Marko 11 - Rapa Nui

He tuꞌu iŋa o Ietū ki Hērutarema

¹ ꞌI te ara oho o kuā Ietū ki Hērutarema, i hāhine era ki Vetefāhē ꞌe ki Vētānia, he kona o muri i te Maꞌuŋa o te ꞌŌrivo, he uŋa e Ietū e rua o tāꞌana nuꞌu hāpī

² koia ko kī: «Ka oho kōrua ki te kona o muꞌa era ai. Nā ꞌi ira e tahi muni e here rō ꞌā, kai eke ꞌā e te taŋata. Ka kume, ꞌai ka maꞌu rō mai.

³ Mo ꞌui atu e te nuꞌu mo aha e kume ena, e kī: “O te mātou Pūꞌoko Haka Tere ko Ietū i kī mai, ꞌe e ko roa he haka hoki atu”».

⁴ He oho ia rā nuꞌu, he takeꞌa i tū muni era ꞌi te ara e here rō ꞌā ꞌi muri i te ꞌōpani e tahi ꞌe he kume.

⁵ I takeꞌa era e te nuꞌu o tū kona era, he ꞌui: «¿E aha ꞌā kōrua? ¿He aha rā kōrua i kume ai i te muni?».

⁶ He pāhono e tū nuꞌu hāpī era pa he meꞌe kī era e Ietū, ꞌe he haꞌatiꞌa e rā nuꞌu mo toꞌo.

⁷ He maꞌu he oho i tū muni era, he puꞌa hai kahu o rāua, ꞌe he eke a Ietū.

⁸ Meꞌe rahi te taŋata i hēriki i te rāua kahu ꞌi te ara a te kona ka vari era a Ietū, ꞌe tētahi i hore-hore hai raupā miro i hēriki ai.

⁹ Te nuꞌu taꞌatoꞌa oho ꞌi muꞌa ꞌe ꞌi tuꞌa ōꞌona ꞌai e ohu e oho era: «¡⌊Osana⌋!» «¡Taŋata haꞌamaitai e te ꞌAtua te taŋata oho mai nei hai ꞌīŋoa ōꞌona!»

¹⁰ «¡Ka haꞌamaitai te ꞌAtua i a ia, he hakaara o te tātou tupuna ko ⌊Tāvita⌋, oho mai mo haka tere i a tātou!» «¡Osana! ¡Ko te nui-nui i te ꞌAtua o te raŋi!».

¹¹ He uru ia a Ietū ki Hērutarema ꞌe he oho ki te Kona Haꞌamuri ꞌAtua. He uꞌi he oho ka vari tahi rō. I oti era he eꞌa he oho ki Vētānia ananake ko tāꞌana hoꞌe ꞌahuru mā piti nuꞌu hāpī ꞌo te ai ko ahi-ahi ꞌana.

Ko Ietū ꞌe he tumu pika e tahi

¹² ꞌI te rua mahana ꞌi te hora eꞌa mai Vētānia, he maruaki a Ietū.

¹³ Mai kōnui i takeꞌa ai i te tumu pika e ai rō ꞌā te raupā. He haka hāhine he uꞌi ana ai te pika o ruŋa, ꞌe ꞌina e tahi meꞌe i ravaꞌa. He raupā mau nō te meꞌe o ruŋa; taꞌe, paꞌi, he ꞌāvaꞌe o te pika.

¹⁴ He kī e Ietū ki tū tumu pika era: «¡ꞌIna e ko kai haka ꞌou te taŋata i te pika o ruŋa ōꞌou!». He ŋaroꞌa ia e tāꞌana nuꞌu hāpī.

He tū-tute iŋa o Ietū i te nuꞌu

¹⁵ I tuꞌu era ki Hērutarema, he uru a Ietū ki roto i te ⌊Kona Haꞌamuri ꞌAtua⌋ ꞌe he haꞌamata he tū-tute ki haho i te nuꞌu hoꞌo o roto. He toꞌo mai he huri i te ꞌamuramaꞌa taꞌatoꞌa o te nuꞌu taui moni, ꞌe pē ira takoꞌa ꞌā i te pepe o te nuꞌu hoꞌo pāroma,

¹⁶ ꞌe ꞌina he haꞌatiꞌa mo vari haka ꞌou o te nuꞌu a ira e tari rō ꞌana i te rāua meꞌe.

¹⁷ He haꞌamata ia a Ietū he hāpī: «Nā ꞌi ruŋa i te ⌊Pāpaꞌi Moꞌa⌋ e hāꞌaki ena te vānaŋa o te ꞌAtua pē nei ē: “Tōꞌoku hare e kī rō: ‘he hare mo pure mo te hau taꞌatoꞌa’”, ꞌe ko haka riro ꞌā e kōrua he ꞌana o te toke-toke».

¹⁸ I ŋaroꞌa era i te meꞌe nei e te nuꞌu ⌊oromatuꞌa ra-rahi⌋ ꞌe e te nuꞌu ⌊maꞌori o te haka tere hūrio⌋, he uꞌi i te rāveꞌa mo tiŋaꞌi mo haka mate i a Ietū. A rāua, paꞌi, e riꞌa-riꞌa rō ꞌana ꞌo te ai he haka roŋo te taŋata i te meꞌe hāpī e Ietū.

¹⁹ I pō era he eꞌa haka ꞌou a Ietū koia ko tāꞌana nuꞌu hāpī mai Hērutarema.

E haka moe te manaꞌu ꞌi ruŋa i te ꞌAtua

²⁰ ꞌI te pōꞌā o te rua mahana, he vari a kuā Ietū a muri i tū tumu pika era, he takeꞌa ko paka-paka tahi ꞌā ꞌātā ki te aka.

²¹ He manaꞌu a Pētero ki tū meꞌe kī era e Ietū, ꞌe he kī: —E te Maꞌori, ka uꞌi rā tū tumu pika tohu era e koe; ko paka-paka tahi ꞌā.

²² He kī e Ietū: —E haka moe te kōrua manaꞌu ꞌi ruŋa i te ꞌAtua.

²³ ꞌĪ a au he kī atu: te kope kī ki te maꞌuŋa nei: “¡Ka oho koe mai nā, ka rere ki roto i te vaikava!”, mo taꞌe ꞌaka-ꞌaka o rā kope ꞌe mo ⌊haka moe i te manaꞌu⌋ ꞌi ruŋa i te ꞌAtua he topa rā meꞌe kī era, pē ira mau ꞌā ka topa era.

²⁴ ꞌO ira ꞌī a au he kī atu: te meꞌe taꞌatoꞌa no-noꞌi e kōrua hai pure, e manaꞌu: nā ko ai ꞌā i a kōrua rā meꞌe ꞌe he vaꞌai atu.

²⁵ »Hora ena o kōrua e pure ꞌā, e haka rehu kōrua ꞌi raꞌe i te meꞌe taꞌe tano aŋa atu e te rua, ki haka kore ai e te Matuꞌa o te raŋi i te kōrua hara. [

²⁶ Mo taꞌe haka rehu o kōrua i te hape o te rua, pē ira takoꞌa ꞌā te Matuꞌa o te raŋi ka taꞌe haka rehu ena i te kōrua hara.]

¿ꞌA ꞌai i vaꞌai ki a Ietū i te parau mo aŋa i te meꞌe aŋa e ia?

²⁷ He tuꞌu haka ꞌou a kuā Ietū ki Hērutarema. E haꞌere nō ꞌana a Ietū ꞌi te Kona Haꞌamuri ꞌAtua, he haka hāhine te nuꞌu oromatuꞌa ra-rahi, te nuꞌu maꞌori o te haka tere hūrio ꞌe pē ira ꞌā te nuꞌu pūꞌoko haka tere hūrio.

²⁸ He ꞌui ki a Ietū: —¿ꞌA ꞌai i vaꞌai atu i te parau mo aŋa ōꞌou i te ŋā meꞌe ena e koe e aŋa ena?

^29-30 He kī e Ietū: —ꞌĪ a au he ꞌui takoꞌa atu: ¿ꞌA ꞌai i uŋa mai i a Iovani mo ⌊papatito⌋, o te ꞌAtua ꞌo o te taŋata? Mo pāhono mai o kōrua, he kī atu e au hai parau o ꞌai a au e aŋa nei.

³¹ He haꞌamata rā nuꞌu he tātake ki a rāua ꞌā e kī era: «Mo kī e tātou: o te ꞌAtua i uŋa mai, pē nei ka kī mai era: “¿He aha ia a kōrua i taꞌe haka roŋo ai i tāꞌana vānaŋa?”.

³² ꞌE, takoꞌa, e ko tano tātou mo kī: o te taŋata i uŋa mai». Rā nuꞌu ra-rahi era, paꞌi, e riꞌa-riꞌa rō ꞌā ꞌi te taŋata ꞌo te ai te nuꞌu taꞌatoꞌa e manaꞌu era he perofeta a Iovani.

³³ He pāhono ia ki a Ietū: —Kai ꞌite a mātou. He kī e Ietū: —ꞌIna takoꞌa ia a au e ko kī atu ꞌa ꞌai i vaꞌai mai i te parau mo aŋa i te meꞌe aŋa e au.