Marko 15 - Rapa Nui

Ko Ietū ꞌi muꞌa o Pirato

¹ ꞌI te pō era ꞌā, i oti era te haꞌaꞌau o te ⌊nūnaꞌa taŋata i a rāua te kī iŋa hopeꞌa o te haka tere hūrio⌋: he nuꞌu ⌊oromatuꞌa ra-rahi⌋, he nuꞌu pūꞌoko haka tere hūrio ꞌe he ⌊maꞌori o te haka tere hūrio⌋, he maꞌu i a Ietū e here-here rō ꞌā, ꞌe he vaꞌai ki a Pirato, he suerekao rōmano.

² He ꞌui ia e Pirato ki a Ietū: —¿He ꞌAriki koe o te ⌊hūrio⌋? He pāhono e Ietū: —ꞌĀꞌau i kī.

³ Meꞌe rahi te meꞌe i tuhi e te nuꞌu oromatuꞌa ra-rahi o ruŋa i a Ietū.

⁴ ꞌO ira i ꞌui haka ꞌou ai e Pirato ki a Ietū: —¿ꞌIna ꞌō ꞌaꞌa meꞌe mo kī? ¿ꞌIna koe he ŋaroꞌa i te rahi o te meꞌe e tuhi atu ena o ruŋa ōꞌou?

⁵ Kai pāhono e Ietū, ꞌe he māere a Pirato.

Te ūtuꞌa mo Ietū he mate

⁶ ꞌI te ⌊ŋoŋoro he Pakate⌋, e haka eꞌa rō ꞌā a Pirato e tahi taŋata mai roto i te hare maꞌuꞌaurī, taŋata nō era o te hūrio i haŋa.

⁷ ꞌI roto te kope e tahi te ꞌīŋoa ko Varavā. E puru rō ꞌā ananake ko te tētahi atu nuꞌu ꞌo te haka tumu i te ture ki te nuꞌu ra-rahi rōmano ꞌe ꞌo te mate o te taŋata i a rāua.

⁸ He haka hāhine ia te nuꞌu, he haꞌamata he ani ki a Pirato mo haka eꞌa e tahi taŋata mai roto i te hare maꞌuꞌaurī pa he meꞌe aŋa e ia paurō te matahiti.

⁹ He ꞌui ia e Pirato: —¿E haŋa rō kōrua mo haka pakoꞌo e au i te ꞌAriki o te hūrio?

¹⁰ I ꞌui ai pē ira e Pirato ꞌi te ꞌite he mākota o tū nuꞌu oromatuꞌa ra-rahi era i vaꞌai ai i a Ietū ki a ia.

¹¹ He kī ia e rā ŋā oromatuꞌa ki te nuꞌu mo ohu ki a Pirato ko Varavā te meꞌe mo haka eꞌa.

¹² He ꞌui haka ꞌou e Pirato: —¿He aha te kōrua meꞌe haŋa mo aŋa e au ki te taŋata nei e kī ena e kōrua he ꞌAriki o te hūrio?

¹³ He raŋi e tū nuꞌu era: —¡Ka veo ꞌi ruŋa i te tātaurō!

¹⁴ He ꞌui e Pirato: —¿He aha tāꞌana meꞌe taꞌe tano i aŋa? He ꞌata ohu e rā nuꞌu: —¡Ka veo ꞌi ruŋa i te tātaurō!

¹⁵ ꞌI te haŋa o Pirato mo riva-riva ōꞌona ki tū nuꞌu era, he haka eꞌa i a Varavā. ꞌE ko Ietū i haka tiŋaꞌi hai ꞌuaka. I oti era he vaꞌai ki te vaꞌehau ꞌe he kī mo veo ꞌi ruŋa i te tātaurō.

¹⁶ He maꞌu ia e te vaꞌehau i a Ietū ki te kona e tahi o roto i te hare o Pirato, ꞌe ꞌi ira i haka taka-taka ai i te vaꞌehau.

¹⁷ He toꞌo mai e te vaꞌehau he patu i te kahu o Ietū ꞌe he haka puꞌa hai kapa mea-mea ꞌuri, ꞌe ki te pūꞌoko i huki ai hai hei i aŋa hai maŋa-maŋa o te tiare pū-pū.

¹⁸ I oti era he haꞌamata he haka meꞌe-meꞌe: «¡Pē hē te ꞌAriki o te hūrio!».

¹⁹ ꞌE he puꞌa-puꞌa hai miro ki te pūꞌoko koia ko ꞌanu-ꞌanu, ꞌai ka noi ananake ka tū-turi pa he meꞌe ena ē: e haꞌatura ꞌā a rāua ki te ꞌariki.

²⁰ I oti era te haka meꞌe-meꞌe, he patu i tū kapa era, he haka uru haka ꞌou i tōꞌona kahu, ꞌe he maꞌu he oho mo veo ꞌi ruŋa i te tātaurō.

He veo iŋa i a Ietū ꞌi ruŋa i te tātaurō

²¹ E maꞌu e oho nō ꞌā i a Ietū a te ara he piri te taŋata e tahi o te kona ko Tīrene te ꞌīŋoa ko Tīmona, matuꞌa tane o Arehantaro ararua ko Rufo, e hoki ꞌā mai ꞌuta. He toꞌo mai e te vaꞌehau he haka ꞌamo i te tātaurō ꞌamo e Ietū.

²² He uŋa he oho ia i a Ietū ki te kona te ꞌīŋoa ko Korokota (te auraꞌa o te ꞌīŋoa nei: «kona o te pakahera taŋata mate»).

²³ I tuꞌu era ki ira, he vaꞌai e te vaꞌehau i te ꞌava ko ꞌānoꞌi ꞌana hai mirra ꞌo ŋaroꞌa rahi e ia i te mamae, ꞌe, kai haŋa e Ietū mo unu.

²⁴ He toꞌo mai he veo ꞌi ruŋa i te tātaurō. I oti era he noho te vaꞌehau he pere i te kahu o Ietū mo uꞌi ki a ai ki a ai ka topa era.

²⁵ Hora iva o te pōꞌā i veo ai i a Ietū ꞌi ruŋa i te tātaurō.

²⁶ ꞌI te pūꞌoko o rā tātaurō i huki ai te miro e hāꞌaki rō ꞌā: «He ꞌAriki o te hūrio», he haka ꞌite iŋa i te tumu o tōꞌona ūtuꞌa.

²⁷ ꞌI te pāꞌiŋa mataꞌu ꞌe ꞌi te pāꞌiŋa maui o Ietū te tātaurō haka ꞌou ꞌi ruŋa i veo ai e rua toke-toke. [

²⁸ Pē ira i haka tano ai ki te meꞌe kī ꞌi ruŋa i te ⌊Pāpaꞌi Moꞌa⌋: «E tataku rō ꞌi roto i te nuꞌu taparahi-taꞌata».]

²⁹ Te nuꞌu vari a ira ꞌai e vā-vā era koia ko ue-ue i te rāua pūꞌoko e kī era: «¡Ē! ¿Taꞌe ꞌō ko koe tū meꞌe kī era he haka hiŋa i te ⌊Kona Haꞌamuri ꞌAtua⌋ ꞌe e toru mahana he haka tuꞌu haka ꞌou e koe?

³⁰ ¡Ka haka eꞌa, hoꞌi, koe i a koe mai roto i te ꞌati ena ꞌe ka topa mai mai ruŋa i te tātaurō!».

³¹ Te nuꞌu oromatuꞌa ra-rahi ꞌe te maꞌori o te haka tere hūrio ꞌai e haka ka-kata era: «Ko haka eꞌa ꞌana i te tētahi taŋata mai roto i te rāua ꞌati, ꞌe, ¿e ko ravaꞌa mo haka eꞌa i a ia mau ꞌā?

³² ¡Ka topa, hoꞌi, te ⌊Kiritō⌋, te ꞌAriki o Itaraera, mai ruŋa i te tātaurō, ki takeꞌa mai ꞌe ki haka moe ai te mātou manaꞌu ꞌi ruŋa i a ia!». ꞌE, takoꞌa, i vā-vā rō i a Ietū e tū ŋā kope veo era ꞌi tupuꞌaki ōꞌona.

He mate iŋa o Ietū

³³ I tano era te hora kai, he pōhāhā tahi te henua ꞌātā ki te hora toru o te ahi-ahi.

³⁴ ꞌI rā hora i aꞌu a Ietū i te reꞌo i ohu ai: Eloí, Eloí, ¿lemá sabactani? (Te haꞌaauraꞌa o te vānaŋa nei: «E tōꞌoku ꞌAtua ē, e tōꞌoku ꞌAtua ē, ¿he aha a koe i haka rē ai i a au hoko tahi nō?»).

³⁵ He ŋaroꞌa e te nuꞌu o tū kona era he kī: «Ka haka roŋo rā kōrua, e ohu ꞌā ki te perofeta era ko ꞌĒria».

³⁶ He tahuti e tahi o roto o rā nuꞌu, he toꞌo i te meꞌe tuꞌu pa he vavai, he haka ruku ki roto i te vino maŋeo, he huki ki ruŋa i te miro, ꞌe he maꞌu he haka puā ki te ŋutu o Ietū mo ꞌomo-ꞌomo. He kī e rā kope ki te nuꞌu o rā kona: «¡Ki haka rē nō, ki uꞌi tātou hoki e tuꞌu rō mai a ⌊ꞌĒria⌋ e haka topa rō i a ia mai ruŋa i te tātaurō!».

³⁷ He aꞌu haka ꞌou a Ietū i te reꞌo, he puhi te haŋu hopeꞌa ꞌe he mate.

³⁸ ꞌI rā hora mau ꞌā te korotina puru i te kona hopeꞌa o te moꞌa o roto i te Kona Haꞌamuri ꞌAtua he paihi mai ruŋa ki raro he topa e rua pāꞌiŋa.

³⁹ ꞌI muꞌa o Ietū e tahi kape o te vaꞌehau rōmano. I takeꞌa era i te huru o tōꞌona mate iŋa he kī: «He aŋi mau ꞌana ꞌō te taŋata nei he Poki o te ꞌAtua».

⁴⁰ ꞌI rā kona takoꞌa te ŋā viꞌe e uꞌi era mai kōnui. ꞌI roto o rā ŋā viꞌe a Māria Matarena, a ⌊Māria⌋, matuꞌa vahine o ⌊Kōsē⌋ ararua ko ⌊Tanatiako⌋ ꞌIti-ꞌiti, ꞌe a Taromē.

⁴¹ O te ŋā viꞌe nei te hāꞌūꞌū i a Ietū ꞌi Karirea. ꞌI muri o rā ŋā viꞌe meꞌe rahi haka ꞌou atu ŋā viꞌe oho ꞌi muri i a Ietū ki Hērutarema.

He haka rē iŋa i te hakari o Ietū

⁴² Ko ahi-ahi ꞌā rā mahana, ꞌe ꞌo te ai he mahana haka riva-riva mo te rua mahana he ⌊mahana haka ora⌋,

⁴³ he oho, kai riꞌa-riꞌa, a ⌊Kōsē⌋, he taŋata o Ārimatea, he kī ki a Pirato mo vaꞌai i te hakari o Ietū. Te taŋata nei he taŋata hōnui e tahi o roto o te nūnaꞌa taŋata i a rāua te kī iŋa hopeꞌa o te haka tere hūrio. A ia takoꞌa e tiaki ꞌā ki te tuꞌu iŋa mai o te ⌊haka tere iŋa ꞌāpī o te ꞌAtua⌋.

⁴⁴ I ŋaroꞌa era e Pirato ko mate ꞌā a Ietū he māere. He uŋa ia mo oho o tū kape era o te vaꞌehau ꞌe he ꞌui e Pirato ki rā kape hoki ko mate mau ꞌā.

⁴⁵ I kī era he parautiꞌa, he haꞌatiꞌa e Pirato mo toꞌo e Kōsē i te hakari o Ietū.

⁴⁶ He oho ia a Kōsē he hoꞌo e tahi tāvana rino, he haka topa i te hakari o Ietū mai ruŋa i te tātaurō, ꞌe he viri hai rā tāvana. I oti era he maꞌu he haka rē ꞌi roto i te kona i ka-karo ꞌi te māꞌea pa he piha mo te pāpaku ꞌe ꞌai ka puru ꞌi rā kona hai māꞌea nui-nui taka-taka.

⁴⁷ ꞌE a Māria Matarena ararua ko Māria matuꞌa vahine o Kōsē ꞌai e uꞌi era ꞌi hē i haka rē ai i te hakari o Ietū.