Marko 16 - Rapa Nui

He haka ꞌite i te ora iŋa o Ietū mai te mate

¹ I oti era te ⌊mahana haka ora⌋, he hoꞌo a Māria Matarena, a ⌊Māria⌋, matuꞌa vahine o kuā ⌊Tanatiako⌋, ꞌe a Taromē i te manoꞌi mo paru i te hakari o Ietū.

² ꞌI te pō era ꞌā o te mahana tāpati, mahana raꞌe o te tāpati, e eꞌa iho nō ꞌā te raꞌā, he oho ananake ki tū kona haka rē era i te hakari o Ietū

³ koia ko ꞌui ki a rāua ꞌā mā ꞌai e tono e haka tapa i te māꞌea puru o rā kona.

⁴ Rā māꞌea, paꞌi, māꞌea nui-nui paŋahaꞌa. I tuꞌu era te ŋā viꞌe nei ki ira, he takeꞌa ko haka tapa era ꞌā.

⁵ I uru era ki roto i tū kona haka rē pāpaku era, he takeꞌa e noho rō ꞌā ꞌi te pāꞌiŋa mataꞌu e tahi taŋata ꞌāpī e uru rō ꞌā i te kahu tea-tea. He riꞌa-riꞌa rō atu ꞌai rā ŋā viꞌe.

⁶ He kī e rā taŋata: «ꞌIna ko riꞌa-riꞌa. A kōrua e kimi ꞌana i a Ietū era o Nātāreta, kope veo era ꞌi ruŋa i te tātaurō. A ia ko ora haka ꞌou ꞌā; ꞌina o nei. Ka uꞌi nō a te kona haka rē era i a ia».

⁷ He kī haka ꞌou e tū taŋata era: «Ka oho kōrua ka kī ki a Pētero ꞌe ki te nuꞌu hāpī haka ꞌou era e hoꞌe ꞌahuru: a Ietū ꞌi raꞌe ki a rāua ka oho ena ki Karirea ꞌe ꞌi ira ka piri ena, pa he meꞌe kī e ia».

⁸ I oti era he eꞌa rā ŋā viꞌe, he tē-tere mai tū kona era ko rurū ꞌana ꞌi te riꞌa-riꞌa. ꞌE ꞌi te ara ꞌina kai ꞌaꞌamu i tū meꞌe era. [

He haka takeꞌa iŋa o Ietū i a ia ki a Māria Matarena

⁹ I ora era a Ietū mai te mate ꞌi te popohaŋa o te mahana raꞌe o te tāpati, he haka takeꞌa i a ia ꞌi raꞌe ki a Māria Matarena, he viꞌe mai roto i haka eꞌa ai e Ietū e hitu tātane.

¹⁰ He oho ia rā viꞌe he haka ꞌite ki te nuꞌu hāpī ꞌa Ietū e ta-taŋi ꞌā ꞌi te koromaki,

¹¹ ko ora haka ꞌou ꞌā a Ietū ꞌe ko takeꞌa ꞌana e ia. He manaꞌu e rā nuꞌu taꞌe he parautiꞌa.

He haka takeꞌa iŋa o Ietū i a ia ki te kope hoko rua

¹² ꞌI te ahi-ahi o rā mahana, e oho nō ꞌā e rua kope hāpī ꞌa Ietū mai Hērutarema ki te rua kona, he piri a Ietū taꞌe hai huru rava māhani takeꞌa e rāua.

¹³ I aŋi-aŋi era e rā ŋā kope ko Ietū ꞌō rā meꞌe, he oho he ꞌaꞌamu ki te tētahi nuꞌu hāpī ꞌa Ietū. ꞌE mo rā nuꞌu taꞌe ꞌā he parautiꞌa.

Te meꞌe mo aŋa e te nuꞌu hāpī ꞌa Ietū

¹⁴ E no-noho nō ꞌā te nuꞌu hāpī ꞌa Ietū e hoꞌe ꞌahuru mā hoꞌe ꞌi ruŋa i te ꞌamuramaꞌa, he haka takeꞌa a Ietū i a ia. He ture ia ꞌo te taꞌe haka roŋo ki te nuꞌu takeꞌa raꞌe i a ia ko ora haka ꞌou ꞌā mai te mate, he pūꞌoko hio-hio o rāua ꞌe he taꞌe ⌊haka moe i te manaꞌu⌋ ꞌi ruŋa i a ia.

¹⁵ I oho era he kī: «E oho kōrua e haka ꞌite i te ⌊roŋo riva-riva o te ꞌAtua⌋ a te henua taꞌatoꞌa.

¹⁶ Te kope haka moe i te manaꞌu ꞌi ruŋa i a au ꞌe haka ⌊papatito⌋ i a ia he eꞌa mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua. ꞌE te kope taꞌe haka moe i te manaꞌu ꞌi ruŋa i a au, he haka ūtuꞌa e te ꞌAtua.

¹⁷ Te nuꞌu haka moe i te manaꞌu ꞌi ruŋa i a au e aŋa rō i te meꞌe ka takeꞌa era e te taŋata he aŋi-aŋi: i rā nuꞌu te mana o te ꞌAtua. Te nuꞌu nei e haka eꞌa rō i te tātane mai roto i te taŋata hai ꞌīŋoa ōꞌoku, ꞌe e vānaŋa rō i te ꞌarero kē taꞌe i hāpī e rāua.

¹⁸ Mo ꞌa-ꞌaru tāꞌue i te kōreha veneno, ꞌe mo unu tāꞌue i te veneno, e ko ꞌati a rāua. ꞌE ꞌātā e ai rō te mana vaꞌai e te ꞌAtua, ka haka puā era hai rima ki te nuꞌu māui-ui, he ora rō ꞌai».

He iri iŋa o Ietū ki te raŋi

¹⁹ I oti era a Ietū te vānaŋa, he maꞌu he iri e te ꞌAtua ki te raŋi. He noho ia a Ietū ꞌi te pāꞌiŋa mataꞌu o te ꞌAtua.

²⁰ ꞌE tū nuꞌu hāpī era ꞌa Ietū he eꞌa he haka ꞌite he oho a te kona taꞌatoꞌa i te roŋo riva-riva o te ꞌAtua, ꞌe ꞌa Ietū te hāꞌūꞌū i rā nuꞌu. ꞌE hai mana aŋa e rā nuꞌu hai ia e takeꞌa era e te taŋata: te roŋo haka ꞌite oho e rāua he parautiꞌa.]