Marko 5 - Rapa Nui

He taŋata e tahi ko oꞌo ꞌā e te tātane

¹ He tomo ia ananake ki te rua pāꞌiŋa, ki te henua o te hērata.

² I topa era a Ietū mai ruŋa i te vaka, he haka hāhine e tahi taŋata eꞌa mai roto i te menemā ko oꞌo ꞌā e te tātane.

³ Rā taŋata ꞌi roto i te menemā e noho era. ꞌE te nuꞌu o rā henua ꞌina he ravaꞌa haka ꞌou mo haka noho i a ia, ka ai atu e here-here hai vivi.

⁴ Ko rahi ꞌana, paꞌi, te here-here iŋa o te rima ꞌe o te vaꞌe ꞌe he motu-motu nō te aŋa i te vivi. ꞌIna he ravaꞌa mo haka māŋaro.

⁵ Ka pō ka ꞌōtea e haꞌere era a ruŋa i te maꞌuŋa ꞌe a te menemā koia ko ohu-ohu ꞌe ko tiŋi-tiŋi i a ia hai māꞌea.

⁶ I takeꞌa era mai kōnui ꞌā ko Ietū, he tahuti he tū-turi ꞌi muꞌa,

⁷ ꞌe, i toꞌo te reꞌo ki roto era, i kī ai: —¡Ka haka rē koe i a au, e Ietū, e te Poki o te ꞌAtua o te raŋi ē! ¡Ka haka ꞌaroha koe i a au; ꞌina koe ko tōtōā mai!

⁸ I kī ai pē ira e te tātane ꞌo te kī e Ietū: «¡Ka eꞌa koe mai roto i te taŋata ena!».

⁹ He ꞌui e Ietū: —¿Ko ai tuꞌu ꞌīŋoa? He pāhono: —Ko Taꞌutini, ꞌi te meꞌe rahi riꞌa-riꞌa a mātou.

¹⁰ ꞌE he ani e rā tātane ki a Ietū mo taꞌe tū-tute i a rāua mai tū henua era.

¹¹ ꞌI te tapa o te maꞌuŋa, hāhine ki tū kona era ꞌi ira ananake, te nūnaꞌa nui-nui o te oru e kai ꞌā.

¹² He ani ia e tū ŋā tātane era ki a Ietū: —Ka haꞌatiꞌa mai koe i a mātou mo uru ki roto i te ŋā oru era.

¹³ He haꞌatiꞌa ia e Ietū. He eꞌa rā ŋā tātane mai roto i rā taŋata ꞌe he uru ki roto i tū ŋā oru era. He huata a te ꞌōpata, he vī-viri ki roto i te vai ꞌe he emu tahi rō ꞌai. E piti taꞌutini rā ŋā oru.

¹⁴ Te nuꞌu hāpaꞌo i rā ŋā oru he eꞌa he tē-tere ki te kona nūnaꞌa hare. He ꞌaꞌamu ꞌi ira ꞌe ꞌi te kona taꞌatoꞌa o ꞌuta o ruŋa i tū meꞌe takeꞌa era e rāua. ꞌE he pae te taŋata he uꞌi.

¹⁵ I tuꞌu era ki tū kona era ꞌi ira a kuā Ietū, he takeꞌa i te kope oꞌo era e te tātane ko riva-riva ꞌā, e uru rō ꞌana i te kahu ꞌe e noho rō ꞌā ꞌi muri i a Ietū. He riꞌa-riꞌa ananake.

¹⁶ Te nuꞌu takeꞌa i rā meꞌe he haka ꞌite riva-riva ki te nuꞌu tuꞌu iho he aha te meꞌe i topa ki te taŋata oꞌo era e te tātane ꞌe ki te oru.

¹⁷ He ani ia e te nuꞌu o tū kona era ki a Ietū mo oho rō ꞌai mai rā henua.

¹⁸ I hoki era a Ietū ki ruŋa i te vaka, he ani e tū taŋata oꞌo era e te tātane mo oho ōꞌona ꞌi muri.

¹⁹ Kai haꞌatiꞌa e Ietū; i kī nō: —Ka oho koe ki tuꞌu hare ꞌe ka ꞌaꞌamu tahi ki tuꞌu huaꞌai i te meꞌe aŋa atu e te ꞌAtua ꞌi te ꞌaroha i a koe.

²⁰ He oho ia tū taŋata era, he ꞌaꞌamu he oho a te kona taꞌatoꞌa o Rēkāpori i te meꞌe riva-riva aŋa e Ietū ki a ia, ꞌe he māere tahi rō atu ꞌai te nuꞌu.

He poki ꞌa Hairo ꞌe he viꞌe māui-ui

²¹ I hoki haka ꞌou era a Ietū a ruŋa i te vaka ki te rua pāꞌiŋa, he taka-taka meꞌe rahi taŋata. He topa a Ietū ꞌe he noho ꞌi te taha-taha o te vai.

²² He tuꞌu ia e tahi o te nuꞌu pūꞌoko haka tere o te ⌊hare pure hūrio⌋ te ꞌīŋoa ko Hairo. I takeꞌa era i a Ietū, he tū-turi ꞌi muꞌa

²³ ꞌe he ani: —E Ietū ē, he mate tāꞌaku poki. Ka oho mai koe ka haka puā i tuꞌu rima ki a ia mo ora o tōꞌona māui-ui ꞌo mate.

²⁴ He eꞌa a Ietū he oho ꞌi muri i a Hairo, ꞌe meꞌe rahi nuꞌu i oho takoꞌa. ꞌE ꞌi te rahi, ko piri ꞌā e oho era ananake.

²⁵ ꞌI roto i rā nuꞌu e tahi viꞌe ka hoꞌe ꞌahuru mā piti matahiti o te ꞌamo i tōꞌona ꞌati, he toto tehe ꞌina he noho.

²⁶ He maꞌu nō te aŋa ꞌi roto i a ia i te mamae o te meꞌe aŋa e taote era e taote era. Ko pau tahi ꞌana, paꞌi, tōꞌona hauhaꞌa ꞌi te uꞌi iŋa i te rāveꞌa mo ora o tū māui-ui era. ꞌE ꞌina kai ora; pe te ꞌata hau nō.

²⁷ I ŋaroꞌa era e rā viꞌe i te vānaŋa o ruŋa i a Ietū, he oho he haka hāhine a tuꞌa, ꞌi roto i te rahi ꞌā o te taŋata, he haka puā ki te kahu.

²⁸ Tōꞌona manaꞌu, paꞌi: hai haka puā nō ki te kahu o Ietū, he ora rā māui-ui.

²⁹ ꞌI tū hora ꞌā he noho te toto ꞌe he ŋaroꞌa rō ꞌai te ora.

³⁰ I ŋaroꞌa era e Ietū ko eꞌa ꞌana te mana haka ora māui-ui mai ruŋa i a ia, he hārui he uꞌi a ruŋa i te taŋata ꞌe he ꞌui: —¿ꞌA ꞌai tōꞌoku kahu i haka puā mai?

³¹ He pāhono e tāꞌana nuꞌu hāpī: —¿ꞌIna ꞌō he takeꞌa te taŋata e ŋatu mai nei, ꞌe nā koe e ꞌui mai ena ꞌa ꞌai koe i haka puā atu?

³² Ko te uꞌi iŋa ꞌā a Ietū ꞌa ꞌai a ia i haka puā.

³³ Tū viꞌe era, ko rurū ꞌana ꞌi te riꞌa-riꞌa ꞌe ko ꞌite riva-riva ꞌā ko ora ꞌana tōꞌona māui-ui ꞌi tū meꞌe aŋa era e ia, he oho he tū-turi ꞌi muꞌa o Ietū ꞌe he kī tahi i te parautiꞌa.

³⁴ He kī e Ietū: —E vovo, i ora ena koe he haka moe ōꞌou i tuꞌu manaꞌu ꞌi ruŋa i a au. Ka oho riva-riva; ko oti ꞌā tuꞌu ꞌati.

³⁵ E vānaŋa nō ꞌā a Ietū ki rā viꞌe, he tuꞌu te nuꞌu mai te hare o Hairo he kī ki a ia: —Ko mate ꞌana taꞌa poki. ¿Ki te aha nō a Ietū ana oho atu?

³⁶ Kai tapa atu a Ietū ki te vānaŋa o rā nuꞌu, i kī nō ki a Hairo: —ꞌIna koe ko riꞌa-riꞌa; ka haka moe nō tuꞌu manaꞌu ꞌi ruŋa i a au.

³⁷ ꞌIna kai haꞌatiꞌa e Ietū i te taŋata mo oho ꞌi muri i a ia ki te hare o Hairo. Te nuꞌu nō i maꞌu ko Pētero, ko ⌊Tanatiako⌋ ꞌe ko ⌊Iovani⌋, taina o Tanatiako.

³⁸ I tuꞌu era ki ira, he takeꞌa e Ietū i te nuꞌu e ki-kiu e taŋi ꞌā ki tū poki era.

³⁹ He uru ki roto ꞌe he kī: —¿He aha a kōrua e ta-taŋi ena ꞌe e pōŋeha ena pē nā? ꞌIna he poki kai mate; ꞌai e haꞌuru ꞌā.

⁴⁰ He ka-kata tū nuꞌu era mo Ietū. He haka eꞌa i tū nuꞌu taꞌatoꞌa era e Ietū ki haho, he toꞌo i te matuꞌa o rā poki ꞌe i tū ŋā kope era hoko toru, ꞌe he uru ki roto o te piha ꞌi ira rā poki.

⁴¹ He ꞌa-ꞌaru i te rima o tū poki era ko mate ꞌā ꞌe he kī: —Talita, kumi. Te auraꞌa o te vānaŋa nei: «E vovo, ki a koe a au e kī atu ena: ka eꞌa ki ruŋa».

⁴² ꞌI tū hora ꞌā he eꞌa ki ruŋa he haꞌere rā poki. He māere tahi rō atu ꞌai ananake. Te matahiti o tū poki era e hoꞌe ꞌahuru mā piti.

⁴³ He kī ia e Ietū: —Taꞌe kōrua mo ꞌaꞌamu i te meꞌe nei ki te hora hopeꞌa. ꞌE he kī takoꞌa: —Ka vaꞌai hai kai ki te poki.