⌋ e tōtōā rō, e oꞌo rō e te māui-ui ki roto i te ivi, ꞌe e ko haŋa e te nuꞌu pūꞌoko haka tere hūrio, e te ⌊oromatuꞌa ra-rahi⌋ ꞌe e te ⌊maꞌori o te haka tere hūrio⌋. I haka ꞌite takoꞌa rō pē nei ē: e tiŋaꞌi e haka mate rō i a ia ꞌe, ꞌi te toru mahana, he ora haka ꞌou.

³² Te meꞌe taꞌatoꞌa nei i haka aŋi-aŋi riva-riva rō e Ietū. I ŋaroꞌa era e Pētero he maꞌu i a Ietū a te tapa he ture ꞌo vānaŋa haka ꞌou pē ira.

³³ He hārui a Ietū, he uꞌi a ruŋa i tāꞌana nuꞌu hāpī ꞌe he teka he ture ki a Pētero pē nei ē: «¡Ka haka tapa koe mai muri i a au, e Rukifero ē! ꞌIna koe he manaꞌu pa he manaꞌu o te ꞌAtua, a koe e manaꞌu ena hai manaꞌu taŋata».

³⁴ ꞌI tū hora mau era ꞌā he raŋi e Ietū ki tāꞌana nuꞌu hāpī ꞌe ki te nuꞌu haka ꞌou o muri mo haka hāhine ꞌe he kī: «Te kope haŋa mo riro ōꞌona he taŋata hāpī ꞌāꞌaku e haka rehu i a ia mau ꞌā, ꞌai ka ꞌamo rō i tōꞌona tātaurō, te auraꞌa, e vaꞌai i a ia ꞌātā mo mate ꞌi te aŋa iŋa i tāꞌaku meꞌe haŋa.

³⁵ Te kope hārui i a au ꞌe i tāꞌaku hāpī hai tuaꞌivi mo hāpaꞌo i a ia ꞌo mate ꞌe mo aŋa i tāꞌana meꞌe nō era i haŋa e ko ai i a ia te ora ꞌāpī ꞌina he hopeꞌa raꞌa vaꞌai e te ꞌAtua. ꞌE te kope haka rē i tāꞌana meꞌe haŋa mo haꞌatura mai ki a au ꞌe mo haka ꞌite o ruŋa i te ⌊roŋo riva-riva o te ꞌAtua⌋ he ravaꞌa e ia i rā ora.

³⁶ »¿He aha ia te hauhaꞌa mo te kope e tahi te ai i a ia te meꞌe taꞌatoꞌa o te ao, ꞌe ꞌina i a ia te ora ꞌāpī ꞌina he hopeꞌa raꞌa?

³⁷ ¿E ai rō ꞌana hō te rāveꞌa o te taŋata mo ꞌauhau ki te ꞌAtua mo rā ora?

³⁸ »Te taŋata o te hora nei taŋata hara ꞌe ꞌina he haŋa mai. Te kope taꞌe toꞌo i a au ꞌe i tāꞌaku hāpī māꞌana ꞌo haꞌamā ꞌi te nuꞌu, a au, te Poki o te taŋata, e ko toꞌo takoꞌa i a ia māꞌaku ꞌi te hora hoki mai ōꞌoku ananake mātou ko te merahi ꞌi ruŋa i a au te pūai ꞌana-ꞌana o tōꞌoku Matuꞌa».