Marko 14 - Rapa Nui

He haꞌaꞌau iŋa mo ꞌa-ꞌaru i a Ietū

¹ E rua mahana toe mo te ⌊ŋoŋoro he Pakate⌋, ŋoŋoro kai i te haraoa ꞌina he revaura. Te ⌊oromatuꞌa ra-rahi⌋ ananake ko te ⌊maꞌori o te haka tere hūrio⌋ e kimi ꞌana i te rāveꞌa mo ꞌa-ꞌaru hai reo-reo i a Ietū ꞌe mo tiŋaꞌi mo haka mate.

² I ai rō tētahi o rā nuꞌu i kī mo taꞌe ꞌa-ꞌaru ꞌi rā ŋā mahana era o te ŋoŋoro ꞌo tātake ꞌe ꞌo moto te taŋata.

He huri iŋa i a Ietū hai manoꞌi

³ A Ietū ia ꞌi Vētānia, ꞌi te hare o Tīmona, e kī takoꞌa era ko Rēpera. E noho nō ꞌā a Ietū ꞌi ruŋa i te ꞌamuramaꞌa, he tuꞌu e tahi viꞌe e maꞌu rō ꞌā e tahi ipu aŋa hai māꞌea nehe-nehe ko ꞌī ꞌā e te manoꞌi he nardo, manoꞌi hopeꞌa o te hauhaꞌa. He tī-tiŋi e rā viꞌe i te puꞌa o rā ipu mo ha-hata, ꞌai ka huri a ruŋa i te pūꞌoko o Ietū.

⁴ I ai rō te nuꞌu o rā kona i riri, i kī ki a rāua ꞌā: «¿He aha i haka māuꞌa ai i te manoꞌi?

⁵ Māuꞌa ꞌō i taꞌe hoꞌo ai mo hāꞌūꞌū ki te veve. Te moni, paꞌi, o te manoꞌi era ko te tara ena mo ꞌauhau e toru hānere mahana aŋa». He ture ia e rā nuꞌu ki rā viꞌe.

⁶ He kī e Ietū: «¡Ka haka rē! ¿He aha kōrua e ture ena ki a ia? Nā e aŋa ꞌana i te meꞌe riva-riva mōꞌoku.

⁷ Te nuꞌu veve e ko ŋaro mai muri i a kōrua ki te hora hopeꞌa. Hora nō era o kōrua i haŋa e tano nō mo hāꞌūꞌū ki a rāua. ꞌE, a au e ko noho e ko oho nō atu ꞌi muri i a kōrua.

⁸ ꞌE te viꞌe nei ko aŋa ꞌā i tāꞌana meꞌe i tano mo aŋa: ꞌī ko haka ꞌeo era ꞌā i tōꞌoku hakari mo tōꞌoku hora tanu.

⁹ ꞌĪ a au he kī atu: ꞌi te kona taꞌatoꞌa o te ao haka ꞌite i te ⌊roŋo riva-riva o te ꞌAtua⌋, he vānaŋa takoꞌa o ruŋa i te meꞌe aŋa mai nei e ia; pē ira ka taꞌe rehu ena a ia».

He hoꞌo iŋa o Hura i a Ietū

¹⁰ A Hura Ikariote, he kope o roto o te hoꞌe ꞌahuru mā piti nuꞌu hāpī ꞌa Ietū, he oho he vānaŋa ki te nuꞌu oromatuꞌa ra-rahi mo vaꞌai e ia i a Ietū.

¹¹ I ŋaroꞌa era e rā nuꞌu i te vānaŋa ꞌa Hura, he koa rō atu ꞌai ꞌe he kī mo ꞌauhau e rāua hai moni. Pē ira a Hura i haꞌamata i uꞌi ai i te hora tano mo vaꞌai i a Ietū ki rā nuꞌu.

He kai iŋa hopeꞌa

¹² ꞌI te mahana raꞌe o te ŋoŋoro kai i te haraoa ꞌina he revaura, he mahana tiŋaꞌi i te māmoe mo te Pakate, he ꞌui e tāꞌana nuꞌu hāpī ki a Ietū: —¿ꞌI hē mātou ana aŋa i te tātou kai mo te Pakate?

¹³ He uŋa ia e Ietū e rua o tāꞌana nuꞌu hāpī: —Ka oho ki Hērutarema. ꞌI ira ka takeꞌa ena e kōrua i te taŋata e tahi e maꞌu rō ꞌā i te karo vai. He oho kōrua ꞌi tuꞌa.

¹⁴ ꞌE, a te kona ōꞌona ka uru era, he uru takoꞌa kōrua he kī ki te taŋata ōꞌona te hare: “Ko uŋa mai ꞌā e te Maꞌori mo ꞌui atu: ¿ꞌI piha hē ka kai ena a ia i te kai o te Pakate ananake ko tāꞌana nuꞌu hāpī?”.

¹⁵ Māꞌana e haka takeꞌa atu i te piha nui-nui o ruŋa ko haka riva-riva era ꞌā. ꞌI roto a kōrua ana aŋa i te tātou kai.

¹⁶ He eꞌa ia tū ŋā kope era he oho ki Hērutarema. I tuꞌu era he takeꞌa ko tano tahi ꞌā pē tū meꞌe kī era e Ietū, ꞌe he aŋa i tū kai era o te Pakate. I oti era he hoki ki muri i a kuā Ietū.

¹⁷ Ko ahi-ahi pō ꞌā i tuꞌu ai a Ietū ki rā hare ananake ko te hoꞌe ꞌahuru mā piti nuꞌu hāpī ꞌāꞌana.

¹⁸ E ka-kai nō ꞌā he kī e Ietū: —ꞌĪ a au he kī atu: e tahi o roto o kōrua e kai mai ena ꞌi muri i a au, nā he vaꞌai i a au ki te nuꞌu.

¹⁹ He māui-ui rō atu ꞌai te māhatu o tū nuꞌu era ꞌāꞌana, ꞌe he haꞌamata he ꞌui e tahi e tahi ki a Ietū: —¿Ko au hō nā meꞌe?

²⁰ He pāhono e Ietū: —He kope e tahi o roto o kōrua haka ruku takoꞌa i tāꞌana haraoa ꞌi roto i te mareti haka ruku ꞌāꞌaku.

²¹ Te meꞌe taꞌatoꞌa hāꞌaki ꞌi ruŋa i te ⌊Pāpaꞌi Moꞌa⌋ mo topa ki te ⌊Poki o te taŋata⌋ e ko taꞌe topa; ꞌe, ¡ko te ꞌaroha ꞌi te kope māꞌana e vaꞌai ki te nuꞌu! I hau ꞌi te riva mōꞌona ꞌāhani i taꞌe poreko.

²² E ka-kai nō ꞌā, he toꞌo e Ietū i te haraoa, he māuru-uru ki te ꞌAtua, he more-more ꞌe he tuhaꞌa ki tāꞌana nuꞌu hāpī he kī: «Ka kai kōrua i te haraoa ena; he hakari ōꞌoku».

²³ I oti era he toꞌo i te hapaina vino, he māuru-uru ki te ꞌAtua, he vaꞌai ki tū nuꞌu era ꞌe taꞌatoꞌa i unu ai.

²⁴ ꞌE he kī: «He toto nā ōꞌoku ka tehe ena mo te riva-riva o te taŋata; hai nā toto ka tāpaꞌo ena te ⌊haka tere iŋa ꞌāpī o te ꞌAtua ananake ko te taŋata⌋ ⌊haka moe i te manaꞌu⌋ ꞌi ruŋa i a au.

²⁵ ꞌĪ a au he kī atu: e ko unu haka ꞌou a au i te vino ꞌātā ki te mahana ka unu nei a au i te vino ꞌāpī ꞌi te ao haka tere e te ꞌAtua».

He haka rehu iŋa i a Ietū

²⁶ He hīmene ia ananake mo haꞌahana-hana ki te ꞌAtua. I oti era he eꞌa a kuā Ietū he oho ki te Maꞌuŋa o te ꞌŌrivo.

²⁷ ꞌI te ara he kī e Ietū: —A kōrua taꞌatoꞌa he haka rehu i a au ꞌi te pō nei. Pē ira, paꞌi, e hāꞌaki ena ꞌi ruŋa i te Pāpaꞌi Moꞌa ꞌi te vānaŋa kī e te ꞌAtua pē nei ē: “E tiŋaꞌi rō a au i te taŋata hāpaꞌo māmoe, ꞌe he maraŋa tahi tāꞌana māmoe”.

²⁸ »ꞌE, ka ai atu he topa pē ira, ki ora a au mai te mate, he piri a tātou ꞌi Karirea.

²⁹ He kī e Pētero: —Mo haka rehu i a koe e te nuꞌu taꞌatoꞌa ena, māꞌaku koe e taꞌe haka rehu.

³⁰ He kī e Ietū: —ꞌArīnā mau nei ꞌā ꞌi te pō, e ko ꞌoꞌoa hia te rua ꞌoꞌoa iŋa o te moa, ka kī rō ena koe ki te nuꞌu e toru kī iŋa kai ꞌite koe ko ai a au.

³¹ He kī haka ꞌou ia e Pētero: —¡Ka ai atu he mate a au ꞌi muri i a koe, e ko kī au, ki te hora hopeꞌa, kai ꞌite a au ko ai a koe! ꞌE ꞌai te tētahi nuꞌu hāpī ꞌa Ietū e kī takoꞌa atu era pē ira.

He pure iŋa o Ietū ꞌi Hetesēmānī

³² I oho era he tuꞌu a kuā Ietū ki te kona te ꞌīŋoa ko Hetesēmānī ꞌi te Maꞌuŋa era o te ꞌŌrivo. He kī ki te rahi raꞌa o tāꞌana nuꞌu hāpī: «Ka noho nō kōrua ꞌi nei; ꞌī a au he oho he pure».

³³ He maꞌu ia e Ietū ꞌi muri i a ia i a Pētero, i a ⌊Tanatiako⌋ ꞌe i a Iovani. E oho nō ꞌā ananake he oꞌo te riꞌa-riꞌa ki a Ietū ꞌi te manaꞌu ki te ꞌati ka topa era ki a ia ꞌe he ŋaroꞌa ꞌina ōꞌona haŋu toe mo ꞌamo i rā ꞌati.

³⁴ He kī ki tū ŋā kope era: «E rahi rō ꞌana te māui-ui ŋaroꞌa e au ꞌi roto i tōꞌoku māhatu ꞌi te ꞌati ka topa mai ena. Ka no-noho nō mai kōrua ꞌi nei; e uꞌi ꞌo hāꞌuru rō».

³⁵ He haka ꞌava-ꞌava a Ietū a muꞌa, he tū-turi, he noi ꞌātā ka puā rō te tira ki te ꞌōꞌone, ꞌe he ani ki te ꞌAtua mo taꞌe topa o tū ꞌati era.

³⁶ Pē nei i kī ai: «E Koro ōꞌoku ē, ꞌina e tahi meꞌe mo taꞌe ravaꞌa e koe. Ka toꞌo te ꞌati nei mai ruŋa i a au. ꞌE, ka ai atu pē nei tōꞌoku manaꞌu, ka haka tano koe hai meꞌe nō ena ꞌāꞌau i haŋa, ꞌe taꞌe hai meꞌe haŋa ꞌāꞌaku».

³⁷ He hoki ia ki tū kona era ꞌi ira a kuā Pētero, he uꞌi ko hāꞌuru ꞌana. He kī ki a Pētero: «E Tīmona, ¿e haꞌuru ꞌā a koe? ¿Kai ravaꞌa hia ka tahi hora ꞌe ko paŋahaꞌa ꞌā koe ꞌi te haꞌuru?

³⁸ E ꞌa-ꞌara e pure kōrua ꞌo hara. Nā ꞌi roto i a kōrua te haŋa mo aŋa i te meꞌe riva-riva, te ꞌino nō, he pūai kore o kōrua».

³⁹ He oho haka ꞌou a Ietū he pure pē tū hora raꞌe era.

⁴⁰ I hoki haka ꞌou era, ko hāꞌuru haka ꞌou ꞌā tū nuꞌu era ꞌi te rohi-rohi. I ꞌa-ꞌara era, ꞌina kai ꞌite he aha te meꞌe mo kī.

⁴¹ ꞌI te toru hoki iŋa o Ietū mai te pure iŋa, he kī ki tū nuꞌu era: «¿E hāꞌuru ꞌana a kōrua? ¿E haka ora ꞌā? Ka haka oti te kōrua rava haꞌuru. Ko tano ꞌā te hora o te Poki o te taŋata mo vaꞌai ki te rima o te nuꞌu hara.

⁴² Ka eꞌa ki ruŋa ki oho rō tātou. Nā ko hāhine mai ꞌā tū kope era mo vaꞌai i a au ki te rima o te nuꞌu ra-rahi».

He ꞌa-ꞌaru iŋa i a Ietū

⁴³ E vānaŋa nō ꞌā a Ietū ki tū nuꞌu era i tuꞌu rō ai a Hura, he kope o roto o te hoꞌe ꞌahuru mā piti nuꞌu hāpī ꞌāꞌana. ꞌI muri i oho takoꞌa ai meꞌe rahi taŋata e maꞌu-maꞌu rō ꞌā i te hoe ꞌe i te miro i uŋa e te nuꞌu oromatuꞌa ra-rahi, e te maꞌori o te haka tere hūrio ꞌe e te nuꞌu pūꞌoko haka tere hūrio.

⁴⁴ Ko haꞌaꞌau era ꞌana e Hura ki tū nuꞌu era pē nei ē: «Ka uꞌi atu ena kōrua i te kope ko hoŋi ꞌā e au, ko ia rā taŋata. Ka ꞌa-ꞌaru ka maꞌu ka oho; e uꞌi ꞌo tere rō».

⁴⁵ He haka hāhine a Hura ki a Ietū he kī: «¿Pē hē koe, e te Maꞌori ē?». ꞌE he hoŋi a te ꞌāriŋa.

⁴⁶ ꞌI tū hora ꞌā he ꞌa-ꞌaru e tū nuꞌu era i a Ietū.

⁴⁷ E tahi kope o roto o te nuꞌu ꞌa Ietū he kume i tāꞌana hoe, he paꞌo i te tariŋa o te tāvini o te oromatuꞌa hopeꞌa o te ra-rahi.

⁴⁸ He ꞌui ia e Ietū ki tū nuꞌu tuꞌu era: —¿He toke-toke ꞌō a au i oho mai ai kōrua e maꞌu-maꞌu rō ꞌana i te hoe ꞌe i te miro mo ꞌa-ꞌaru i a au?

⁴⁹ Paurō te mahana ꞌi muri i a kōrua e noho e hāpī era a au ꞌi te Kona Haꞌamuri ꞌAtua ꞌe ꞌina a kōrua kai ꞌa-ꞌaru i a au. I ai ai pē nei e haka tano ꞌā ki te meꞌe hāꞌaki ꞌi ruŋa i te Pāpaꞌi Moꞌa.

⁵⁰ ꞌI tū hora mau era ꞌā he hoa i a Ietū e tāꞌana nuꞌu hāpī he tē-tere.

⁵¹ He kope ꞌāpī mau nō e tahi i oho ꞌi tuꞌa e viri rō ꞌā i a ia hai tāvana. He moko e te nuꞌu he ꞌa-ꞌaru a te kahu.

⁵² He haka pakoꞌo e tū kope era i rā kahu ꞌe he eꞌa he tere ꞌina e tahi meꞌe uru.

Ko Ietū ꞌi muꞌa o te nuꞌu hūrio ra-rahi

⁵³ He maꞌu ia e tū nuꞌu era i a Ietū ki te hare o te oromatuꞌa hopeꞌa o te ra-rahi. He taka-taka ꞌi ira te nūnaꞌa taŋata taꞌatoꞌa i a rāua te kī iŋa hopeꞌa o te haka tere hūrio: he nuꞌu oromatuꞌa ra-rahi, he nuꞌu pūꞌoko haka tere hūrio, ꞌe he nuꞌu maꞌori o te haka tere hūrio.

⁵⁴ A Pētero ia e haka ꞌava-ꞌava rō ꞌā i a ia i oho ai ꞌi tuꞌa ꞌātā ka tuꞌu rō ki rā hare. He noho ꞌi haho he haka mahana i a ia ki te ahi ꞌi muri i te nuꞌu mūtoꞌi.

⁵⁵ Tū nūnaꞌa taŋata era i a rāua te kī iŋa hopeꞌa o te haka tere hūrio e uꞌi ꞌā i te ꞌōtohe mo haka ūtuꞌa i a Ietū hai mate ꞌe ꞌina kai ravaꞌa

⁵⁶ ꞌo te taꞌe ai e rua ꞌo e toru mataꞌite i kī ko tū meꞌe ꞌā, ki tano ai ki te rāua haka tere iŋa, ka ai atu nuꞌu rahi i mataꞌite hai reo-reo o ruŋa i a Ietū.

⁵⁷ He eꞌa ia tētahi nuꞌu ki ruŋa he reo-reo takoꞌa:

⁵⁸ «Ko ŋaroꞌa ꞌā e mātou te kī iŋa ōꞌona he haka hiŋa e ia i te ⌊Kona Haꞌamuri ꞌAtua⌋ aŋa e te taŋata ꞌe, ꞌi te toru mahana, ko haka tuꞌu haka ꞌou ꞌā e tahi taꞌe e aŋa e te taŋata».

⁵⁹ ꞌE, ka ai atu pē ira, te rāua meꞌe kī taꞌe ko tū meꞌe ꞌā.

⁶⁰ He māroa ia te oromatuꞌa hopeꞌa o te ra-rahi ꞌi vāeŋa o tū nuꞌu taꞌatoꞌa era he ꞌui ki a Ietū: —¿ꞌIna ꞌō aꞌa pāhono? ¿He aha te meꞌe e kī mai nei o ruŋa ōꞌou?

⁶¹ I mou nō a Ietū; ꞌina kai pāhono. He ꞌui haka ꞌou e tū oromatuꞌa hopeꞌa era o te ra-rahi: —¿He Kiritō koe, he Poki o te ꞌAtua?

⁶² He pāhono e Ietū: —ꞌĒ-ē, ko au. ꞌE a kōrua e takeꞌa rō i te Poki o te taŋata e noho rō ꞌana ꞌi te pāꞌiŋa mataꞌu o te ꞌAtua ꞌe i tōꞌona topa iŋa mai ꞌi ruŋa i te raŋi e tahi.

⁶³ I ŋaroꞌa era e rā oromatuꞌa i tū vānaŋa era ꞌa Ietū, he ihi i tōꞌona kahu mo haka takeꞌa i tōꞌona riri ꞌe he kī: —¿Mo aha nō o tātou te mataꞌite haka ꞌou?

⁶⁴ Nā ko ŋaroꞌa ꞌana e kōrua i te kī iŋa mai i te vānaŋa ꞌina he tano mo te ꞌAtua. ¿Pē hē te kōrua kī? Taꞌatoꞌa i kī ai ko hape ꞌā, ꞌe ka tiŋaꞌi ka haka mate.

⁶⁵ He haꞌamata ia e te tētahi nuꞌu he ꞌanu-ꞌanu ꞌi te ꞌāriŋa o Ietū. He puru i te mata he haka eke-eke hai rima koia ko kī: «¡Ka kī mai rā ꞌa ꞌai a koe i puꞌa atu!». ꞌE he haka eke-eke takoꞌa e te mūtoꞌi hai rima ki te ꞌāriŋa.

He kī iŋa o Pētero kai ꞌite a ia ko ai a Ietū

⁶⁶ E noho nō ꞌana a Pētero ꞌi haho o rā hare i tuꞌu ai te viꞌe tāvini e tahi o te oromatuꞌa hopeꞌa o te ra-rahi.

⁶⁷ I takeꞌa era i a Pētero e haka mahana ꞌā ꞌi muri i te ahi, he noho he uꞌi riva-riva ꞌe he kī: —Ē, a koe o roto i te nuꞌu oho ꞌi muri i a Ietū era o Nātāreta.

⁶⁸ He kī e Pētero: —ꞌIna a au kai ꞌite ko ai te kope ena, ꞌe kai ꞌite a au he aha taꞌa meꞌe e vānaŋa mai ena. He oho a Pētero ki muri i te ꞌōpani. He ꞌoꞌoa ia te reꞌo o te moa.

⁶⁹ I oho era he takeꞌa haka ꞌou e tū tāvini era i a Pētero ꞌe he kī ki te nuꞌu o ira: —Te kope era o rā nuꞌu.

⁷⁰ He ꞌina haka ꞌou e Pētero. Ko hini ꞌā he kī haka ꞌou e te nuꞌu o tū kona era: —He parautiꞌa, a koe o te nuꞌu oho ꞌi muri i a Ietū. O Karirea takoꞌa, paꞌi, koe.

⁷¹ He kī e Pētero ki rā nuꞌu: —He hōrea atu a au hai ꞌīŋoa o te ꞌAtua, kai ꞌite a au ko ai te taŋata ena, ꞌe ka hoa a au ki roto i te pōꞌauahi mo ai e reo-reo atu ꞌana a au.

⁷² He ꞌoꞌoa haka ꞌou ia te moa ꞌi rā hora, ꞌe he topa te manaꞌu o Pētero ki tū meꞌe kī era e Ietū: «E ko ꞌoꞌoa hia te rua ꞌoꞌoa iŋa o te moa ka kī ena e koe e toru kī iŋa kai ꞌite koe ko ai a au». ꞌE he toꞌo rō atu ꞌai te taŋi o Pētero.